Marko 10

OBUSWEZI TIBUKUHICHA KUSURUMUKA.

1Ka yarugire aho, naiza mu mbibi za Buyahudi ha mwambu gwa Yordani; embaga nesuba kumusumbirira, nabolekerera nk’okwo yaliga amanyire. 2Abafarizayo nibeza nibamubuza bati: Si omuseza akuhicha kwanga omukazi? nibamuroza. 3Wenene nasubamo nabagambira ati: Musa akabalagira kiha? 4Bonene nibagira bati: Musa akafuha kwandika olwandiko lw’obutagani no kumwanga. 5Yezu nabasubiramo nagira ati: Omuku ogwo akagubayandikira obwo emitima zanu zigumire. 6Nawe ha butandikiro bw’obuhangi Mungu akakola omuseza omo n’omukazi omo. 7Nich’ echo omuntu ali no kusigira ise na nina, ayemere omukazi we, 8mbe babili babe ngingo zimo. Batyo tibakili babili, nawe ngingo zimo. 9Mbe echo Mungu yakwatanisize, omuntu takitaganisya. 10Mu nzu abahemba be nibasuba kumubuza ebyo. 11Nabagambira ati: Buli muntu alyanga omukazi we akaswera ondi, akugir’obukwate hali ogwo. 12Kandi omukazi akayanga iba akaswerwa ondi, akusihana#10, 12 Lora Matayo 19, 6 na 19, 9..

YEZU NABARIKA BANAMUTO. — NAYETA OMUSIGAZI. — NASIMA OBUHABI.

13Nibamuletera banamuto abateho omukono; nawe nibachahalira ababalesire. 14Yezu ka yabwene, akabihirirwa, nabagambira ati: Muleke banamuto beze hal’ine, mutabazibira; kuba abakususa batyo nibo bakana obukama bwa Mungu. 15Koto nkubagambira nti: Buli muntu wena atayanankwile obukama bwa Mungu nka namuto, talibuhikamo. 16Ka yabafumbasire, nabataho emikono, nababarika.

17Ka yarugireho akaza mu muhanda, omuntu ogwo naiza nairuka, namugwa mu maguru obusyo ye, namubuza ati: Mwolekerezi muzima, nkore ki, niho mbone obulame obutahwaho? 18Yezu namugambira ati: Wanetera ki oti: muzima? Tihaliho omuzima, atali Mungu wenka. 19Okumanya ebilagiro: Otasihanga, otaitaga, otaibaga, otabeherezaga, otazigazigaga, otinega iso na noko. 20Ogwo nasubamo namugira ati: Mwolekerezi, ebyo byona nkabihicha kuruga buto bwange. 21Yezu ka yamwetegereze, namwenda, namugambira ati: Ochasigalireyo kimo: roko, oguze byona eby’oli nabyo, ohe abahabi, olibona ensabo mw’igulu; mbe oize ondube. 22Wenene akabihirizibwa ekigambo echo, nagenda azubire; kuba yaliga ali n’ebintu bingi.

23Yezu ka yalozire mbazu zona, nagambira abahemba be ati: Abali n’empilya ningi baligumirwa muno kutaha mu bukama bwa Mungu! 24Abahemba nibakumisibwa ebigambo ebyo. Aho Yezu nasubamo lwa kabili nabagambira ati: Bana bange, kutaha mu bukama bwa Mungu kugumire muno mu bantu abater’emitima zabo ha mpilya! 25Changuhire entungabulende kuraba mw’ihundu ly’ensinga kukira omuhango kutaha mu bukama bwa Mungu. 26Bonene nibakuma muno kukiraho, nibagambirana bati: Kai akuhicha kuchunguka ni ga? 27Yezu ka yabetegereze, nagira ati: Tikikuhikibwa abantu, nawe Mungu; kuba hali Mungu bikuhikibwa byona#10, 27 Lora Matayo 19, 26.. 28Aho Petro natandika kumugambira ati: Lora, itwe tukasiga byona nitukuruba. 29Yezu nasubamo nagira ati: Koto nkubagambira nti: Tihaliho omuntu ayasigire enzu, hamo batabani babo, hamo bahara babo, hamo ise, hamo nina, hamo abana, hamo ensambu, ha bwange n’Evanjeli, 30na wenene ataherwe ngendo igana hati mu nsi munu, amazu, na batabani babo, na bahara babo, na banina, n’abana, n’ensambu, mu binaranazo#10, 30 Omuntu akusiga byona kubera Mungu, akubona omulebo mu mutima, naho akanaranara mu nsi, kai akuhabwa obulame obutahwaho., kai mu buzima bundi obulame obutahwaho. 31Nawe bengi abo kutandika baliba bo kuhereruka, kai abo kuhereruka babe bo kutandika#10, 31 Owo kutandika wena akuhicha kugwa, kai hatyo akubihya kukir’abandi..

KUSABA KW’ABENDE ZEBEDEYO. — BARTIMEYO OMUHUME NAKIZIBWA.

32Baliga bali mu muhanda nibanegera Yeruzalemu; Yezu yaliga nabebembera, nibakuma, nibamuruba no kutina. Naihaho ikumi na babili lwa kabili, natandika kubagambira ebilamugwera: 33Kuba lora, tukugenda Yeruzalemu, Omwana w’omuntu aliherezibwa ha bakuru b’abasaserdoti n’abandiki n’abagurusi, balimulamula kufwa, kai balimuha abasenzi; 34balimusekerera no kumuchwer’amachwanta, bamutez’amasanzu bamwite; nawe olunaku lwa kasatu alizoka.

35Mbe Yakobo na Yohana, abende Zebedeyo, nibamuzaho nibagira bati: Mwolekerezi, tukwenda otugirire buli chona echo tulakusaba. 36Wenene nabagambira ati: Mukwenda mbagire nta? 37Nibagira bati: Notuhe twikare mw’ikuzo lyawe, omo ha bulyo bwawe, ondi ha bumoso bwawe. 38Nawe Yezu nabagambira ati: Timukumanya echo mukusaba. Mukuhicha kunwa ekikompe echo ine ndanwa? hamo kubatizibwa batisimu eyo ine ndabatizibwa? 39Bonene nibamugambira bati: Tukuhicha. Nawe Yezu nabagambira ati: Nikwo, ekikompe echo ndanwa mulikinwa, kai mulibatizibwa batisimu eyo ndabatizibwaho; 40nawe kwikara ha bulyo bwange hamo ha bumoso ti mulimo gwange kuha imwe, nawe abategekerwe kukihabwa#10, 40 Ekikompe na batisimu bikumanyisya obusasi, batisimu y’ensagama.. 41Ikumi ka bahulire, nibatandika kunigahalira Yakobo na Yohana. 42Yezu, ka yabesire, nabagambira ati: Mukumanya okwo abakususa oti henda batwere amahanga, babatwere mani, kai abakuru babo bali n’obuhicha hali bonene. 43Nawe mul’imwe tibili bityo; mbe akwenda kuba mukuru, abe mukozi wanu; 44kai buli akwenda kuba wo kutandika mul’imwe, abe wo kubakolera mwena. 45Nikwo Omwana w’omuntu tiyezire kukolerwa, nawe wenene kukolera no kuta omwoyo gwe ha buchunguzi bwa banamwingi#10, 45 Abakuru b’edini tibakutwara nk’abakuru b’ensi, obutware bwabo nibw’obufura n’obwekehya n’obusasizi..

46Nibahika Yeriko; ka barugire Yeriko n’abahemba be n’embaga ningi muno, omwana wa Timeyo, Bartimeyo omuhume, yaliga aikere ha muhanda nasabiriza. 47Ogwo ka yahulire okw’ali Yezu Omunazareti, natandika kusekana no kugira ati: Yezu, mwana wa Daudi, nonsasire. 48Bengi nibamuchahalira ayesize. Wenene naguma kusekana muno ati: Mwana wa Daudi, nonsasire. 49Yezu naimerera nalagira kumweta. Nibayeta omuhume nibagira bati: Guma; imuka, akukweta. 50Wenene, ka yanagire omugutu gwe, nairuka namwizaho. 51Yezu nasubamo namugira ati: Okwenda nkukolere ki? Omuhume ati: Mukama wange, nkwenda mbone. 52Mbe Yezu namugambira ati: Genda, kwikiriza kwawe kwakukiza. Kachwi n’ako nabona, namuruba mu muhanda.

Currently Selected:

Marko 10: KED1946

Highlight

Copy