Ebikorwa 3
3
PETRO NAKIZA OMULEMA W’OBUZARWA. — NAYOLEKERERA KUTAMWA KW’EBIHENO.
1Petro na Yohana nibanegera mw’eklezia mu saha yo mwenda yo kulembereza. 2Omuntu ogwo, ayaliga alemere kuruga mu nda ya nina, bamubatwire; bamutaga naku zona ha mulyango gw’eklezia, ogwo bakweta bati: Gusemere, ahiche kukurata abatahaga mw’eklezia. 3Wenene ka yabwene Petro na Yohana nibatandika kutaha mw’eklezia, nabasaba bamuheho akantu. 4Petro namwetegereza na Yohana, nagira ati: Notulore. 5Wenene nabalora, nategeza kuhabwa ekintu hali bonene. 6Nawe Petro nagira ati: Ezahabu n’efweza tindi nabyo; nawe ka nkuhe echo ndi nacho, kinu: mw’izina lya Yezu Kristu Omunazareti imuka, olibate. 7Nakwata omukono gwe gw’obulyo, namwimucha; aho honka amaguru ge n’enonga niziguma. 8Ka yachumire, nayemerera nalibata; nataha nabo mw’eklezia, yaliga nalibata nachuma, nakuza Mungu. 9Embaga yona nemubona nalibata nakuza Mungu. 10Nibamumanya okw’ali wenene ayekaraga hali Gusemere, omulyango gw’eklezia, nasabiriza, nibezur’obutini n’omutangaro kuber’ebyagizire hali ogwo. 11Ka yayomerere Petro na Yohana, abantu bona nibaberukirira mu lukale, olwo bakweta bati: olwa Salomoni, nibakuma.
12Petro ka yabwene, nasubiramo abantu ati: Baseza mwe, Banaisraeli, mukukumisibwa ki binu? nangu mukutunonkolera ki oti henda onu tumulibasize n’amani getu hamo na buhicha yetu? 13Mungu wa Ibrahimu, Mungu wa Izaki, Mungu wa Yakobo, Mungu wa batata akakuza Omwana we Yezu, owe imwe mwasagere, kai mukamwanga mu meso ga Pilato, ka yamulamwire kusurumurwa. 14Imwe mukayanga Omutakatifu n’omuronge, nimusaba omuntu mwisi, niwe babahe; 15nimwita Kana bulame, owe Mungu yazokwere mu bafu, owe itwe tuli mbona ze. 16Na ha bwo kwikiriza izina lye onu, owe mukubona no kumanya, izina lye likamutamo amani; kai kwikiriza okukuruga hali wenene kukaleta obukiza obwo bwa kimo ha meso ganu mwena. 17Mbe hati, bana betu, nkumanya okwo mwakikozire mutakumanya, nk’abakuru banu. 18Nawe Mungu akahicha atyo ebyo yatengire kara mu kanwa k’abalagi bona, okwo Kristu we alisasibwa.
19Mbe mutamwe, muhinduke, niho ebiheno byanu bikizibwe, 20niho zize enaku zo kuhumura, niziruga mu meso g’Omukama, kai alituma owe babayolekerereho, Yezu Kristu, 21niwe wo kwanankurwa mw’igulu kuhika mu naku zo kusuba kusemerezamo byona, ebyo Mungu yafumorere mu kanwa k’abalagi be batakatifu kuruga ira lyona. 22Kuba Musa akagira ati: Mungu Omukama wanu aliha mu batabani banu omulagi nk’ene; mulimuhulira muli byona na byona ebyo alibafumorera. 23Halibaho kinu: buli muntu alibura kuhulira omulagi ogwo, alirukibwa mw’ihanga. 24N’abalagi bona kuruga Samueli n’abarubireho, abafumwere, bakatenga enaku ezo. 25Imwe muli bana b’abalagi n’ab’omulago ogwo Mungu yalagire batata, nagambira Ibrahimu ati: Mu luganda lwawe nimwo enganda zona zo mu nsi ziliboner’omugisa. 26Mungu akatandika kwimukiza imwe Omwana we, namutuma kubabarika, niho buli muntu ahinduke, aruge mu bubi bwe.
Currently Selected:
Ebikorwa 3: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
