Matíe 26
26
Nyʋa núnuù a ká Zozíi bhlá
(Málɩ́kɩ 14.1‑2; Lúkɩ 22.1‑2; Záan 11.45‑53)
1Zozíi bhɩa wɔlɩ́ɛ́ fɩ́ɛ́ lɩ̀à a lɩbhɩɛ zɔ̀ a, ɔ́ srʋ ɔ́ kʋjɩ̀nyʋ̀àà mà: 2«A yì saá mà yrií sɔ́ tuo mɔ̀ɔ lé flíiflíiglɩ̀sɩ́sɩ̀ɛ̀ ká ŋnɩ lé Nyɔɔ́ a Yuwliyʋɔ́, nyʋa kɔ́ɔ́ nyʋa wlɩ pɛ́lʋ́ ŋwʋ́ lé a kɔ́ɔ́ kúsu jɩ̀ kʋ.» 3Ɩ́ ka ŋnɩ lé Lagɔ̀nɔ̀nʋ̀zrɩ̀nyʋ̀à a cífɩnyʋaá yà bhlɩ́ɛ́ a mnɩ́ a dɔ̀panyʋaá sɔ́ ŋnɩlɔ̀ Lagɔ̀bʋ̀bɔ̀nyɔ̀kádɔ̀ɔ̀ Kayífʋ a gbó wlú. 4Lé á núnuù, ɩ́mɩ́ ŋwɔ́ɔ mà a ká dɩgàlɩ bhá lé a ká Zozíi kʋ́ bli á kɔ́ɔ́ bhlá. 5Á núnu a, ɩ́mɩ́ ŋwɔ́ɔ sɔ́kʋ́ mà: «À ná bhlilo glɩ̀sɩ́sɩ̀ɛ̀ a tányɩɛ́ mʋ́ kʋ́, nyʋa nɩ kɩɩ́ yrè mʋ́ pláa.»
Ŋwnɔ́ kɔ́sɔ Zozíi dàŋwóni wlú
(Málɩ́kɩ 14.3‑9; Lúkɩ 7.36‑50; Záan 12.1‑8)
6Zozíi kʋ Betaníi kosugɔ̀bhànyɔ̀ɔ̀ á wlele Simɔ́ɔ a, ɔ gbó, 7lé ŋwnɔ́ a múó yi lé ɔ́ ŋnɩ ɔ́ gɔ̀, ɔ́ gbá námakpalá wlɩɩ́, cɔ́kʋɔ́ á wlele alɩbátrɩ#26.7 alɩbátrɩ: Cɔ́kʋ a céàna kʋ̀ʋ. Ʋ́ lʋɛ, á bhʋ́ʋ́ lé á nie kpálɩ́. a, ʋ́mʋ́ á bhá lé á nɩ a. Kpáláá yíe dìèpàdàŋwóni kʋ́, Zozíi kʋ tébhle jɩ̀ ɔ́ lie lé ŋwnɔ́ɔ́ kɔ́kʋalɔɔ́ dàŋwónié wlú. 8Mà tányɩɛ́ mʋ́ Zozíi a kʋjɩ̀nyʋ̀àà yɛ́ wɔlɩ́ɛ́ ŋwnɔ́ɔ́ nɩ a, ɩ́ bhlálaá dɩ, á anɩ́: «Bhè ɛ̀ kʋʋ bhè ŋwnɔ́ɔ́ ŋáta sɩ́tɛ̀ dàŋwónié à? 9À yi la ɛ pɛ́lʋ́ tɛ́ma lé à yií la sa à, lé moníe à nà kà yɛ́ a, à yií la ŋazɩ̀nyʋa nyɛ́!» 10Mà Zozíi ŋwʋ́ wɔlɩ́ɛ́ fɩ́ɛ́ á nɩ a yɩ́gɔ̀, bhʋ́ ɔ́ srʋ á mà: «Ɛ̀kʋ̀ʋ̀ bhè a bhlálɛ ŋwnɔ́ɔ́ nyakalɩ áa? Wɔlɩ́ɛ́ ɔ́ nɩ lɛ́ mɔ́ɔ gà a, námasa ɩ́ ŋwɔ́ɔ à. 11Ŋazɩ̀nyʋa, dɛ́ a yà sɔ́ kʋ kɔ́ɔ̀kɔ́, mà mɔ́ɔ, nɩ́ ka kɔ́ɔ̀kɔ́ amɔ nyièdɩ kʋ. 12Dàŋwónié ɔ́ kɔ́kʋɔ lɛ́ mɔ́ɔ jɩ̀ a, ɔ́ɔ nií bhlà ná ŋwʋ́ ŋwʋ́ yruó kʋ́ a zà. 13Náa srʋɛ amɔ cɩ́cása a mnɩ́: Zɩkpaá lɩ̀à mnɩ́ a bhlɩ́ɛ́ fɩ́ɛ́ jɩ̀ á na ká Lagɔ a Námadìè cí ka fa a, wɔlɩdrè lɩ̀à ŋwnɔ́ɔ́ nɩ lɛ́ ná zà a, nyʋa yia kɔ́ɔ̀kɔ́ dí kʋ́ ŋwʋ́ʋ, lé á yio kɔ́ɔ̀kɔ́ luò.»
Zudáa Sɩkalɩ́ɔ́tʋ nyɩ́glɩ̀ Zozíi
(Málɩ́kɩ 14.10‑11; Lúkɩ 22.3‑6)
14Zozíi a kʋjɩ̀nyʋ̀àà kʋ́gbá sɔ́ɔ́ a nyièdɩ a nyɔɔ́ á wlele wá Zudáa Sɩkalɩ́ɔ́tʋ a, ɔ́ mʋ Lagɔ̀bʋ̀bɔ̀nyʋ̀àkádàà gɔ̀, 15lé ɔ́ srʋ á mà: «Nɩ ŋwʋ́ amɔ wlɩɩ Zozíi pɛ́lʋ́ a, lɛ́gbá a yi míi lé a yi mɔ́ nyɛ́ a?» Bhʋ́ á zɛɛ flèejì a glʋ̀ lé kʋ́gbá lé á nyɛ́ ɔ. 16Bháa yɩ́ ʋ́ jɩ̀ a, Zudáa nie yɩ́ wɔlɩ́ɛ́ fɩ́ɛ́ lé ɔ ká yɩ́ Zozíi ámá wlɩ ŋwʋ́.
Flíiflíiglɩ̀sɩ́sɩ̀ɛ̀ a lelilɩ
(Málɩ́kɩ 14.12‑21; Lúkɩ 22.7‑14,21‑23; Záan 13.21‑30)
17Flíiflíiglɩ̀sɩ́sɩ̀ɛ̀ ɛ̀ kɛ̀ɛ̀ tányɩ mʋ́ a nɩ́ ŋwʋ́ wá flɔ́ɔ bháabháagɔ̀zɩ mnɩ́ a, ɛ́ tagàyrùò kʋ́ Zozíi a kʋjɩ̀nyʋ̀àà yio yrá ka mà: «Cɩ́anyɔɔ̀, dɛ́gbá ɩ̀ yrá lé à nɩ̀ pi nà flíiflíiglɩ̀sɩ́sɩ̀ɛ̀ a lelilɩɛ́ a?» 18Zozíi anɩ́: «A mʋ dú, nyɔɔ́ a na ká yɛ́ a, a srʋ ɔ́ mà: Cɩ́anyɔ anɩ́: Ɔ glíiyié ya kla, naa nà gbó mʋ́ ɔ yà ɔ́ kʋjɩ̀nyʋ̀àà sɔ́ na ká flíiflíiglɩ̀sɩ́sɩ̀ɛ̀ yɛ́ɛ.» 19Cémʋ́ Zozíi cí a, sɩ́tɛ̀ mʋ́ ɔ́ kʋjɩ̀nyʋ̀àà nɩ lé á ghlɩlɩ flíiflíiglɩ̀sɩ́sɩ̀ɛ̀.
Nyɔɔ́ nà kà Zozíi sa a, á yɔɔ́ yɩbhlɩ
20Kosúgbòtànyɩ, Zozíi yà ɔ́ kʋjɩ̀nyʋ̀àà kʋ́gbá sɔ́ɔ́ sɔ́ kʋ tébhle jɩ̀ á lie. 21A kʋ liìda lé Zozíi srʋ á mà: «Náa srʋɛ amɔ cícása, mà á nyièdɩ a nyɔ a múó yi mɔ́ sa à!» 22Ɔ́ cí wɔlɩdrè a, kpɩkpɩ wɔtɔma á lɔ̀fɩ́ɛ́ gɔ̀, ɩ́ ka ŋnɩ́ lé nyɔ anɔ yrɔ́ɔ́ mà: «Mɔ́ɔ, Kanyɔɔ̀?» Nyɔ anɔ yrɔ́ɔ́ mà: «Mɔ́ɔ, Kanyɔɔ̀?» 23Zozíi anɩ́: «Nyɔɔ́ yɔ́ɔ̀sɔ́ à plalɛ dàplʋ a múó mnɩ́ glɔ̀gbɩ́ a, ɔ́mɔ́ nà kà mɔ́ɔ saà. 24Wɔlɩ́ɛ́ ɩ̀ jɩ́jrɔ̀ wá Nyɔɔ́ a Yuwliyʋɔ́ a zà a, ɩ́mɩ́ ŋnɩ, kú ka ɔ́ mnɛ yɩ́ lɛ́! Mà nyɔɔ́ nà kɔ̀ɔ̀ nyʋa wlɩ pɛ́lʋ́ ŋwʋ́ a, kplé lé ɛ́ klɔɔ́! A nɩ nɩ́ la bhʋ́anɩ nyɔɔ́ va a, ɩ́ náa la kpʋanyɩ!» 25Mà Zudáa nà kɔ̀ɔ̀ lɛ́ sa a, yrɔ́ɔ́ mà: «Másɛɛ̀, mɔ́ɔ ɩ̀ sa a, mɔ́ɔ nà kà lɛ́ mɔ̀ sa a?» Zozíi anɩ́: «Mɔ̀ cíí!»
Kanyɔ a kplɔkplɔlelilɩ
(Málɩ́kɩ 14.22‑26; Lúkɩ 22.15‑20; 1 Kɔlɛ́tɩ 11.23‑26)
26Á kʋ liìda lé Zozíi bhá flɔ́ɔbhuo, ɔ́ bhibhie lé ɔ́ pá Lagɔ nyú lé ɔ́ bhábha lé ɔ́ nyɛ́ ɔ́ kʋjɩ̀nyʋ̀àà, ɔ́ srʋ á mà: «A bhá a ká li mà ná yɛ́kɛ́ kʋ̀ʋ!» 27Lé ɔ́ bhá duváaplɩ, ɔ́ bhibhie, ɔ́ pá Lagɔ yúó lé ɔ́ nyɛ́ a ɔ́ anɩ́: «Á lɔ̀fɩ́ɛ́ a mná! 28A mná mà ná dòlú kʋ̀ʋ! Mɛnʋ́ dòlúó ʋ̀ kɔ́sɔ nyʋa kɔ́kɔ́mnɩ́ a zà sá lé ʋ̀ cie nyʋa a nyumoé a, ʋ́mʋ́ kʋ̀ʋ. 29Náa srʋɛ amɔ mà, bháa yɩ́ lɛ́ zɩmnɛ́ jɩ̀ a, nɩ́ ká yɩ́ duváa lɩ̀à mná, ká yɩ́ sɔ́kʋ́ duváa mná a, à Tʋ́ a léyibhlɩɛ́ a mnɩ́ mɔ̀ɔ yáa amɔ sɔ́ à nà kà yɩ́ duváa yala mná.»
30Zozíi bhɩa kɔ́ɔ̀kʋ́ cícíé zɔ̀ a, á bháa yɩ́ ʋ́ flíiflíiglɩ̀sɩ́sɩ̀ɛ̀ a lʋ́ a bhlɩbhlɩ́ɛ́ kʋ́, á kʋ bhlɩda lé á gblà Olivíe kikéé wlú.
Zozíi anɩ́ Pɩ́ɛ́lɩ yi ɔ́ zà zie
(Málɩ́kɩ 14.27‑31; Lúkɩ 22.31‑34; Záan 13.36‑38)
31Zozíi srʋ ɔ́ kʋjɩ̀nyʋ̀àà mà: «Dɩ́bɩ̀ɛ̀ lɩ̀à bhlɔ̀bhlɔ̀, a yi mɔ́ɔ yɩ́ sá jɛlɔ̀, á jɩ́jrà Lagɔ̀bɔ̀gʋ a mnɩ́ mà: Bhlábhlɩ́ a kʋjɩ̀nyɔ̀ɔ̀, á yio bhlá lé bhlábhlɩ́ɛ́ yi sá jɛlɔ̀.#26.31 A zɛlɩɩ sáà Zaka 13.7.
32Mà nɩ galɔ̀ a, ɩ́ yi amɔ Galilée gláa ka mʋ.» 33Ɔ́ cí sɩ́tɛ̀ a, Pɩ́ɛ́lɩ srʋ ɔ́ mà: «Másɛɛ̀, á lɔ̀fɩ́ɛ́ yi mɔ̀ɔ yɩ́ sá jɛlɔ̀, mà mɔ́ɔ, nɩ́ ka kɔ́ɔ̀kɔ́ mɔ̀ gɔ̀ wlʋ́.» 34Bhʋ́ Zozíi srʋ ɔ́ mà: «Pɩ́ɛ́lɩ ná srʋɛ mɔ̀ cícása, mà, zɩ́mnɩ a dɩ́bɩ̀ɛ̀ lɩ̀à bhlɔ̀bhlɔ̀, fɩ́ɛ́ lé zizìèdɩ̀kɔ̀kʋ̀ɛ̀ ká wɔlɩ́ pá a, ɩ̀ yi taa kʋ́ ziè ná zà, ɩ̀ yi cí mà, nɩ́ mɔ́ɔ yì.» 35Pɩ́ɛ́lɩ anɩ́: «Ɩ́ yi sanasàna kʋ, ya mɔ̀ sɔ́ à yi pla nɩ́ ka kɛ́ nà zà zie.» Ɔ kʋjɩ̀nyʋ̀àà ànàà sɛ́fʋɔ́ céamúó ɩ́mɩ́ á cí.
Zozíi bhibhie Gesemaníi
(Málɩ́kɩ 14.32‑42; Lúkɩ 22.39‑46)
36Zozíi yà ɔ́ kʋjɩ̀nyʋ̀àà sɔ́ mʋ dɛ́ á wlele Gesemaníi a. Lé ɔ́ srʋ á mà: «A kʋ dɛ́ mà ná ká amɔ gwá wlʋ́ lé ká bhibhie.» 37Ɔ́ na ká mʋ a, ɔ́ fa Pɩ́ɛ́lɩ yà Zebedée a yúóó sɔ́ɔ sɔ́. Mà Zozíi mnɛ bhè duo gbláalɔɔ́ nyú, ŋanɩmɛ bhlɔ́ɔ́. 38Bhʋ́ ɔ́ srʋ á mà: «Kalɩmɛɛ́ mʋ́ ɩ́ kʋ lɛ́ a, ɛ́ yi mɔ́ kwɩ́ neé fa. A kʋ dɛ́ mà ya amɔ sɔ́ à nɩ ka ŋwɔ́ɔ, zrɩ̀ à nà kà bhlá.» 39Lé ɔ́ wlʋ́laá gwá dɩgàsa ɔ ká bhibhie, ɔ́ sra koti sá lé ɔ́ ŋwʋ́ klʋ́ dʋ̀dʋ kʋ́ lé ɔ́ cíe bhibhie kʋ́, ɔ́ anɩ́: «Wé! À Tʋ́, ɩ́ nɩ ŋwɔ́ɔ la mà nyakalɩ plɩɛ́ lɩ̀à wlʋ́ la mɔ́ gwá lé ná mnɛ́ la a, mà nà nɩ cémʋ́ ná duo yra a, nɩ cémʋ́ ɩ̀ wà a!» 40Zozíi yrɩ́bha lé ɔ́ yi ɔ́ kʋjɩ̀nyʋ̀àà gɔ̀ a, á lɔ̀fɩ́ɛ́ ya ŋwɔ́ɔ. Ɔ́ srʋ Pɩ́ɛ́lɩ mà: «A nɩ́ ka míi lé a ká glíiyie a múó a zà yrá a duo kʋ́ tɛ́ma a, mà aa yi ŋwɔ́ɔ? 41A ná ŋwɔ́ɔ, a bhibhie kɔ́ɔ̀kɔ́ Lagɔ bhè a nɩ ka amɔ zɔ̀ saà! Wé a yrá yɩ́ la námasa a niníé, ɛ́ nɩ̀ ŋwɔ́ɔ a zizi a, ɩ́ tɛ́ kɔ́ɔ̀kɔ́ mʋ́, mà yɛ́kɛ́ɛ́ ɛ́mɛ́ ɛ̀ nɩ́ yɩ́ fɩ́ ka lé ɛ ya Dɩ́blʋ̀ɔ̀ sɔ́ ká kʋ́ bhlaa!» 42Lé ɔ́ wlʋ́ʋ sɔ́kʋ́ má gwá lé ɔ́ mʋ dɛ́ɛ́ ɛ̀ trʋ a bhibhie ka, ɔ́ mʋ a, ɔ́ anɩ́: «Wé, à Tʋ́, nàa nɩ nɩ́ ka mɔ́ɔ nyakalɩ plɩɛ́ lɩ̀à gwá wlá a, lé ɩ nɩ ŋwɔ́ɔ mà kɛ́ɛ́ mná a, nà nɩ cémʋ́ ná duo yrá a, nɩ cémʋ́ ɩ̀ wà a!» 43Lé ɔ́ mʋ sɔ́kʋ́ ɔ́ kʋjɩ̀nyʋ̀àà gɔ̀, ɔ nɩ ná yi a, á ya sɔ́kʋ́ ŋwɔ́ɔ, á yɩ́ ya kʋ́ ŋwnɔ́ma yrá a zà. 44Lé ɔ́ wlʋ́ sɔ́kʋ́ má gwá lé ɔ́ mʋ taàda ɔ Tʋ́ bhibhie ka, wɔlɩceé a múó ɩ́mɩ́ ɔ́ cí lé ɔ́ bhibhiè. 45Ɔ́ yrɩ́bha ɔ́ kʋjɩ̀nyʋ̀àà gɔ̀ a, bhʋ́ ɔ́ srʋ á mà: «A ŋwɔ́ɔ kɔ́ɔ̀kɔ́, a bhlenyɔɔ́, a lɛbhɛɛ glíiyie ya ʋ́ mɛ́, Nyɔɔ́ a Yuwliyʋɔ́, ɔ́mɔ́ á na ká yɩ́ bhàlʋ̀nyʋa wlɩ pɛ́lʋ́ ŋwʋ́. 46A soglù à kà mʋ mà pɛ́lʋ́panyɔɔ́ mɔ́ɔ yie, ɔ́ ya dɛ́ gɔ̀ mɛ́.»
Á ya Zozíi kʋ́ bhlii
(Málɩ́kɩ 14.43‑50; Lúkɩ 22.47‑53; Záan 18.2‑11)
47Wɔlɩ́ɛ́ kʋ bhlà saá Zozíi neé bhè blà! Zudáa pla, ɔ́ kʋjɩ̀nyʋ̀àà kʋ́gbá sɔ́ a nyièdɩ a nyɔ kʋ̀ʋ, nyʋaá ɔ yà sɔ́ námɛ a, a nɩ́ bɛ́ á gbágbà jɛ̀lɩ̀ yà sidrì sɔ́ wlɩɩ́. Lagɔ̀bʋ̀bɔ̀nyʋ̀àkádàà yà dɔ̀panyʋaá sɔ́ cíe a. 48Mà nyɔɔ́ ɔ̀ sà Zozíi a, ɔ yàsɔ́ núnuù lé ɔ́ srʋ á mà: «Nyɔɔ́ ná ká gbɩ̀ a, ɔ́mɔ́ kʋ̀ʋ, a bhlio kʋ!» 49Zudáa ŋnɩ a, ɔ́ mʋ Zozíi mʋ́ lé ɔ́ pɔ́ɔ́ yúó, ɔ́ anɩ́: «Àyúó Másɛɛ̀!» Lé ɔ́ gbɩ̀lɔ̀ɔ̀. 50Bhʋ́ Zozíi srʋ ɔ́ mà: «Bhée, wɔlɩ́ɛ́ ɩ̀ yi nɩ ka a, nií!» Lé nyʋa ànàà ŋnɩ Zozíi gɔ̀ lé á ŋwʋ́ ɔ́ glɔ̀gbá jɩ̀ lé á tɔ́pʋlɔɔ́. 51Lé nyʋaá kʋ̀ Zozíi gɔ̀ a, á nyièdɩ a nyɔ a múó kpla mɔ̀ jrɛ̀ lé ɔ́ dí Lagɔ̀bʋ̀bɔ̀nyɔ̀kádɔ̀ɔ̀ a cóyʋ nyúklú wlú. 52Mà Zozíi srʋ ɔ́ mà: «Ŋwʋ́ nà jrɛ̀ɛ̀ tʋ́kpá, mà nyʋaá fɩ́ɛ́ à bhá jɛ̀lɩ̀ kʋ́ a, jɛ̀lɩ̀ mʋ́ á bhlálaá. 53Nɩɩ́ sa yì mà ɩ́ yi míi lé ɩ́ yi ɩ Tʋ́ wɔlɩ́ pá lé ɔ́ yi mɔ́ɔ kplɔkplɔzìzi a sʋ́ja a dɔ́lɩ́ɛ́ ɩ̀ plɩ́ kʋ́gbá sɔ́ gɔ̀ a la a? 54Mà cémʋ́ á jɩ́jrà wá Lagɔ̀bɔ̀gʋ a mnɩ́ a, ɩ ka yɩ́ neé sralɔɔ̀, bhè sɩ́tɛ̀ á cíi wá mà sɩ́tɛ̀ mʋ́ ɩ́ na ká wá nilo.» 55Lé Zozíi srʋ nyʋaá mà: «A bhá jɛ̀lɩ̀ yà sidrì sɔ́ lé a yie mɔ́ɔ kʋ bhli ka nànɩ́ cémʋ́ á bhlie lɛ́ kàpàkápányɔ kʋ́ a, bhè tányɩɛ́ fɩ́ɛ́, a yɛ́lɛ mɔ́ɔ Lagɔ̀wlʋ̀kádʋ̀ɔ̀ mnɩ́ cɩ́ada, sɩ́tɛ̀ ɩ́ kʋ bhè a nɩ́ mɔ́ɔ mɔ̀ɔ kʋ bhli ka yi. 56Wɔlɩ́ɛ́ fɩ́ɛ́ lɩ̀à, ɩ́ ŋnɩ lé Lagɔ a nékʋ́cinyʋa a jɩ́jràwɔ̀lɩ̀ɛ̀ ká neé sralɔɔ̀.» Lé Zozíi a kʋjɩ̀nyʋ̀àà a lɔ̀fɩ́ɛ́ wlʋ́ɔ́ bɩ́ lé á jɛlɔ̀ɔ̀ yɩ́ sá.
Á fa Zozíi Zúfʋnyʋa a tɩ́tɩ́plɔjrèè a mnɩ́
(Málɩ́kɩ 14.53‑54; Lúkɩ 22.54‑55; Záan 18.12‑15)
57Nyʋaá à tɔ́pʋ Zozíi a, Lagɔ̀bʋ̀bɔ̀nyɔ̀kádɔ̀ɔ̀ Kayífʋ a gbó mʋ́ á fɔɔ́. Lé lɔ̀ a másɛnyʋaá yà dɔ̀panyʋaá sɔ́ ŋnɩlɔ̀ mɔ̀ɔmɔ̀ wlú. 58Mà Pɩ́ɛ́lɩ trʋma Zozíi da lé ɔ́ jɩ́ ɔ́ kʋ́, ɔ́ jɩ́ ɔ́ kʋ́ àààn, lé ɔ́ pla Lagɔ̀bʋ̀bɔ̀nyɔ̀kádɔ̀ɔ̀ a gbó. Ɔ́ plɩ́ɩ gbó a sʋ́jàà nyièdɩ lé ɔ́ bɔ́ɔ sá, bhè ɔ ká dɛ́ɛ́ wɔlɩ́ɛ́ na ká zɔ̀ bhɩɔ a, yɛ́.
Á fa Zozíi Lagɔ̀bʋ̀bɔ̀nyʋa a cífɩ á drɩ̀
(Málɩ́kɩ 14.55‑65; Lúkɩ 22.63‑71; Záan 18.19‑24)
59Lagɔ̀bʋ̀bɔ̀nyʋ̀àkádàà yà Zúfʋnyʋa a Tɩ́tɩ́plɔjrì káda a mnɩ́ a nyʋaá kʋ̀ mɔ̀ a, cémʋ́ á yi nɩ lé á yi Zozíi gbʋ́ wlú ŋwʋ́ lé á yio bhlá a, ɩ́mɩ́ á bhobho. 60Mà wɔlɩdrèè a ká lɛ́ bhá a, a nɩ́ yɛ́ á, sɩ́tɛ̀ ɩ́ kʋ bhè nyʋa kɔ́kɔ́mnɩ́ yi kpɔkpláŋwɔ̀nɩ̀srɩ̀lɛ nɩ ka, á ŋwʋ́ Zozíi flɛ́flɛ gbʋ wlú. Bɩ́kʋ́bhɩa nyʋaá sɔ́ɔ́ yi a, 61á anɩ́: «Nyɔɔ́ lɩ̀à ɔ́mɔ́ cí lɛ́ mà: Ɩ́ yi Lagɔ̀wlʋ̀kádʋ̀ɔ̀ wla, lé ɩ́ yi yrií ta bhá lé ɩ́ yi ʋ sɔ́kʋ́ pá.» 62Lagɔ̀bʋ̀bɔ̀nyɔ̀kádɔ̀ɔ̀ soglù, lé ɔ́ yrá Zozíi mà: «Bhè nɩɩ́ sa née, wɔlɩ́ɛ́ fɩ́ɛ́ á cíé lɛ́ a, mɔ̀ɔ ɩ́ zɛlɛ ŋnɩ́ a?» 63Wɔlɩ́ɛ́ fɩ́ɛ́ ɔ́ yrá lɛ́ Zozíi kʋ́ a, ɔ nɩ́ sa né. Lagɔ̀bʋ̀bɔ̀nyɔ̀kádɔ̀ɔ̀ yrɔ́ɔ́ sɔ́kʋ́ mà: «Náa yrá caá Lagɔ a ŋnɩ́ mʋ́, srʋ àmɔ̀ cícása mɔ̀ nɩ̀ ŋwɔ́ɔ Lagɔ a mʋ́gbàzɩ̀yʋ̀ɔ̀ lé mɔ̀ɔ nɩ̀ ŋwɔ́ɔ Lagɔ a Yuwliyʋɔ́ a?» 64Zozíi anɩ́: «Ɩ́mɩ́ ɩ̀ cílɛ́. Mà náa yie yɩ́ sáà amɔ srʋ ka mà: Bháa yɩ́ lɛ́ zɩmnɛ́ jɩ̀ a, a yi kɛ́zɔ̀ Nyɔɔ́ a Yuwliyʋɔ́ Lagɔ̀ɔ̀ kà pɔ́wa a, ɔ́ lilie kʋ́ yɛ́ɛ, a yi sáà mɔ́ yɛ́ lé ɔ́ yi jrù a mnɩ́ laa lé ɔ́ yi yi.» 65Zozíi cíí bhlà saá bhè Lagɔ̀bʋ̀bɔ̀nyɔ̀kádɔ̀ɔ̀, dɩ ka ŋnɩ́ lé ɔ́ yra yra kótié ɔ́ pla mʋ́ a, ɔ́ anɩ́: «Bhè Lagɔ ɔ́ vlávla a, à yi àyɩ ŋwɔ́nɩ́srɩ̀nyʋa mʋ́mɔɔ̀? Á lɔ̀fɩ́ɛ́ a klʋ́ jɩ̀ lé ɔ́ vlávlà lɛ́ Lagɔ. 66Cégbá mʋ́ a bhobho a?» Nyʋaá anɩ́: «Ɔ́ ka lé ɔ kú!» 67Bhʋ́ á ŋwnalɔɔ́ dàdɩ klʋ́ lé á kláalɔɔ́ gòdì nyʋa àna káklalɔɔ́ kpɩ́ nyúkwlí 68lé á srʋ ɔ́ mà: «Lagɔ a mʋ́gbàzɩ̀yʋʋ̀, bhobho lé kà àmɔ̀ srʋ, nyɔɔ́ ɔ̀ bhɩtɩ mɔ̀ a, zɛlɔɔ ŋnɩ́!»
Pɩ́ɛ́lɩ zie Zozíi a zà
(Málɩ́kɩ 14.66‑72; Lúkɩ 22.56‑62; Záan 18.17,25‑27)
69Naa Pɩ́ɛ́lɩ bɔ́ɔ jrùkʋ́ gbó a mnɩ́ lé cóŋwnɔ a múó ŋnɩ ɔ́ gɔ̀, ɔ́ yrɔ́ɔ́ mà: «Nà sɛ́fʋ ɩ̀ gbɛlɛ la sáà Galiléeyʋ Zozíi jɩ̀ à?»
70Pɩ́ɛ́lɩ zie nyʋa fɩ́ɛ́ a klʋ́ jɩ̀, ɔ anɩ́: «Wɔlɩ́ɛ́ ɩ̀ cíé lɛ́ a, nɩ́ɩ́ yìi!»
71Pɩ́ɛ́lɩ soglù, lé ɔ́ náa lé ɔ́ mʋ gbine kʋ́, lé cóŋwnɔ ànɔ yɛ́ ɔ́, lé ɔ́ srʋ nyʋaá kʋ̀ ʋ́ a mà: «Nyɔɔ́ lìà, ɔ yà Nazalɛ́tɩ a Zozíi sɔ́ plɩ́ɛ́ wázɔ̀.» 72Lé Pɩ́ɛ́lɩ zie sɔ́kʋ́, ɔ́ anɩ́ mà: «Ɩ́ sɔ́lɩ, nyɔɔ́ a sa lɛ́ a, nɩ́ ɔ́ yì!» 73Fɩɩn bhè nyʋaá à kʋ ʋ́ a, á ŋnɩ Pɩ́ɛ́lɩ gɔ̀, lé á srʋ ɔ́ mà: «Cícása nyʋaá lɩ̀à a nyièdɩ a nyɔ ɩ ŋwɔ́ɔ, nà cícíwɔlɩ srʋɛ àmɔ̀ mɩ́.» 74Lé Pɩ́ɛ́lɩ bháa ʋ́ dabʋ̀ɛ̀ kʋ́: «Kpɔkplá nɩ ŋwʋ́ a, Lagɔ sie mɔ́ɔ, nyɔɔ́ lɩ̀à, ná anɩ́ nɩ́ ɔ́ yì!» Ɔ́ cíí bhlà saá bhè, kɔkʋɛ́ pá wɔlɩ́. 75Bhè Pɩ́ɛ́lɩ luo wɔlɩ́ɛ́ Zozíi srʋ ɔ́ a kʋ́: «Pɩ́ɛ́lɩ dɩ́bɩ̀ɛ̀ lɩ̀à bhlɔ̀bhlɔ̀, fɩ́ɛ́ lé zizìèdɩ̀kɔ̀kʋ̀ɛ̀ ká wɔlɩ́ pá a, ɩ̀ yi ná zà taa kʋ́ ziè, mà nɩ́ mɔ́ɔ yi.» Ɔ́ luo a, ɔ́ flʋ zɔ̀, ɔ́ ŋwí àààn lé ɔ́ sɩà.
Currently Selected:
Matíe 26: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
