Marko 15

YEZU OBUSYO YA PILATO.— NIBAMUZWEKA ENGATA Y’AMAHWA.

1Kanencha aho honka, abasaserdoti bakuru nibategekerana n’abagurusi n’abandiki n’olukale lwona, nibaboha Yezu, nibamutwara nibamusagalira Pilato#15, 1 Lora Matayo 27, 2.. 2Pilato namubuza ati: N’iwe omukama w’Abayahudi? Wenene nasubamo namugambira ati: Wakigamba. 3Abakuru b’abasaserdoti nibamuchulira bingi. 4Pilato nasuba kumubuza nagira ati: Si tokusubamo kigambo? Lora okwo bakukulega bingi. 5Yezu nabura kusubamo ekigambo n’ekimo, Pilato nakuma. 6Nawe buli lunaku lukuru yaliga amanyire kubasurumulira omo wo mu mbohe, owe bayendaga wena. 7Haliga haliho owe bayetaga bati: Baraba, abohirwe n’engome ha bwo kwit’omuntu mu bugome. 8Embaga ka yanegere, netandika kusaba nk’omwo yabagiriraga naku zona. 9Pilato nasubamo nagira ati: Mukwenda mbasurumulire omukama w’Abayahudi? 10Kuba yamanyaga okw’abakuru b’abasaserdoti baliga bamuletere ichubi. 11Nawe abasaserdoti bakuru nibayohereza embaga, hakili abasurumulire Baraba. 12Pilato nasubamo lwa kabili, nabagira ati: Mbe mukwenda ngire nta omukama w’Abayahudi? 13Bonene nibasuba kuyomba bati: Nomulege ha musalaba. 14Kandi Pilato nabagambira ati: Akakola mabi ki? Bonene nibaguma kuyomba bati: Nomulege ha musalaba. 15Mbe Pilato, obwo yayendaga kusemerez’embaga, nabasurumulira Baraba, nabaha Yezu bamutez’amasanzu, niho bamulege ha musalaba#15, 15 Lora Matayo 27, 26..

16Mbe abasirikale nibamusagara mu kibuga ch’olukale, nibasumbya kohoriti yona#15, 16 Lora Matayo 27, 27.. 17Nibamuzwek’omwenda gumutuku, nibazing’engata y’amahwa, nibagimutaho ha mutwe. 18Nibatandika kumubwacha bati: Kasinge, mukama w’Abayahudi. 19Nibater’omutwe gwe n’ibingo, nibamuchwera, nibatez’ebizwi, nibamulamucha.

OMUHANDA GWA KALVARIYO.— YEZU NALEGWA HA MUSALABA.— NAFWA.— NAZIKWA.

20Mbe ka bamazire kumusekerera, nibamuzur’omwenda gumutuku, nibamuzwek’ebizwaro bye; nibamuhurucha, baze kumulega ha musalaba. 21Nibasiniriza omuntu omo ayarabahoga, naruga ha musiri, niwe Simoni Omunasirene, ise Alekisandri na Rufi, ategule omusalaba gwe. 22Nibamusagara Golgota, ensonga zacho nikwo kugira oti: Kalvariyo#15, 22 Lora Matayo 27, 33..

23Nibamuha kunwa evini etobiremo emira; nabura kwanankula. 24Nibamulega ha musalaba, nibagabana ebizwaro bye, nibabyesera olweso, kulora echo buli muntu alatwara.

25Yaliga eli saha ya kasatu aho bamulegire ha musalaba. 26Enzuno y’elamu ye ekayandikwa eti: Omukama w’Abayahudi. 27Kandi nibalega abasuma babili hamo nage, omo ha bulyo, ondi ha bumoso bwe. 28Olwandiko niluhika, olwandikire luti: Alibalirwa mu baheni. 29Abarabahoga baliga nibamuzuma, nibasingisy’emitwe zabo nibagira bati: Iwe akukambula eklezia ya Mungu, kai mu naku isatu okasuba kugyombeka, 30noyechungule omwene, ohanantuke ha musalaba. 31Nikwo batyo n’abakuru b’abasaserdoti bamusekereraga bonene bonka n’abandiki, nibagira bati: Yakiz’abandi, kai takuhicha kwekiza omwene. 32Kristu, omukama wa Israeli, nahanantuke hati ha musalaba, niho tubone nitwikiriza. N’abaliga balegirwe ha musalaba nage, bona bamuzumaga.

33Ka zabere saha mukaga, nigubayo omwirima mu nsi yona kuhika saha mwenda. 34Saha mwenda Yezu nahamuka n’ilaka ihango, nagira ati: Eloi, Eloi, lamma sabakthani? Nikwo kugira ati: Mungu wange, Mungu wange, wannagiranira ki?#15, 34 Lora Matayo 27, 46. 35Abandi abaliga baliho, ka bahulire, nibagira bati: Lora, akweta Eliya. 36Niharugaho omo nairuka naizuz’esala mw’ikobyo, nata h’esahunga, namuha kunwa, nagira ati: Leka tulore, raba Eliya naiza kumuhananturaho.

37Nawe Yezu nahamuka n’ilaka ihango, omwoyo niguhwamo. 38Aho omwenda gwo mw’eklezia nigutemukamo, kuruga oluguru kuhika ifwo, bihinzu bibili#15, 38 Lora Matayo 27, 51.. 39Omukuru w’abasirikale ayaliga amwimerereho, ka yabwene nahamuka n’ilaka ihango liti, omwoyo gukahwamo, nagira ati: Waza! omuntu onu sanga ali Mwana wa Mungu koto. 40Haliga haliho n’abakazi nibalorera hara, muli bonene haliho Maria Madalena, na Maria nina Yakobo muto na Yozefu, na Salome; 41abamurubaga aho yaliga ali Galilaya nibamukolera; n’abandi bengi abaliga banegere nage Yeruzalemu.

42Ka habere kebazo, obwo lwaliga luli lulaliriro lw’olunaku olukwebembera sabato#15, 42 Lora Matayo 27, 62., 43naiza Yozefu w’Arimateya, omulamuzi mukumuke, ayaliga nalindirir’obukama bwa Mungu, nahigahara kugenda hali Pilato, namusaba omutumbi gwa Yezu. 44Aho Pilato nakumisibwa Yezu kwanguha kufwa; nayeta omukuru w’abasirikale igana namubuza okwo yafwire. 45Omukuru w’abasirikale igana ka yamumanyisize, naha Yozefu omutumbi. 46Yozefu nagur’omwenda, namuhanantura, namusemba mu mwenda, namuzika mu kituro echaliga kisimbirwe mw’ibale, ha mulyango gw’ekituro nahiringisizaho ibale. 47Nawe Maria Madalena na Maria, nina Yozefu, baliga nibalora aho yazikirwe.

Currently Selected:

Marko 15: KED1946

Highlight

Copy