Yohana 14

Anchëra e ghuye Mwishaaro

1Yesu akëëndërëra kobheeghi akabhugha, “Motiitumata mo‑metema gheenyu, momokumi Waryobha, wiiki monkumi na neeni. 2Mo‑nyumba e Taata waane haanyi no obhwikari bhwaru. Aribha taanyi hangʼu, nengabhabhooriire. Ibheere ˆneeghaye kobhasëëmëra obhwikari. 3Eriibhagha neeghuye na kobhasëëmëra obhwikari, nekuucha wiiki kobhiimoki kubha ahaghiro hano neekubha, na niinyu mubhe‑ho. 4Inyu moyeeche anchëra e kohika hano neeghuye.”

5Niho, Tomaso akamobhoori Yesu akabhugha, “Oo Omutëmi, itu toteeche hano oghuye. Ibheere nibhu toghuköra toyimënyë anchëra iyo?” 6Yesu akamugharokeri akabhugha, “Eni n‑anchëra, no obhuhëënë, no obhuhöru. Taanyi‑ho uno aghotora kuucha o‑Taata aribha atahetiire ghokoone. 7Erabha mongamënyiri eni, mongamumënyiri na Taata waane. Korwera ibheere, momweche, wiiki momorooche.” 8Bhiiribho akamobhoorera akabhugha, “Oo Omutëmi, ntoghoghusabha otwërëki Taata, neghotwisha.” 9Yesu akamugharokeri akabhugha, “Bhiiribho, nibheere haghirohamu na niinyu chaasiko chino choose, iye okeere kuumënya eni? Omooto wowoose uno andooche eni, namorooche Taata. Mbe, ngwake okomboori kubha, ‘Otwërëki Taata’? 10Kana, toghokumi kubha eni neenyi moose e Taata, na Taata naanyi moose yaane? Amangʼana ghano nekobhabhoorera ghataakoru mo‑miihëëbhö ghaane, amare Taata, uno anyi moose yaane, naghuköra emeremo gheeche. 11Mokumi ghano neghosiikëra kubha neenyi moose e Taata, na kubha iwe naanyi moose yaane. Amare erabha inyu motaaghokumi ghano neghosiikëra, mokumi gho ghiri e meremo ghino neghuköra. 12Mahëënë ˆnekabhabhoorera, omooto wowoose uno aghonkumi, naghuköra emeremo ghiire ghiire eni neghuköra. Wiiki naghuköra emeremo mekoro ghokera ghino niköriri, gho kubha ˆneeghaye o‑Taata. 13Aribha morasabha egheghiro ghyokyose kwo riina reene, eni neghuköra kebhuno moghusabha. Gho nchëra iyo, nekwërëki obhokumi obhokoro bho Taata kebhuno bhoonyi gho kohetera eni, Omoona. 14Morasabha egheghiro ghyokyose kwo riina reene, neghuköra.

Yesu ˆaghasiikëra ighoro e Körö Ahörëëru

15“Aribha monsiighiri, moghughööta amaraghereri ghaane. 16Mbe, na neeni nekomusabha Taata kubha abhahë Omotoorereri owonde,#14:16 Omotoorereri owonde. Egheteemoro keeche n‑Akörö Ahörëëru. kubha ikare na niinyu emiishe ghyose. 17Akörö iyo nekobhahunyurera abhaato obhuhëënë. Abhaato bhano bhakwanga Eryobha bhataaghotora ghosongʼaana Akörö iyo, gho kubha bhataakoyerighi, wiiki bhatayeeche. Amare inyu moyeeche Akörö iyo gho kubha neghwikara haghirohamu na niinyu, wiiki neekubha moose yaanyu.

18“Nteekobhatigha inyu bheene kinya abhaana abhahabhe, amare neghugharuka wiiki ghokoonyu. 19Rekeere eriibhagha isuuhu abhaato bha mo‑se ino bhataakondighi wiiki. Amare inyu mokondighi, gho kubha eni m‑muhöru, na niinyu mookubha abhahöru. 20Eriibhagha riyo, inyu mokumënya kubha eni neenyi moose e Taata, na niinyu moonyi moose yaane, na neeni neenyi moose yaanyu. 21Omooto wowoose uno aghosongʼaana amaraghereri ghaane na ghoghaghööta, uyo niwe ansiighiri. Omooto uno aghonsiigha, Taata nakomosiigha, na neeni nekomosiigha na kwiyërëkani ghokooche.”

22Mbe, omoonamwegha umu eriina reeche Yuuta, taanyi Yuuta Isikariyoote, akamobhoori Yesu akabhugha, “Oo Omutëmi, nibhu ekubha wiyërëkani ghokwito, taanyi kwo bhaato bha mo‑se?” 23Yesu akamugharokeri akabhugha, “Omooto wowoose uno ansiighiri, naghughööta angʼana yaane. Taata waane nakomosiigha, wiiki eni na Taata ntookuucha ghokooche na ghwikara haghirohamu nawe. 24Amare omooto wowoose uno atansiighiri, taaghughööta amangʼana ghaane. Wiiki, angʼana ino mokooghu taanyi yaane, amare n‑e Taata uno antomiri ghokoonyu.

25“Nebhabhooriire ghoose ghayo eriibhagha nekeere neenyi haghirohamu na niinyu. 26Amare Omotoorereri uyo, egheteemoro keeche n‑Akörö Ahörëëru, ino Taata akoyetoma ghokoonyu kwo riina reene, nekobheeghi na kobhahiiti ghoose ghano neere nebhabhooriire. 27Hano neghutanura, nekobhatighera omurëmbë, omurëmbë waane nekobhaha. Omurëmbë uno taanyi kinya uno okoru mo‑se. Motiitumata mo‑metema gheenyu, wiiki motatiina ghyokyose. 28Mooghwire ghano nebhabhooriire kubha, ‘Neeghuye, amare nekuucha wiiki ghokoonyu.’ Aribha mahëënë monsiighiri, mongabheere morachömëru kooghu kubha neeghuye o‑Taata, gho kubha Taata m‑mokoro ghonkera eni.

29“Ibheere nebhabhooriire ghoose ghayo, eriibhagha ghakeere korwera, kubha hano ghakorwera motore ghonkumi. 30Nteeghotora ghosiikëra na niinyu amangʼana maaru, gho kubha omokoro o se#14:30 Omokoro o se. Egheteemoro keeche n‑Erishambu. ino akaacha. Amare taanyi no obhotoro ighoro yaane. 31Amare nekwëndëru abhaato bha mo‑se bhatore kumënya nemosiighiri Taata, kinya bhuure Taata ꞉andagheriiri, nibhu neghuköra.

“Ibheere, mwimeerere toru hano.”

Currently Selected:

Yohana 14: ntk

Highlight

Copy