Marko 11
11
YEZU KRISTU NATAHA YERUZALEMU.
1Ka yerire hehi na Yeruzalemu na Betaniya h’ebanga lya Zituni, natuma babili bo mu bahemba be, 2nabagambira ati: Mugende mu charo ekili obusyo yanu, ka mulatahamo, kachwi n’ako mukubona omwana gw’ensikiri gusibikire, ogutakahanamwahoga muntu n’akati; mugusibure mulete. 3Mbe omuntu k’alabagambira ati: Mukukola ki? mumugambire okw’Omukama niwe akugwenda; aho n’aho akugusindika kunu. 4Nibagenda nibasanga omwana gw’ensikiri gusibikire obusyo y’elembo h’esazi, ha ntaganiro y’emihanda, nibagusibura. 5Abandi muli abaliga baliho nibabagambira bati: Mukusibulira ki omwana gw’ensikiri? 6Bonene nibabasubiramo nk’okwo balagirwe Yezu, nibagusindika. 7Nibasagalira Yezu omwana gw’ensikiri, nibagwaraho emyenda zabo, nagwikaraho. 8Bengi nibayara emyenda zabo mu muhanda; abandi bakonoraga amatabi g’amati nibagalira mu muhanda. 9Mbe abaliga bebembere n’abarugaga enuma nibahamuka nibagira bati: Hozana! 10Abarikirwe akwiza h’ezina ly’Omukama; bubarikwe obukama bwa tata wetu Daudi obukwiza. Hozana oluguru mw’igulu! 11Mbe nataha Yeruzalemu mw’eklezia; ka yalozire byona, obwo haliga habere bwebazo, narugayo naza Betaniya n’ekumi na babili.
YEZU NAZUMIRIZA OMUTINI. — NAIRUCH’ABATUNZI MW’EKLEZIA.
12Bwire kucha, ka yarugire Betaniya, enzala nemuruma. 13Ka yalorere hara omutini guli n’amababi, naiza kuhigaho ekintu hali gwonene; ka yaguhikireho, nasangaho amababi gonka, ekindi pai; kuba zaliga zitali naku z’amatini. 14Nasubamo nagugambira ati: Kuruga hati tihaliho alilya ebirabo hal’iwe nangu ira lyona. Abahemba nibahulira#11, 14 Yezu akazumiriza iti elyo kutumanyisya okw’omuntu atakuraba ebirabo bizima alizumirizibwa Mungu ha lunaku olulihereruka..
15Mbe nibahika Yeruzalemu; ka yatahire mw’eklezia, natandika kwiruch’abatunzi n’abaguzi mw’eklezia; nakunura emeza z’abahingya b’empilya n’ebitebe by’abaguzya b’ameba. 16Kandi tiyalekire omuntu kuraba mw’eklezia n’omutegulo. 17Yaliga nayolekerera, nabagambira ati: Si tichandikirwe kiti: Enzu yange eliyetwa enzu yo kusomeramo mu mahanga gona? Kai imwe mwagigira nanga y’abasuma#11, 17 Lora Matayo 21, 13.. 18Abakuru b’abasaserdoti n’abandiki, ka bahulire ebyo, nibahiga obwenge bwo kumwita; kuba bamutinaga, obw’embaga yona yakumisibwaga ebyo yayolekereraga. 19Mbe ka habere kebazo, naruga mu kikale.
KULEMBEREZA NO KWIKIRIZA. — KUKIZ’ABATUHENERA. — OBURUGO BW’OBUHICHA BWE.
20Ka barabireho bwanencha, nibasanga omutini gwayomire kuruga ha mizi. 21Petro ka yezukire, namugambira ati: Rugaba, lora omutini ogw’ozumirize, gwayomire. 22Yezu ka yasubiremo, nabagambira ati: Mwesigirire Mungu. 23Koto nkubagambira nti: Buli muntu aligambira ibanga linu ati: Rugayo, ogende mu nanza, atakutimatimya mu mutima gwe, nawe naikiriza okwo buli echo akugamba kikuhika, kilihika hali wenene. 24Nicho nkubagambirira nti: Buli chona echo mulisaba nimulembereza, mwikirize nimutegeze okwo mulikihabwa, kai kilibezira.
25Mwayemereraga kulembereza, musasirega, mwabaga muli n’ekigambo ha muntu, niho Iso wanu ali mw’igulu abasasire ebiheno byanu. 26Kuba mukabura kusasira, nikwo na So wanu ali mw’igulu talibasasira ebiheno byanu.
27Nibasuba kwiza Yeruzalemu. Yaliga akilibata mw’eklezia, abakuru b’abasaserdoti n’abandiki n’abagurusi nibamwizaho, 28nibamugambira bati: Binu okubikoza buhicha ki? 29Yezu nasubamo nabagira ati: Nkubabuza n’ene kigambo kimo, munsubiremo, nimbagambira obuhicha obwo nkukoza binu. 30Si batisimu ya Yohana yaliga erugire mw’igulu nangu mu bantu? Munsubiremo. 31Bonene nibatekateka bonka, nibagira bati: Ka tulagira tuti: Ekaruga mw’igulu, aligira ati: Kai mukazibirwa ki kugikiriza? 32Kai tukagira tuti: Mu bantu, tukutina embaga; kuba bona balengaga Yohana nk’omulagi wa kimo. 33Mbe nibasubamo nibagambira Yezu bati: Titukumanya. Yezu nasubamo nabagira ati: Hatyo n’ene tinkubagambira buhicha obwo nkukoza binu#11, 33 Lora Matayo 21, 27..
Currently Selected:
Marko 11: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
