মার্ক 7
7
চলেদে সুদোম্
(মথি ১৫:১-২০)
1যিগুনে যিরূশালেমত্তুন্ এচ্চ্যন্ এমন্ কয়েক্কো ফরীশী আর ধর্ম-মাষ্টর যীশুর চেরোকিত্যে এগত্তর্ অলাক্। 2তারা দেগিলাক্, যীশুর শিচ্চ্যগুনোত্তুন্ কয়েকজনে আঢ্ ন-ধোইনে অসিজিগুরি হেবাত্তে বোচ্চ্যন্। 3ফরীশীগুনে আর বেক্ যিহূদীগুনে পুরোণি দিনোর্ ধর্ম-মাষ্টরুনোরে দিয়্যে যে সুদোমান্ চলি এজের্ সেই সুদোম মজিম্ আঢ্ ন-ধোইনে ন-হান্। 4বাজারত্তুন্ এইনে তারা আঢ্-টেঙ্ ন-ধোইনে কিচ্চু ন-হান্। ইয়েনি বাদেয়ো তারা আরঅ নানান্ বাবোত্যে সুদোম পালেই থান্, যেমন্ লদা, কদরা, থাল্ ইগুন ধনা।
5সেনত্তে ফরীশী আর ধর্ম-মাষ্টরুনে যীশুরে পুযোর্ গুরিলাক্, “পুরোণি দিনোর্ ধর্ম-মাষ্টরুনোরে দিয়্যে যে সুদোমানি চলি এজের্ তঅ শিচ্চ্যগুনে সিয়েনি মানি ন-চলদন্ কিত্তে? মাত্তর্ তারা সিয়েনর্ বদলে দঅ আঢ্ ন-ধোইনে হান্।”
6যীশু জোব্ দিলো, “তুমি ভণ্ড! তমা পৌইদ্যেনে ভাববাদী যিশাইয় ঠিগ্ কধা কোইয়্যে। তা বোইবোত্ লেঘা আঘে:
এ মানুচ্চুনে মুয়োদি মরে সর্মান গরন্,
মাত্তর্ তারার্ মনানি মত্তুন্ দূরোত্ থায়।
7তারা মিজে মিজে মর্ উবোসনা গরন্,
তারার্ দিয়্যে শিক্ষ্যে মান্জ্যর্ বানেয়্যে কয়েক্কো সুদোম্ বানা।
8তুমি দঅ গোজেনর্ দিয়্যে উগুমানি বাদ্ দিইনে মান্জ্যর্ দিয়্যে চলেদে সুদোমানি পালর্।”
9যীশু তারারে আরঅ কলঅ, “গোজেনর্ উগুম বাদ্ দিইনে নিজোর সুদোমানি পালেবাত্তে গমেডালে গম্ পথ্তান্ তমার জানা আঘে। 10যেমন্ ধরঅ, মোশি কোইয়্যেদে, ‘মা-বাবরে সর্মান গরঅ’ আর ‘যিবের্ কধালোই মা-বাবঅ উগুরে অশ্রদ্ধা থায় তারে হামাক্কায় মারে ফেলা পড়িবো।’ 11মাত্তর্ তুমি কোই থাগঅ, যুনি কেঅ তার্ মা-বাবরে কয়, ‘মর্ যে জিনিস্চান্দোই তর্ সাহায্য ওই পারিদো সিয়েন গদ্দন্,’ অত্তাৎ গোজেন ইধু উৎসর্ব গরা ওইয়্যে, 12মাত্তর্ মা-বাবত্তে তাত্তুন্ আর কিচ্চু গরা ন-পরে। 13এবাবোত্যেগুরি তুমি তমার চলেত্তে সুদোমান্ শিক্ষ্যে দিইনে গোজেনর্ কধানি বাদ্ দুয়ো। ইয়েনি বাদেয়ো তুমি আরঅ এবাবোত্যে বোউত্ কাম গুরি থাগঅ।”
14ইয়েনর্ পরেদি যীশু মানুচ্চুনোরে আরঅ তাইধু ডাগিনে কলঅ, “তুমি বেক্কুনে মঅ কধাগান্ শুনো আর বুঝো। 15-16বারেত্তুন্ যিয়েনি মান্জ্য ভিদিরে যায় সিয়েনি মান্জ্যরে অসিজি গুরি ন-পারে, বরং মান্জ্য ভিদিরেত্তুন্ যিয়েনি নিগিলি এজে সিয়েনি মান্জ্যরে অসিজি গরে।”
17ইয়েনর্ পরেদি যীশু যেক্কে মানুচ্চুনোরে ফেলেইনে ঘরত্ সোমেল, সেক্কে শিচ্চ্যগুনে সে কধাগানর্ অত্তগান্ তাত্তুন্ পুযোর্ গুরিলাক্। 18যীশু তারারে কলঅ, “তুমি কি অন্যগুনোত্তুন্ এদক্ অবুঝ্? তুমি কি ন-বুঝো যে, বারেত্তুন্ যিয়েনি মান্জ্য ভিদিরে চমে সিয়েনি তারে অসিজি গুরি ন-পারে? 19ইয়েনর্ কারনান্ অলঅ, সিয়েন দঅ তা মনত্ ন-চমে মাত্তর্ পেদত্ সমে আর পরেদি কিয়্যেত্তুন্ নিগিলি যায়।” এ কধাগান্দোই যীশু বুঝেই দিলোদে যে, বেক্ হানাগানি সিজি।
20যীশু আরঅ কলঅ, “মান্জ্য ভিদিরেত্তুন্ যিয়েনি নিগিলি এজে সিয়েনিই মান্জ্যরে অসিজি গরে, 21কিয়া মান্জ্য ভিদিরে, অত্তাৎ মনত্তুন্ ভান্ন্যেই চিন্তে, নানান্ বাবোত্যে বেভিচের্, চুর্, খুন, 22লুভি অনা, অন্যরে ক্ষতি গুরিবার্ আওজ্, ছলনা, বজং খাচ্চ্যত্, ইংসে, নিন্দে, বার্ গরানা আর মূর্খকামানি নিগিলি এজে। 23এই বেক্ ভান্ন্যেয়ানি মান্জ্য ভিদিরেত্তুনই নিগিলি এজে আর মান্জ্যরে অসিজি গরে।”
অযিহূদী মিলেবোর্ বিশ্বেজ্
(মথি ১৫:২১-২৮)
24ইয়েনর্ পরেদি যীশু সে জাগায়ান্ ছাড়িনে সোর চাগালাত্ গেলঅ। তে এক্কান ঘরত্ সোমেল আর চেলদে যেন কেঅ হবর্ ন-পান্, মাত্তর্ তে লুগি থেই ন-পারিলো। 25সিয়েনত্ এমন্ এক্কো মিলে এলঅ যিবের্ ঝিবোরে ভান্ন্যেই আত্মায় পেইয়্যে। সে মিলেবো যীশু পৌইদ্যেনে শুনিনে সেক্কে এইনে যীশুর টেঙত্ পুড়িলো। 26মিলেবো এলদে অযিহূদী আর সুর-ফৈনীকীত জোর্মেয়্যে। তে যীশু ইধু কোজোলী গরা ধুরিলো যেন তে তা ঝিবোত্তুন্ ভান্ন্যেই আত্মাগান্ দূর্ গুরি দে।
27যীশু জোবত্ কলঅ, “আগে পুয়ো-ঝিগুনে পেট ভুরিনে খাদোক্, কিয়া পুয়ো-ঝিগুনোর হানা লোইনে কুগুরো মুজুঙোত্ ফেলানা গম্ নয়।”
28সেক্কে সে মিলেবো কলঅ, “প্রভু, তুই ঠিগই কোইয়োচ্, মাত্তর্ পুয়ো-ঝিগুনোর হানাত্তুন্ যেদক্কানি পড়িনে টেবিলো তলে পড়ে সিয়েনি দঅ কুগুরে খায়।”
29যীশু তারে কলঅ, “কধাগান তুই গমেডালে কোইয়োচ্। ইক্কিনে যাহ্; যেইনে চাহ্, ভান্ন্যেই আত্মাগানে তঅ ঝিবো ভিদিরেত্তুন্ নিগিলি যেইয়্যে।”
30সে মিলেবো সেক্কে ঘরত্ ফিরি যেইনে দেগিলো, তা ঝিবো বিচ্ছোনত্ পড়ি আঘে আর ভান্ন্যেই আত্মাগানে তা ভিদিরেত্তুন্ নিগিলি যেইয়্যে।
বহ্রা আর হন্ মানুচ্চো গম্ অলঅ
31ইয়েনর্ পরেদি যীশু সোর চাগালাগান্ ছাড়িনে সীদোন শঅর ভিদিরেদি গালীল সাগর কায়কুরে দিকাপলি চাগালার্ আদামানিত্ গেলঅ। 32সিয়েনত্ কয়েক্কো মান্জ্যে এক্কো বহ্রা আর হন্ মান্জ্যরে যীশু ইধু আনিলাক্ আর কোজোলী গরা ধুরিলাক্ যেন তে সে মিলেবো উগুরে তা আঢ্তানি বাজায়।
33যীশু ভিড়ো ভিদিরেত্তুন্ সেই মানুচ্চোরে এক কিত্তেদি নেযেইনে তা দ্বি কানত্ নিজো আঙুলুন্ দিলো। পরেদি সেফ্ ফেলেইনে মানুচ্চোর্ জিলান্ ধুরিলো। 34সে পরেদি তে আগাজ ইন্দি রিনি চেইনে ভঅ নিজেস্ ফেলেইনে মানুচ্চোরে কলঅ, “এপ্ফাথা,” অত্তাৎ “খুলি যাহ্।”
35সেক্কে মানুচ্চোর্ কানানিয়ো খুলি গেলঅ, জিলান্ খুলি গেলঅ আর তে গমেডালে কধা কুয়ো ধুরিলো। 36যীশু এ পৌইদ্যেনে কাররে ন-কবাত্তে মানুচ্চুনোরে মানা গোজ্যে। মাত্তর্ তে যেদক্ তারারে মানা গোজ্যে সেদক্ তারা সে পৌইদ্যেনে আরঅ বেশ্ গুরি কুয়ো-কি গরা ধুরিলাক্। 37এ ঘটনাগান্দোই মানুচ্চুনে অমকদ আমক্ ওইনে কলাক্, “ইবে বেক্ কামানি কদক্ গমেডালে গরে। ইবে বহ্রাগুনোর্ শুনিবার বল্ আর ববাগুনোর্ কধা কবার খেমতা দে।”
Currently Selected:
মার্ক 7: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
