Ebikorwa 8

FILIPO ALI SAMARIYA. — SIMONI OMUFUMU. — PETRO NA YOHANA MU BANASAMARIYA.

1Ha lunaku olwo hakabaho kunaranazibwa kuhango mw’Eklezia eyaliga eli Yeruzalemu; bona nibasambalira mu nsi za Buyahudi na Samariya, raba si Entumwa zonka nikwo pai. 2Abantu bazima nibachuma omutumbi gwa Stefano, nibamwaramira charamo kihango. 3Nawe Sauli yaliga nahena muno Eklezia; yatahaga mu mazu, naihamo abaseza n’abakazi, nabasagara kubohwa.

4Mbe abasambere balibataga hona hona nibamanyisya amakuru mazima g’ekigambo cha Mungu. 5Filipo akalengetuka mu charo cha Samariya, nabolekerera ebya Kristu. 6Embaga yahulirizaga ebyagambwaga Filipo, nibahulira mutima gumo, kai nibabona amahano ago yaliga nakora. 7Kuba bengi muli bonene abaliga bali n’emyoyo z’obulofu, bayanaga n’amalaka mahango, nizibarugamo. Kai hona abalema bengi n’abasuntizi baliga nibakizibwa. 8Mbe mu charo echo nihabamo kusemererwa kwingi.

9Omuntu ogwo, izina lye Simoni, ayaliga ali mufumu mu charo omwo mbele na mbele, yaliga nazig’abantu ba Samariya, nayeyeta muntu mukuru; 10ogwo niwe batinaga muno, abato n’abakuru, nibagira bati: Onu niwe mani ga Mungu, ago bakweta bati: mahango. 11Bamuhuliraga, kuba naku ningi yaliga abatangeze n’amaleba ge. 12Ka bekirize Filipo nayolekerera ebigambo bizima by’obukama bwa Mungu, nibabatizibwa mw’izina lya Yezu Kristu, abaseza n’abakazi. 13Hatyo na Simoni wena naikiriza; yabatizibwe, naruba Filipo; kai hona akatangara nakumisibwa kubona amahano n’ebikumyo bihango ebyakorwaga.

14Entumwa ezaliga zili Yeruzalemu, ka zahulire okwo Samariya yayanankwile ekigambo cha Mungu, nizibatumira Petro na Yohana; 15aho ka bahikire, nibabasaba bahabwe Mwoyo Mutakatifu: 16kuba yaliga atakezirire omuntu n’omo muli bonene, nawe baliga babatizibwe chonka mw’izina ly’Omukama Yezu. 17Aho nibabataho emikono, mbe nibahabwa Mwoyo Mutakatifu. 18Simoni ka yabwene okwo kutebwaho emikono kwaletaga Mwoyo Mutakatifu, nabakwatir’empilya, 19nagira ati: Nimumpeho n’ene obuhicha obwo, niho buli owe ndatahoga emikono, yahabwa Mwoyo Mutakatifu. Nawe Petro namugambira ati: 20Empilya zawe nizibuleyo okwo hamo n’ewe, obwo watekateka engabirano ya Mungu kugibonesy’empilya! 21Toli na mugabo na mwanya mu kigambo echo; kuba omutima gwawe tigugororokire mu meso ga Mungu. 22Mbe notamwe obubi bwawe obwo; nosabe Mungu, hamo yakakusasire ekitekateko echo ch’omutima gwawe: 23kuba si nabona okw’oli mu ndurwi nsalizi na mu miguha z’obubi. 24Simoni nasubamo nagira ati: Imwe nimuntwezere ha Mukama, ebyo mwagamba bitanizaho. 25Hatyo bonene nibamanyisya nibagamba ekigambo ch’Omukama, nibasuba Yeruzalemu, nibayolekerera Evanjeli mu nsi ningi z’Abanasamariya.

OMUKONE W’OMUGOLE KANDAKE NABATIZIBWA FILIPO.

26Mumalaika w’Omukama nafumorera Filipo nagira ati: Imuka, ogende lubazu lwo mu malimbe mu muhanda ogukulengetuka kuruga Yeruzalemu niguza Gaza; omuhanda ogwo guli busa. 27Naimuka nagenda. Niwe n’omuntu wa Etyopiya, omukone#8, 27 Omukone ni muntu afwire mu nsembe, nawe ayagizire atyo amani g’abantu. nfura ya Kandake, omugole wa Etyopiya, ayemererere ebintu bye byona, yaliga yezire kuhabudu Yeruzalemu. 28Mu kasubire, yaliga aikere mw’igari lye, nasoma eby’omulagi Izaiya. 29Omwoyo nigugambira Filipo guti: Irira hehi, okwatire igari eli. 30Filipo ka yerukire, namuhulira nasoma Izaiya omulagi, nagira ati: Okuchwa okw’okusombokerwa eby’okusoma? 31Wenene nagira ati: Mpiche nta, hataliho muntu wo kunoleka? Nalembereza Filipo ahaname, aikare nage. 32Mbe omwanya gw’Enandiko ezo yasomaga ni gunu: Nk’enabalega, nasagarwa mw’ibagiro, kandi nk’omwana gw’enabalega ogutali n’ilaka obusyo y’akugusinzura amoya, nikwo na wenene tiyasamize akanwa ke. 33Mu bwekehya bwe elamu ye ekahwa. Alirobeza oluzaro lwe ni ga? kuba obulame bwe bulihwa mu nsi. 34Omukone nasubiramo Filipo nagira ati: Nkukusaba, omulagi akugambaho ga ebyo? akwegambaho nangu akugambaho ondi? 35Filipo nayasamya akanwa ke, natandika ha Nandiko ezo kumutengera ebya Yezu. 36Baliga bakigenda mu muhanda, nibahika ha menzi, omukone nagira ati: Ngaga amenzi, ekikunzibira kubatizibwa ni kiha? 37Filipo nagira ati: Raba noikiriza n’omwoyo gwawe gwona, tikiliho ekikukuzibira. Nasubamo nagira ati: Nkwikiriza okwo Yezu Kristu ali Mwana wa Mungu. 38Nalagira kwemereza igari; ha bubili bwabo nibahanantukira mu menzi, Filipo n’omukone, namubatiza. 39Mbe ka basyokire mu menzi, Omwoyo gw’Omukama nigukwangura Filipo, omukone tiyasubire kumubona; nagenda mu muhanda gwe asemererwe. 40Filipo nasangwa ali Azoto, yarabayoga, nayolekerera Evanjeli mu byaro hona hona, natamwa nahika Kaizariya.

Currently Selected:

Ebikorwa 8: KED1946

Highlight

Copy