प्रेरित 2
2
पवित्र आत्मा राछ
1पेन्टीकोस डेच यहूदीकुङ चाड राहा र येशूकी विश्वास जाट्च पट्ट भर्मीको काठोव्हाङ न भेला छानन्या। 2होसबेला होला स्वर्ग लकीङ मोसोमायाङ बाड्को नाम्सु रान्हाङ लेखा काट आवाज राहा र होसे आवाजै होखुरीक ङुच इम न न्हेपा। 3होटै न्हुइङ म्हेओ मेलेट ल्याक्चको होखुरीक लेठाङ डाङा र होसे पट्ट मीटाक राहा। 4होखुरीक पट्ट जना पवित्र आत्मै न्हेपा र पवित्र आत्मै याछ बोली अनुसार होखुरीक अन्य भासाकोवाङ ङाक्की ठाला।
5संसार भरी लेच देशलकीङ परमेश्वरकी मन्डीच यहूदीको होसबेला यरूशलेमाङ राम्हन्या। 6याङ्च हल्ला सेयार भर्मीको राहा र होला बाड्को भीड भेला छाना। होसे भर्मीको छक्क पर्या, हीजैडेनाङ मेखुरीकुङ भासाकोवाङ ङाक्च होखुरीकै सेया। 7होखुरीक सार्है न अचम्म मन्डीचै डेया, “ही इसे ङाक्चको च पट्ट न गालीलीको माहाले र? 8कुटजाट्न इखुरीकै कानुङ भासाकोवाङ ङाक्च कानै सेमन ले? 9कानको च इला पार्ठी, माडी र एलामी, मेसोपोटामीया, यहूदिया, कापाडोकीया, पोन्टस र एसीयुङ बासीन्डाको ले। 10अनी फ्रिगिया, पामफीलीया, मिश्र र कुरेनीयाङ पर्च लीबीयुङ कुडीक क्षेत्रको र रोमलकीङ राछ, 11यहूदी र यहूदी मत मन्डीचको नीस न ले, केरेटुङ बासीन्डाको र अरबीको र ले। अनी होखुरीकै काल्हौ भासाकोवाङ परमेश्वरौ महान कामकुङ चर्चा जाट्च काल्है सेमन ले।”
12अनी होखुरीक पट्ट न छक्क पर्या र अल-मल्ल छानार काटै काट्की इट डेकी ठाला, “इच्यौ अर्थ ही हो?” 13टर कुडीक जनै चहीँ खीस्डीचै डेया, “इखुरीक च अङ्गुरौ मड्य गार म्होर्न ने।”
पत्रुसै भीडकी डेच
14टर पत्रुसै एघार जना प्रेरितको खाटा खडा छानार बाड्को सोरै होसे भर्मीकोलाक डेया, “ए यहूदीयुङ भर्मीको र यरूशलेमुङ पट्ट न बासीन्डाको, नाखुरीकै इसे कुरा वार्न्ही र ङौ कुरा सेनी। 15नाखुरीकै सोच्डीच लेखा इखुरीक माम्होर्ने हीजैडेनाङ चाहाँ गोराकुङ नौ बजे मट्टै छान्न ने। 16टर योएल अगमवक्तै ङाक्च कुरा इसे न हो,
17परमेश्वर डेले,
‘अन्टीम डीनकोवाङ याङ्च छान्ले, ङा पट्ट भर्मीको मीटाक ङौ आत्मा व्हाक्ङ याल्हे
अनी नाखुरीकुङ लेन्जा मीजाको र मास्टो मीजाकै अगमवाणी ङाक्ले
रेन्जा मीजाकै दर्शन डाङ्ले
र बुढा पाकाकै चहीँ माङ्नामाङ दर्शन डाङ्ले।
18हो, ङा ङौ सेवा जाट्चको मीटाक होसे डीनकोवाङ लेन्जा भर्मी र मास्टो भर्मीको मीटाक ङौ आत्मा व्हाक्ङ याल्हे।
अनी होखुरीकै अगमवाणी ङाक्ले।
19सर्घाङ ङा अचम्मौ चीन्हको टान्हाक्ले
र पृथ्वीयाङ ङा अचम्मौ कामको जाट्ले।
य्हु, म्हे र ढुवौ मुस्लो डाङ्ले।
20परमप्रभुओ महान र महीमामय डीन राखी डेनाङ अगाडी नाखान छुम्छ छान्ले,
र ग्याहोट य्हु ल्याक्च ग्याच छान्ले।
21होसबेला सुये परमप्रभुओ म्यार्मीन लाले होसे जीवाले।’#योएल २:२८-३२
22“इस्राएलुङ भर्मीको, इसे कुरा सेनी नासरतुङ येशूकी परमेश्वरै बीर्न्हकाच हो डेम होसकै जाट्च शक्तिशाली कामको र अचम्मौ चीन्हको लकीङ नाखुरीकुङ म्याहासाङ प्रमाणित जाट्ने। नाखुरीककी थाहा न ले परमेश्वरै नाखुरीकुङ मीघ्याङ इसे कामको होसको लकीङ जाट्च हो। 23परमेश्वरै ठहरीच निश्चित योजना चहीँ होसकोकी अगाडी लकीङ न थाहा लेया होसे अनुसार न येशूकी नाखुरीकुङ मीहुटाङ जीम्मा याहा। अनी नाखुरीकै होसकोकी अधर्मी भर्मीकुङ मीहुटाङ याहा र क्रूसाङ टङ्गडीयार साटा।
24“टर होसकोकी परमेश्वरै मृत्युओ कष्ट लकीङ छुटकारा याहार जीबीट खासा। हीजैडेनाङ मृत्युओ अधिनाङ होसको ङुम ङुकी असम्भव लेया। 25अनी दाउदै होसकुङ बारेयाङ डेले,
‘ङै प्रभुकी सधैँ ङौ म्याहासाङ डाङा,
हीजैडेनाङ ङा माबीर्हीख्यौ डेयार होसको ङौ डोर पट्टी ङुमने।
26होटबाटै ङौ मीमन आनन्दित छान्न ने र ङौ मेलेट मार्हाङ्ने।
अनी ङौ शरीर र आशाङ जीवाले।
27हीजैडेनाङ नाकै ङौ प्राणकी पाटलाङ माडास्ले
न ट नाकै लहो पवित्र जनौ शरीरकी घेरेल्की न याल्हे।
28नाकै ङाकी जीवनौ लामको टान्हाका।
अनी नाकै ङाकी लहो उपस्थितियाङ आनन्दये गड-गड खास्ले।’#भजनसंग्रह १६:८-११
29“ए भाइको, काल्हौ पुर्खा दाउदौ बारेयाङ ङा नाखुरीककी पक्काखाटा डेकी य्होक्ले। दाउद सीया र होसकी ठाका, अनी चाहाँ सम्म र होच्यौ चीहान लेमै ले। 30टर दाउद काट अगमवक्ता लेचबाटै र होचे वार्न्हन्या की परमेश्वरै प्रतिज्ञा जाट्च र होच्यौ न सन्टान लकीङ होसकी लेखान सिंहासनाङ काट जनाकी परमेश्वरै डाले। 31होटबाटै अघीलकीङ न इसे कुरा डाङार दाउदै मुक्ति याछ राजा ख्रीष्ट सीच लकीङ जीवाचओ बारेयाङ डेया, परमेश्वरै होसकोकी न ट पाटलाङ डास्ले न ट होसकुङ शरीर न घेरेल्की याल्हे।
32“अब इसे न येशूकी परमेश्वरै सीच लकीङ जीवाका र इसे कुरौ कान पट्ट जना साक्षी ले। 33परमेश्वर बोये येशूकी मान जाटार लहो डोर मीहुट पट्टी डा र लहे प्रतिज्ञा जाट्च अनुसार होसकोकी पवित्र आत्मा याहा। अनी होसे पवित्र आत्मा येशूये काल्हा मीटाक व्हाक्ङ याछ हो, होसे न कुराको नाखुरीकै चाहाँ डाङ्ङने र सेमने। 34दाउद च स्वर्गाङ मानुङा टर होचे मेल्है न डेले,
‘परमप्रभुये ङौ प्रभुकी डेया,
नाको ङौ डोर मीहुट पट्टी ङुनी
35जबसम्म ङा नाकुङ
सटुरकोलाक नाकुङ मीकु म्हकी मापार्ले।’#भजनसंग्रह ११०:१
36“होटबाटै इस्राएलुङ पट्ट न भर्मीकै इसे कुरा पक्का जाट्न वार्खी पर्ले। नाखुरीकै क्रूसाङ टङ्गडीच येशूकी न परमेश्वरै प्रभु र मुक्ति याछ ख्रीष्ट खासा।”
37पत्रुसौ इसे कुरा सेयार भर्मीकुङ मीमन छीया-छीया छाना। होटै पत्रुस र अरु प्रेरितकोलाक होखुरीकै गीना, “ए भाइको, अब कानै ही जाट्की?” 38टब पत्रुसै होखुरीककी डेया, “नाखुरीक पट्टकै जाट्च पापौ क्षमा डुप्कीयो लागी लाहा-लहे जाट्च पापको डासार परमेश्वर पट्टी ल्हेस्नी, अनी येशू मुक्ति याछ ख्रीष्टौ म्यार्मीनाङ नाखुरीक पट्टकै बप्तिस्मा लानी। होस न्हुइङ नाखुरीकै परमेश्वरौ वरदान पवित्र आत्मा डुप्ले। 39हीजैडेनाङ इसे प्रतिज्ञा नाखुरीक र नाखुरीकुङ सन्टानकुङ लागी र लो-लोस लेच पट्टकुङ लागी हो। इसे चहीँ पट्टकुङ लागी हो, सु-सुकी प्रभु कानुङ परमेश्वरै मेखोलै न आर्घाले।”
40अनी पत्रुसै होखुरीककी अरु धेरै कुराको लकीङ साक्षी याहा अनी इट डेयार अर्ती याहा, “इसे दुष्ट पुस्ता मीटाक राछ दण्डलकीङ नाखुरीकै लाहाकी जोगडीनी।” 41होटै सु-सुये पत्रुसौ शिक्षा विश्वास जाटा होखुरीकै चहीँ बप्तिस्मा ला र होस्नीक लगभग सोम हजार भर्मीको विश्वासीकुङ सङ्ख्याङ ठप्डीसा। 42होखुरीक प्रेरितकुङ शिक्षा, सङ्गटी, भोजाङ #२:४२ भोजाङ प्रभु भोज र भोज नीस न सङ्केट जाट्ले।र प्रार्थनाङ लगाटार लक्डीस्न न ङुमन्या।
प्रभु येशूकी विश्वास जाट्चकुङ रहनसहन
43होटै प्रेरितकै जाट्च अचम्मौ काम र चीन्हको डाङार पट्ट न भर्मीको छक्क पर्या। 44अनी विश्वास जाट्च जटी पट्ट जनाको सेन खाल काठोवाङ न भेला छान्नन्या र होखुरीकुङ पट्ट न ठोकको साझ्या लेया। 45होखुरीकै लहो सम्पत्ति र चीजबीजको आर्लार मेखुरीक मीघ्याङ सु-सुकी हीयो खाँचो पर्या होसे पट्ट कोलाक पुङ्ङ याम्हन्या। 46र डीन-डीनै होखुरीक परमेश्वरौ मन्दिराङ काठोव्हाङ जम्मा छानन्या, र मार्हाङ्छै खाटार इम-इमाङ भोज ज्यामन्या गामन्या। 47होखुरीकै सधैँ परमेश्वरौ प्रशंसा जाट्न्या र अरु भर्मीकै र होखुरीककी जाक्ङन्या। उड्डार डुप्चकोलाक प्रभुये डीन-डीनै होखुरीकुङ सङ्ख्याङ ठप्डीम याम्हनन्या।
Currently Selected:
प्रेरित 2: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
