সখরিয় 7

উবোস্ থানা পৌইদ্যেনে প্রশ্ন আর উত্তর

1রাজা দারিয়াবসর্ রাজাগিরির চের্ বজরর্ কিষ্‌লেব নাঙে নয় মাসর্ চের্ দিনোত্ লগেপ্রভুর কধাগান সখরিয় ইধু ফগদাং অলঅ। 2সে অক্তত্ লগেপ্রভুর আশিদ্‌বাদ চেবাত্তে বৈথেলর মানুচ্চুনে শরেৎসররে, রেগম্মেলকরে আর তারা মানুচ্চুনোরে পাধেই দিলো। 3তারা বেগত্তুন্ খেমতাবলা লগেপ্রভু ঘরর্ ধর্মগুরুগুনোরে আর ভাববাদীগুনোরে এ কধাগান পুযোর্ গুরিবাত্তে পাদেল, “আমি এদক্ বজর্ যেবাবোত্যেগুরি এচ্চ্যেই সেবাবোত্যে কি পাচ্ মাসত্ আবিলেচ্ গুরিবোং বা উবোস্ থেবং?”

4সেক্কে বেগত্তুন্ খেমতাবলা লগেপ্রভু মরে কলঅ, 5“তুই দেজর্ বেক মানুচ্চুনোরে আর ধর্মগুরুগুনোরে কঅ, ‘তুমি গত সত্তুর্ বজর সং পাচ্ আর সাত মাসত্ যে আবিলেচ্ গরর্ আর উবোস্ থর্ সিয়েনি লগেপ্রভুর নাঙে ন-গরঅ। 6আর যেক্কেনে তুমি হানা-দানা গোজ্য সেক্কে সিয়েন নিজোত্তে গোজ্য। 7যেক্কে যিরূশালেম আর তার কায়কুরে শঅরানিত্ মানুচ্ বজত্তি গত্তন্ আর সিয়েনির অবস্থাগান্ ভালেদি অর্ আর নেগেভ আহ্ পোজিমেদি তলে মুড়ো চাগালাত্ মানুচ্চুনোর্ বজত্তি এলঅ সেক্কেয়ো লগেপ্রভু এই বেক্ কধানি পুরোণি ভাববাদীগুনোর মাধ্যমে কোইয়্যে।’ ”

8-9লগেপ্রভু আরঅ মরে কলঅ, মুই বেগত্তুন্ খেমতাবলা লগেপ্রভু তারারে ইয়েন্‌অ কোইয়োং, তুমি গমেডালে বিচের্ গরঅ; একজন আর একজন ইধু বিশ্বেজি অ আর মেয়্যে-দোয়্যে বেবহার গরঅ। 10তুমি রানিমিলে, মা-বাপ নেইয়্যে, বিদেশী আর নাঢা মানুচ্চুনো উগুরে অত্যেচার ন-গোজ্য; মনে মনে এক আর একজন বিরুদ্ধে কুজুরোমি ন-গোজ্য।

11“মাত্তর্ তারা সিয়েনি শুনিবাত্তে ন-চান্; একবুস্যে গুরি তারা পিজেদি ফিরিনে তারার্ কানানি নাঢি রাগেয়োন। 12তারা তারার্ মনানি পাত্তর ধোক্ক্যেন দরমর গোজ্যন্ আর রীদি-সুদোম ন-মানন্। মুই বেগত্তুন্ খেমতাবলা লগেপ্রভু মঅ আত্মাগান্দোই পুরোণি ভাববাদীগুনোর মাধ্যমে যে কধানি পাদেয়োং সিয়েনিয়ো তারা ন-শুনোন্। সেনত্তে মর্ অমকদ রাগ্‌‌কান জুলি উঠ্যে। 13মুই ডাগিলে তারা ন-শুনোন্, সেনত্তে তারা ডাগিলে মুই বেগত্তুন্ খেমতাবলা গোজেন লগেপ্রভু ন-শুনোং। 14মুই নচিন্যে জাদ ভিদিরে তারারে ছিদিই দুয়োং। ইয়েনর্ পরেদি তারা দেজ্‌‌চান এমন মানুচ্ নেইয়্যে ওই পোজ্যন, সিয়েনত্ কনজনে যানা-এযানা ন-গুরিদাক্। এবাবোত্যেগুরি তারা সেই দোল্ দেজ্‌‌চানরে মানুচ্ নেইয়্যে গোজ্যন্।”

Currently Selected:

সখরিয় 7: CBT

Highlight

Copy