Matíe 28
28
Zozíi ya galɔ̀
(Málɩ́kɩ 16.1‑10; Lúkɩ 24.1‑12; Záan 20.1‑10)
1Zúfʋnyʋa a nyɔbhleyruó plɩ́ɩ a, sɔ́lɩ a geglìàmí, Malí Madɩlɛ́nɩ ya Malíi ànɔ̀ɔ̀ sɔ́ mʋ lésuó yɛ́ ka. 2Fɩɩn bhè dʋ̀dʋ tɩtɛɛ̀, bhè Kanyɔ a Kplɔkplɔzùzu a múó wlʋ́ lagɔɔ́ lé ʋ́ kwlíi, lé ʋ́ bhísie lésuó né kʋ́ a cókʋɔ́ lé ʋ́ sa ʋ́ mʋ́ lé ʋ́ plɩ́lʋʋ́ jɩ̀ lé ʋ́ bɔ́ɔ sá. 3Ʋ́ lʋɛ nànɩ́ cémʋ́ lagɔ̀ɔ̀ wɛ́zɛ lɛ́ a, ʋ kótié kʋ plátatata. 4Mà sʋ́jàà à dɛdɛ lésuó a, á tɩtɛlɛ ŋanɩmɛɛ́ bhlá a, áa kúé. 5Lé Kplɔkplɔzùzùò srʋ ŋwnáá mà: «Ŋanɩmɛ ná bhlá amɔ we! Ɩ́ yì saá mà Zozíe á kʋ lɛ́ kúsuó jɩ̀ a, ɔ́mɔ́ kà ŋnɩ́ lé a yi lɛ́. 6Ɔ nɩ́ dɛ́ kʋ, ɔ́ ya galɔ̀, wɔlɩ́ɛ́ ɔ́ cí wá ɩ́mɩ́ ŋnɩ. A yi a ká dɛ́ɛ́ á púolo wá a, yɛ́! 7Lé a vʋ́vʋ̀à kʋ́ a mʋ a srʋ ɔ́ kʋjɩ̀nyʋ̀àà mà ɔ́ ya galɔ̀, ɔ́ ya amɔ Galilée gláa ka mʋ, mɔ̀ɔmɔ̀ a na kɔ́ɔ́ yɛ́ɛ.#28.7 A zɛlɩɩ sáà 26.32. Wɔlɩ́ɛ́ ɩ́ ka lé ká la amɔ srʋ á, ɩ́mɩ́ lɛ̀.»
8Ŋwnáá, cémʋ́ ŋanɩmɛ yà lɔlɔ sɔ́ cákalɔ mʋ́ lé ɩ́ bhlá a, á bháʋ́ sóo lé á wlʋ́ lésuó gɔ̀ lé á mʋ Zozíi a kʋjɩ̀nyʋ̀àà srʋ ka.
9Ŋwnáá wlʋ́ɛ́ yɩ́ lésuó gɔ̀ á fa sóo á mnɛ, bhè vʋ̀à Zozíi flʋ ʋ́, ɔ́ námɛ ɔ́ yie a nyúzɔ kʋ́, ɔ́ anɩ́: «A àyúó!» Lé ŋwnáá ŋnɩ ɔ́ gɔ̀ lé á bhli ɔ́ bhɩ kʋ́ lé á srɔɔ wlú. 10Lé Zozíi srʋ á mà: «Ŋanɩmɛ ná bhlá amɔ, mà a mʋ lé a srʋ ɩ nɩ́ayúóó lé a mʋ́ Galilée mà mɔ̀ɔmɔ̀ á na ká mɔ́ɔ yɛ́ɛ.»
Sʋ́jàà sa lésuó jɩ̀ a dí
11Ŋwnáá kʋ nyúzɔ kʋ́, bhè sʋ́jàà à dɛdɛ la lésuó a, á nyièdɩ a sʋ́ja àna mʋ sáà dú Lagɔ̀bʋ̀bɔ̀nyʋ̀àkádàà wɔlɩ́ɛ́ fɩ́ɛ́ ɩ̀ plɩ́ a, dí sa ka. 12Mà Lagɔ̀bʋ̀bɔ̀nyʋ̀àkádàà nú wɔlɩ́ɛ́ a, a yà dɔ̀panyʋaá sɔ́ núnuù lé á nyɛ́ sʋ́jàà moníi kɔ́kɔ́mnɩ́, 13lé á srʋ á mà: «A nɩ mʋ a, a cí mà: À kʋ̀ yrá lé ɔ́ kʋjɩ̀nyʋ̀àà yi dʋdʋ́kádʋʋ́ lé á ghlíi gàzɛ̀ɛ̀ lé á fɛɛ́. 14Mà gɔ̀mnàà nɩ núí a, cémʋ́ à yi cí lé à yio duo jɩ̀ sɩsa a, à yi cí, lé a nɩ ka amɔ gbʋ́ wlú ŋwʋ́.» 15Lé sʋ́jàà bhli moníe kʋ́ lé céé tɛ̀ɛ̀ á srʋ á mà a nɩ a, ɩ́mɩ́ á nɩ. Ɩ́mɩ́ kpɔkplá wɔlɩɛ́ lɩ̀à sʋ́jàà bie lɛ́ a, ɩ́mɩ́ bhli Zúfʋbhlɩɛ́ a lɔ̀fɩ́ɛ́ lé yi lé ŋnɩ zɩmnɛ́.
Zozíi flʋ ɔ́ kʋjɩ̀nyʋ̀àà yɩ́
(Málɩ́kɩ 16.14‑18; Lúkɩ 24.36‑49; Záan 20.19‑23; Nɩnɩgbɩ 1.6‑8)
16Kʋjɩ̀nyʋ̀àà kʋ́gbá bhlɛ̀gbɩ́ɛ́ mʋ Galilée a kíkéé Zozíi pápalaá a, jɩ̀.#28.16 A zɛlɩɩ sáà 26.32. 17Á yɛ́ ɔ́ a, á sra ɔ́ drɩ̀ koti sá lé á bʋbɔ̀lɔ̀ɔ̀, mà á nyièdɩ á bhlɔ̀bhlɔ̀nyʋa á di nɩ́ bhli. 18Lé Zozíi ŋnɩ á gɔ̀, lé ɔ́ srʋ á mà: «Lagɔ nyɛ́ mɔ́ɔ pɔ́waá fɩ́ɛ́, lagɔɔ́ bhè dɛ́ dʋ̀dʋ kʋ́ sɔ́ a zà. 19A mʋ bhlɩ́ɛ́ fɩ́ɛ́ jɩ̀ lé a cíi mɔ̀ɔ a nyʋa gɔ̀ bhè a ká ná kʋjɩ̀nyʋa plɩ́.#28.19 A zɛlɩɩ sáà Nɩnɩgbɩ 1.8. A ŋwʋ́ á nyú wlú Tʋ́, Yʋ́ lé Blɔ̀blɔ̀zùzu a ŋnɩ́ mʋ́. 20A cɩ́alaá, bhè a ká jràmáá fɩ́ɛ́ ɩ́ pápa lɛ́ amɔ a ʋ́ ŋwʋ́. Mà mɔ́ɔ, ɩ́ yi kɔ́ɔ̀kɔ́ amɔ gɔ̀ kʋʋ lé kɔ́ yi kɛ́ ʋ́ bhɩa.»
Currently Selected:
Matíe 28: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
