সখরিয় 10
10
লগেপ্রভু যিহূদার যত্তন্ নিবো
1বসন্তকালত্ ঝড় দিবাত্তে তুমি লগেপ্রভুরে কঅ; তেয়ই ঝড়র্ মেঘ বানায়। তে মানুচ্চুনোরে ঝড় দান গরে আর বেক্কুনো খেদত্ ফসল জর্মায়। 2মূত্তিগুনে ছলনার কধা কন্, গোণোক্ক্যেগুনে মিজে দর্শন দেগান; তারা যে স্ববনর কধাগান কন্ সিয়েন মিজে, আর তারা মিজে সান্তনা দুয়োন। সেনত্তে মানুচ্চুনে অত্যেচারিত্ ওইনে ভেড়া ধোক্ক্যেন ঘুরি বেড়ান্, কিত্যে তারার্ গরক্ নেই।
3লগেপ্রভু কত্তে, গরক্কুনো বিরুদ্ধে মঅ রাগ্কান জুলি উদের্, সেনত্তে মুই নেতাগুনোরে সাজা দিম। মুই বেগত্তুন্ খেমতাবলা লগেপ্রভু নিজো পালর্, অত্তাৎ যিহূদার মানুচ্চুনোরে দেগাশুনো গুরিম আর যুদ্ধোর্ বোলী ঘোড়া ধোক্ক্যেন গুরি তুলিম। 4যিহূদাত্তুন্ কুণো পাত্তর্, তাম্বুলোর্ খুদো, যুদ্ধোর ধনু আর বেক্ শাজন্ গুরিয়্যেগুন এবাক্। 5সেক্কে যিহূদার মানুচ্চুনে এমন বোলী মান্জ্য ধোক্ক্যেন অবাক্ যিগুনে যুদ্ধোত্ গাড়া-যেয়্যে পধত্ শত্রুগুনোরে টেঙোই মাড়ন। মুই তারা সমারে টেইম্ বিলিনে তারা যুদ্ধো গুরিনে ঘোড়া চালেয়্যেগুনোরে ওদেই দিবাক্।
6“মুই যিহূদার মানুচ্চুনোরে বোলী বানেম্ আর যোষেফর, অত্তাৎ ইস্রায়েলর মানুচ্চুনোরে উদ্ধোর গুরিম। মুই তারারে ফিরেই আনিম, কিত্যেই তারা উগুরে মর্ দোয়্যে-মেয়্যে আঘে। সেক্কে তারা এমন অবাক্ যেন মুই তারারে এলাফেলা ন-গরং, কিত্যেই মুই তারার গোজেন লগেপ্রভু; মুই তারার্ ডাগনিলোই শমক্ দিম। 7ইফ্রয়িমীয়গুনে বোলী মান্জ্য ধোক্ক্যেন অবাক্, আংগুর-রস খাইদ্যে ধোক্ক্যেন তারার মনানি হুজি অবঅ। সিয়েনি দেগিনে তারার্ পুয়ো-ছাগুনে হুজি অবাক্; তারার্ মনানি মরে নিইনে ফুত্তি গুরিবাক্। 8মুই তারারে শিক্ কারিনে ডাগিম্ আর এক সমারে এগত্তর্ গুরিম। মুই তারারে উদ্ধোর্ গুরিম বিলিনে তারা আগ ধোক্ক্যেন জনেদি বোউত্ অবাক্। 9যুনিয়ো নানান্ জাদ ভিদিরে মুই তারারে ছিদি দুয়োং তো দূর দেজত্তুন্ তারা মরে ইদোত্ রাগেবাক্। তারা আর তারার্ পুয়ো-ছাগুনে বাঁজি থেবাক্ আর তারা ফিরি এবাক্। 10মিসর দেজত্তুন্ মুই তারারে ফিরেই আনিম্, আসিরিয়াত্তুন্ তারারে এগত্তর্ গুরিম। গিলিয়দ আর লেবাননত্ মুই তারারে আনিম আর এদক্ মানুচ্ অবাক্কে যে, সিয়েনত্ তারার্ জাগা ন-কুলেব। 11মুই দুঘো-সাগরর ভিদিরেদি যেম্ আর সাগরর তুবোলানরে দোঙেম্ আর সেক্কে য়্যেল্ গাঙর্ বেক গভীন্ জাগায়ানি শুগেই যেবঅ। আসিরিয়ার অহংকার ভাঙি দিয়্যে অবঅ আর মিসরর রাজলুদিক্কো দূর্ ওই যেবঅ। 12মর্ খেমতালোই মুই তারারে বোলী গুরিম আর মর্ আওজ্ মজিম তারা আদাউদো গুরিবাক্। মুই লগেপ্রভু এ কধাগান কঙর্।”
Currently Selected:
সখরিয় 10: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
