মার্ক 9
9
1সে পরেদি যীশু শিচ্চ্যগুনোরে কলঅ, “মুই তমারে ঘেচ্চেক্গুরি কঙর্, ইয়েনত্ এমন্ কয়েকজন আগন্ যিগুনো ইধু গোজেনর্ রেজ্যগান দাঙর্ খেমতালোই দেগা ন-দেনা সং তারা কনমতে মুরি ন-যেবাক্।”
যীশুর জোল্জোল্যে চেয়ারা
(মথি ১৭:১-১৩; লূক ৯:২৮-৩৬)
2ইয়েনর্ ছ'দিন পরে যীশু বানা পিতর, যাকোব আর যোহনরে সমারে নিইনে এক্কো অজল্ মুড়োত্ গেলঅ। এ শিচ্চ্যগুনো মুজুঙোত্ তা চেয়ারাগান্ বুদুলি গেলঅ। 3তা কাবড়-চুগোড়ানি এমন্ চোগ্ ফিরেই ন-বাজ্জ্যে ধুব্ অলঅ যে, পিথ্তিমীর কনঅ কাবড় কাজেয়্যের্ পক্ষে সেবাবোত্যেগুরি কাবড় খাজানা সম্ভব নয়। 4সে পরেদি তারা তিনজন শিচ্চ্যই এলিয় আর মোশি যীশু লগে কধা কধে দেগিলাক্।
5সেক্কে পিতর যীশুরে কলঅ, “মাষ্টরবাবু, গম্ ওইয়্যে দঅ, আমি ইয়েনত্ আগিই। আমি ইয়েনত্ তিনেন্ তাম্বুল-ঘর বানেই-এক্কান তর্, এক্কান মোশির আর এক্কান এলিয়ত্তে।”
6তে আর অন্যগুনে অমকদ দোরেয়োন্দে যে তে হবর্ ন-পেদঅ কি কোইয়্যে। 7সে পরেদি এক্কান মেঘ এইনে তারারে ছাবালোই নাঢি ফেলেল, আর সে মেঘ্কানত্তুন্ এ কধাগান শুনো গেলঅ, “ইবে মর্ কোচ্পেইয়্যে পুয়ো, তুমি ইবে কধা শুনো।”
8সেক্কে তারা চেরোকিত্তেদি যাদিমাদি রিনি চেলাক্ মাত্তর্ কনজনরে ন-দেগিলাক্; বানা তারা সমারে যীশু এলঅ। 9যেক্কে তারা মুড়োবোত্তুন্ লামি এত্তন্ সেক্কে যীশু তারারে এ উগুমান দিলো, “তুমি যিয়েন দেগিলে, সিয়েন মান্জ্যপুয়োবো মরণত্তুন্ জেঈ ন-উদোনা সং সিয়েন কাররে ন-কোয়ো।”
10শিচ্চ্যগুনে যীশুর উগুমান্ পালেলাক্, মাত্তর্ মরণত্তুন্ জেদা ওই উদোনার অত্তগান্ কি সিয়েন নিজো ভিদিরে কুয়ো কি গরা ধুরিলাক্। 11তারা যীশুরে পুযোর্ গুরিলাক্, “ধর্ম-মাষ্টরুনে কিত্তে কন্ পত্তমে এলিয়র এযানা দরকার্?”
12তা জোব্পান্ অলদে, “এ কধাগান্ ঘেচ্চেকগুরি এলিয় পত্তমে এইনে বেক্কানি আগঅ ধোক্ক্যেন ফিরেই আনিবো। মাত্তর্ মান্জ্যপুয়োবো পৌইদ্যেনে কিবাবোত্যে গুরি পবিত্র বোইয়োত্ লেগা আঘে যে, তাত্তুন্ অমকদ দুঘ্ পাহ্ পুড়িবো আর মান্জ্যে তারে এলাফেলা গুরিবাক্? 13মুই তমারে কঙর্, এলিয় পৌইদ্যেনে পবিত্র বোইয়োত্ যিয়েন লেগা আঘে সেবাবোত্যেগুরি তে লুম্মেগি, আর মানুচ্চুনে তা উগুরে যিয়েন আওজ্ সিয়েনই বেবহার গোজ্যন্।”
ভুদে পেইয়্যে পুয়োবো গম্ অলঅ
(মথি ১৭:১৪-২৩; লূক ৯:৩৭-৪৫)
14যীশু আর সেই তিনজন শিচ্চ্য অন্য শিচ্চ্যগুনো ইধু ফিরি এইনে দেগিলাক্, তারা চেরোকিত্তে বোউত্ মানুচ্ তুবেয়োন আর কয়েক্কো ধর্ম-মাষ্টর তারা সমারে কধা তর্কাতর্কি বাজেয়োন্। 15মানুচ্চুনে যীশুরে দেগিনে অমকদ আমক্ ওই গেলাক্ আর দাবা যেইনে তারে ভালেদি জানেলাক্। 16যীশু ধর্ম-মাষ্টরুনোরে পুযোর্ গুরিলো, “তুমি তারা লগে কি পৌইদ্যেনে সৌল্ গরর্?”
17ঝাগ ভিদিরেত্তুন্ এক্কো মানুচ্ জোব্ দিলো, “মাষ্টরবাবু, মঅ পুয়োবোরে তইধু আন্যং। কিয়া তারে ভান্ন্যেই আত্মায় পেইয়্যে আর তে কধা কোই ন-পারে। 18যেক্কেনে আত্মাবো তারে আক্রমন গরে সেক্কে আযার্ মারিনে মাদিত্ ফেলায়। তা মুয়োত্তুন্ ফেনা নিগিলে আর তে দাত্ কামারায় আহ্ দরঅ ওই যায়। মুই তঅ শিচ্চ্যগুনোরে সেই আত্মাবোরে ধাবেই দিবাত্তে কলুং, মাত্তর্ তারা ন-পারিলাক্।”
19সেক্কে যীশু কলঅ, “অবিশ্বেজি মানুচ্চুন! আর কয়দিন মুই তমা সমারে থেইম্? কয়দিন তমারে সোজ্য গুরিম্? পুয়োবোরে মইধু আন।”
20মানুচ্চুনে সেক্কে পুয়োবোরে যীশু ইধু আনিলাক্। যীশুরে দেগিনে সেই ভান্ন্যেই আত্মাবো পুয়োবোরে অমকদ জুরে চিবি ধুরিলো। পুয়োবো মুয়োত্তুন্ ফেনা নিগিলোদে নিগিলোদে মাদিত্ গোজ্যে ধুরিলো। 21যীশু তা বাব্পোরে পুযোর্ গুরিলো, “কয়দিন অলঅ তার্ এবাবোত্যে ওইয়্যে?”
মানুচ্চো কলঅ, “চিগোনত্তুন্ ধুরি। 22এ আত্মাবো তারে মারে ফেলেবাত্তে পেরায় আগুনোত্ আর পানিত্ ফেলে দিদো। মাত্তর্ তুই যুনি আমারে কনঅ উপকার্ গুরি পারচ্ সালে দোয়্যে গুরিনে সিয়েন গর্।”
23যীশু তারে কলঅ, “ ‘যুনি গুরি পারচ্,’ এ কধাগানর অত্তগান্ কি? যে বিশ্বেজ্ গরে তাত্তেই বেক্কানি সম্ভব।”
24সেক্কে পুয়োবোর্ বাব্পো রঅ ছাড়িনে কলঅ, “মুই বিশ্বেজ্ গরঙর্; মঅ ভিদিরে এজঅ যে অবিশ্বেজ্ আঘে সিয়েন দূর্ গুরি দে।”
25ভালোক্কুন্ মানুচ্ দাবা এত্তন্ দেগিনে যীশু সেই ভান্ন্যেই আত্মাবোরে ধমক্ দিইনে কলঅ, “ও কাল্ আর ববা আত্মাবো, মুই তরে উগুম্ দুয়োঙর্, ইবে ভিদিরেত্তুন নিগিল্; আর কনদিন্অ ইবে ভিদিরে ন-সোমেচ্।”
26সেক্কে সেই ভান্ন্যেই আত্মাবো রঅ ছাড়িনে পুয়োবোরে জুরে মুজুরি ধুরিলো আর তা ভিদিরেত্তুন্ নিগিলি গেলঅ। সেক্কে পুয়োবো মরা ধোক্ক্যেন্ পুড়ি রলঅ দেগিনে ভালোক্কুনে কলাক্, “তে মুরি যেইয়্যে।” 27মাত্তর্ যীশু তা আঢ্তানি ধুরি তুলোনার্ পরেদি তে উদিনে থিয়্যেল।
28ইয়েনর্ পরেদি যীশু ঘর ভিদিরে গেলঅ। সেক্কে শিচ্চ্যগুনে ভিদিরে ভিদিরে তারে পুযোর্ গুরিলাক্, “আমি তারে কিত্তে ধাবেই ন-পারিলোং?”
29যীশু কলঅ, “তবনা ন-গোজ্যে গুরি আর কনঅ মতে এবাবোত্যে ভান্ন্যেই আত্মা ধাবেই দিয়্যে ন-যায়।”
30পরেদি তারা সে জাগায়ান্ ছাড়িনে গালীল রেজ্যর্ ভিদিরেদি গেলাক্। তে চেইয়্যেদে যেন কেঅ হবর্ ন-পান্ যে, তে কুদু যার্, 31কিয়া সেক্কে তে তা শিচ্চ্যগুনোরে শিক্ষ্যে দের্। তে তারারে কোইয়্যেদে, “মান্জ্য পুয়োবোরে মানুচ্চুনো আঢত্ ধুরি দিয়্যে অবঅ। তারা তারে মারে ফেলেবাক্ আর তিন দিনোত্ তে জেঈ উদিবো।”
32মাত্তর্ শিচ্চ্যগুনে যীশু কধাগানর মানেগান্ বুঝি ন-পারিলাক্ আর তারে পুযোর্ গুরিবাত্তেয়ো তারার্ দর্ লাগিলো।
দাঙর্ কন্না?
(মথি ১৮:১-৫; লূক ৯:৪৬-৪৮)
33সে পরেদি যীশু আর তা শিচ্চ্যগুনে কফরনাহূমোত্ গেলাক্। যীশু ঘর ভিদিরে যেইনে শিচ্চ্যগুনোরে পুযোর্ গুরিলো, “তুমি পধথ্ কিত্তেই সৌল্ গোজ্য?”
34মাত্তর্ শিচ্চ্যগুনে অলর্ গুরি রলাক্, কিয়া কন্না বেগত্তুন্ দাঙর্ সিয়েন্দোই পধথ্ তারা তর্কাতর্কি গোজ্যন্। 35যীশু বুজিলো আর সেই বারজন শিচ্চ্যরে ডাগিনে কলঅ, “কেঅ যুনি আজল্লো অবাত্তে চায় সালে তাত্তুন্ বেক্কুনো শেজত্ থাহ্ পড়িবো আর বেক্কুনোর সেবাগুরিয়্যে উয়ো পড়িবো।”
36পরেদি তে এক্কো চিগোন্ গুড়োরে নেযেল আর তারা মুজুঙোত্ থিয়্যেই রাগেল। তারে করত্ লোইনে তে কলঅ, 37“যে কেঅ মঅ নাঙে ইবে ধোক্ক্যেন্ কনঅ চিগোন্ চিজিবোরে মঅ নাঙে ভালেদি জানায় তে মরে ভালেদি জানায়, আর যে মরে ভালেদি জানায় বানা মরে নয় মাত্তর্ যিবে মরে পাধেয়্যে তারেয়ো ভালেদি জানায়।”
পক্ষে না বিপক্ষে?
(মথি ১০:৪০-৪২; লূক ৯:৪৯,৫০)
38যোহন যীশুরে কলঅ, “মাষ্টরবাবু, আমি এক্কো মান্জ্যরে তঅ নাঙে ভান্ন্যেই আত্মা ধাবাদে দেগিনে তারে মানা গুরিলোং, কিয়া তে আমা দলর্ মানুচ্ নয়।”
39যীশু কলঅ, তারে মানা ন-গোজ্য। মঅ নাঙে আমক্ কাম্ গুরিবার পরেদি কেঅ ফিরিনে মরে নিন্দে গুরি ন-পারন্, 40কিয়া যে আমা বিপক্ষে ন-থায় তে দঅ আমা পক্ষে আঘে। 41মুই তমারে ঘেচ্চেক্গুরি কঙর্, তুমি মশীহর্ মানুচ্ বিলিনে যে কেঅ তমারে এক জগ পানি হেবাত্তে দে তে কনমতে তা বক্শিজ্চান ন-আরেব।
পাপ গরানার্ পৌইদ্যেনে
(মথি ৫:১৩-১৬; ১৮:৬-৯; লূক ১৪:৩৪,৩৫; ১৭:১,২)
42মঅ উগুরে বিশ্বেজি এই চিগোনুনো ভিদিরে কাররে যুনি কেঅ পাপঅ পধেদি নেযায় সালে তা গত্তনাত্ এক্কো দাঙর্ পাত্তর্ বানিনে তারে সাগরত্ ফেলে দেনা বরং তা পক্ষে গম্। 43-44তঅ আঢ্তানে যুনি তরে পাপ পধেদি টানে সালে সিয়েন্ কাবি কাবিনে ফেলেই দে। দ্বিয়েন আঢ্তোই নরগত্ যানাত্তুন্ বরং লুলো ওইনে জিংকানিত্ সমানা তঅ পক্ষে গম্। 45-46সেই নরগর্ আগুনান্ কনদিন্অ ন-মুরিবো। যুনি তঅ টেঙানিয়ে তঅ বিশ্বেজ্চানরে আরেই দে সালে সিয়েনি কাবি ফেলেই দে। দ্বিয়েন্ টেঙোই নরগত্ পড়ানাত্তুন্ বরং লেং ওইনে জিংকানিত্ সমানা তঅ পক্ষে গম্। 47তঅ চোগ্কো যুনি তরে পাপ পধেদি টানে সালে সিবে নিগিলেইনে ফেলা। দ্বিবে চোগ্কোই নরগত্ পড়ানাত্তুন্ বরং কানা ওইনে গোজেন রেজ্যত্ সমানা তঅ পক্ষে গম্। 48সেই নরগত্ মরা মান্জ্যর্ য়েরা হেইয়্যে পুগ্কুনে কনদিন্অ ন-মরন্, আর সিদুগোর্ আগুনান্ কনদিন্অ ন-মরে।
49নুন্ দেদে ধোক্ক্যেন্ পত্তিজন উগুরে আগুন দিয়্যে অবঅ।
50“নুন্ গম জিনিস, মাত্তর্ যুনি নুনোর্ সুয়োত্তান্ বর্বাদ্ ওই যায় সালে কেধোক্ক্যেন্ গুরিনে আরঅ নুন্যো গরা যেবঅ? তমা মন ভিদিরে নুন্ থঅ আর তুমি একজন আরেক্জন লগে সুগে-শান্দিয়্যে থাগঅ।”
Currently Selected:
মার্ক 9: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
