সখরিয় 12
12
যিরূশালেমর শত্রুগুনোর্ ভস্ত অনা
1ইবে অলঅ ইস্রায়েল পৌইদ্যেনে লগেপ্রভুর্ কধা। লগেপ্রভু, যিবে আগাজ্চানরে মিলি দিয়্যে, যিবে পিত্থিমীর গোড়াগানরে থিদেবর্ গোজ্যে, যিবে মান্জ্য ভিদিরে আত্মা বানেই দিয়্যে, তে কোইয়্যেদে, 2মুই যিরূশালেমানরে এমন এক্কো মদ পিলে বানেম্ যিবেত্তুন্ হেইনে কায়-কুরে বেক্ জাদ্তুনে ঢুলিবাক্। যিরূশালেম সমারে যিহূদার অন্য শঅরানিরেয়ো ঘিরে অবঅ। 3সেদিন্যে যেক্কে বেক্ জাদে যিরূশালেম বিরুদ্ধে এগত্তর্ অবাক্ সেক্কে মুই তারে বেক্ জাদ্তুনোত্তে এক্কো গুয়োর্ পাত্তর ধোক্ক্যেন্ গুরিম। যিগুনে সেই পাত্তর্বোরে তুলিবাত্তে চেট্ট্যা গুরিবাক্ তারা নিজে আঘাত্ পেবাক্। 4সেদিন্যে মুই পত্তি ঘোড়ারে দর্বুক্ লাগেম্ আর ঘোড়াচালেয়্যেগুনোরে পাগল বানেম। যিহূদার মানুচ্চুনো উগুরে মুই উজিয়ার গুরি নজর্ রাগেম্, মাত্তর্ অন্য জাদ্তুনোর বেক ঘোড়াগুনোরে চোগ্কান্ গুরি দিম। 5সেক্কে যিহূদার নেতাগুনে মনে মনে কবাক্, যিরূশালেম মানুচ্চুন আমার্ বল্, কিত্যেই বেগত্তুন্ খেমতাবলা লগেপ্রভু তারার্ গোজেন।
6সেদিন্যে যিহূদার নেতাগুনোরে মুই দার্বো কুড়ো ভিদিরে জ্বোল্জোল্যে আঙারা ধোক্ক্যেন আর শোজ্য বনা ভিদিরে জ্বোল্জোল্যে বম্বা ধোক্ক্যেন গুরিম। তারা ডেনে-বাঙে কায়কুরে বেক্ জাগায়ানি গজক্ গুরিবাক্, মাত্তর্ যিরূশালেম মানুচ্চুনে আরঅ তারার নিজো জাগানত্ বজত্তি গুরিবাক্।
7মুই লগেপ্রভু পত্তমে যিহূদার থেবার জাগায়ানি উদ্ধোর্ গুরিম যেনে দায়ূদো বংশর আর যিরূশালেম আদাম্মেগুনোর সর্মান যিহূদার অন্য মানুচ্চুনোত্তুন্ বেশ্ ন-অয়। 8সেদিন্যে মুই যিরূশালেমর আদাম্মেগুনোরে রোক্ষ্যে গুরিম। তারা ভিদিরে বেগত্তুন্ বল্পোজ্যে মানুচ্চুন্অ দায়ূদো ধোক্ক্যেন অবাক্ আর দায়ূদোর বংশধরুনে গোজেন ধোক্ক্যেন, অত্তাৎ লগেপ্রভুর দূতো ধোক্ক্যেন তারার্ আগে আগে যেবঅ। 9সেদিন্যে যিদুক্কুন জাদে যিরূশালেমানরে আক্রমণ গুরিবাত্তে এবাক্ মুই তারারে ভস্ত গুরিম।
10মুই দায়ূদো বংশ আর যিরূশালেম আদাম্মেগুনো উগুরে মঅ আত্মাগান ঢালি দিম; তে দোয়্যে গরে আর তবনার্ মনোভাব দে। সেক্কে তারা মইন্দি, অত্তাৎ যিবেরে তারা মাজ্যন্ তাইন্দি রিনি চেবাক্। বানা এক্কো পুয়োবোত্তে আবিলেচ্ গরেদে ধোক্ক্যেন গুরি তারা তাত্তে আবিলেচ্ গুরিবাক্ আর পত্তম্ পুয়োবোত্তে যেবাবোত্যেগুরি আবিলেচ্ গরন সেবাবোত্যেগুরি জদবদে গুরি আবিলেচ্ গুরিবাক্। 11সেদিন্যে যিরূশালেমত্ অমকদ বিলেপ্ গুরিবাক্, যেবাবোত্যেগুরি মগিদ্দো সংজাগানর্ হদদ্-রিম্মোণত্ ওইয়্যে। 12-14দেজর্ পত্তি বংশর্ মানুচ্চুনে যুদো যুদো গুরি বিলেপ্ গুরিবাক্। দায়ূদো বংশর, নাথন বংশর, লেবি বংশর, শিমিয়ির বংশর আর বাদবাগি বেক্ বংশর মানুচ্চুনে বিলেপ্ গুরিবাক্। মরদ্তুনে আর তারা মোগ্কুনে যুদো যুদো গুরিনে বিলেপ্ গুরিবাক্।
Currently Selected:
সখরিয় 12: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
