Yohana 16

1Yesu akëëndërëra kobhugha, “Nebhabhooriire ghoose ghano kubha motaacha ghotigha obhokumi bhoonyu. 2Abhaato mbakobhahëëbha mo‑masinaghooghi. Ndekuucha eriibhagha rino omooto aramwita umu ghate yaanyu, nakwihëëbha kubha, nakorihökëri Ryobha. 3Mbakobhakörëra hangʼu, gho kubha bhatamweche Taata, wiiki bhatanyeche eni. 4Amare ˆnekabhabhoorera ghayo, kubha eriibhagha reebho re ghuköra ghayo reraacha kohika, mohiite kubha ꞉neebhabhooriire.

Emeremo ghe Körö Ahörëëru

“Ntebhabhooriire amangʼana ghayo korwera ekeenyuma gho kubha, neere haghirohamu na niinyu. 5Mbe, ibheere ˆneeghaye o‑Taata uno ꞉antomiri ghokoonyu. Amare taanyi‑ho wowoose ghate yaanyu uno akomboori kubha, ‘Kana, hayi oghuye?’ 6Amare gho kubha nebhabhooriire ghayo, ˆmookabha na amacheeche chwee mo‑metema gheenyu.

7“Nekobhabhoorera inyu obhuhëënë kubha, ngʼoni ghokoonyu eni neghi o‑Taata, neraanga ghuye, Omotoorereri wuure taaghotora kuucha ghokoonyu. Amare aribha neraghe, nekomotoma ghokoonyu. 8Eriibhagha akuucha, naakubha arabhëërëki abhaato bhoose ighoro e masari ghaabho, no obhuhëënë bhoone, wiiki kubha Eryobha ndekobhatenera ekiina. 9Naakubha arabhëërëki abhaato bhoose ighoro e masari ghaabho gho kubha, bhataaghonkumi eni. 10Nakwërëki obhuhëënë bhoone gho kubha, neeghuye o‑Taata na motaakondighi wiiki. 11Naakubha arabhëërëki kubha Eryobha ndekuucha kobhatenera ekiina gho kubha, ndimariri ghotenera ekiina Erishambu omokoro o se ino.

12“Nekeere neenyi na amaaru gha kobhabhoorera, amare eriibhagha rino motaaghotora ghoghamënya. 13Amare Akörö e bhuhëënë, hano ekuucha ghokoonyu, nekobhakangata kobhumënya obhuhëënë bhoose. Teekobhugha kwo bhotoro bhooche ayeene, amare nekobhugha ghano yoghwire na kobhabhoorera ghano ghakuucha. 14Akörö iyo neekubha erabhëërëki obhokumi bhoone obhokoro, gho kubha nekobhabhoorera ghoose ghano ekubha eghabhwine ghokoone. 15Ebheghiro bhyose bhino Taata anyi nabhyo m‑bhebheene. Gho ghiri iyo neghosiikëra kubha Akörö iyo nekobhabhoorera ghoose ghano ekubha ebhwine koru ghokoone.

Amacheeche no oghuchömëru

16“Rekeere eriibhagha isuuhu hangʼu na niinyu motaakondighi, wiiki rekeere eriibhagha isuuhu hangʼu na niinyu mokondighi.” 17Mbe, abhaanabheegha bhaache abhande bhakabhoorani bharabhugha, “Kana, egheteemoro ke mangʼana ghano akobhugha kubha, ‘Rekeere eriibhagha isuuhu hangʼu na niinyu motaakondighi, wiiki rekeere eriibhagha isuuhu hangʼu na niinyu mokondighi,’ na kubha, ‘ˆNeeghaye o‑Taata’?” 18Mbe, bhakëëndërëra kobhoorani bharabhugha, “Egheteemoro ke ‘eriibhagha isuuhu’ n‑ghento ke? Itu toteeche ghano aghosiikëra.” 19Yesu akamënya kubha ꞉mbëëndiri komobhoori ghano abhughiri, akabhabhoori akabhugha, “Kana, mokobhoorani ghano nebhughiri kubha, ‘Rekeere eriibhagha isuuhu hangʼu na niinyu motaakondighi, wiiki rekeere eriibhagha isuuhu hangʼu na niinyu mokondighi?’ 20Mahëënë ˆnekabhabhoorera, inyu mokorera na kubha na amacheeche, amare abhaato bha se ino mbaghuchömëru. Mookubha na amacheeche kwo riibhagha ighuhe, amare amacheeche ghaanyu ngaghwigharura kubha ghuchömëru. 21Kinya omukari anda eramure, nahaabha na macheeche gho kubha, eriibhagha re nyaako yaache ˆrekahika. Amare aramara kwibhora, tahahiita wiiki anyaako yiire, gho kubha nahaachömëru kubha omooto niibhwiru mo‑se. 22Inyu moonyi na amacheeche kwo riibhagha rino. Amare nekuucha wiiki ghokoonyu, na niinyu mookubha na ghuchömëru mo‑metema gheenyu. Taanyi‑ho uno akoruusi ghuchömëru kuyo mo‑metema gheenyu. 23Wiiki eriibhagha riyo reraacha kohika, motaakomboori angʼana yoyoose.

“Mahëënë ˆnekabhabhoorera, ghyokyose kino morasabha kohetera eriina reene, Taata nakobhaha. 24Mbagha ibheere, motaamara musabha Eryobha ghyokyose gho kohetera eriina reene. Musabhe Eryobha na niinyu mokuhaabhu, kubha ghuchömëru koonyu kohikeerane.

Yesu ˆakayekinda ase

25“Nekobhabhoorera ghoose ghayo gho nchëra e bhetuubhaani. Eriibhagha ndekuucha rino ntaaghosiikëra na niinyu gho nchëra e bhetuubhaani, amare nekobhabhoorera haheero ighoro e Taata. 26Kwo riibhagha riyo, moghusabha Eryobha kwo riina reene. Nteekobhugha kubha eni nekobhasabhera gho Taata. 27Taata omwene nabhasiighiri inyu, gho kubha inyu monsiighiri eni, wiiki moghokumi kubha neruure o‑Taata. 28Eni neruure o‑Taata nekaacha mo‑se ino, amare ibheere neghutanura mo‑se ino, nigharuke o‑Taata.”

29Mbe, abhaanabheegha bhaache bhakamobhoorera bhakabhugha, “Oo Omweghi, ibheere ˆoghasëëma ghosiikëra na niitu inkongʼorimu, koru taanyi kwo bhetuubhaani! 30Ibheere tokamënya kubha nogheeche ghoose, wiiki tookwënda omooto akobhoori ghyokyose. Gho ghayo, toghakumi kubha noruure kwo Waryobha.”

31Yesu akabhabhoori akabhugha, “Kana, ibheere ˆmoghakumi? 32Eriibhagha ˆreghatingʼi, wiiki ˆrekahika, hano moghusanchana, omooto woose naaghuye bhowaabho, na ghontigha eni omwene chiri. Amare nteekubha eni omwene chiri, gho kubha Taata naanyi haghirohamu na neeni. 33Nebhughiri ghayo ghoose kubha mubhe no omurëmbë mo‑metema gheenyu, gho kubha moonyi moose yaane. Mo‑se muno mokubhöna anyaako yaaru, amare mwitoore omukörö gho kubha eni neyekindiri ase.”

Currently Selected:

Yohana 16: ntk

Highlight

Copy