प्रेरित 1
1
परमेश्वरै पवित्र आत्मा बीर्न्हकाले डेम प्रतिज्ञा जाट्च
1प्यारो ठीयोफीलस, येशूये काम जाट्की र पाहाक्की सुरु जाट्च पट्ट न कुराकुङ बारेयाङ ङै पहीला रीक्च कीताबाङ#१:१ लुकै रीक्च सेछ समाचार। (लुका १:१-४) ले। 2लहे भाक्च प्रेरितकोलाक येशूये पवित्र आत्मा लकीङ आज्ञा याम्ह भ्यारखीङ होसको स्वर्गाङ गाराङ्ङ आल्छ डीनसम्म पट्ट न कुरा होसे कीताबाङ रीक्ङने। 3लहो डुख भोग्डीम भ्यारखीङ वास्टै सत्य प्रमाणको लकीङ येशूये लाहाकी जीउँडै ले डेम टान्हाका। चालीस डीनसम्म होसको घरी-घरी होखुरीकुङ म्याहासाङ डाङा र परमेश्वरौ राज्यौ बारेयाङ होखुरीककी सेटाका।
4येशू होखुरीक खाटा ज्याकी ङुनाङ होसकै होखुरीककी याङ्च आज्ञा याहा, “नाखुरीक यरूशलेमीङ कुलाक र मानुङ्नी टर बोये पवित्र आत्मा बीर्न्हकाले डेयार जाट्च प्रतिज्ञाकी लेन्नी। इसे बारेयाङ ङै पहीला न डेम भ्यामने। 5युहन्नै च डीये बप्तिस्मा याहा टर अब कालाप डीनाङ पवित्र आत्माङ नाखुरीकुङ बप्तिस्मा छान्ले।”
येशू स्वर्गाङ नुङ्च
6जब प्रेरितको भेला छाना टब होखुरीकै येशूकी गीना, “ए प्रभु, ही नाकै इसे समयाङ न रोमीकुङ शासनीङ इस्राएल राज्यकी मुक्त जाटार फेरी खास्न याल्हे र?” 7टब येशूये होखुरीककी डेया, “बोये मेखोल्हौ अधिकार लकीङ टोक्डीच समयकी वार्छ नाखुरीकुङ काम होइन। 8टर पवित्र आत्मा नाखुरीक लेठाङ रार्हखीङ नाखुरीकै शक्ति डुप्ले। होटै नाखुरीक यरूशलेमाङ, पट्ट यहूदियाङ, सामरीयाङ र पृथ्वीयुङ अन्टीम छेउसम्म ङौ साक्षी छान्ले।”
9येशूये इसे कुरा डेम भ्यारखीङ होखुरीकै ङोस्नाङ-ङोस्नाङ न होसकोकी ढेम्लाक गाराङ्ङ आल्हा र डेबुवाङ होसको होखुरीकुङ मीमीकीङ म्हाटा।
10प्रेरितकै होसको नुङ्चै जाट्च सर्घा पट्टी ङोस्न ङुमन्या, होडीक न बेला मोसोमायाङ बोच बढीन बील्छ नीस जना भर्मी होखुरीक छीनी टोङ्हा। 11होखुरीकै डेया, “ए गालीलुङ भर्मीको, नाखुरीक हीजै सर्घालाक ङोस्चै टोङ्ह ङुच? कुटजाट्न चाहाँ येशू नाखुरीकुङ मीघीङ स्वर्गाङ गाराङ्ङ आल्छ डाङा, होटजाट्न न होसको फेरी राल्हे।”
यहूदासौ ठावाङ अर्को चेला चुन्डीच
12होटै प्रेरितको जैटुन डाँडा डासार यरूशलेमाङ ल्हेसा। यरूशलेम लकीङ इसे डाँडा ओल माओल काट कीलो मीटर टडीक लोस पर्ले। 13अनी होखुरीक यरूशलेम टार्हखीङ लाहा ङुचै जाट्च इमौ ढेम्च टलौ कोठाङ पर्या। होखुरीक पत्रुस, युहन्ना, याकुब, अन्द्रियास, फीलीप र थोमा, बारथोलोमाइ र मत्ती, अल्फयसौ मीजा याकुब र देशभक्त दलुङ सीमोन र याकुबौ मीजा यहूदा लेया। 14कुडीक जना मास्टो भर्मीको र येशूओ मोइ मरीयम र होसकुङ भाइको खाटा इखुरीक पट्ट न काट मीमनौ छानार सधैँ प्रार्थना जाट्नन्या।
15होसबेला विश्वास जाट्चकुङ मीघ्याङ पत्रुस टोङ्हा (होला भर्मीकुङ सङ्ख्या ओल माओल काट सय बीस जना लेया) र डेया, 16“ए भाइको, धर्मशास्त्रओ बचन ओल्खी पर्च लेया। कुसे बचन येशूकी घोचकुङ अगुवा यहूदासौ बारेयाङ दाउदौ मेङेरीङ अगाडी लकीङ न पवित्र आत्मै ङाक्ङन्या। 17यहूदास र कान खाटा न हील्नन्या र इसे सेवाङ होचे र भाग डुप्मन्या।”
18होसे भर्मीये येशूकी ढोका याहार कमडीच पैसै काट बारी लोवा। अनी होसे होला न टुरुङ्क्याक छानार कुरुव्हार सीया। होच्यौ मीटुक भाटा र पट्ट न मेखे ख्योव्हा। 19इसे कुरा यरूशलेमुङ बासीन्डाकोलाक पट्टकी थाहा छाना। होटै होसे बारीयो म्यार्मीन होखुरीकै लहो भासाङ “आखेल्दामा” डा, होच्यौ अर्थ हो य्हुओ बारी।
20अनी पत्रुसै डेया, “हीजैडेनाङ भजनसंग्रहौ कीताबाङ याङ्च रीक्ने,
‘होच्यौ इम उजाडीस्ख्यौ,
होला बास ङुच सुर माछान्ख्यौ।’#भजनसंग्रह ६९:२५
“होला याङ्च र रीक्ने,
‘र होचे जाट्च कामौ जीम्मा अरुकै न लाख्यौ।’#भजनसंग्रह १०९:८
21-22“होटबाटै कानखाटा लेच भर्मीको मढ्याङ कानै याङ्च काट जनाकी चुन्डीकी पर्ले। होसे भर्मी प्रभु येशू कानुङ मीघ्याङ व्हानाङ ङुनाङ सधैँ कानखाटा लेया, र होसे भर्मी युहन्नै बप्तिस्मा याछ समयलकीङ लार येशू कानुङ मीघीङ स्वर्गाङ गाराङ्ङ आल्छ डीन सम्म कानखाटा लेया, होसे भर्मी न होसकुङ साक्षी छान्की पर्ले।”
23होटबाटै होखुरीकै नीस जनाकी भर्मीकुङ म्याहासाङ राका। काट जना चहीँ बारसाबास डेच योसेफ लेया, होसकी युस्टस डेमन्या र अर्को चहीँ मटीयास लेया। 24अनी होखुरीकै इट डेयार प्रार्थना जाटा, “पट्ट भर्मीकुङ मीमनुङ कुरा वार्छ प्रभु, इसे नीस जना मढ्याङ प्रेरित छानार सेवा जाट्की नाकै सुकी चुन्डीमे होसे कुरा कानकी टान्हाक्ङ यान्ही, 25र होसे चहीँ यहूदासौ ठावाङ राखी य्होख्यो, कुसे सेवालकीङ यहूदास भड्कडीसार नुङा र मेन न ठावाङ सीया।” 26होटै होखुरीकै होसे नीस जनौ म्यार्मीनाङ चीट्ठा का। होसे चीट्ठा मटीयासौ म्यार्मीनाङ पर्या र एघार जना प्रेरितको खाटा होसकी हीला।
Currently Selected:
प्रेरित 1: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
