মার্ক 8
8
চের্ আজার্ মান্জ্যরে হাবানা
(মথি ১৫:৩২-১৬:৪)
1পরেদি আরঅ একদিন্যে বোউত্ মান্জ্যর্ ভিড় অলঅ। এই বেক্ মানুচ্চুনো ইধু কনঅ হানা ন-এলঅ বিলি যীশু তা শীচ্চ্যগুনোরে ডাগিনে কলঅ, 2“এ মানুচ্চুনোত্তে মর্ চিৎ পুরের্, কিয়া এইচ্চ্যে তিনদিন অলঅ ইগুনে মঅ লগে লগে আগন্, আর ইগুনো ইধু কনঅ হানা নেই। 3যুনি মুই এ অবস্থায় ইগুনোরে ঘরত্ পাধেই দুয়োং সালে তারা পদথ্ অজ্ঞান্ ওই পড়িবাক্, কিয়া ইগুনো ভিদিরে ভালোক্জনে বোউত্ দূরোত্তুন এচ্চ্যন্”
4শিচ্চ্যগুনে কলাক্, “এ ধূল্যেচর চাগালাত্ ইগুনোরে হাবেবাত্তে কন্না কুত্তুন্ এদক্ রুটি পেবাক্?”
5যীশু পুযোর্ গুরিলো, “তমাইধু কয়ান্ রুটি আঘে?”
তারা কলাক্, “সাত্তান্ রুটি।”
6তে মানুচ্চুনোরে মাদিত্ বুজিবাত্তে উগুম্ দিলো। যেরেদি সেই সাত্তান্ রুটি লোইনে তে গোজেনরে ভালেদি জানেইনে ভাঙিলো আর মানুচ্চুনোরে দিবাত্তে শিচ্চ্যগুনো আঢত্ দিলো আর শিচ্চ্যগুনে সিয়েনি মানুচ্চুনো আঢত্ দিলাক্। 7শিচ্চ্যগুনো ইধু কয়েক্কো চিগোন্ মাছ্অ এলঅ। যীশু সেই মাছ্চুনোত্তেয়ো ভালেদি জানেল আর সিগুন মানুচ্চুনোরে ভাগ্ গুরি দিবাত্তে শিচ্চ্যগুনোরে কলঅ। 8মানুচ্চুনে পেট্ ভুরি হেলাক্। যেরেদি যে কট্টানি পড়ি রলঅ শিচ্চ্যগুনে সিয়েনি তুলিনে সাত্তো লেই ভোরেলাক্। 9-10কমেদি চের্ আজার্ মরদ্ সিয়েনত্ এলাক্। ইয়েনর্ পরেদি তে মানুচ্চুনোরে বিদেয় দিলো আর শিচ্চোগুনো সমারে এক্কান্ নৌকোত্ উদিনে দল্মনুথা চাগালাত্ গেলঅ।
11সিয়েনত্ ফরীশীগুনে এইনে যীশু লগে সৌল্ গরা ধুরিলাক্ আর তারে পোরোক্ষ্যে গুরিবাত্তে স্বর্গত্তুন কনঅ এক্কান চিহ্নো দেগিবাত্তে চেলাক। 12সেক্কে যীশু ভঅ নিজেস্ ফেলেইনে কলঅ, “এই কালর্ মানুচ্চুনে কিত্যে আমক্ অবার চিহ্নো তগান্? না, মুই তমারে কঙর্, কনঅ প্রমাণ ইগুনোরে দেগা ন-অবঅ।”
13তে তারারে ছাড়িনে আরঅ নৌকোনত্ উদিনে সাগর উই পারত্ গেলঅ।
শিচ্চ্যগুনোরে উজিয়ার্ গরানা
(মথি ১৬:৫-১২)
14শিচ্চ্যগুনে তারা লগে রুটি নেযেবাত্তে ভুলি যেইয়োন্। নৌকো ভিদিরে তারা ইধু বানা এক্কান্ রুটি এলঅ। 15এ সময়োত্ যীশু কলঅ, “তুমি উজিয়ার থাগঅ, ফরীশীগুনোর্ আর হেরোদ সদাগানিত্তুন্ উজিয়ার্ অ।”
16ইয়েন্দোই শিচ্চ্যগুনে নিজো ভিদিরে কুয়ো-কি গরানা আরাম্ভ গুরিলাক্, “আমা ইধু রুটি নেই বিলিনে তে এ কধাগান্ কত্তে।”
17শিচ্চ্যগুনে কি কদন্ সিয়েন বুঝি পারিনে যীশু তারারে কলঅ, “তমার্ রুটি নেই? তুমি কি এজঅ হবর্ ন-পঅ বা ন-বুঝো? তমা মনানি কি এদক্ নিরোস্ ওই যেইয়্যে? 18তমার্ চোগ্ তাগদেয়ো কি ন-দেগর্? কান্ থাগদেয়ো কি ন-শুনোর্? মনত্অ কি ন-উদের্, 19যেক্কেনে মুই পাচ্ আজার্ মান্জ্যত্তে পাচ্চান্ রুটি ভাঙ্যং সেক্কে কয় লেই রুটির কট্টা তুমি কুড়েয়ো?”
শিচ্চ্যগুনে জোব্ দিলাক্, “বার লেই।”
20যীশু পুযোর্ গুরিলো, “মুই যেক্কেনে চের্ আজার্ মান্জ্যত্তে সাত্তান্ রুটি ভাঙ্যং সেক্কে কয় লেই রুটির কট্টা তুমি কুড়েয়ো?”
তারা কলাক্, “সাত্ লেই।”
21সেক্কে তে তারারে পুযোর্ গুরিলো, “সালে তুমি কি এজঅ ন-বুঝো?”
এক্কো কানা মানুচ্ গম্ অলঅ
22পরেদি যীশু আর তা শিচ্চ্যগুনে বৈৎসৈদা আদামত্ গেলাক্। সিদুগো মানুচ্চুনে এক্কো কান্ মান্জ্যরে যীশু ইধু আনিলাক্ আর মানুচ্চো কিয়্যেত্ আঢ্তানি রাগেবাত্তে যীশুরে কোজোলী গরা ধুরিলাক্। 23যীশু সেই কান্ মানুচ্চোরে আঢত্ ধুরিনে আদামর বারেদি নেযেল। সে পরেদি মানুচ্চোর্ চোগোত্ চেফ্ দিলো আর তা কিয়্যেত্ আঢ্ দিইনে পুযোর্ গুরিলো, “তুই কি কিজু দেগর্?”
24মানুচ্চো রিনি চেইনে কলঅ, “মুই মানুচ্ দেগঙর্; তারা রিনি চাদে গাজ ধোক্ক্যেন্, আরঅ আঢিয়ো বেড়াদন্।”
25যীশু আর একবার মানুচ্চোর চোগ্কুনো উগুরে আঢ্ দিলো। এবারত্ তা চোগ্কুন্ খুলি গেলাক্ আর তে দেগিবার্ খেমতাগান্ ফিরি পেলঅ। তে গমেডালে বেক্কানি দেগা ধুরিলো। 26যীশু তারে তা ঘরত্ পাধেই দিবার সময়োত্ কলঅ, “বৈৎসৈদা আদামত্ ন-যেচ্।”
প্রভু যীশুই মশীহ
(মথি ১৬:১৩-২০; লূক ৯:১৮-২১)
27সে পরেদি যীশু আর তা শিচ্চ্যগুনে কৈসরিয়া-ফিলিপি শঅরর্ কায়কুরে আদামানিত্ গেলাক্। যেবার পদথ্ তে শিচ্চ্যগুনোরে পুযোর্ গুরিলো, “মুই কন্না, এ পৌইদ্যেনে মান্জ্যে কি কন্?”
28শিচ্চ্যগুনে কলাক্, “কেঅ কেঅ কন্দে তুই বাপ্তিস্মদিয়্যে যোহন; কেঅ কেঅ কন্ এলিয়; আরঅ কেঅ কেঅ কন্ তুই ভাববাদীগুনো ভিদিরে একজন।”
29সেক্কে তে তারারে কলঅ, “মাত্তর্ তুমি কি কঅ, মুই কন্না?”
পিতরে জোব্ দিলো, “তুই সেই মশীহ।”
30পরেদি যীশু তারারে উগুম দিলো যেন তারা তা পৌইদ্যেনে কাররে কিচ্চু ন-কন্।
নিজো মরণ পৌইদ্যেনে প্রভু যীশু
(মথি ১৬:২১-২৮; লূক ৯:২২-২৭)
31পরেদি যীশু তা শিচ্চ্যগুনোরে ইয়েন কোইনে শিক্ষ্যে দিয়্যে ধুরিলো, মান্জ্য পুয়োবোত্তুন্ বোউত্ দুঘ্ পাহ্ পুড়িবো। বুড়ো নেতাগুনে, বেগ দাঙর্ ধর্মগুরুগুনে আর ধর্ম মাষ্টরুনে তারে এলাফেলা গুরিবাক্। তারে মারে ফেলা অবঅ আর তিন দিন পরে তারে মরণত্তুন্ আরঅ জেঈ উদো পুড়িবো। 32এই বেক্ কধানি তে জদবদেগুরি কলঅ। সেক্কে পিতর যীশুরে এক কিত্তেদি নেযেইনে আবিত্তি গরা ধুরিলো। 33মাত্তর্ যীশু ফিরিনে শিচ্চ্যগুনো ইন্দি রিনি চেলঅ আর পিতররে তেল্যে গুরিনে কলঅ, “মঅ কায় কুরেত্তুন্ দূর্ অ শদান্। গোজেনর যিয়েন্, সিয়েন্ তুই ন-ভাবর্, মাত্তর্ মান্জ্যর্ যিয়েন, সিয়েন-ই ভাবর্।”
34ইয়েনর্ পরেদি তে শিচ্চ্যগুনোরে আর অন্য মানুচ্চুনোরে তা কায়কুরে ডাগিনে কলঅ, “যুনি কেঅ মঅ পধেদি এবাত্তে চায় সালে তে নিজোর্ আওজ্ মজিম ন-চোলোক্; নিজো ক্রুশ্চান বুয়োইনে তে মঅ পিজেদি এজোক্। 35যে কেঅ তার নিজোত্তে বাঁজি থেবার্ চায় তে তার্ জিংকানিগান্ ঘেচ্চেক্গুরি আরেব; মাত্তর্ যে কেঅ মত্তে আর গোজেনর দিয়্যে গম্ হবরত্তে তা পরাণান্ আরায়, তে তার ঘেচ্চেক্গুরি জিংকানিগান রোক্ষ্যে পেবঅ। 36তুই যুনি পুরো পিত্থিমীগান লাভ গুরিনেয়ো সিয়েনর বদলে তর্ জিংকানিগান্ আরাস্ সালে সিয়েনর কনঅ লাভ অলঅ? নিশ্চয় নয়! 37সালে কেধোক্ক্যেন গুরি এক্কো মান্জ্যে তা জিংকানিগান ফিরি পেবঅ? 38এই কালর্ অবিশ্বেজি আর পাপী মানুচ্চুনো ভিদিরে যুনি কেঅ মরে নিইনে আর মঅ কধানিলোই লাজান্, সালে মান্জ্য পুয়োবো যেক্কে পবিত্র দূত্তুনো সমারে গুরি তা বাব মহিমালোই এবঅ, সেক্কে তেয়ো সেই মানুচ্চুনো পৌইদ্যেনে লাজেব।”
Currently Selected:
মার্ক 8: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
