Yohana 20

Koryoka kwo Yesu

(Mataayo 28:1–8; Maariko 16:1–8; Ruuka 24:1–12)

1Atabhoori mo‑rungʼöörö, orosiko ro Chumabhiiri, Mariyamu o koru mo‑moghya o Maghitara aghaye mo‑mbeehera e Yesu. Akabhöna eriibhohe riire rehiringituru koru mo‑ghisëku ke mbeehera. 2Mbe, aghaye arayaara mbagha o‑Bheetero na kwo moonamwegha uno Yesu are asiighiri. Akabhabhoorera akabhugha, “Abhaato mbaruusiri erihundughu re Mutëmi wiito mo‑mbeehera, koru toteeche hayi bharehiriri!”

3Bheetero no omoonamwegha wuure owonde, bhaaghaye bhwango mo‑mbeehera. 4Bhombe bhabhere bhaaghaye bharahe, amare omoonamwegha wuure owonde akayaara ghokera Bheetero na ghukangata kohika mo‑mbeehera. 5Akiihiinya, aghasongoreri mo‑mbeehera, akarighi chasanda chino ꞉bhaamokundekiiri Yesu, amare taasöhiri‑mu. 6Mbe, Simiyooni Bheetero woose akaacha amurööbhiire, aghasöha mo‑mbeehera inkongʼorimu na ghochibhöna changibho echeero chino ꞉bhaamokundekiiri Yesu. 7Wiiki aghakibhöna ne eghitambara kino ꞉bhaamubhöhiri Yesu a‑mutu. Eghitambara kiyo, ghetaare haghirohamu na changibho echende, amare ngekunyuru na ghotooru rubhareka. 8Mbe, omoonamwegha wuure owonde, uno akangatiri kohika hayo, woose aghasöha‑mu. Akamööhi, aghakumi ghano arooche, 9gho kubha mbaare bhakeere kumënya Amandëkö Amatööbhiyu ghano ghakobhugha, Yesu nakwëndëru aryoke koru mo‑bhaku. 10Mbe, abhaanabheegha bhaare bhaghagharuka mo‑chaaka cheebho.

Yesu ˆakamorwera Mariyamu o Maghitara

(Mataayo 28:9–10; Maariko 16:9–11)

11Amare Mariyamu o Maghitara aghasaagha imeeriire anche haghuhe na ambeehera, ino ararera. Eriibhagha are ararera, akiihiinya na ghosongoreri‑mu, 12akabharighi bhamarayika bhabhere bhabheekiri changibho cheero chayi. Bhamarayika bhayo mbaare bhiikeere hano erihundughu re Yesu reere riraaruru, umu hano omutu ore, no owonde mo‑maghoro. 13Bhamarayika bhaare bhakamobhoori bhakabhugha, “Oo yiima, neke okorerera?” Iwe akabhagharokeri akabhugha, “Abhaato mbariimokiri erihundughu re Mutëmi waane, wiiki ntyeche hayi bharehiriri!”

14Hano Mariyamu amariri ghosiikëra amangʼana ghayo, aghiishoorori, akamorighi Yesu imeeriire, amare Mariyamu taamumënyiri. 15Yesu akamobhoori akabhugha, “Oo yiima, neke okorerera? Kana, n‑niwe oghutabhara?” Mariyamu ꞉niihëëbhiri kubha omooto uyo naare omutamishi o kinyaweera, akamugharokeri akabhugha, “Oo taata, aribha n‑iye oreruusiri erihundughu reeche, omboorere hayi oretooriri, eni neeghuye neriimoki.” 16Yesu akamobherekera akabhugha, “Iye Mariyamu!” Niho Mariyamu aghiishoorori wiiki, akamorighi Yesu, aghasiikëra gho Kebhuraaniya akabhugha, “Rabhooni!” Egheteemoro keeche “Omweghi.” 17Yesu akamobhoorera akabhugha, “Otangööta. Nekeere ntiimara neghi Mwishaaro o‑Taata. Mbe, nooghi obhabhoorere abhahiiri bhaane,#20:17 Abhahiiri bhaane. Egheteemoro keeche n‑abhaanabheegha bhaane. kubha ˆneeghaye Mwishaaro o‑Taata waane, nawe n‑Taata waanyu, kwo Ryobha reene naryo n‑Eryobha reenyu.” 18Niho Mariyamu o Maghitara aghaye kwo bhaanabheegha bha Yesu, akabhabhoorera amangʼana ghayo, akabhugha, “Mööhi, eni nemorooche Omutëmi!” Akabhatöngöchëri ghoose ghano Yesu amobhooriire.

Yesu ˆakabharwera abhaanabheegha bhaache

(Mataayo 28:16–20; Maariko 16:14–18; Ruuka 24:36–49)

19Ekabha omughörööbha orosiko ruyo ruyo o rumbërë, abhaanabheegha bha Yesu mbaare bhiikomiine mo‑nyumba imu na ghwighara charwighe gho kubha mbaare bharabhatiina abhakangati bha Bhayahuuti. Yesu akaacha akiimeerera ghateghate yaabho, akabhakëëri akabhugha, “Nekobhakëëri. Omurëmbë ubhe na niinyu!” 20Hano amariri kobhugha ghayo, akabhëërëki amabhökö ghaache no orubharu rooche. Hano abhaanabheegha bhamorooche Omutëmi, bhaghachömëru chwee. 21Yesu akabhabhoorera wiiki akabhugha, “Omurëmbë ubhe na niinyu. Kinya bhuno Eryobha rentomiri eni, hangʼu hangʼu na neeni ˆnekabhatoma inyu mo‑se ino.” 22Niho akabhahuuteri omwika, akabhabhoorera akabhugha, “Mosongʼaane Akörö Ahörëëru. 23Mbe, morabhaabhëra abhaato amasari ghaabho, mbaabhiiru ne Eryobha. Aribha motabhaabhiire, bhataabhiiru ne Eryobha.”

Yesu ˆakamorwera Tomaso

24Mbe, umu mo‑bhaanabheegha ikomi na abhere bha Yesu, eriina reeche Tomaso, uno bhamobherekiire Eghisare, taare haghirohamu na abhaanabheegha abhande eriibhagha Yesu akobharwera. 25Mbe, abhaanabheegha abhande bhayo bhakamobhoorera bhakabhugha, “Itu ntomorooche Omutëmi.” Amare iwe akabhagharokeri akabhugha, “Eni nteeghotora ghokumi ghayo aribha netagharooche singa amaghaati gha misumaari mo‑mabhökö ghaache na ghoghaturi ne ekyara keene, na ghotoora okubhökö koone mo‑rubharu rooche.”

26Hano chaasiko mohungate chehetiri, abhaanabheegha bha Yesu bhaghiikomana haghirohamu wiiki mo‑nyumba. Orosiko ruyo Tomaso woose naare haghirohamu nabho. Charwighe ncheere chigheere, hayo hayo, Yesu akaacha, akiimeerera ghateghate yaabho, akabhakëëri akabhugha, “Nekobhakëëri. Omurëmbë ubhe na niinyu!” 27Mbe, Yesu akamobhoorera Tomaso akabhugha, “Oo Tomaso, nuuche onturi ne ekyara keecho mo‑mabhökö ghaane. Wiiki, onturi no okubhökö koocho mo‑rubharu roone. Ötëëndërëra kwanga ghokumi, amare okumi.” 28Tomaso akamugharokeri akabhugha, “Omutëmi waane ne Eryobha reene!” 29Yesu akamugharokeri akabhugha, “ˆOghakumi gho kubha nondooche. Mbiitabhiiru bhano bhankumiri koru nangabha bhatandooche.”

Ekebhune ghe ghitabhu kino

30Yesu ꞉naaköriri ebhyërëkërëri ebhende bhyaru bhino abhaanabheegha bhaache bharooche, bhino bhetaandëkuru mo‑ghitabhu kino. 31Amare ebhyërëkërëri bhino bheenyi mo‑ghitabhu kino bhyandëkuru motore ghokumi kubha Yesu niwe Kirisito, Omoona o Ryobha, na gho komokumi mubhönë obhuhöru bho miishe ghyose kwo riina reeche.

Currently Selected:

Yohana 20: ntk

Highlight

Copy