সখরিয় 11
11
1ও লেবানন, তর্ দোরানি খুলি দে, যেনে আগুনানে তর্ এরস গাজ্চুন গজক্ গুরি পারে। 2ও বেরস গাজ্সো আবিলেচ্ গর্, কিত্যেই এরস গাজ্সো পড়ি যেইয়্যে। সেরা গাজ্চুন ভস্ত ওই যেইয়োন্। ও বাশনর এলোন গাজ্, তুমি আবিলেচ্ গরঅ, কিত্যে গভীন্ ঝারর্ বেক গাজ্চুন কাবি ফেলা ওইয়্যে। 3ভেড়া গরগ্কুনোর আবিলেচ্ শুনো; তারার্ গম্ গম্ চড়াইদ্যে বামানি বর্বাত্ ওই যেইয়্যে। সিংহগুনোর গুজুরোনি শুনো; যর্দনর ঝারানি ভস্ত ওই যেইয়্যে।
দ্বিজন গরগ্
4মর্ গোজেন লগেপ্রভু কত্তে, “ঢালি দিবাত্তে যে ভেড়াপাল্লো ঠিগ্ ওই আঘে তুই সেই পাল্লোরে চরা। 5যিগুনে তারারে কিনি নেযান্ তারা তারারে কাবন্ মাত্তর্ নিজোরে দুষি মনে ন-গরন। যিগুনে তারারে বেজন্ তারা কন্, ‘লগেপ্রভুর বাঈনী ওক্, মুই তাগোয়্যে ওইয়োং।’ তারার্ গরগ্কুনে তারা উগুরে দোয়্যে ন-গরন। 6দেজ মানুচ্চুনো উগুরে মুই আর দোয়্যে ন-গুরিম; মুই পত্তিজনরে তার পাড়াল্যে আর রাজা আঢত্ তুলি দিম। তারা দেজ্চানরে ভস্ত গুরিবাক্ আর তারা আঢত্তুন্ মুই কাররে উদ্ধোর্ ন-গুরিম।”
7কাবিবাত্তে যে ভেড়া পাল্লো ঠিগ্ ওই আঘে, বিশেজ্ গুরিনে সেই পালর দুঘ্ পেইয়্যেগুনোরে মুই চরা ধুরিলুং। সে পরেদি মুই দ্বিবে লুদিক্ নিলুং আর সিগুনোর এক্কোর্ নাঙ্ দিলুং দোয়্যে আর অন্যবোর্ নাঙান্ দিলুং মিজেনা; আর মুই সেই ভেড়া পাল্লো চরা ধুরিলুং। 8এক মাস ভিদিরে মুই তিনজন গরগরে দূর্ গুরি দিলুং। পরেদি সেই পাল্লো মরে ঈস্ গরা ধুরিলো আর মুইয়ো তারারে নিইনে বল্পোজ্যে ওই পুড়িলুং। 9মুই কলুং, “মুই তমার গরগ্ ন-ওম্। যিবের্ মুরিবার কধা আঘে তে মোরোক্ আর যিবের্ দূর্ ওই যেবার কধা আঘে তে দূর্ ওই যোক্। বাদবাগীগুনে একজনে আর একজনর য়েরা খোক্।”
10সে পরেদি মুই দোয়্যে নাঙে সেই লুদিক্কো নিইনে ভাঙি ফেলেইনে বেক জাদ্তুনো লগে মর্ যে চুক্তি এলঅ সিবে বাতিল গুরিলুং। 11সেদিন্যে সিবে বাতিল অলঅ, সেনত্তে পালর্ দুঘ্ পেইয়্যেগুনে যিগুনে মরে খিয়েল্ গোজ্যন্ তারা হবর্ পেলাক্, ইয়েনির মাধ্যমে লগেপ্রভু কধা কোইয়্যে।
12মুই তারারে কলুং, “তুমি যুনি গম্ মনে গরঅ সালে মঅ বেতনুন্ দুয়ো; মাত্তর্ যুনি গম্ মনে ন-গরঅ সালে সিগুন থোই দুয়ো।” সেক্কে তারা মরে ত্রিশছো রূবোর্ কট্টা দিলাক্।
13সেক্কে লগেপ্রভু মরে কলঅ, “আহ্, কি সেই দামান্ যিয়েন তারা মর্ মূল্য ইজেবে ঠিগ্ গোজ্যন! সিগুন কুমোর ইধু ফেলেই দুয়ো।” সে পরেদি মুই সেই ত্রিশছো রূবোর্ কট্টা নিইনে লগেপ্রভুর ঘরত্ কুমোর ইধু ফেলেই দিলুং।
14পরেদি মুই একযদা নাঙে সেই দ্বিলম্বর লুদিক্কো ভাঙিনে যিহূদা আর ইস্রায়েল ভিদিরে ভেইয়োর যে কুদুম্মোগান্ এলঅ সিয়েন বর্বাত্ গুরিলুং।
15সেক্কে লগেপ্রভু মরে কলঅ, এবেরা তুই আরঅ এক্কো বাজে গরগর্ পযাপিরা নেযা। 16দেজ উগুরে মুই এমন এক্কো গরগরে তুলিম যে দজাত্ পোজ্যে মানুচ্চুনোরে দেগাশুনো ন-গুরিবো, যিগুনে ছিদি পোজ্যন্ তারারে ন-তোগেব, যিগুনে আঘাত্ পেইয়োন তারারে গম্ ন-গুরিবো, পক্তামক্তাগুনোরে ন-খাবেব; মাত্তর্ তে বেঈ লোইয়্যে ভেড়াগুনোর য়েরানি হেবঅ আর তারার্ খুরত্তুন্অ য়েরানি ছিনি ছিনি হেবঅ।
17“অভিশাব্ পোড়োক্, সেই অপদাত্ত গরগ্কোর, যে সেই পাল্লো ছাড়িনে যায়! লাম্বা ছুরিগানে যেন তা আঢ্তানরে আর ডেন্ চোগ্কোরে আঘাত গরে। সেক্কে তা আঢ্তান এক্কুবারে শুগেই যেবঅ আর তা ডেন্ চোগ্কো এক্কুবারে কান্ ওই যেবঅ।”
Currently Selected:
সখরিয় 11: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
