Yohana 19

Yesu ˆaghateneru ekiina ghwitu mo‑musarabha

1Mbe, Bhiraato akahatëka abhaashirikare bhamwimoki Yesu bhamutëmë emicharicho. 2Abhaashirikare bhakaroka orohuuru ro maho, bhakamobheeki a‑mutu. Wiiki bhakamobheeki andachana e range e sambaraawe e ghitëmi. 3Bhaakabha bharamusëëta, bharamukëëri bharabhugha, “Ntoghoghukëëri, oo Omutëmi o Bhayahuuti!” Bhakamutëma orohe.

4Bhiraato akahoroka anche wiiki, akarebhoorera erikinda re bhaato bhaare akabhugha, “Mutëghëërërë, nemurëëtiri omooto uno ghokoonyu, motore kumënya kubha eni ntiimara ndighi eriisari ryoryose re komusëma.” 5Mbe, bhakamohoroki Yesu anche abheekiri orohuuru ro maho na andachana e sambaraawe. Bhiraato aghasiikëra haheero akabhugha, “Mööhi, omooto omwene kauno hano.”

6Mbe, eriibhagha abhakoro bha bhachaama na abhachongi bha Risëngërö bhamorooche Yesu, bhaghaköra eriireghe bharabhugha, “Mumambe! Mumambe!” Niho Bhiraato akabhabhoorera akabhugha, “Momwimoki inyu bheene momumambe mo‑musarabha, gho kubha eni nteekorighi eriisari ryoryose ighoro yaache.” 7Abhayahuuti bhakamugharokeri bhakabhugha, “Itu ntoonyi no omoghiro, na kurëngʼaana no omoghiro uyo, nakwëndëru ghwitu, gho kubha naghwighamba kubha n‑Omoona o Ryobha.”#19:7 Mööhi Abharaawi 24:16.

8Hano Bhiraato oghwire amangʼana ghayo, akëëngëra ghotiina chwee. 9Mbe, aghasöha wiiki mo‑nyumba e ghitëmi, akamobhoori Yesu akabhugha, “Iye hayi orweriire?” Amare Yesu tamugharokiiri angʼana. 10Niho Bhiraato akamobhoorera akabhugha, “Ngwake otaaghungarokeri? Kana, tweche kubha neenyi no obhotoro bho ghoghotighooroka, wiiki na bho ghokumamba mo‑musarabha?” 11Yesu akamugharokeri Bhiraato akabhugha, “Tongabheere no obhotoro bhobhoose ighoro yaane, aribha otangahaabhuru ne Eryobha. Amare omooto uno antooriri mo‑mabhökö ghaacho, naanyi na amasari makoro chwee.”

12Hano Bhiraato oghwire ghayo, aghasaki ghutabhara anchëra e komotighooroka Yesu, amare Abhayahuuti bhaghaköra eriireghe wiiki bhakabhugha, “Aribha oramotighooroka omooto uyo, mbe, iye taanyi omusaani o Kayisaari. Omooto wowoose uno aghwiköri kubha omutëmi, nakomwanga Kayisaari.” 13Hano Bhiraato oghwire amangʼana ghayo, akamurëëta Yesu anche, aghaye aghiikara mo‑ghetumbe ghe ghotenera ekiina, ahaghiro hayo habherekiiru, “Ahaghiro hano hakanduru na amabhohe.” Gho ghighambo ghe Kebhuraaniya hakobherekeru, “Ghabhata.” 14Neere kinya chaasa ishaasabhe, orosiko ro masëëmö gha nyangi e Bhaasaka. Bhiraato akarebhoorera erikinda re bhaato akabhugha, “Mööhi, omutëmi waanyu kauno hano!” 15Ibho bhaghaköra eriireghe bharabhugha, “Omwite! Omwite! Omumambe mo‑musarabha!” Bhiraato akabhabhoori akabhugha, “Kana, mokwënda nemumambe mo‑musarabha omutëmi waanyu?” Abhakoro bha bhachaama bhakamugharokeri bhakabhugha, “Itu totaanyi no omutëmi owonde nanyinga Kayisaari!” 16Mbe, antenero Bhiraato akamuhaana Yesu kubha amambu mo‑musarabha.

Yesu ˆakamambu mo‑musarabha

(Mataayo 27:32–44; Maariko 15:21–32; Ruuka 23:26–43)

Mbe, abhaashirikare bhakamwimoki Yesu na ghuye nawe. 17Akaru mo‑moghya aghëghiri omusarabha waache, aghaye ahaghiro hano hakobherekeru gho Kebhuraaniya, “Ghorighööta,” egheteemoro keeche Ahaghiro ha Kehoore ke Mutu. 18Hano bhahikiri hayo, bhakamumamba Yesu mo‑musarabha. Ahaghiro hayo mbaare‑ho abhaato abhande bhabhere bhano ꞉bhaamamburu mo‑misarabha haghirohamu nawe, umu eribhaara re kwiro no owonde eribhaara re kumosi.

19Bhiraato akahatëka kubha ghaandëku amangʼana na ghotooru mo‑musarabha o‑Yesu, ghano ghakobhugha, “uno n‑yesu o nasareeti, omutëmi o bhayahuuti.” 20Amandëkö ghayo ꞉ngaandëkuru mo‑ghighambo ghe Kebhuraaniya, ne Ekeruumi, ne Ekeyunaani. Abhayahuuti bhaaru ꞉mbaasömiri amandëkö ghayo, gho kubha ahaghiro hano bhamumambiri Yesu ꞉haare haghuhe na Yerusareemu. 21Mbe, abhakoro bha bhachaama bhakamobhoorera Bhiraato bhakabhugha, “Otaandëka kubha, ‘Uno n‑Omutëmi o Bhayahuuti,’ amare wandëkë kubha, ‘Omooto uno ꞉niighambiri kubha iwe n‑omutëmi o Bhayahuuti.’ ” 22Bhiraato akabhagharokeri akabhugha, “Tiyaanyi, amandëkö ghasaaghe hangʼu hangʼu kinya bhuno niragheriiri.”

23Hano abhaashirikare bhamumambiri Yesu mo‑musarabha, bhakiimoki changibho cheeche, bhaghachihööhi amatuumu ane. Kira omoshirikare akiimoki eribhaara reeche. Wiiki, bhakiimoki andachana yaache. Andachana ino teere etumuru, neere erokuru gho gheteneka kimu hangʼu ke ngibho. 24Mbe, bhakabhoorani bhakabhugha, “Totayitandura andachana ino, amare tutëmë akuura kubha ibhe yaawe.” Ghayo ꞉ngaaköruru kubha ghahikeerane ghano ghaandëkuru mo‑Mandëkö Amatööbhiyu kubha, “Bhakahööha changibho cheene, na ghutëmëra akuura andachana yaane.”#19:24 Mööhi Sabhuri 22:18. Mbe, hangʼu nibhu ꞉bhaaköriri abhaashirikare bhaare.

25Mbaare‑ho abhakari abhande bhano ꞉bhaare bhiimeeriire haghuhe no omusarabha o Yesu. Mo‑bhakari bhayo naare‑ho nyina Yesu, na nyina monyi Yesu, na Mariyamu omukari o Kiroobha, na Mariyamu o Maghitara. 26Hano Yesu amorooche nyina no omoonamwegha uno amosiighiri chwee imeeriire haghuhe na nyina, akabhugha, “Oo yiima, mumööhërëri uno, niwe omoona waacho.” 27Wiiki akamobhoorera omoonamwegha uyo akabhugha, “Mumööhërëri uno, niwe nyako.” Mbe, korwera eriibhagha riyo omoonamwegha uyo akamwimoki, aghaye na nyina Yesu ghwikara nawe awaache.

Yesu ˆaghaku

(Mataayo 27:45–56; Maariko 15:33–41; Ruuka 23:44–49)

28Hano ghayo ghahetiri, Yesu akamënya kubha naare amariri ghoghiköra emeremo gheeche ghyose. Mbe, aghasiikëra akabhugha, “Nekooghu anyööta.” Ghayo ꞉ngaarweriire ghahikeerane ghano ghaandëkuru mo‑Mandëkö Amatööbhiyu.#19:28 Mööhi Sabhuri 69:21. 29Ahaghiro hayo ꞉haare ne eghetibha bhaghiichwiri adivaayi andoro. Mbe, abhaashirikare bhakiimoki obhorobha, bhaghaköri mo‑divaayi iyo, bhakayetoora mo‑moori, bhakamuha mo‑monu. 30Hano Yesu asamiri adivaayi iyo, aghasiikëra akabhugha, “Emeremo gheene ghekahikeerana!” Mbe, akahiinya omutu, aghaye mo‑bhaaru.

Yesu ˆakangʼuutu eriitimo mo‑rubharu

31Neere orosiko ro masëëmö gha rosiko ro Riikane, wiiki Eriikane riyo ndeere orosiko orokoro ghokera echende.#19:31a Eriikane riyo ndeere orosiko orokoro ghokera echende, gho kubha ndeere mo‑rosiko ro nyangi e Bhaasaka. Gho ghiri iyo, abhakangati bha Bhayahuuti bhatëëndiri erihundughu risaaghe ighoro e musarabha mo‑rosiko ro Riikane. Mbe, bhaaghaye o‑Bhiraato, bhakamusabha kubha abhaashirikare bhaghëndë bhabhabhune amaghoro#19:31b Bhabhabhune amaghoro. ꞉Mbaaköriri hangʼu kubha bhaku bhwango. abhaato bhano ꞉bhaamamburu, na ghogharuusi amahundughu mo‑misarabha. 32Mbe, bhaaghaye, bhakabhabhuna amaghoro omooto o mumbërë no o kabhere bhano ꞉bhaamamburu haghirohamu na Yesu. 33Amare hano bhamohikiire Yesu, bhakabhöna akuure, bhataamobhuniri amaghoro. 34Amare omoshirikare umu akamongʼuuta Yesu eriitimo mo‑rubharu. Mbe, amasaahë na amanche bheekaru. 35Bhuno n‑obhwibhateri bho mooto uno agharooche gharaköru. Bhuyo n‑obhwibhateri bho hëënë, gho kubha iwe neeche ghano aghosiikëra n‑gha hëënë, kubha na niinyu motore ghokumi. 36Ghayo ꞉ngaaköruru kubha ghahikeerani ghano ghaandëkuru mo‑Mandëkö Amatööbhiyu kubha, “Retaanyi‑ho eriighuha reeche rino rekobhunu.”#19:36 Mööhi Sabhuri 34:20. 37Wiiki Amandëkö Amatööbhiyu ngakobhugha, “Mbakomorighi uno ꞉bhaamongʼuutiri eriitimo.”#19:37 Mööhi Sakariya 12:10.

Yesu ˆakaryeku

(Mataayo 27:57–61; Maariko 15:42–47; Ruuka 23:50–56)

38Hano ghayo ghahetiri, akaacha omooto umu eriina reeche Yusubhu, uno aruure Arimataaya. Omooto uyo naare omoonamwegha o Yesu gho kebhisere, gho kubha naare arabhatiina abhakangati bha Bhayahuuti. Mbe, omooto uyo aghaye o‑Bhiraato, akamusabha kubha imoki erihundughu re Yesu, aryeryeke. Bhiraato akamwisherereri. Gho ghayo, Yusubhu aghaye, akariimoki erihundughu re Yesu.

39Niho Nikoteemu uno eriibhagha rimu aghiire o‑Yesu obhotiko,#19:39a Mööhi Yohana 3:1–2. akaacha na amaghuta gha keneeso ghichömu ghasangeriini na manemane,#19:39b Amaghuta gha keneeso ghichömu ghasangeriini na manemane. Abhayahuuti ꞉mbaanariri ghuse ebheneeso na manemane bhino bheere ne ekeneeso ghichömu na ghusangerani haghirohamu gho ghiri e kuhaka erihundughu hano bhaakubha bhakeere koryeka, kuhööchërëra ekerumba ekebhe. ngaare chakiiro miröngö etato. 40Mbe, bhombe bhakariimoki erihundughu re Yesu, bhakariinaareri asanda e ghitani haghirohamu na amaghuta ghaare gha keneeso ghichömu kurëngʼaana na chaasughara che Bhayahuuti che koryeka abhaato. 41Ahaghiro hayo ꞉bhaamumambiri Yesu ꞉haare ne ekinyaweera. Mo‑kinyaweera kiyo, neere‑mu ambeehera ahë ino ꞉bhaare bhakeere koryeka‑mu omooto wowoose. 42Orosiko ruyo, ndoore orosiko ro Bhayahuuti ro masëëmö gha Riikane. Gho ghayo, bhakamoryeka Yesu mo‑mbeehera iyo, gho kubha neere haghuhe na hayo ꞉bhaamumambiire.

Currently Selected:

Yohana 19: ntk

Highlight

Copy