Ebikorwa 1

EBIGAMBO BYO KUTANDIKA. — KUHANAMA KWA YEZU MW’IGULU.

1Ye Teofili, mu kitabo cho kutandika nkagamba byona ebyo Yezu yatandikire kukola no kwolekerera, 2kuhika ha lunaku olwo yalagire Entumwa ezo yasozire, n’Omwoyo Mutakatifu, nasagarwa mw’igulu#1, 2 Ekitabo cho kutandika echo niyo Evanjeli eyandikirwe Luka mutakatifu.; 3kandi kumara obusasi bwe akabeyoleka n’enyamo ningi okwo yaliga nalora, mu naku makumi ana yababonekeraga nafumora eby’obukama bwa Mungu#1, 3 Lora Matayo 3, 2..

4Yaliga nalya nabo, nabalagira baleke kuruga Yeruzalemu, nawe balinde omulago gwa Tata, ogwo mwahulire mu kanwa kange, engambo ye; 5kuba Yohana yabatizaga n’amenzi, nawe imwe mulibatizibwa n’Omwoyo Mutakatifu, enaku zitakarabireho ningi. 6Mbe abaliga basumbireho nibamubuza bati: Mukama wetu, si mu naku zinu nizo okusubizamo obukama bwa Israeli#1, 6 Abanaisraeli, nibo Abayahudi, baliga batwerwe Abanaroma. Abahemba ba Yezu, nk’abanaluganda babo bona, bachwaga bati: Masiha, k’alaiza, alitwar’engoma ya Daudi, aliba mukama nka wenene, kandi alitwara amahanga gona g’ensi.? 7Nabagambira ati: Ti mulimo gwanu kumanya emyanya n’enaku ezo Tata yatereho mu buhicha bwe; 8kandi mulibona amani g’Omwoyo Mutakatifu alibahanantukira, kai imwe muliba mbona zange muli Yeruzalemu, na Buyahudi yona na Samariya, no kuhika ha muhero gw’ensi. 9Mbe ka yafumwere ebyo, nibamubona nayerera oluguru, elire nilimukingiriza ha meso gabo. 10Baliga bakimulora oluguru nagenda, nibo na bamalaika babili baliho hehi na bonene, bazwere zimwera, 11nibagira bati: Imwe baseza ba Galilaya, mwikazibwe ki nimulora oluguru? Yezu onu ayasagarwa mw’igulu nabarugaho, nikwo aliza atyo nk’omwo mwamubonera nagenda mw’igulu.

ENTUMWA NIZISUMBA HAMO. — MATYASI NASORWA KUBA NTUMWA.

12Mbe aho nibasuba Yeruzalemu, nibaruga h’ebanga elyo bakweta bati: Zituni, elili hehi na Yeruzalemu kuti lugendo lw’olunaku lwa sabato. 13Ka batahire mu nzu, nibanegera aho baliga bali Petro na Yohana, Yakobo na Andrea, Filipo na Toma, Bartolomayo na Matayo, Yakobo w’Alfeyo na Simoni Zelote, na Yuda wa Yakobo. 14Abo bona baliga bagumire bali mutima gumo mu kulembereza, hamo n’abakazi, na Maria Nina Yezu, n’abatabani babo#1, 14 Lora Matayo 12, 50..

15Mu naku ezo Petro naimerera hagati ya batabani babo, (embaga y’abantu bona hamo ehikire igana na makumi abili), nagira ati: 16Bana betu, baseza, Olwandiko luli no kuhika, olwo Mwoyo Mutakatifu yatandikire kugamba mu kanwa ka Daudi, ebya Yuda, ayaliga ali mwebembezi w’abakwasire Yezu; 17ayabalirwaga mul’itwe, kandi yaliga ali n’omwanya mu mulimo gunu. 18Wenene akatunga omusiri gw’empera y’obuyaga; akesunga, nabaruk’enda, amara ge gona nigazagira. 19Ekigambo echo kikamanywa mu batuzi bona ba Yeruzalemu, n’ensambu egyo neyetwa mu lulimi lwabo eti: Hakeldama, niyo ensambu y’ensagama. 20Kuba mu kitabo ch’Ezabuli hayandikirwemo hati: Obuturo bwabo bube busa, kai atabaho wo kuturamo, kandi omwoga gwe gusubweho ondi. 21Mbe ni hakili mu bantu banu abasumbire n’etwe naku zona, ez’Omukama Yezu yatwizire, kai akaturugamo, 22kuruga ha batisimu ya Yohana kuhika ha lunaku olwo yaturugireho nasagarwa, omo muli banu abe mbona yo kuzoka kwe hamo n’etwe. 23Nibataho abantu babili; Yozefu, owe bayetaga bati: Barsaba, echesongoro che ali Yusto, na Matyasi. 24Nibalembereza nibagira bati: Rugaba, iwe akumanya emitima za bona, notwoleke owe olasoramo mu babili banu, 25wo kusuba ha mwanya gw’omulimo gunu n’obutumwa obwo Yuda yanagire, agende ha mwanya gwe. 26Mbe nibabaha olweso; olweso nilugwa hali Matyasi, mbe nabalirwa n’Entumwa ikumi n’emo.

Currently Selected:

Ebikorwa 1: KED1946

Highlight

Copy