সখরিয় 8
8
যিরূশালেমরে আশিদ্বাদ গুরিবাত্যে এগেম্ গরানা
1-2যেরেদি বেগত্তুন্ খেমতাবলা লগেপ্রভুর কধাগান ফগদাং অলঅ। তে কলঅ, সিয়োনত্তে মঅ মনানত্ অমকদ জ্বালা আঘে; মুই তাত্তে আবেগে অমকদ বুগ্ পুড়ের্। 3মুই সিয়োনত্ ফিরি যেইনে যিরূশালেমত্ বজত্তি গুরিম। সেক্কে যিরূশালেমানরে সত্যর শঅর্ আর বেগত্তুন্ খেমতাবলা লগেপ্রভুর মুড়োবোরে সুদ্ধো-সাংগ মুড়ো কুয়ো অবঅ। 4যগাজ্যে বয়জর্ মরদ্ আর মিলেগুনে আরঅ যিরূশালেমর খুলো জাগাত্ বোইনে সময় কাদেবাক্ আর বেশ্ বয়জ্ অনার কারনে তারার্ পত্তিজন আঢত্ লুদিক্ থেবঅ। 5শঅরর্ নানান্ বাবোত্যে খুলো জাগাত্ বোউত্ ঝি-পুয়ো খেলা গুরিবাক্। 6ইয়েনি যে ঘুদিবো সিয়েনি এ জাদর্ বাঁজি থেইয়্যে মানুচ্চুনো ইধু অসম্ভব বিলি মনে ওই পারে, মাত্তর্ মইদু সিয়েনি অসম্ভব নয়। মুই বেগত্তুন্ খেমতাবলা লগেপ্রভু এ কধাগান কঙর্। 7মুই আরঅ কঙর্, পূগেদি আর পোজিমেত্তুন্ মুই মঅ মানুচ্চুনোরে উদ্ধোর্ গুরিম। 8যিরূশালেমত্ বজত্তি গুরিবাত্তে মুই তারারে ফিরেই আনিম। তারা মঅ মানুচ্ অবাক্ আর মুই তারার্ গোজেন ওম্; মুই তারা উগুরে বিশ্বেজি আর ন্যায়বান থেইম্।
9মুই বেগত্তুন্ খেমতাবলা লগেপ্রভু কঙর্, মঅ ঘরান্ বানেবাত্তে খুদো গারেবার্ সময় ভাববাদীগুনে সেই বেক্ কধানি কোইয়োন, আর ইক্কিনে তুমি সেই একই কধা শুনোর্; সেনত্তে তুমি দরমর অ। 10সেই কামান্ আরাম্ভ গুরিবার আগে কনজনে মান্জ্যর বেতন বা য়েমান ভাড়া দি ন-পারিদাক্, কিত্যে মুয়ই পত্তি জনরে তার পাড়াল্যেগুনো বিরুদ্ধে উচ্চোমি দুয়োং। 11মাত্তর্ ইক্কিনে মুই এ জাদর্ বাঁজি থেইয়্যে মানুচ্চুনো লগে আগ ধোক্ক্যেন বেবহার ন-গুরিম। 12ইক্কিনে বীজিত্তুন্ গাজ্ গমেডালে বাড়ি উদিবো, আংগুরো লুদিত্ ফল ধুরিবাক্, মাদিত্ খেত্-খেত্তি জোর্মেবাক্ আর আগাজত্তুন্ শিরোপানি পুরিবো। এই জাদর্ বাঁজি থেইয়্যে মানুচ্চুনে মর্ দিয়্যে অধিকার ইজেবে ইয়েনি বেক্কানি পেবাক্। 13ও যিহূদা আর ইস্রায়েল, বেক্ জাদর্ মানুচ্চুনে আগে তমা নাঙানি অভিশাব্ ইজেবে বেবহার গুরিদাক্, মাত্তর্ ইক্কিনে মুই তমারে উদ্ধোর্ গুরিম আর তারা তমা নাঙানি আশিদ্বাদ ইজেবে বেবহার গুরিবাক্। তুমি ন-দোরেয়ো, বরং দরমর অ।
14“মুই বেগত্তুন্ খেমতাবলা লগেপ্রভু কঙর্, তমা পূরোণি মানুচ্চুনে যেক্কে মরে অহুজি গোজ্যন্ সেক্কে মুই তারা উগুরে দযা আনিম্ বিলি ঠিগ্ গোজ্যং আর সিয়েন ঘোদেয়োংঅ। 15মাত্তর্ ইক্কিনে মুই আরঅ যিরূশালেম আর যিহূদার ভালেদি গুরিম বিলি ঠিগ্ গোজ্যং। তুমি ন-দোরেয়ো। 16এই বেক্ উগুমানি তমাত্তুন্ মানা পুরিবো-তুমি একজন আর একজন ইধু সত্য কধা কবা আর তমা আদালদত্ ন্যায়বিচের্ গুরিবাক্ যেনে মানুচ্চুনো ইধু শান্তি অয়; 17তুমি কারঅ বিরুদ্ধে কুজুরোমী ন-গুরিবা আর মিজে সাক্ষি ন-দিবা। মুই লগেপ্রভু ইয়েনি বেক্কানি ঈচ্ গরং।”
18বেগত্তুন্ খেমতাবলা লগেপ্রভু আরঅ মরে কলঅ, 19চের্, পাচ্, সাত্ আর দশ মাজর্ উবোস্ থানা যিহূদাত্তে ফুত্তি গরানার্, হুজির্ আর ভালেদির পরব্ ওই উদিবো। সেনত্তে তুমি সত্য আর শান্তিগানরে কোচ্পেবা।
20“এমন সময় এবঅ যেক্কে বোউত্ জাদে আর বোউত্ শঅর আদাম্মেগুনে যিরূশালেমত্ এবাক্; 21এক শঅরর্ আদাম্মেগুনে অন্য শঅরত্ যেইনে কবাক্, ‘বেগত্তুন্ খেমতাবলা লগেপ্রভুর আশীদ্বাদ চেবাত্তে আর উবোসনা গুরিবাত্তে আঢঅ, আমি ইক্কিনে যেই।’ সেক্কেনে ভালোক্ জনে কবাক্, ‘মুইয়ো যেইম্।’ 22মর্ উবোসনা গুরিবাত্তে আর মর্ আশীদ্বাদ চেবাত্তে বোউত্ মান্জ্যে আর খেমতাবলা জাদত্তুন্ যিরূশালেমত্ এবাক্। 23সেই সময়োত্ নানান্ ভাষা আর জাদর্ দশজন মান্জ্যে এক্কো যিহূদীর কাবড় কাজাত্ ধুরিনে কবাক্, ‘আঢ, আমি তমা লগে যেই, কিত্যে আমি শুন্যেইদে যে, গোজেনে তমা লগে আঘে।’ মুই বেগত্তুন্ খেমতাবলা লগেপ্রভু এ কধাগান কঙর্।”
Currently Selected:
সখরিয় 8: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
