Yohana 21

YEZU NABONEKERA ABAHEMBA HA NANZA YA TIBERIYADI.

1Kumara Yezu nasuba kweyoleka abahemba be ha nanza ya Tiberiyadi. Akeyoleka ati: 2Abaliga baliho hamo na Simoni Petro ni Toma, owe bakweta bati: Didimo, na Natanæli, ayaliga ali wa Kana ya Galilaya, n’abende Zebedevo n’abandi babili bo mu bahemba be. 3Simoni Petro nabagambira ati: Nagenda kutega. Nibamugira bati: N’etwe tukugenda twena. Nibagenda, nibahanama mu bwato; mu kiro echo tibesire kintu. 4Ka habere kanencha, Yezu yaliga aimerere ha chambu; nawe abahemba tibamanyire okwo yaliga ali Yezu. 5Mbe Yezu nabagambira ati: Bana mwe, muliho n’enfwi? Nibamusubiramo bati: Pai. 6Nabagira ati: Nimunage enero ha lubazu lw’obulyo lw’obwato, mukwita. Mbe nibanaga; tibahikize kuzuba ha bwingi bw’enfwi. 7Mbe omuhemba owe Yezu yayendaga nagambira Petro ati: Niwe Omukama. Simoni Petro ka yahulire okw’ali Omukama, nayeboha enkanzu, kuba yaliga ali busa, nayenaga mu nanza. 8Kandi abahemba bandi nibezira mu bwato, (kuba haliga hatali hara n’echaro, kuti ntambi magana abili), nibakwesa olwero lw’enfwi. 9Mbe ka basyokire ha charo, nibabona amakara galiho n’enfwi eterwe ha luguru, n’omukate. 10Yezu nabagambira ati: Nimuleteho enfwi ezo mwaita hati. 11Simoni Petro nagenda mu bwato, nakwesera olwero ha charo, lwizwire enfwi mpango igana limo na makumi atanu n’enfwi isatu. Naho zaliga zili ningi zityo, hona olwero tilwatemukire. 12Yezu nabagambira ati: Mwize mulye. Kandi mu baliga bekere bona tihaliho ayahigahere kumubuza ati: N’iwe ga? obwo bamanyaga okw’ali Omukama. 13Yezu naiza, nakwat’omukate, nabaha, n’enfwi yona nikwo. 14Olwo ni lwa kasatu Yezu kweyoleka abahemba be, kuruga yazokire mu bafu.

PETRO NASIGIRWA ENABALEGA ZA YEZU. — EBY’OLUFU LWA PETRO NA YOHANA.

15Ka bamazire kulya, Yezu nagambira Simoni Petro ati: Simoni, mwende Yohana, okunenda si kukira banu? Namugambira ati: Nikwo, Mukama wange, okumanya okwo nkukwenda. Namugambira ati: Lisya abana b’enabalega zange. 16Nasuba kumugambira ati: Simoni, mwende Yohana, okunenda? Onu nagira ati: Nikwo, Mukama wange, okumanya okwo nkukwenda. Namugira ati: Lisya abana b’enabalega zange. 17Namugambira lwa kasatu ati: Simoni, mwende Yohana, okunenda? Petro nazuba, obwo yamugambire lwa kasatu ati: Okunenda? namugira ati: Mukama wange, iwe okumanya byona; okumanya okwo nkukwenda. Namugambira ati: Lisya enabalega zange#21, 17 Abana b’enabalega nibo abakristu; enabalega zonene nizo Entumwa n’abahunguzi bazo: Abepiskopi n’Abasaserdoti. N’ebigambo ebyo Yezu akaha Petro n’abahunguzi be obuhicha bwo kugerera abakristu bona, abato n’abakuru, nk’omulisya nalisya enabalega ze, nazihabura, nazikingiriza..

18Koto koto nkukugambira nti: Okili namuto, wayebohaga omwene nogenda ey’oyendaga; nawe k’olikura, oligoror’emikono, ondi nakuboha, kai nakusagara ey’otakwenda. 19Ebyo akabigamba nalenganisya olufu olwo Petro alikulizaho Mungu#21, 19 Petro akafwer’edini, nibamulega ha musalaba; nawe wenene mu bwekehya bwe bwingi nasaba baleke kumulega ha musalaba nka Yezu Omukama we, bamulege omutwe guli ifwo; mbe abesi be nibekiriza, nibagira batyo.. Ka yatengire ebyo, namugira ati: Nondube. 20Petro ka yekebukire, nabona omuhemba owe Yezu yayendaga namuruba, ayaliga aikere mu nzu yo kuliramo ha kifuba che, namugambira ati: Mukama wange, alikutunda ni ga? 21Mbe Petro ka yamubwene, nagambira Yezu ati: Mukama wange, kai onu akuba ata? 22Yezu namugambira ati: Raba ninenda aikare atyo kuhika nize, echakusasa ni kiha? Iwe, nondube. 23Mbe ekigambo echo nikisugana mu batabani betu#21, 23 Omwandiki mutakatifu Yohana akweta abakristu ati: Batabani betu, nka Yezu wenene, olwo yabonekere Maria Madalena. Lora Yohana 20, 17., okw’omuhemba ogwo talifwa. Yezu yaliga atamugambire ati: Talifwa, nawe ati: Raba ninenda aikare atyo kuhika nize, echakusasa ni kiha?

24Ogwo niwe omuhemba ayamanyisize binu, nabyandika; kai tukumanya okwo kumanyisya kwe kukomereze. 25Haliyo n’ebindi bingi ebyo Yezu yakozire; ebyo bikiba byandikirwe byona kimo kimo, nkuchwa nti: n’ensi yonene tiyakuhikize kubika ebitabo ebyakwandikirwemo.

Currently Selected:

Yohana 21: KED1946

Highlight

Copy