Ebikorwa 9
9
KUHINDUKA KWA SAULI. — NABATIZIBWA ANANIYA. — NATANDIKA KWOLEKERERA YEZU.
1Sauli yaliga akili n’olusaro n’obwegongi bwo kwit’abahemba b’Omukama, nagenda ha mukuru w’abasaserdoti, 2namusaba ebaruwa yo kuza Damasko ha masomero, k’alasanga abantu b’omuhanda ogwo, baseza hamo bakazi, abalete Yeruzalemu babohire. 3Ka yalibasire, yerire hehi na Damasko, kachwi n’ako omwanga gwo mw’igulu nigumwezonga. 4Nagwa ha nsi, nahulira ilaka nilimugambira liti: Sauli, Sauli, okunnaranaliza ki? 5Wenene nagira ati: N’iwe ga, Mukama wange? Onu ati: N’ine Yezu, owe okunaranaza; kigumire kusibira ihinzyo. 6Nachundw’olumazi, nazuguma, nagira ati: Rugaba, okwenda nkole ki? Omukama namugira ati: Imuka, ogende mu charo, okwo niyo balakugambira ech’ oli no kukola. 7Nawe abantu abo yaliga ali nabo baliga bemerere, batangere, nibahulira ilaka, nawe batakubona muntu. 8Mbe Sauli naimuka ha nsi, naburur’ameso, nawe atakubona kintu. Aho nibamukwat’omukono nibamusagara Damasko; 9akamarayo naku isatu atakubona, atakulya, atakunwa.
10Damasko haliga haliyo omuhemba omo, izina lye Ananiya; Omukama namubonekera namugambira ati: Ananiya. Onu nagira ati: Ndi hanu, Mukama wange. 11Omukama namugira ati: Imuka, ogende mu muhanda ogwo bakweta bati: Naburonge, obuze mu nzu ya Yuda omuntu izina lye Sauli Omunatarsi; kuba akulembereza. 12(Nabona omuntu, izina lye Ananiya, natahamo kumutaho emikono, abone). 13Nawe Ananiya nasubamo ati: Rugaba, ndahulire eby’omuntu ogwo ha bantu bengi, amabi kingaha ago yakolere abatakatifu bawe ba Yeruzalemu; 14kandi kunu ali n’obutumwa bw’abasaserdoti bwo kuboha bona abakulembereza izina lyawe. 15Nawe Omukama namugambira ati: Nogende kuba ogwo ni kikozo echo nasozire kusagara izina lyange mu mahanga, na mu bakama, na mu bana ba Israeli. 16Kuba si ine ndimwoleka ebyo ali no kusasibwa ha bw’izina lyange. 17Ananiya nagenda, nataha mu nzu; namutaho emikono, nagira ati: Mwana wetu Sauli, Omukama Yezu, ayakubonekere mu muhanda ogw’oiziremo, yantuma ohiche kubona, oizure Mwoyo Mutakatifu. 18Aho honka amantu nigaruga mu meso ge kuti magamba, nasuba kubona; naimuka, nabatizibwa. 19Ka yalire, naguma. Naikara naku nke n’abahemba abaliga bali Damasko.
20Aho honka nayolekerera mu masomero ebya Yezu, okw’ali Mwana wa Mungu. 21Nawe bona abahulire bakakuma, nibagira bati: Onu tiwe yanaranazaga Yeruzalemu abalemberezaga izina lya Yezu, kai ekimulesire kunu ti kubasagara ha bakuru b’abasaserdoti babohire? 22Nawe Sauli nabon’amani mengi muno, natamya Abayahudi abaliga batwire Damasko, namanyisya okwo Yezu ali Kristu.
SAULI NIBAMUCHUMY’OLUGO. — PETRO NAKIZA ENEYA. — KANDI NAZORA TABITA.
23Ka zahikire naku ningi, Abayahudi nibategekerana kumwita. 24Nawe Sauli akamanya emitego zabo. Baliga nibalinda ha malembo mu kiro na musana, bahiche kumwita; 25nawe abahemba nibamutwara mu kiro, nibamuchumy’olugo, bamuteremo mw’itukuru. 26Ka yahikire Yeruzalemu, naroza kwekwatanisya n’abahemba; nawe bona baliga nibamutina, tibekirizaga okwo yabere muhemba. 27Aho Barnaba namutwara namusagara ha Ntumwa, nabarobeza okwo yabwene Omukama mu muhanda n’okwo yamufumorere, kandi n’okwo yakozire Damasko n’obwesige mw’izina lya Yezu. 28Mbe yaliga ali nabo Yeruzalemu, natahamo nahuruka, nayolekerera mw’izima ly’Omukama, atakukukwa. 29Yafumoreraga abasenzi, nahakanisyanya n’Abagereki; nawe bonene bahigaga kumwita. 30Batabani babo ka bamanyire, nibamusagara Kaizariya, nibamusindika Tarsi.
31Mbe Eklezia negira omulebo muli Buyahudi yona na Galilaya na Samariya; nekura, nelibatira mu butini bw’Omukama, neizura ekihumuzo ch’Omwoyo Mutatatifu. 32Mbe aho Petro naraba mu maka ga bona, nahika ha batakatifu abaliga batwire Lyda. 33Okwo nasangayo omuntu ogwo, izina lye Eneya, kuruga myaka munana alambire ha kitabo, yaliga alemere amaguru. 34Petro namugambira ati: Eneya, Omukama Yezu Kristu yakukiza, oyeyalire. Aho n’aho naimuka. 35Bona abaliga batwire Lyda na Salona bakamubona, nibahinduka ha Mukama.
36Yope haliga haliyo omuhembakazi, izina lye Tabita, nikwo kugira bati: Dorka. Ogwo yaliga aizwire ebikorwa bizima n’emiherezo ezo yaherezaga. 37Mbe mu naku ezo narwara nafwa; ka bamazire kumunabya, nibamuta mu kano k’enzu. 38Obwo Lyda eli hehi na Yope, mbe abahemba ka bahulire okwo Petro aliyo okwo, nibatum’abantu babili hali wenene, nibasaba bati: Oterirwa kutwizaho. 39Petro naimuka naiza nabo. Ka yahikire, nibamusagara mu kano k’enzu; bakifwerwa beba bona nibamwekumiriraho nibalira, nibamwoleka enkanzu n’emyenda ezo Dorka yaliga abakolere. 40Petro nabahurucha bona hanza, natez’ebizwi, nasoma; nahindukira ha mutumbi, nagira ati: Tabita, imuka. Wenene naburur’ameso; ka yabwene Petro, naikara. 41Namuha omukono namwimucha; ka yayesire abatakatifu na bakifwerwa beba, namubaha, ali muzima. 42Ekigambo echo nikisugana muli Yope hona hona, bengi nibaba bo kwikiriza Omukama. 43Mbe Petro naba wo kumara naku ningi ow’omwozo ogwo Simoni, omuhazi w’empu.
Currently Selected:
Ebikorwa 9: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
