Luka 1
1
EBIKWEBEMBERA.
1Obwo bengi batandikire kutenga ebigambo, ebyagwire mul’itwe, 2nk’okwo twabisigirwe ababibwene bonene kuruga ha butandikiro n’abaliga bali bakozi b’ebigambo: 3mbe n’ene ayetegereze byona kuzimazima kuruga ha butandikiro, nabona ni hakili mbikwandikire nibirubarubana, iwe Teofili wange, 4niho omanye obukomereza bw’ebigambo binu, ebyo wayolekererwe.
MUMALAIKA NAGAMBA KUZARWA KWA YOHANA BATISTA.
5Mu naku za Herode, omukama wa Buyahudi, haliga haliho omusaserdoti ogwo, izina lye Zakaria, wo mu rubu lw’Abiya#1, 5 Abasaserdoti b’Abayahudi tibakolaga emilimo zabo bona hamo, nawe babaranwaga. Zakariya yakolaga n’ab’oluganda lw’Abiya, omukuru wabo., n’omukazi we wo mu bahara b’Aroni, izina lye Elizabeti. 6Ha bubili bwabo baliga barongire mu meso ga Mungu, nibalibata mu bilagiro by’Omukama byona byona sombesombe. 7Baliga batali na mwana, obwo Elizabeti yaliga ali mugumba, kai ha bubili bwabo baliga bakokwere mu naku zabo.
8Mbe hakabaho, olwo yaliga nakol’omulimo gw’obusaserdoti mu meso ga Mungu, nk’okwo byarubanaga ha rubu lwe, 9zili ntungwa z’obusaserdoti, nasorwa kuza kutuntumur’ obubani mw’eklezia y’Omukama. 10Embaga yona y’abantu yaliga eli hanza mu katungu ko kutuntumura. 11Mumalaika w’Omukama namubonekera aimerere ha lubazu lw’obulyo lw’olutare lwo kutuntumuliraho. 12Zakaria ka yamubwene, naharamuka, obutini nibumukwata. 13Nawe mumalaika namugambira ati: Otatina, Zakaria, kuba kusaba kwawe kwahulirwa, omukazi wawe Elizabeti alikuzalira omwana museza, olimuruka Yohana. 14Olibona kusemererwa no kuhirahirwa, kai bengi balisemererwa ha kuzarwa kwe: 15kuba aliba mukuru mu meso g’Omukama. Talinwa evini n’ebikutamiza, alikuzibwa Mwoyo Mutakatifu kuruga mu nda ya nina; 16kai alihindura bengi bo mu bana ba Israeli ha Mukama Mungu wabo. 17Kai wenene alyebembera obusyo ye, ali n’omwoyo n’amani g’Eliya, asuby’emitima za bese bantu ha bana, kai abatakwikiriza ha bwenge bw’abarongire, achumire Omukama ihanga lihikire#1, 17 Ebigambo ebyo bya mumalaika bikumanyisya kuzima emilimo n’entungwa za Yohana Batista, Omwebembezi w’Omuchunguzi. Niwe alichuma abantu, bahiche kwanankula kuzima Masiha no kugasirwa enema ze.. 18Zakaria nagambira mumalaika ati: Ebyo nkubimanya nta? kuba ine ndi mugurusi, n’omukazi wange wena yakokwere mu naku ze. 19Mumalaika nasubamo namugambira ati: N’ine Gabrieli, aimerere obusyo ya Mungu; natumwa hal’iwe kukufumorera no kukumanyisya ebizima ebyo. 20Mbe olikara otitihere, otakuhicha kufumora, kuhika ha lunaku olw’ebyo bilihika, obw’otekiriza ebigambo byange, ebilihika mu naku zabyo.
21N’abantu abalindiriraga Zakariya nibakuma obwo yerirwe mw’eklezia. 22Nawe ka yahurukire, tiyahikize kufumora nabo, nibamanya okwo yabonekerwe mw’eklezia. Wenene yaliga nabatigisya, naikara ali mutita. 23Mbe enaku z’obuhereza bwe ka zahwereho, nagenda mu ka ye#1, 23 Abasaserdoti bazibirwaga kuruga mw’eklezia ya Yeruzalemu batakamazire emilimo zabo. Kuti bona baturaga kanya n’ekikale cha Yeruzalemu.. 24Kai enaku ezo ka zarabireho, Elizabeti omukazi we natwar’enda; nayesereka mezi atanu, nagira ati: 25Nikwo Omukama yangizire atyo mu naku ezo yandozire, kunihaho ensoni mu bantu#1, 25 Kanya kake, ebigambo bya mumalaika nibihika. Elizabeti naikara mu nzu ye, atatura mu maka kwolek’abantu engabirano nzima eyo yaherwe Mungu, munomuno mu naku z’obukokoro bwe..
EKIGAMBO CHA MUNGU NICHEGIR’OMUNTU.
26Mbe mu kwezi kwa mukaga mumalaika Gabrieli natumwa Mungu mu charo cha Galilaya, izina lyacho Nazareti, 27ha mubikira ayasanzirwe omuseza, izina lye Yozefu, w’oluganda lwa Daudi, izina ly’omubikira ni Maria. 28Mumalaika namuzaho, nagira ati: Kasinge, oizwir’enema; Omukama ali n’ewe, oli n’omugisa mu bakazi bona. 29Maria ka yahulire, naharamukibwa ebigambo ebyo, natekateka ati: ni kibwacho ki echo. 30Mumalaika namugambira ati: Otatina, Maria, kuba wabona ekisa hali Mungu. 31Mbe okutwar’enda, ozare omwana mwozo, olimuruka izina lye Yezu. 32Wenene aliba mukuru, alyetwa Omwana w’Asingire mw’igulu; Omukama Mungu alimuha ekitebe cha Daudi ise, alitwar’engoma mu nzu ya Yakobo mu myaka zona, 33kai obukama bwe tibulihwaho. 34Maria nagambira mumalaika ati: Obwo ntakumanya museza, kai ebyo bikuhika bita? 35Mumalaika nasubamo namugambira ati: Mwoyo Mutakatifu akukuhanantukira, n’amani g’Asingire mw’igulu gakukusweka; mbe nicho n’alizarwa iwe alyeterwa Mutakatifu, Omwana wa Mungu. 36Mbe lora, na Elizabeti omunaluganda wawe yatwer’enda y’omwana mwozo mu bukekuru bwe; kunu nikwo kwezi kwe kwa mukaga, owe bakweta bati: mugumba; 37kuba hali Mungu tihaliho ekitakuhikibwa. 38Mbe Maria nagira ati: Ndi muzana w’Omukama, bigirwe hal’ine nk’okwo wagamba. Mumalaika namurugaho.
MARIA NAZA KUSURA MUHARA WABO ELIZABETI. — OLWEMBO LWA MARIA.
39Mbe Maria naimuka mu naku ezo, nagenda mu mabanga bwangubwangu, mu charo kimo cha Yuda; 40nataha mu nzu ya Zakariya, nabwacha Elizabeti. 41Mbe Elizabeti ka yahulire ekibwacho cha Maria, omwana nahinda nasemererwa mu nda ye, Elizabeti naizura Mwoyo Mutakatifu. 42Nahamuka n’ilaka ihango nagira ati: Oli n’omugisa mu bakazi bona, kai n’omwana w’enda yawe ali n’omugisa. 43Kinu chanduga kita, nina Omukama wange akeza hal’ine? 44Kuba lora, ilaka ly’ekibwacho chawe ka lyahulirwa mu matwi gange, omwana yahinda no kusemererwa mu nda yange. 45Oli n’omugisa iwe ayekirize, kuba ebyo wagambirwe Mungu bikuhika. 46Maria nagira ati:
Omwoyo gwange gukukuz’Omukama;
47kai omutima gwange gukusemererwa hali Mungu, omuchunguzi wange,
48kuba aketegereza obuke bw’omuzana we, Waza! kuruga lero amahanga gona galineta ow’omugisa;
49kuba Omuhicha akagira amagambo makuru mul’ine, kai izina lye n’itakatifu;
50ekisa che kikubonwa abakumutina kuruga ha nzaro kuhika ha nzaro.
51Akagira amani mu mukono gwe; nanyarambula abakwekuza mu mitima zabo.
52Akahanantura abetware ha bitebe byabo, nakuza abakwekehya.
53Abali n’enzala akabezuz’ebizima, abahango nabasindika kugenda busa.
54Akayanankura Israeli, omwana we, naizuka ekisa che:
55nk’okwo yafumorere batata Ibrahimu n’abezukuru be mu myaka z’emyaka.
56Maria akekara nage kuti mezi asatu, niho nasuba mu ka.
KUZARWA KWA YOHANA. — OLWEMBO LWA ZAKARIYA.
57Mbe enaku zo kuzara ka zahikire, Elizabeti nazara omwana mwozo. 58Abatulanwa n’ababo nibahulira okw’ Omukama yamwitirw’ekisa muno, nibamwihucha. 59Mbe ha lunaku lwa munana nibeza kusar’omwana, nibamuruka izina ly’ese Zakariya. 60Nina nasubamo nagira ati: Pai, bamuruke Yohana. 61Nibamugambira bati: Kampaho mu luganda Iwanu tihalimo muntu akwetwa izina elyo. 62Nibatigisya ise okw’akwenda bamuruke. 63Nasaba akahero, nayandikaho ati: Izina lye niwe Yohana. Nibakuma bona. 64Aho honka akanwa ke n’olulimi lwe nibisurumuka, nafumora nakuza Mungu. 65Abatulanwa babo bona nibakwatw’obutini, ebigambo ebyo byona nibisugana mu mabanga gona ga Buyahudi. 66Bona ababihulire nibabibika mu mitima zabo, nibagira bati: Okutekateka ota? omwana onu aliba ata? Kuba omukono gw’Omukama sanga guli nage. 67Mbe Zakariya ise naizura Mwoyo Mutakatifu; nalaga nagira ati:
68Omukama Mungu wa Israeli nakasinge, obwo yasuzire ihanga lye, naligirira obuchunguzi;
69natwimukiza ihembe ly’obuchunguzi#1, 69 “Ihembe ly’obuchunguzi” ni lunyamo lw’amani n’obuhicha. mu nzu ya Daudi omwana we;
70nk’okwo yafumorere mu kanwa k’abalagi be batakatifu abaliho kuruga ira lyona;
71okw’alituchungula mu bahate betu na mu mikono za bona abatakutwenda,
72ha kugirira batata ekisa no kwizuka omulago gwe mutakatifu;
73ha bwo kulahira okwo yalahire Ibrahimu tata, okwo alituha,
74niho tuchunguke mu ngaro z’abahate betu, nitumuhereza, nzira butini,
75mu butakatifu na mu buronge mu meso ge, naku zona z’obulame bwetu.
76Kai iwe mwana, olyetwa mulagi w’Asingire mw’igulu: kuba olyebembera obusyo y’Omukama, kuchuma emihanda ze;
77omanyisye ihanga lye obuchunguzi mu kukizibwa kw’ebiheno byabo;
78ha bw’omutima gw’ekisa cha Mungu wetu, ogwalesire izoba#1, 78 “Izoba” elyezire kutusura niwe Yezu Kristu, alimulikira abantu, babone omuhanda gwo kuchunguka. kutusura, niliruga oluguru;
79ha kumulikira abekere mu mwirima na mu kiminimini ch’olufu, na ha kuhabur’ebigere byetu mu muhanda gw’omulebo.
80Omwana nakura naguma mu mwoyo; yaliga ali mw’iswa kuhika ha lunaku lwo kweyoleka kwe hal’Israeli.
Currently Selected:
Luka 1: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
