Ebikorwa 4
4
PETRO NA YOHANA NIBASAGARWA MW’ILAMULIRO. — NIBAZIBIRWA KUTENGA EBYA YEZU.
1Baliga bakifumora n’abantu, nibemukirwa abasaserdoti n’omukuru wo mw’eklezia n’Abasadusayo#4, 1 na, 2babihirirwe obwo bayolekereraga abantu, nibabatengera ebya Yezu kuzoka mu bafu; 3nibabataho engaro, nibabasagara mw’ibohero kuhika obwire kucha, kuba haliga habere kebazo. 4Nawe banamwingi muli banu abahulire ekigambo bakekiriza: nihabaho olubaro lw’abantu bihumbi bitanu.
5Mbe obwire ka bwachere, abakuru b’abantu n’abagurusi babo n’abandiki#4, 5 Lora Matayo 5, 20. nibekobyanya Yeruzalemu, 6na Anna, omukuru w’abasaserdoti, na Kaifa, na Yohana, na Alekisanderi, na bona abaliga bali bo mu luganda lw’abasaserdoti. 7Nibabemereza hagati, nibababuza bati: Kinu mukikolize mani ki hamo izina ki? 8Aho Petro, ka yezuzibwe Mwoyo Mutakatifu, nabagambira ati: Imwe bakuru b’embaga n’abagurusi, nimuhulirize. 9Raba nimutulamula obwo twakolere kuzima omulema, echo wenene yakirizibweho, 10muli no kumanya, imwe mwena n’ihanga lyona lya Israeli, okwo mw’izina ly’Omukama wetu Yezu Kristu Omunazareti, owe mwalegire ha musalaba n’owe Mungu yazokwere mu bafu, nimwo onu yakirizibwe, naimerera obusyo yanu. 11Wenene nilyo ibale elyo imwe abombeki mwayangire, niliba ibale lyo mu kisago#4, 11 Abayahudi baliga bayangire Yezu, nk’ebale elyo.; 12kandi muli ondi tihalimo obuchunguzi: no kuba tihaliyo izina lindi ifwo y’igulu, elyaherwe abantu, elyo tuli no kuchunguka nalyo.
13Ka babwene obugume bwa Petro na Yohana, kai nibetegereza okwo bali bantu bateyegire, batali na bwenge, nibakuma; hona bamanyaga okwo baliga bali na Yezu; 14obwo babonaga omuntu ayakizibwe aimerere na bonene, mbe nibaburwa echo kusubamo. 15Nibalagira kubahurucha hanza, baruge mu nzu y’omutegeko; mbe nibategekerana bonka, 16nibagira bati: Abantu banu tubagire tuta? kuba ihano limo lyakorwa bonene, elikumanywa abatuzi bona ba Yeruzalemu; lili ha bweru, kai titukuhicha kulihakana. 17Nawe lileke kusugana mu bantu, mbe tubachahalire, baleke kusuba kufumorera abantu mw’izina elyo. 18Ka babayesire, nibabatengera kulekera koto kufumora hamo kwolekerera mw’izina lya Yezu. 19Nawe Petro na Yohana ka basubiremo, nibabagambira bati: Nimulamule, raba kuhikire mu meso ga Mungu kuhulira imwe kukira kuhulira Mungu; 20kuba titukuhicha kuleka kufumora ebyo twabwene n’ebyo twahulire. 21Bonene nibabachahalira, nibabasindika kugenda, tibabwene okwo balabanaranaza, kuber’abantu, kuba bona basimiraga Mungu echagwire hali ogwo. 22Kuba si omuntu ayakizibwe ihano elyo yaliga ali n’emyaka kukira makumi ana.
ESALA Z’ABAHEMBA. — EMITULIRE EHIKIRE Y’ABAKRISTU BO KUTANDIKA.
23Ka babasindikire, nibeza ha bezabo, nibabarobeza ebyo abakuru b’abasaserdoti n’abagurusi babatengere. 24Banu ka bahulire, nibereza ilaka lyabo mutima gumo hali Mungu nibagira bati: Mukama wetu, niwe wakozire igulu n’ensi, n’enanza na byona ebilimo; 25niwe wagambisize Mwoyo Mutakatifu mu kanwa ka tata wetu Daudi, omwana wawe, oti: 26Ab’ensi bemukire, n’abakuru basumbire hamo kurwana Omukama, kurwana Kristu we. 27Kuba bakasumba koto mu kikale kinu kurwana Omwana wawe mutakatifu Yezu, owe wasigire amazuta, ba Herode na Ponsyo Pilato n’abasenzi n’ihanga lya Israeli, 28bahikirize eby’omukono gwawe n’obwetegeki bwawe byaliga byalagire. 29Mukama wetu, hati nolore echaha chabo, nohe aberu bawe kufumora ekigambo chawe n’obwesige bwona, 30nogorore omukono gwawe, niho obwehulizi n’enyamo n’amahano bikorwe mw’izina ly’Omwana wawe mutakatifu Yezu. 31Ka balembereze, enzu aho baliga basumbire netengeta; bona nibezuzibwa Mwoyo Mutakatifu, mbe nibafumora ekigambo cha Mungu n’obwesige.
32Obwingi bw’abekirize baliga bali b’omutima gumo n’omwoyo gumo; tihaliho muntu muli bonene ayayetaga ebyo ali nabyo ati: ni byange; nawe baliga bakobere byona. 33N’amani mengi Entumwa nizimanyisya kuzoka kwa Yezu Kristu, Omukama wetu; kandi omugisa mwingi gwaliga guli muli bonene bona. 34Kai muli bonene haliga hatalimo muntu akenire: kuba buli ayaliga ali n’ensambu hamo amazu, yabiguzaga, yaletaga obuguzi bwabyo obwarugamoga, 35yabutaga mu maguru g’Entumwa; bwagabanwaga buli muntu ha bw’obukene bwe. 36Mbe omulevita#4, 36 Abalevita nibo abantu abakolaga emilimo mw’eklezia hamo n’abasaserdoti. Yozefu Omunasipriya, owe Entumwa zarukire Barnaba, (nikwo kugira oti: mwana w’obuhumuza), 37yaliga ali n’ensambu, nagiguza, naleta obuguzi bwayo, nabuta mu maguru g’Entumwa.
Currently Selected:
Ebikorwa 4: KED1946
Highlight
Share
Copy

Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.