Matíe 27
27
Áa faa Zozíi Pilátɩ drɩ̀
(Málɩ́kɩ 15.1; Lúkɩ 22.66; 23.1; Záan 18.28)
1Zrɩɩ zɩ a, Lagɔ̀bʋ̀bɔ̀nyʋ̀àkádàà yà bhlɩ́ a mnɩ́ a dɔ̀panyʋaá sɔ́, núnuù a ká Zozíi bhlá. 2Á gʋɔ́, lé á fɔɔ́ gɔ̀mnàà á wlele wá Pilátɩ a, ɔ gbó.
Zudáa Sɩkalɩ́ɔ́tʋ bhlá ɔ nyoku
(Nɩnɩgbɩ 1.18‑19)
3Zudáa sà lɛ́ Zozíi a, tányɩɛ́ mʋ́ ɔ́ yɩbhlɩ saá mà nyʋa ya Zozíi kúbhla jɩ̀ɩ ŋwʋ́ a, bhobhoé nió lé flèejìèè glʋ̀ɔ̀ lé kʋ́gbáá Lagɔ̀bʋ̀bɔ̀nyʋ̀àkádàà yà dɔ̀panyʋaá sɔ́ nyɛ́ ɔ́ a, ɔ́ yrɩ́bhɩɩ́. 4Ɔ́ mʋ á gɔ̀ lé ɔ́ srʋ á mà: «Yáa nyumoé nɩ, nyɔɔ́ ɩ́ ŋwʋ́ amɔ wlɩ a, ɔ nɩ́ nyumoé nɩ!» Nyʋaá anɩ́: «Ɛ̀ nɩ́ à wɔlɩ́ ŋwɔ́ɔ. Mɔ̀ nà múó nà wɔlɩ́ kʋ!» 5Á cí saá a, Zudáa páa moníe Lagɔ̀wlʋ̀kádʋ̀ɔ̀ mnɩ́ lé ɔ́ mʋ lé ɔ́ páa ɔ nyoku bhlú. 6Lagɔ̀bʋ̀bɔ̀nyʋ̀àkádàà tɩpɩ moníe a, á anɩ́: «À nɩ́ ka lé à kà moníe lɩ̀à Lagɔ̀wlʋ̀ɔ̀ a moníibhɔklɔɔ́ a mnɩ́ sá ŋwʋ́ʋ̀, nyɩ́kpɔbhlamoníi kʋ̀ʋ, dòlú a moníi kʋ̀ʋ.» 7Á bɔ́ɔ sá a, ɩ́mɩ́ ŋwɔ́ɔ mà, a bhá moníe lé a kla nyidimànyɔ̀ɔ̀ a lágbɩ̀pɩ̀ɔ̀ lé a kʋ́ʋ́ lówùdùnyʋa a lésigwlè mʋ́ pláa. 8Ɩ́ ka ŋnɩ́ a zà lágbàà a ŋnɩ́ ŋwɔ́ɔ yɩ́ zɩmnɛ́ dòlú a lágba. 9Lagɔ a nékʋ́cinyɔ Zelemíi a wɔlɩ́ɛ́ ɔ́ cí wá a, ɩ́mɩ́ nilo lɛ́. Ɩ́mɩ́ ŋwɔ́ɔ wá mà: Flèejìèè glʋ̀ɔ̀ lé kʋ́gbáá, á bhá wá ʋ́ mɩ́, moníe kɩ̀ɩ zà Izrayɛ́lɩnyʋa núnu wá lé á sɔɔ́ wá a. 10Moníe á bhá wá lé á kla wá nyidimànyɔ a lágbàà a. Ɩ́mɩ́ Kanyɔ ŋwʋ́ wá mɔ́ɔ né kʋ́.#27.9‑10 A zɛlɩɩ sáà Zaka 11.12‑13; Zele 18.2‑3; 19.1‑2; 32.6‑15.
Á fa Zozíi Pilátɩ drɩ̀
(Málɩ́kɩ 15.2‑5; Lúkɩ 23.3‑5; Záan 18.33‑38)
11Á fa Zozíi gɔ̀mna Pilátɩ drɩ̀, lé Pilátɩ yrɔ́ɔ́ mà: «Mɔ̀ ŋwɔ́ɔ lɛ́ Zúfʋnyʋa a lóo?» Zozíi anɩ́: «Ɩ́mɩ́ tɛ̀ɛ̀ ɩ̀ cí lɛ́.» 12Ɩ́ nɩ lé Lagɔ̀bʋ̀bɔ̀nyʋ̀àkádàà yà dɔ̀panyʋaá sɔ́ ŋwʋ́ Zozíi gbʋ́ wlú, mà ɔ nɩ́ wɔlɩ́ kʋ́ bhá. 13Ɩ́ ka ŋnɩ́ lé Pilátɩ srʋ ɔ́ mà: «Lɛbhɛɛ mɔ̀ á ŋwʋ́ lɛ kɔ́ɔ̀kɔ́ gbʋ́ wlú, nɩɩ́ sa née?» 14Bhè Zozíi nɩ́ srɔɔ́ kɔ́ɔ̀kɔ́ né, ɩ́ nɩ lé neé mna gɔ̀mnàà.
Á na ká yɩ́ Zozíi bhlá
(Málɩ́kɩ 15.6‑15; Lúkɩ 23.13‑23; Záan 18.39‑40)
15Flíiflíiglɩ̀sɩ́sɩ̀ɛ̀ fɩ́ɛ́ a tányɩ, Gɔ̀mnàà cíe kɔ́ɔ̀kɔ́ jɩ̀ŋwʋ̀nyʋa nyièdɩ á jɩ̀ŋwʋ̀nyɔ sá, jɩ̀ŋwʋ̀nyɔ̀ɔ̀ nyʋa pá ŋnɩ́ a. 16Mà jɩ̀ŋwʋ̀nyɔ a múó kʋ ʋ́ lé ŋnɩ́ mʋlɔɔ́, ɔ́mɔ́ á wlele Balabásɩ. 17Nyʋa ya wlú bhɩa, lé Pilátɩ yrá á mà: «Jɩ̀ŋwʋ̀nyɔ gbá a yrá lé nɩ cíe sá à? Zozíe á wlele Kláyɩ́sɩ a, mà Balabásɩɩ?» 18Mà Pilátɩ yì saá mà waza kà ŋnɩ́ a zà á lɔɔ́ Zozíi drɩ̀. 19Mà á kʋ tɩ́tɩ́plɔjrèè a mnɩ́ lé ɔ ŋwnɔ́ fɔɔ́ dí lé ɔ́ srʋ ɔ́ mà: «Yʋwlɩ, nàa pla nyɔɔ́ lɩ̀à a wɔlɩ́ɛ́ mʋ́, mà ɔ́ ŋwɔ́ɔ nyɔ lé ɔ̀ kɔ̀ɔ nɩnɩgbɩ srí sá Lagɔ a drɩ̀, nyɔɔ́ lɩ̀à a zà, nɩ́ dɩ́bɩ̀ɛ̀ lɩ̀à námasa ŋwɔ́ɔ. Ɩ́ yra nyumo yra ɔ́ zà.» 20Lagɔ̀bʋ̀bɔ̀nyʋ̀àkádàà yà dɔ̀panyʋaá sɔ́ súé nyʋa kʋ̀ jrèè, a ká mɔ̀ɔ Balabásɩ bhá bhè Zozíi a ká bhlá. 21Lé gɔ̀mnàà yrá sɔ́kʋ́ mà: «Áa sɔ́ɔ́, ànɔ̀ gbá a yrá lé nɩ cíe sá a?» Áa anɩ́: «Balabásɩ!» 22Pilátɩ anɩ́: «Bhè cégbá mʋ́ a yrá lé nɩ nɩ Zozíe a wlele Kláyɩ́sɩ a?» Á lɔ̀fɩ́ɛ́ á klu: «Kʋlɔ kúsu jɩ̀!» 23Pilátɩ anɩ́: «Bhè nyumosa gbá ɔ́ nɩ à?» Ɔ́ yrá bhlà sɩ́tɛ̀ bhè á klu sɔ́kʋ́, áa anɩ́: «Kʋlɔ kúsu jɩ̀!»
24Tányɩɛ́ mʋ́ Pilátɩ yɩbhlɩ saá mà ɔ nɩ́ á neé bhɩa a, bhè nyʋaá sa kɔ́ɔ̀kɔ́ yrè a, ɔ́ bhá nyúkɔpʋ lé nyʋa fɩ́ɛ́ a klʋ́ jɩ̀ ɔ́ wɔlɔ wlɩ lé ɔ́ srʋ á mà: «Nɩ́ nyɔɔ́ lɩ̀à a bhlábhlá wɔlɩɛ́ mʋ́ kʋ, aa múó ka yɩ́ mɩ́.» 25Lé jrèè kʋ ʋ́ lé á klu: «Aan, ɔ́ dòlúó a gèsie bhlá àmɔ̀, ɩ́ bhlá à mnɩ́ a yúó!» 26Lé Pilátɩ cíe Balabásɩ sá. Ɛ̀ nɩ̀ ŋwɔ́ɔ Zozíi a, ɔ́ nyɛ́ nyʋa lɔ̀ lé á sɩ́á fɩ́ɛ́ mɔ́, lé ɔ́ nyɛ́ à mɔ́ a kɔ́ɔ́ kúsu jɩ̀ kʋ.
Sʋ́ja nyɩa Zozíi
(Málɩ́kɩ 15.16‑20; Lúkɩ 23.11; Záan 19.2‑3)
27Lé gɔ̀mnàà a sʋ́jàà bháʋ́ Zozíi, á fɔɔ́ gɔ̀mna a gbó lé á lɔ̀fɩ́ɛ́ glalɔɔ́ klʋ́. 28Á díóbhluú lé á plɔɔ́ bànɩ̀zàla mʋ́ a kɔ́ɔ́ nyɩà. 29Á bhá nyníciwlùgblè lé á ŋwʋ́ ɔ̀ má wlú, á ŋwʋ́ ɔ́ zìzie liligblɔ̀gbá, á srɔɔ drɩ̀ koti sá lé á nyɩalɔɔ́, á nie: «Àyúó Zúfʋnyʋa a lóo!» 30Á ŋwnalɔɔ́ dàdɩ kʋ́, á bhá zúzu á sɩ́á ɔ wlú. 31Á bhɩa ɔ́ nyɩalɛ zɔ̀ a, á sɔɔ́ bànɩ̀zàlàà mʋ́ lé á plɔɔ ɔ kótié mʋ́, lé á fɔɔ́ yɩ́ kúsuó jɩ̀ kʋ ka.
Sʋ́jàà kʋ Zozíi kúsu jɩ̀
(Málɩ́kɩ 15.21‑32; Lúkɩ 23.26‑43; Záan 19.17‑27)
32Á wlʋ́ɛ́ dú a mnɩ́ á mnɛ lé a yà Sɩlɛ́nɩ a nyɔ a múó sɔ́ gbɩ́dà, ɔ́mɔ́ ŋwɔ́ɔ Simɔ́ɔ, á bhlio kʋ lé á gʋalɔ Zozíi a kúsuó jɩ̀ ɔ kʋ́ʋ gbɩdɩ̀. 33Á ŋnɩ dɛ́ɛ́ á wlele Glɔgɔtáa a, Glɔgɔtáa ŋnɩɛ a gba ŋwɔ́ɔ kúwlukofó a dɛ́. 34Nyʋaá bhá duváa lé á bhlábhlalaá gɔ́zɩ̀kàlɩ mʋ́ lé á nyɛ́ Zozíi mnáada, ɔ́ yráa a, ɔ́ sɛɛ́ neé.#27.34 A zɛlɩɩ sáà Lɔlɔ 69.22. 35Tányɩɛ́ mʋ́ sʋ́jàà kʋɔ́ kúsuó jɩ̀ a, á bhábha ɔ kótié, mà a kɩ́ɩ́ bhábha a, nɩ̀gbɩ á pá fɩ́ɛ́ lé á bhábhalɩɩ́.#27.35 A zɛlɩɩ sáà Lɔlɔ 22.19.
36Lé á plɩ́ɩ ʋ́ lé á bɔ́ɔ sá, á kɔ́ɔ́ dɛdɛ̀. 37Wɔlɩ́ɛ́ á ŋwʋ́ʋ kʋ́ lé á kʋ ɔ́ kúsuó jɩ̀ a, á jɩ́jrɩ̀ɩ̀ kplipá jɩ̀, lé á kʋ á ɔ wlú kʋ́. Ɩ́mɩ́ ŋwɔ́ɔ mà: Nyɔɔ́ lɩ̀à ɔ́mɔ́ ɔ̀ ŋwɔ́ɔ Zozíi, Zúfʋnyʋa a lóo!
38Dɛ́ɛ́ á kʋlɔ kúsuó jɩ̀ a, á kʋ sáà ʋ́ kàpàkápányʋa a sɔ́, múó kʋ ɔ lilie kʋ́, lé ànɔ kʋ ɔ kɔmɩa kʋ́. 39Plɩ́plɩ́nyʋa trʋlɔɔ́, á bíbie wlú. 40Á cíé lé á nie: «Mɔ̀ɔ nà kà wá Lagɔ̀wlʋ̀kádʋ̀ɔ̀ wla, lé ɔ̀ kà wá wlʋ ànʋ yrií ta pá a, sa yɩ́ ʋ́ ɩ̀ nyoku neé à! Nɩ̀ ŋwɔ́ɔ Lagɔ a Yuwliyʋ a, wlʋ́ kúsuó jɩ̀ lé kwlíi à!» 41Lagɔ̀bʋ̀bɔ̀nyʋ̀àkádàà lé lɔ̀ a másɛnyʋaá yà dɔ̀panyʋaá sɔ́ nyɩalɛ sáà mɔ́, á nie: 42«Ɔ́ sa ʋ́ nyʋa neé, bhè ɔ nɩ́ míi ɔ ká ʋ́ ɔ nyoku neé sa à! Ɔ nɩ ŋwɔ́ɔ Izrayɛ́lɩnyʋa a lóo a, ɔ wlʋ́ yɩ́ kúsuó jɩ̀ ɔ kwlíi à! Bhʋ́ à yi ɔ wɔlɩ́ɛ́ cícása kʋ́ bhá. 43Lagɔ̀ɔ̀ ɔ́ tɔ̀ wá duo a, ɔ nɩ wɔ̀ɔ̀ cícása a, ɔ sa yɩ́ ʋ́ mɔ́ neé à, ɔ nie wá mà: Lagɔ a Yuwliyʋ ɩ́ ŋwɔ́ɔ.» 44Kàpàkápányʋaá sɔ́ɔ́ a sɛ́fʋɔ́ kʋ̀ kúsie yɩ́ a, á trʋlɔɔ́, wɔlɩceé a múó mɩ́ á cíé.
Zozíi a kwɩ́ a wɔlɩ́
(Málɩ́kɩ 15.33‑39; Lúkɩ 23.44‑48; Záan 19.28‑30)
45Yrʋ́ a dunyɩ̀dɩ ŋnɩ, sɩ́tɛ̀ ɩ́ kʋ bhè cúcú plalɛ bhlɩ́ a lɔ̀fɩ́ɛ́ jɩ̀, ʋ́ kʋplada àààn lé kosúgbòglìyi a ta kla. 46Kosúgbòglìyi ta a tányɩɛ́, Zozíi bhɩa wɔlɩ́, ɔ́ anɩ́: «Elíi! Elíi! Lama sabatani?» Ɩ́ gba ŋwɔ́ɔ mà: «À Tʋ́ Lagɔ̀! À Tʋ́ Lagɔ̀! Ɛ̀kʋ̀ʋ̀ bhè ɩ̀ sa mɔ́ɔ glɔ̀gbá jɩ̀ a?#27.46 A zɛlɩɩ sáà Lɔlɔ 22.2.» 47Nyʋa àna kʋ nyʋaá nyièdɩ á nú wle wle wɔlɩɛ́ a, á anɩ́: «À pʋ nyúkwlí mà Elíi ɔ́ wlee!» 48Bhè nyɔ a múó bháʋ́ sóo lé ɔ́ mʋ lé ɔ́ bhá sápla lé ɔ́ ŋwʋ́a nɔkalʋ, lé ɔ́ gʋalaá zìzie yɩ́ lé ɔ́ nyɛ́ Zozíi mnáada. 49Bhè nyʋa àna nie mà: «À gláa, Elíi nɩ yi ʋ́ mɔ́ neé sa a, à kɩ́ɩ́ yɛ́.» 50Bhè Zozíi bhɩa sɔ́kʋ́ wɔlɩ́ a, ɔ́ɔ dí nyobhuo. 51Dáamúó, Lagɔ̀wlʋ̀ɔ̀ a mnɩ́ a lɔkwɩɛ́ kʋ̀ mɔ̀ a, ɛ́ yralɔ mʋ́ pɩ́ sɔ́ ɛ́ bháa lagowlú lé ɛ́ ŋnɩ zɔ̀, dʋ̀dʋ tɩtɛɛ̀, cɔ́kwɩ yrayralɔ mʋ́, 52lési kalɔ klʋ́ lé Lagɔ̀nyʋ̀à kɔ́kɔ́mnɩ́ɛ́ à kú wá a, á galɔ̀. 53Lé tányɩɛ́ mʋ́ Zozíi galɔ̀ a, a sɛ́fʋɔ́ á wlʋ́ lési a mnɩ́ lé á mʋ lé á pla kplɔkplɔdùò#27.53 kplɔkplɔdùò: Zelízalɛ́mʋ kʋ̀ʋ. a mnɩ́, lé á flʋ mɔ̀ɔ a nyʋa kɔ́kɔ́mnɩ́ yɩ́. 54Wlɔmɛ́ɛnyʋa a sʋ́jàà a cífɩɛ́, lé sʋ́ja ànàà à gla Zozíi klʋ́ a, tányɩɛ́ mʋ́ dʋ̀dʋ̀ɔ̀ tɩtɛɛ̀ lé á yɛ́ wɔlɩ́ɛ́ fɩ́ɛ́ ɩ̀ ŋnɩ a, ɩ́ la á ŋanɩmɛ kʋ́. Bhʋ́ á cí mà: «Nyɔɔ́ lìà ŋwɔ́ɔ wázɔ̀ cícása Lagɔ a Yuwliyʋ!» 55Ŋwná kɔ́kɔ́mnɩ́ kʋ la sáà ʋ́, mà á wlʋ́ʋ ʋ́ gwá lé á dʋdʋɛ. Bháa wá Galilée kʋ́ a, a yà Zozíi sɔ́ɔ̀ námɛ, ámá ŋwʋ́ɛ́ ɔ́ yɩ́gɔ̀. 56Ámá ŋwnáá nyièdɩ, Malí Madɩlɛ́nɩ kʋ ʋ́, Zákɩ yà Zɔ̀zɛ́fʋ sɔ́ a nɛ́ Malíi kʋ ʋ́ lé Zebedée a yúó a nɛ́ kʋ sáà ʋ́.
Á ŋwʋ́ Zozíi a gàzɛ̀ɛ̀ lésuú
(Málɩ́kɩ 15.42‑47; Lúkɩ 23.50‑56; Záan 19.38‑42)
57Kosúgbòtànyɩ, Alimatée a lóo a múó á wlele wá Zɔ̀zɛ́fʋ, ɔ̀ ŋwɔ́ɔ wá sáà Zozíi a kʋjɩ̀nyɔ a, ɔ́mɔ́ ɔ̀ yi. 58Ɔ́mɔ́ ɔ̀ mʋ lé ɔ̀ srʋ Pilátɩ mà ɔ nyɛ́ ɔ́ Zozíi a gàzɛ̀ɛ̀. Lé Pilátɩ srʋ nyʋa mà a nyɛ́ ɔ̀ mɛ́. 59Lé Zɔ̀zɛ́fʋ sa gàzɛ̀ɛ̀ kúsuó jɩ̀ lé ɔ́ bhá cʋ́crɔ́ɛ́ lé ɔ́ pɩpɩɛ́ 60lé ɔ́ ŋwʋ́ɛ́ lésu yalʋɔ́ mnɩ́ ɔ́ kɔtɔ cɔ́kʋ patrapá a mnɩ́ ɔ nyoku a zà a, ɔ́ bhísie cɔ́kʋ lé ɔ́ ŋwʋ́ŋwɛ lésuó a pladàà kʋ́ lé ɔ́ mʋ. 61Zozíi a zízìètànyɩ̀ɛ̀, Malí Madɩlɛ́nɩ yà yígàdà Malíi a múó sɔ́ bɔ́ɔ ʋ́ lésuó a drɩ̀.
Sʋ́ja dɛdɛ Zozíi a lésuó
62Yruó kʋ́ á bhɩa flíiflíiglɩ̀sɩ́sɩ̀ɛ̀ a dʋ̀dʋ kʋ́ a gɩglɛ̀ zɔ̀ lé zrɩ̀ zɩ a,#27.62 Yruó kʋ́ Zúfʋnyʋa gɩglà dʋ̀dʋ kʋ́ flíiflíiglɩ̀sɩ́sɩ̀ɛ̀ a zà a, sɔ́lɩ a gbɩ́ yruú kʋ̀ʋ. bhʋ́ Lagɔ̀bʋ̀bɔ̀nyʋ̀àkádàà yà Falizɩ́ɛnyʋaá sɔ́ mʋ Pilátɩ srʋ ka 63mà: «Kanyɔɔ̀, à yì saá, tányɩɛ́ mʋ́ Kpɔkplányɔɔ́ lɩ̀à gà wázɔ̀ a, ɔ́ cí wá mà ɔ nɩ kú a, tayruó kʋ́ ɔ́ yi wá galɔ̀.#27.63 A zɛlɩɩ sáà 16.21; 17.23; 20.19. 64Naa, kà sʋ́ja srʋ lé a ká lésuó dɛdɛ̀ yrií a ta a tányɩ, ɔ́ kʋjɩ̀nyʋ̀àà nɩ ka lɛ mɔ́ glù sa à, lé a nɩ ka bhlɩ́ srʋ mà: Ɔ́ ya galɔ̀. À nɩ̀ cíe ɔ́ kʋjɩ̀nyʋ̀àà sá a, kpɔkplá ànàà á na ká ŋwʋ́ a, á yi tɛgà anaa kʋ́ zi.» 65Bhʋ́ Pilátɩ srʋ á mà: «Sʋ́ja lɛ̀ɛ̀! A mʋ lé a gla lésuó klʋ́ a kʋ́ʋ́ dɛdɛ̀ cémʋ́ a wà a!» 66Lé á mʋ lésuó dɛdɛ̀ kà. Cɔ́kʋɔ́ ʋ̀ kɩkla lésuó a plaàdà a né a, á gʋʋ́ ʋ nɩ ka sríneé kʋ́ wlʋ́, lé sʋ́jàà gla yɩ́ mʋ́ klʋ́.
Currently Selected:
Matíe 27: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
