Ebikorwa 5

ANANIYA NA SAFIRA. — EKLEZIA NEKURA. — ENTUMWA MW’IBOHERO NA MUMALAIKA.

1Nawe omuntu ogwo, izina lye Ananiya, n’omukazi we Safira, naguza ensambu; 2natebyaho obuguzi bwayo, omukazi we amanyire, naletaho ekihinzu nakita mu maguru g’Entumwa. 3Petro namugambira ati: Ananiya, isitani lyaloliza ki omutima gwawe kuziga Mwoyo Mutakatifu no kutebyaho obuguzi bw’ensambu? 4Aho sanga ekili hal’iwe, sanga etali yawe si? kandi kumara kuguza sanga etali mu buhicha bwawe? Kai ekigambo echo okitere ki mu mutima gwawe? Tozigire abantu, nawe Mungu. 5Mbe Ananiya ka yahulire ebigambo ebyo, nagwa, nafwa. Abahulire bona bakakwatw’obutini bwingi. 6Abasigazi nibemuka nibamutwara, nibamusagara kuza kumunaga. 7Niharabaho mwanya kuti gw’esaha isatu, omukazi we naiza, atakumanya ebyaliga byagwire. 8Petro namugambira ati: Ngambira, mukazi we, si ensambu mugigulize binu byonka? wenene namugira ati: Yee, nibyo. 9Petro namugambira ati: Mulaganire ki kuroza Omwoyo gw’Omukama? Amaguru g’abazikire baro gahikire ha mulyango, ngaga, n’ewe bakukusagara. 10Aho honka nagwa mu maguru ge, omwoyo niguhwamo. Abasigazi nibatahamo nibamusanga afwire; nibamusagara, nibamuzika hehi n’omuseza we. 11Eklezia yona na bona abahulire ebyo nibakwatw’obutini bwingi.

12Enyamo n’amahano mengi gakakorwa emikono z’Entumwa mu bantu; baliga basumbire hamo mu lukale lwa Salomoni. 13Mu bandi haliga hatalimo muntu wo kuza kubetobamo; nawe abantu baliga nibabakuza. 14Obwingi bw’abakwikirizaga Omukama nibukana kweyongera mu baseza n’abakazi; 15baletaga ha mihanda abarwere, babatwalire ha bitabo na ha malaro, niho Petro yeza, ekiminimini che kikaswekaho omo muli bonene, yakira mu ndwara ye. 16Banamwingi bo mu byaro ebihererenwe na Yeruzalemu nibaleta abarwere n’abaliga bakwasirwe emyoyo z’obulofu, nibakizibwa bona.

17Omukuru w’abasaserdoti naimuka n’abaliga bali nage, (nibo Abasadusayo) bali n’ichubi lingi; 18nibataho Entumwa engaro, nibabasagara mw’ibohero lya bukama. 19Nawe mumalaika w’Omukama nakingur’emilyango z’ibohero mu kiro, nabahurucha nagira ati: 20Nimugende, mwemerere mw’eklezia, mugambire abantu ebigambo ebyo byona by’obulame. 21Ka bahulire, nibataha mw’eklezia mu lumambya, nibolekerera. Omusaserdoti mukuru naiza n’abo yaliga ali nabo, nibasoroza abalamuzi n’abagurusi bona b’abana ba Israeli, nibatuma abantu kuza kubenda mw’ibohero. 22Aberu ka bagenzire, nibakingura ibohero, nibasanga batalimo, nibasuba, 23nibagira bati: Ibohero twasanga likingire zirumire, n’abalinzi bemerere ha milyango; nawe ka twakingula, titwasanga muntu mu nda. 24Abakuru bo mw’eklezia n’abakuru b’abasaserdoti ka bahulire ebigambo ebyo, nibatamibwa okwo bilaba. 25Omuntu ondi naiza nabatengera ati: Mbabo abantu abo musagere mw’ibohero, bali mw’eklezia, bemerere, bakwolekerera abantu. 26Aho omukuru nagenda n’aberu, nabaleta, kutali kw’amani, kuba batinaga abantu, batabalasy’amabale.

PETRO NASUBIRAMO ABASASERDOTI. — EBIGAMBO BYA GAMALYELI.

27Ka babalesire, nibabatahya mw’ilamuliro; omukuru w’abasaserdoti nababuza, 28nagira ati: Tukabazibira mani kuleka kwolekerera mw’izina elyo, kai imwe mwezwize Yeruzalemu ebyo mukwolekerera; kandi mukwenda kuleta ensagama y’omuntu ogwo hal’itwe. 29Petro nasubamo n’Entumwa nibagira bati: Tuli no kuhulira Mungu kukir’abantu. 30Mungu wa batata yazokwere Yezu, owe mwesire nimumusunga h’eti. 31Omukuru ogwo omuchunguzi Mungu akamukuza n’omukono gwe gw’obulyo, Israeli ehiche kuhabwa kutamwa no kukizibwa ebiheno. 32Itwe n’itwe mbona z’ebigambo ebyo, na Mwoyo Mutakatifu, owe Mungu yahere abakumuhulira bona. 33Ka bahulire batyo, nibasara nilununka, nibatekateka kubeta.

34Omuntu ogwo Mufarizayo naimuka mw’ilamuliro, izina lye Gamalyeli, ali mubuya w’ebilagiro nakuzibwa mu bantu bona, nalagira Entumwa zize hanza mwanya muke, 35nabagambira ati: Imwe baseza Banaisraeli, nimwetegereze imwe abene okwo mulagirira abantu banu. 36Kuba mu naku aho Teyoda akemuka, nayeyeta muntu mukuru, naba muhemba mukuru w’abantu kuti magana ana; kumara naitwa, n’abamwikirizaga bona nibanyarambuka, kai nibamarwaho. 37Enuma y’ogwo naimuka Yuda Omunagalilaya, mu naku zo kubarwa, nakongy’abantu kumuruba; wenene nabura, na buli bona abaliga bamurubire nibanyarangana. 38Mbe hati nkubagambira nti: Mutagane n’abantu banu, mubaleke; kuba ekigambo hamo omulimo gukaba gurugire mu bantu, gukuheneka; 39nawe raba gurugire hali Mungu, timukuhicha kugumaraho, mutabwenwe okwo mukurwanana na Mungu. Nibekiriza; 40nibayeta Entumwa, nibabasanzura, nibabazibira koto kufumora mw’izina lya Yezu; nibabasindika kugenda. 41Bonene nibaruga mw’ilamuliro basemererwe, obwo babwenwe bahikire kwemera ebinaranazo ha bw’izina lya Yezu. 42Buli lunaku tibayosaga kwolekerera mw’eklezia na mu maka, no kutenga ebigambo bizima bya Kristu Yezu.

Currently Selected:

Ebikorwa 5: KED1946

Highlight

Copy