Marko 14
14
OMUKAZI OGWO NASIGA YEZU AMAZUTA. — YUDA NAMUTUNDA.
1Enaku ibili ka zarabireho, niluba lunaku lukuru lwa Paska n’Azima#14, 1 Lora Matayo 26, 2 na 26, 17.; abakuru b’abasaserdoti n’abandiki nibahiga okwo balakwatira Yezu mu bwenge, bamwite. 2Nawe nibagira bati: Ha lunaku lukuru pai, leka kataba kanamutoke mu bantu#14, 2 Lora Matayo 26, 5..
3Mbe olwo yaliga ali Betaniya mu nzu ya Simoni ow’omubili, aikere nalya, nihezaho omukazi ogwo, ali n’akabya k’amazuta ga nardi y’echangara g’obuguzi bwingi, nayata akabya, nasesa ha mutwe gwe#14, 3 Lora Matayo 26, 7.. 4Haliga haliho abandi babihirirwe mu mitima zabo, nibagira bati: Amazuta ganu baganaliza ki bati? 5Kuba amazuta ago gakuhikize kugurwa denari kuhika magana asatu no kuziha abahabi. Nibamunigahalira. 6Nawe Yezu nagira ati: Nimumuleke; mukumunaranaliza ki? Yankolera kikorwa kizima. 7Kuba abahabi muli nabo bucha bucha, kai mukayenda, mukuhicha kubakolera kuzima; nawe ine timuliba n’ene naku zona. 8Onu yakora ebyo akuhicha; yatandika kwoter’engingo zange nka mu buziki bwazo. 9Koto nkubagambira nti: Honahona eyo Evanjeli enu elyolekererwa mu nsi zona, n’eby’omukazi onu bilitengwa kumwizukiraho#14, 9 Lora Matayo 26, 13..
10Kandi Yuda Iskaryota, omo mul’ikumi na babili, nagenda ha basaserdoti bakuru, ahiche kumubaha. 11Ka bahulire, nibasemererwa muno, nibamulaganisya kumuha empilya. Yahigaga omwanya guhikire gwo kumubaha.
YEZU NAGIRA UKARISTIA. ―NALAGA OKWO PETRO ALAMWEYOGA.
12Olunaku lwo kutandika lw’Azima, olwo babaga Paska, abahemba bakamugira bati: Okwenda tuze kukuchumira hai, olye Paska? 13Natumaho babili mu bahemba be, nabagambira ati: Mugende mu kikale, omuntu omo akubabugangana atwer’ensuha y’amenzi; mumurube, 14omwo alataha, mugambire kanaka muti: Omwolekerezi yagira ati: Enzu yange eli hai, omwo nkulira Paska n’abahemba bange? 15Wenene alaboleka enzu mpango#14, 15 Enzu mpango egyo yaliga eli n’akano, elilimo iliro elyo baliramoga., eyalire; okwo niyo mutuchumire. 16Abahemba be nibagenda nibahika mu kikale; nibasanga nk’okwo yaliga abagambire, mbe nibasemeza Paska.
17Mbe ka habere kebazo, naiza n’ekumi na babili. 18Baliga bekere h’eliro nibalya, Yezu nabagambira ati: Koto nkubagambira nti: Omo mul’imwe akuntunda, akulya n’ene. 19Bonene nibatandika kuzuba no kumugambira omo omo bati: Si n’ine? 20Wenene nabagambira ati: Omo mw’ikumi na babili akukoza n’ene omukono ha lunanga. 21Nikwo, Omwana w’omuntu yagenda nk’okwo chamwandikirweho; nawe omuntu ogwo aligabona, owe Omwana w’omuntu akutundirwaho! Kwakubere kuzima ha muntu ogwo akiba atazerwe!
22Baliga bakilya, Yezu nakwat’omukate, nagubarika, naguhinzura, nabaha, nagira ati: Mwanankure, kinu nizo ngingo zange. 23Ka yakwasire n’ekikompe, akasima, nabaha, nibanwa bona. 24Nabagambira ati: Enu ni nsagama yange y’omulago muhya, elisesekera bengi. 25Koto nkubagambira okwo ntakisuba kunwa ha birabo by’omuzabibu, kuhika ha lunaku luliya olwo ndibinwa lundi buhya mu bukama bwa Mungu#14, 25 Lora Matayo 26, 21,26,28,29,39,41..
26Olwembo ka lwahwere, nibahuruka kuza mw’ibanga lya Zituni. 27Yezu nabagambira ati: Mwena mukusitara hal’ine mu kiro kinu, kuba chandikirwe kiti: Nditera omulisya, enabalega zinyarambuke. 28Nawe ka ndiba nazokire, ndibebemberera Galilaya. 29Petro namugira ati: Naho bona balasitara hal’iwe hona, ine pai. 30Yezu namugira ati: Koto nkukugambira okwo iwe lero, mu kiro kinu, enkokoromi etakakokoromire kabili, okuneyoga kasatu. 31Wenene nayongera kufumora ati: Naho nkaba no kufwa n’ewe hona, tinkukweyoga. Mbe nikwo bona nibagira batyo.
YEZU NAYOYERA ENSAGAMA. — NIBAMUKWATA.
32Nibeza mu nsambu eyo bakweta bati: Getsemani. Nagambira abahemba be ati: Mwikare hanu, ine nindembereza. 33Natwara Petro na Yakobo na Yohana; natandika kuchundw’olumazi no kutina. 34Nabagambira ati: Omwoyo gwange guli n’obuzune bwingi nk’akwenda kufwa; nimwikare hanu, muleke kunagira. 35Ka yerireho obusyo kake, nagwa ha nsi, nasaba esaha egyo emurabeho, raba nibihicha kuba bityo. 36Nagira ati: Abba, Tata, byona bikuhikibwa hal’iwe, nondabyeho ekikompe kinu; nawe t’okwo ine nkwenda, nawe okw’iwe okwenda. 37Naiza, nasanga banagire. Nagambira Petro ati: Simoni, onagire? tokuhicha kuloraho saha emo? 38Muleke kunagira, mulembereze, niho mutarozibwa. Kuba omwoyo gwanguhire, nawe engingo zinogire. 39Nasuba kugenda, nalembereza, nagamba ekigambo echo chonene. 40Nasuba kwiza, nabasanga banagire; kuba ameso gabo galiga gazitohire, batakimanya n’echo balamusubiramo. 41Naiza lwa kasatu nabagambira ati: Hati nimunagire, muhumure. Byahika, esaha yahika; lora, Omwana w’omuntu akuherezibwa mu ngaro z’abaheni. 42Mwimuke, tugende; ngugwo akuntunda ali hehi.
43Yaliga akifumora, Yuda Iskaryota, omo mul’ikumi na babili, naiza, n’embaga ningi eli na wenene, bali n’embanda n’amakoni, barugire ha bakuru b’abasaserdoti n’abandiki n’abagurusi. 44Omutunzi we yaliga abahere olunyamo, agizire ati: Owe ndanwegera, niwe wenene; mumukwate, mumusagare bwenge bwenge. 45Mbe ka yezire, kachwi n’ako namwiriraho, nagira ati: Kasinge, Rugaba. Namunwegera. 46Bonene nibamutaho engaro, nibamukwata. 47Nawe omo wo mu baliga baliho nasoromorayo embanda, nater’omwiru w’omusaserdoti mukuru, namuchwaho okutwi. 48Yezu nasubamo nabagambira ati: Mweza kunkwata n’embanda n’amakoni nk’omusuma. 49Naku zona naliga ndi hagati yanu ninolekerera mw’eklezia, mutakunkwata; nawe ka bihike ebyayandikirwe. 50Aho abahemba be nibamusiga bona niberuka. 51Omusigazi ogwo niwe namuruba azwere ensembe obusyo; nibamukwata. 52Wenene nanaga ensembe, naberukaho ali busa.
YEZU OBUSYO YA KAIFA. — PETRO NAYEYOGA YEZU KASATU.
53Nibasagara Yezu ha musaserdoti mukuru; abasaserdoti bona n’abandiki n’abagurusi nibasumba. 54Nawe Petro namurubira hara kuhika mu ka mu kibuga ch’omusaserdoti mukuru; yaliga aikere ha muliro n’aberu, nayota. 55Nawe abasaserdoti bakuru n’abalamuzi bona nibahig’entambala hali Yezu, bahiche kumwita, tibagibwene. 56Kuba bengi bamubeherezaga, kandi ebyo bagambaga byaliga bitesyenye. 57Abandi nibemuka nibamubehereza nibagira bati: 58Kuba itwe tukamuhulira nagira ati: Ine ndikambula eklezia enu eyayombekirwe emikono z’abantu, kai mu naku isatu ninombeka endi etakozirwe emikono z’abantu. 59Kai hona ebyo bagambaga bitali bimo. 60Aho omukuru w’abasaserdoti naimuka hagati, nabuza Yezu ati: Tokusubamo kigambo muli ebyo, ebyo bakukugambaho? 61Nawe wenene nabuza chonka, tiyasubiremo kintu. Omusaserdoti mukuru nasuba kumubuza namugambira ati: N’iwe Kristu, Omwana wa Mungu asingire? 62Yezu namugira ati: N’ine; kai mulibona Omwana w’omuntu aikere ha bulyo bw’amani ga Mungu, naiza mu mere g’igulu. 63Aho omukuru w’abasaserdoti natemur’ebizwaro bye, nagira ati: Tuchahigira ki embona? 64Mwahulira ekizumi cha Mungu; mukutekateka ki? Bona nibamulamula nk’ahikire kwitwa. 65Aho abandi nibatandika kumuchwera, nibamusweka ha busyo, nibamuter’enfune, nibamugira bati: Laga. Aberu nibamuter’empi.
66Petro aho yaliga ali mu kibuga ifwo, naiza omo wo mu bazana b’omukuru w’abasaserdoti; 67ka yabwene Petro nayot’omuliro, namwetegereza nagira ati: N’ewe wena sanga oli na Yezu Omunazareti. 68Wenene nayanga nagira ati: Tinkumanya, hona tinkuhulira eby’okugamba. Nahuruka hanza obusyo y’olukare, enkokoromi nekokoroma. 69Omuzana ka yasubire kumubona, natandika kugambira abaliga baliho ati: Onu ni wo mu baliya. 70Wenene nasuba kwanga. Niharabaho katungu, abaliga baliho nibasuba kugambira Petro bati: Koto oli wo mu baliya, kuba oli Munagalilaya. 71Nawe wenene natandika kuzumiriza no kulahira ati: Ine tinkumanya omuntu ogwo, owe mukugamba. 72Aho n’aho enkokoromi nesuba kukokoroma. Petro naizuk’ekigambo echo Yezu yaliga amugambire ati: Enkokoromi etakakokoromire kabili, iwe okuneyoga kasatu. Natandika kulira.
Currently Selected:
Marko 14: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
