Yohana 21

Yesu ˆakabharwera abhaanabheegha bhaache Ghariraaya

1Hano ghayo ghahetiri, Yesu akabharwera wiiki abhaanabheegha bhaache rubhareka ro nyancha e Tibheeriya.#21:1 Anyancha e Tibheeriya. Eriina reeche erende n‑anyancha e Ghariraaya. 2Mbaare‑ho Simiyooni Bheetero, Tomaso uno eriina reeche erende n‑Eghisare, Natanaheri uno aruure Kana e Ghariraaya, abhaana bhabhere bha Sebhetaayo,#21:2 Abhaana bhabhere bha Sebhetaayo. Amariina ghaabho ngaare Yakobho na Yohana. Mööhi Mataayo 10:2. na abhaanabheegha bhaache abhande bhabhere mbaare haghirohamu. 3Simiyooni Bheetero akabhabhoorera abhaghëndi bhaache akabhugha, “ˆNeeghaye mo‑nyancha koweesana chaasu.” Ibho bhakamugharokeri bhakabhugha, “Itu bhoose ntooghuye haghirohamu na niiye.” Mbe, bhaaghaye, bhaghatiira mo‑bhwato, bhakaweesana obhotiko bhoghima, amare bhataaghöötiri asu yoyoose.

4Atabhoori, Yesu akiimeerera rubhareka ro nyancha, amare abhaanabheegha bhaache bhataamënyiri kubha n‑Yesu. 5Mbe, Yesu akabhabherekera akabhabhoori akabhugha, “Inyu bhasaani bhaane, mobhwine ekereero?” Ibho bhakamugharokeri bhakabhugha, “Tiyaanyi.” 6Yesu akabhabhoorera akabhugha, “Murëkërë orwërö eribhaara re kwiro re bhwato, moghughööti chaasu.” Mbe, bhakarëkëra orwërö mo‑nyancha, amare ibheere bhaghakeyu koruta gho kubha ꞉mbaaghöötiri chaasu chaaru chwee. 7Omoonamwegha uno Yesu amosiighiri, akamobhoorera Bheetero akabhugha, “N‑Omutëmi!” Eriibhagha Simiyooni Bheetero oghwire kubha n‑Omutëmi, akabheeka changibho cheeche chino are aruusiri hano are araweesana, akiirëkëra mo‑nyancha. 8Abhaanabheegha bhaare abhande bhaaghaye rubhareka ro nyancha no obhwato, gho kubha bhataare kurë, mbaare kinya amatambukera eriighana rimu hangʼu. Bhakaruta orwërö ruyo rwichwire chaasu.

9Hano bhahikiri mo‑se ayoomu, bhakarighi omororo uhëmburu. Mo‑mororo uyo bhakarighi chaasu no omughaate cheragheekeru ighoro yaache. 10Yesu akabhabhoorera abhaanabheegha bhaache akabhugha, “Murëëtë hano chaasu echimu chino moweesiine ibheerebheere.”

11Mbe, Bheetero aghasöha mo‑bhwato, akaruta rubhareka orwërö ruure rwichwire chaasu. Mo‑rwërö ruure ncheere‑mu chaasu chankoro eriighana rimu na miröngö etaano ni ishato. Koru nangabha ncheere‑mu chaasu chaaru chwee, koru hangʼu orwërö rotabhaarokiri.

12Yesu akabhabhoorera abhaanabheegha bhaache akabhugha, “Muuche muraaghërë.” Mo‑bhaanabheegha bhaare taare‑ho uno asakiri komobhoori kubha, “Iye n‑niwe?” Gho kubha ꞉mbaamënyiri kubha n‑Omutëmi. 13Mbe, Yesu akaacha akiimoki omughaate, akabhaha abhaanabheegha bhaache. Wiiki, akiimoki asu aghaköra hangʼu hangʼu. 14Iyo neere mara e ghatato Yesu kobharwera abhaanabheegha bhaache, korwera hano Eryobha remoryokiri koru mo‑bhaku.

Yesu na Bheetero

15Hano bhamariri kuraaghëra, Yesu akamobhoori Bheetero akabhugha, “Simiyooni, omoona o Yohana, kana, nonsiighiri eni ghokera bhuno bhano bhansiighiri?” Bheetero akamugharokeri akabhugha, “Hee, Omutëmi, weeche kubha neghosiighiri.” Yesu akamobhoorera akabhugha, “Oriishi abhaana bha changʼöndu cheene.” 16Yesu akamobhoori Bheetero mara e kabhere akabhugha, “Simiyooni, omoona o Yohana, kana nonsiighiri?” Bheetero akamugharokeri akabhugha, “Hee, Omutëmi, weeche kubha neghosiighiri.” Yesu akamobhoorera akabhugha, “Ochonge changʼöndu cheene.” 17Akamobhoori mara e ghatato akabhugha, “Simiyooni, omoona o Yohana, kana nonsiighiri?” Mbe, Bheetero akabha na amacheeche gho kubha ꞉naamobhooriri mara e ghatato kubha, “Kana, nonsiighiri?” Akamugharokeri akabhugha, “Oo Omutëmi, nogheeche ghoose. Weeche kubha neghosiighiri.” Yesu akamobhoorera akabhugha, “Oriishi changʼöndu cheene. 18Mahëënë ˆneghakobhoorera, hano ore omobhureni, noore unariri kobheeka changibho cheecho, na ghuye hohoose hano wëndiri. Amare hano oghokunguha, noghughöröröki amabhökö ghaacho no omooto owonde naghokobheeki changibho cheecho na ghokohira hano otaakwënda ghuye.” 19Yesu ꞉naabhughiri hangʼu kwërëki kinya Bheetero akuucha ghoku na koreghongi Eryobha. Mbe, Yesu akamobhoorera Bheetero akabhugha, “Ntambane.”

20Mbe, Bheetero aghiishoorori, akamorighi omoonamwegha uno Yesu are amosiighiri chwee, arabhatambana. Omoonamwegha uyo w‑wuure ikeere haghuhe na Yesu eriibhagha re ndaaghëra, na komobhoori arabhugha, “Oo Omutëmi, n‑niwe akuucha ghoghwigharurani?” 21Hano Bheetero amorooche omoonamwegha uyo, akamobhoori Yesu akabhugha, “Oo Omutëmi, neke ghekuucha korwera kwo moonamwegha uno?”

22Yesu akamugharokeri akabhugha, “Aribha nekwënda kubha abhe muhöru mbagha hano neghugharuka, ngwake ghayo ghaghokunyaaki? Iye nuntambane eni.” 23Gho ghiri iyo, amangʼana ghayo ghaghasancha mo‑bhaghëndi kubha, omoonamwegha uyo taaghoku naabha. Amare Yesu tamobhooriire kubha omoonamwegha uyo taaghoku naabha, ꞉naabhughiri, “Aribha nekwënda kubha abhe muhöru mbagha hano neghugharuka, ngwake ghayo ghaghokunyaaki?” 24Omoonamwegha uyo niwe uno aghoghaghambera ghano na ghoghaandëka. Itu ntweche kubha ghano akobhugha n‑gha hëënë.

Yesu ꞉naaköriri aghande maaru

25Ngaanyi‑ho aghande maaru ghano Yesu aköriri. Aribha ghoose ghayo ghangaandëkuru, nerighi ase yoose tengiishiri ghotoora ebhitabhu bhino bhengaandëkuru.

Currently Selected:

Yohana 21: ntk

Highlight

Copy