Yohana 15

Yesu n‑omusabhiibhu o hëënë

1Yesu akëëndërëra kobheeghi arabhugha, “Eni n‑omusabhiibhu o hëënë, na Taata waane niwe omoremi. 2Eghisaghe ghyokyose moose yaane kino ghetaaghusönga amakorobhese, Taata nahaakenunga. Amare eghisaghe ghyokyose kino ghetaaghusönga amakorobhese, Taata nahaaghiköngöörëra kubha kyëngërë ghusönga. 3Inyu mumariri ghuköngööru, gho kubha moghokumi ameeghi ghaane. 4Mwikare moose yaane, na neeni neghwikara moose yaanyu. Kinya bhuno eghisaghe ghetaaghotora ghusönga amakorobhese ekyene chiri aribha ghetighöötëriire mo‑musabhiibhu, hangʼu hangʼu motaaghotora ghuköra amiigha gha Ryobha aribha motiikeere moose yaane.

5“Eni n‑omusabhiibhu, na niinyu n‑ebhihaghe. Omooto uno aghwikara moose yaane, na neeni moose yaache, uyo naakubha arasönga amakorobhese maaru, gho kubha aribha taanyi eni motaaghotora ghuköra ngʼana yoyoose. 6Omooto wowoose araanga ghwikara moose yaane natuubhiine ne eghisaghe kino ghekurëkëru na kunyaara. Mbe, abhaato mbaghoghitööra na ghokirëkëra mo‑mororo, kehi. 7Aribha moghwikara moose yaane na amangʼana ghaane ghiikare moose yaanyu, mbe, musabhe Taata ghyokyose kino mokwënda, na niinyu mokuhaabhu. 8Abhaanabheegha bhaane bha hëënë mbahaasönga amakorobhese maaru. Gho ghiri iyo abhaato mbakumënya kinya Taata anyi mokoro. 9Kinya bhuure Taata ansiighiri, nibhu na neeni nebhasiighiri inyu. Mbe, mwikare mo‑bhosiighi bhoone. 10Aribha moraghööta amaraghereri ghaane, mokwëndërëra ghwikara mo‑bhosiighi bhoone, kinya bhuure eni nighöötiri amaraghereri gha Taata waane na ghwikara mo‑bhosiighi bhooche.

11“Nebhabhooriire amangʼana ghano kubha ghuchömëru koone kubhe moose yaanyu, na ghuchömëru koonyu kohikeerane. 12Eriiraghereri reene niryo rino, mosiighane, kinya bhuno nebhasiighiri inyu. 13Taanyi‑ho omooto uno anyi no obhosiighi bhokoro ghokera bhuno, bho mooto koruusi obhuhöru bhooche gho ghiri e bhasaani bhaache. 14Aribha moghuköra ghano nebharagheriiri, inyu m‑bhasaani bhaane moonyi. 15Korwera ibheere, nteekubha nerabhabherekera wiiki kubha abhasësë bhaane, gho kubha omusësë teeche kino omutëmi waache aghuköra. Amare inyu nebhahunyuriire ghoose ghano nyoghwire koru o‑Taata, mbe, neekubha nerabhabherekera abhasaani bhaane. 16Inyu motanyahwire eni, amare n‑eni nebhahwire inyu. Nebhahwire kubha, musöngë amakorobhese ghano ghataaghosira naabha. Moraköra hangʼu, ghyokyose kino morasabha kohetera eriina reene, Taata nakobhaha. 17Mbe, nekabhahatëka inyu kubha, mosiighane.”

Abhaato bha mo‑se ino mbabharëghiri bhano bhakomokumi Yesu

18Yesu akëëndërëra kobheeghi arabhugha, “Aribha abhaato bha mo‑se ino bharabharëgha inyu, mubhe morahiita kubha mbashamiri kundëgha eni. 19Aribha mongabheere abhaato bha mo‑se ino, bhayo mbangabheere bhabhasiighiri kinya bhuno ase esiighiri abhaato bhaache. Amare inyu motaanyi bha se ino, gho kubha nebhahwire koru mo‑se ino, nikyo gheghughëri abhaato bha mo‑se ino ˆbhakabharëgha. 20Mohiite ghano ꞉neebhabhooriire kubha, ‘Omusësë taanyi omokoro ghokera omutëmi waache.’ Mbe, kinya bhanyaakiri eni, mbakobhanyaaki na niinyu wiiki. Amare aribha bhakumiri ameeghi ghaane, mbaghokumi na ghaghaanyu. 21Amare mbakobhakörëra ghoose ghayo, gho ghiri e ghuntambana eni, gho kubha bhatamweche uno antomiri. 22Aribha netangichiri bhowaabho na ghosiikëra nabho, mbangabheere bhataanyi na amasari. Amare ibheere, bhataaghotora ghwitachura kubha bhataanyi na amasari. 23Omooto wowoose uno andëghiri eni, namurëghiri na Taata waane. 24Niköriri ebheroghooro bhekoro bhino bhetaamara bhiköru no omooto owonde. Erabha bhatangabherooche, mbangabheere bhataanyi na amasari. Amare ibheere, mbagharooche ghoose ghano ꞉niiköriri, koru hangʼu bhakeere bhandëghiri eni na Taata waane. 25Amare ghano ngarweriire kubha ghahikeerane amangʼana ghano ghaandëkuru mo‑Mandëkö Amatööbhiyu kubha, ‘꞉Mbaandëghiri bhoowa.’#15:25 Mööhi Sabhuri 35:19, 69:4.

26“Hano akuucha ghokoonyu Omotoorereri, uno nekomotoma ghokoonyu koru o‑Taata, niyo Akörö Ahörëëru e hëënë ino ekoru o‑Taata, neghungambëra obhuhëënë ighoro yaane. 27Wiiki inyu bhoose moghungambëra amangʼana ghaane, gho kubha moore haghirohamu na neeni korwera ekeenyuma.”

Currently Selected:

Yohana 15: ntk

Highlight

Copy