Marko 16
16
MUMALAIKA NAGAMBIRA ABAKAZI KUZOKA KWA YEZU.
1Sabato ka yahwereho, Maria Madalena na Maria, nina Yakobo, na Salome, bakagula ebikununka kuzima, baze kusiga Yezu. 2Mbe kanencha chulichuli, olunaku olukuruba sabato#16, 2 Lora Matayo 28, 1., nibagenda ha kituro, izoba lyasohwere. 3Baliga nibagambirana bati: Akutuhiringisizaho ibale ha mulyango gw’ekituro ni ga? 4Aho ka betegereze, nibasanga ibale lihiringisize; nawe lyaliga lihanguhire muno. 5Nibataha mu kituro, nibabona omusigazi aikere ha bulyo, azwere enkanzu mwera, nibaharamuka. 6Wenene nabagambira ati: Muleke kutina; Yezu wa Nazareti, ayalegirwe ha musalaba, niwe mukuhiga; yazokire, tali hanu: mulore aho sanga bamumamize. 7Nawe mugende, mugambire abahemba be na Petro okwo yabebemberera Galilaya; okwo niyo mulimubonera, nka nikwo yabagambire. 8Bonene nibahuruka niberuka mu kituro, kuba bakakwatw’obutini n’olumazi; tibagambireho muntu ekigambo, kutina kwa muno.
YEZU NABONEKERA MARIA MADALENA.
9Ka yazokire kanencha, olwo kutandika lwa sabato, akatandika kubonekera Maria Madalena, owe yehiremo amasitani musanzu. 10Wenene nagenda nagambira abo yaliga ali nabo, nibalira, nibater’empamo. 11Abo ka bahulire okw’ akulora n’okwo yabwenwe omukazi ogwo, tibekirize.
YEZU NABONEKERA ABAHEMBA BABILI N’ENTUMWA.
12Ebyo ka byahwereho, nabonekera babili muli abo, abaliga nibatura nibagenda mu ngongo, nibamubona nasusa kundi. 13Mbe aho nibagenda nibagambira abandi; na bonene tibabekirize.
14Kumara nabonekera ikumi n’omo bekere h’eliro; nabahanira obutekiriza bwabo n’obugume bw’emitima zabo, obwo bayangire kwikiriza abamubwene yazokire. 15Nabagambira ati: Mugende mu nsi, mwolekerere Evanjeli ebihangwa byona. 16Alikiriza akabatizibwa, alichunguka; nawe atalikiriza, alisingwa. 17Abalikiriza balirubw’amahano ganu: baliruch’amasitani mw’izina lyange, balifumor’endimi zindi, 18balikwat’enzoka, kandi ka balinwa obusungu, tibulibarwaza, balita emikono ha barwere, nibakira.
YEZU NAHANAMA MW’IGULU, ENTUMWA NIZIZA KWOLEKERERA.
19Mbe hatyo Omukama Yezu, ka yamazire kubafumorera atyo, nasagarwa mw’igulu, niyo aikere ha bulyo bwa Mungu. 20Nawe bonene nibagenda nibolekerera hona hona, Omukama nabahwera, kai nagumizy’amagambo gabo n’amahano ago bakukola.
Currently Selected:
Marko 16: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
