Matíe 25

Ŋnɩ́keyuo kʋ́gbá a núnúó

1«Lagɔ a Léyibhlɩɛ́ a wɔlɩ́, nɩ̀ yɩ́ɩ́ a, nànɩ́ cémʋ́ ŋnɩ́keyuo a kʋ́gbá bháʋ́ a nápɩ lé à mʋ yʋwlɩ nyúzɔ kʋ́ a. 2Ŋnɩ́keyuo a gbɩ́ kʋ á nyièdɩ lé á nɩnà, lé àna a gbɩ́ fíke. 3Nɩnà anaá fa nápɩ mà a nɩ́ panivíi fa. 4Mà fíke anaa, a bháʋ́ a nápɩ lé a panivíikpalɩ. 5Mà cémʋ́ yʋwlɩɛ́ nɩ́ yi yɩ́ lɛ a, á lɔ̀fɩ́ɛ́ sɩa lé á ŋwɔ́ɔ. 6Lé dʋdʋ́kádʋʋ́ nyɔ pá wɔlɩ́ mà: Yʋwlɩɛ́ mɔ́ yie! A soglù a kɔ́ɔ́ nyúzɔ kʋ́ mʋ! 7Lé ŋnɩ́keyuoó a lɔ̀fɩ́ɛ́ soglù, lé á yrɩ̀lɩ̀ a nápɩɛ́. 8Nɩnàŋnɩ̀kèyùòò gbɩ́ɛ́ srʋ fíke anaa gbɩ́ɛ́ mà: A nyɛ́ àmɔ̀ panivíi tòyipɛ mà à nápɩɛ́ ɩ́ɩ nyúmo! 9Bhʋ́ fíkeŋnɩkeyuoó srʋ á mà: À panivíe nɩ́ zù lé a kɛ̀ɛ̀ mʋ́ díi lé à kà amɔ nyɛ́, a mʋ nyʋaá à ŋwʋ́ɛ́ panivíi pɛ́lʋ́ a, gɔ̀ a ká anɛ kla. 10Nɩnàŋnɩ̀kèyùòò mʋ panivíi kla ka, mɔ̀ɔmɔ̀ á kʋ lé yʋwlɩɛ́ ŋnɩ lé fike anaa yà la yrɩ̀lɩ̀ a, ɔ yàsɔ́ pla wlʋɔ́ mnɩ́ á na ká sí a, lé á bhle kpluó. 11Tányɩ trʋma fɩ́ɛ́ mʋ́ lé ŋnɩ́keyuo ànàà à mʋ la panivíe kla ka a, á yi lé á bhɩtɩ kpluó: Kanyɔɔ̀, kanyɔɔ̀, ka kpluó! 12Yʋwlɩɛ́ sa né a, ɔ́ anɩ́: Náa srʋɛ yɩ́ lɛ́ amɔ cícása nɩ́ amɔ yì.» 13Zozíi srʋ á sɔ́kʋ́ mà: «A dɛdɛ̀ mà a nɩ́ yruó yà glíiyie sɔ́ yì!

Cóyuo ta a núnúó

(Lúkɩ 19.11‑27)

14Lagɔ a Léyibhlɩɛ́ a wɔlɩ́ɛ́ wlʋ́ mànɩ́ cémʋ́ nyɔ na ká lɛ́ lówùduú mʋ lé ɔ́ wle ɔ cóyuó lé ɔ́ tɩ a ɔ́ kakalɩ gɔ̀ a. 15Ɔ́ tɩ cóyʋ a múó sìkàbhi a gbɩ́ gɔ̀, sɔ́ anɔ sɔ́, lé ta anɔ múó gɔ̀, cémʋ́ nyɔ yi míi lé ɔ́ yi zrɩ a, lé ɔ́ mʋ yɩ́ wɛ́ɛ. 16Cóyʋɔ́ á nyɛ́ sìkàbhìè gbɩ́ɛ́ a, ɔ́ bhɩ́ɩ́ lé ɔ́ pá pɛ́lʋ́ lé ɔ́ yɛ́ sìkàbhi ànɩ gbɩ́. 17Ànɔ̀ɔ̀ ɔ̀ yɛ́ sìkàbhìè sɔ́ a, ɔ́ pá sáà pɛ́lʋ́ lé ɔ́ yɛ́ sìkàbhi ànɩ sɔ́. 18Mà ta ánɔɔ́ ɔ́ yɛ sìkàbhùò a múó a, ɔ́ mʋ lé ɔ́ wlúu bhúkuo lé ɔ́ zízìè mɔ̀ɔ ɔ kanyɔ a sìkàbhùò. 19Tányɩ trʋma fɩ́ɛ́ mʋ́ lé á kanyɔɔ́ yrɩ́bha, lé ɔ́ wle á lé ɔ yà sɔ́ bɔ́ɔ sá a kɔ́ɔ́ dí sa. 20Ànɔ̀ɔ̀ gɔ̀ ɔ́ tɩ wá sìkàbhìè gbɩ́ɛ́ a, ɔ́ nyɛ́ ɔ́ sìkàbhi ànɩ a gbɩ́ lé ɔ́ srʋ ɔ́ mà: Kanyɔɔ̀, sìkàà ɩ̀ tɩ wá mɔ́ɔ gɔ̀ a, ɩ́ pálaá pɛ́lʋ́ mʋ́ lé ɩ́ yɛ́ sìkàbhi ànɩ a gbɩ́. 21Ɔ kanyɔ anɩ́: Ɩ́ náa, ɩ̀ ŋwɔ́ɔ náma cóyʋ! Ɩ́ tɔ̀ mɔ̀ duo lé ɩ́ ka yɩ́ nà cícása wɔlɩkɔtɔpɩ́ɛ́ fɩ́ɛ́ a zà, ɩ́ yi yɩ́ mɔ̀ lɛkádɛ yɩ́ gɔ̀ ŋwʋ̀da nyɛ́, yi bhè à nɩ lɔlɔ! 22Sɔ́ anɔɔ́ ɔ́ nyɛ́ wá sìkàbhìè sɔ́ɔ́ a, ɔ́ yi a, ɔ́ anɩ́: Kanyɔɔ̀, ɩ̀ tɩ wá mɔ́ɔ sìkàbhi a sɔ́ gɔ̀, ɩ́ pálɩɩ́ pɛ́lʋ́ mʋ́ lé ɩ́ yɛ́ sɔ́kʋ́ sìkàbhi ànɩ sɔ́. 23Ɔ kanyɔ anɩ́: Ɩ́ náa, ɩ̀ ŋwɔ́ɔ náma cóyʋ! Ɩ́ tɔ̀ mɔ̀ duo lé ɩ́ ka yɩ́ nà cícása wɔlɩkɔtɔpɩ́ɛ́ fɩ́ɛ́ a zà, ɩ́ yi yɩ́ mɔ̀ lɛkádɛ yɩ́ gɔ̀ ŋwʋ̀da nyɛ́, yi bhè à nɩ lɔlɔ! 24Ànɔ̀ɔ̀ ɔ́ nyɛ́ wá sìkàbhùò a múó a, ɔ́ yi a, ɔ́ anɩ́: Kanyɔɔ̀, cémʋ́ ɩ́ yì saá mà nà ka kʋ́, lé dɛ́ nɩɩ glɩ lelilɩ a, bhʋ́ ɩ̀ mʋ́mɔlɩɩ́ lé sié nɩɩ́ glɩ a, ɩ wlú ɩ̀ mʋ́mɔlɛ bhí, 25ɩ́ ka ŋnɩ́ a, ɩ́ gú, lé sìkàbhùò ɩ̀ tɩ mɔ́ gɔ̀ a, ɩ́ wlúu dʋ̀dʋ lé ɩ́ zízìè laa mɔ̀ɔ, ámá lɛ̀ bháʋ́ mà mɔ̀ kàà. 26Ɔ́ cí sɩ́tɛ̀ a, bhʋ́ ɔ kanyɔ srʋ ɔ́ mà: Wɔtɔmanyɔ, mɔ́nyùmònyɔ! Ɩ̀ yì saá mà dɛ́ɛ́ nɩ́ lelilɩ glɩ a, bhʋ́ ɩ́ mʋ́mɔlɩɩ́ lé sié nɩ́ glɩ a, ɩ wlú ɩ́ mʋ́mɔlɛ bhí. 27Bhè ɩ̀ yi la ná moníe bágɩ̀wlʋ̀ kʋ́ sá ŋwʋ́ʋ, bhʋ́ nɩ yrɩ́bha la a, ɩ́ yi la ʋ́ bʋ̀zɛ jɩ̀ yɛ́ a. 28A bhɔ́ɔ́ sìkàbhùò gɔ̀ lé a nyɛ́ a nyɔɔ́ kà sìkàbhìè kʋ́gbá a! 29Mà nyɔɔ́ ɔ̀ kalɛ a, ɔ́mɔ́ á nyɛ́, bhʋ́ ɔ́ yɛ́ kɔ́kɔ́mnɩ́ lé ɔ kakalɩ zumole. Mà ɔ̀ nɩ́ ka a, ɔ́ nɩnɩgbɩ nie lé tòyipɛɛ́ ɔ́ ka a, á bhɔ́ɔ̀ mɛ́ gɔ̀. 30Ɔ́ anɩ́: Flɛ́flɛ còyʋ̀ɔ̀ lɩ̀à, a pálɔɔ́ jrùkʋ́ cúcú a mnɩ́, ɔ ká kalɩmɛ yɛ́ lé ɔ́ ká ŋwí!

Lagɔ a tɩ́tɩ́kádɛ̀ɛ̀ a plɔ yruó kʋ́

31Tányɩɛ́ mʋ́ Nyɔɔ́ a Yuwliyʋɔ́ na ká ɔ blɔ̀blɔ́ɔ́ a mnɩ́ yi lé kplɔkplɔzìzìè fɩ́ɛ́ kɔ́ɔ́ námnɩ a, bhʋ́ ɔ́ na ká ɔ léyikpoó jɩ̀ bɔ́ɔ. 32Bhlɩ́ɛ́ fɩ́ɛ́ yi ɔ drɩ̀ wlú ŋnɩlɔ bhʋ́ ɔ́ na ká á mʋ́ gbázɩ̀ cémʋ́ mna a jɩ̀gbɛ̀nyɔ gbázɩɛ lɛ́ bhlábhlɩ́ yà wluú sɔ́ mʋ́ a. 33Ɔ́ yi bhlábhlɩ́ɛ́ ɔ́ lilie kʋ́ ŋwʋ́ lé ɔ́ yi wluó ɔ́ kɔmɩa kʋ́ ŋwʋ́. 34Lé Lóoó yi nyʋaá ɔ́ ŋwʋ́ ɔ lilie kʋ́ a, srʋ mà: A yi, amɔɔ́ ɩ Tʋ́ pá nyú a, léyibhlɩɛ́ ɔ́ ŋwʋ́ wá ʋ́ a zà a kɔ́ nɩ ka wá wlʋ́ a, a kɛ́ɛ́ djáa kʋ́ li! 35Máà tányɩɛ́ mʋ́ kleé bhlá wá mɔ́ɔ a, a nyɛ́ wá mɔ́ɔ lelilɩ, mnátʋ bhlá wá mɔ́ɔ a, a nyɛ́ wá mɔ́ɔ nyú, ɩ́ pla wá amɔ kʋ́ lé a bhli wá mɔ́ɔ námasa kʋ́. 36Ɩ́ dí wá bhluú lé a yrʋ́ʋ wá mɔ́ɔ, gú bhlá wá mɔ́ɔ lé a ŋwʋ́ wá mɔ́ɔ yɩ́ gɔ̀, ɩ́ kʋ wá jɩ̀ɩ, lé a yi wá mɔ́ɔ yɛ́ ka. 37Bhʋ́ nyʋaá à kà a nɩnɩgbɩ srí sá a, yrɔ́ɔ́ mà: Kanyɔɔ̀, tányɩ gbá mʋ́ kleé bhlá wá mɔ̀ lé à nyɛ́ wá mɔ̀ lelilɩ á? Lé mnátʋ bhlá wá mɔ̀ lé à nyɛ́ wá mɔ̀ nyú a? 38Tányɩ gbá mʋ́ ɩ̀ pla wá àmɔ̀ kʋ́ lé à bhli wá mɔ̀ námasa kʋ́ à? Lé ɩ̀ dí wá bhluú lé à yrʋ́ʋ wá mɔ̀ à? 39Lé tányɩ gbá mʋ́ gú bhlá wá mɔ̀, lé tányɩ ànɛ̀ gbá mʋ́ ɩ̀ kʋ wá jɩ̀ɩ lé à mʋ wá mɔ̀ yɛ́ ka á? 40Bhʋ́ lóo srʋ á mà: Cɩ́cása a mnɩ́, náa srʋɛ amɔ mà tányɩɛ́ mʋ́ a nɩ wɔlɩ́ɛ́ fɩ́ɛ́ lɩ̀à ɩ nɩ́ayúó a nyièdɩ a bɩ́kʋ́ anɔ a múó a, mɔ́ a nií. 41Lé lóoó srʋ nyʋaá kʋ̀ ɔ kɔmɩa kʋ́ a, mà: Amɔ, kplínyʋa a ŋwɔ́ɔ! A wlʋ́ mɔ́ɔ gwá, a mʋ kosugàlàà nɩ́ bhɩa kʋ́ lé ɔ́ pápa wá kʋ́ Dɩ́blʋ̀ɔ̀ yà ɔ nyumozìzi sɔ́ a zà a, mnɩ́. 42Tányɩɛ́ mʋ́ kleé bhlá wá mɔ́ɔ a, a nɩ́ wá mɔ́ɔ lelilɩ nyɛ́, mnátʋ bhlá wá mɔ́ɔ a, a nɩ́ wá mɔ́ɔ nyú nyɛ́. 43Ɩ́ pla wá amɔ kʋ́ lé a nɩ́ wá mɔ́ɔ námasa kʋ́ bhli. Ɩ́ di wá bhluú lé a nɩ́ wá mɔ́ɔ yrʋ́ʋ, gú bhlá wá mɔ́ɔ, ɩ́ kʋ wá sáà jɩ̀ɩ lé a nɩ́ wá mɔ́ɔ yɛ́ ka yi. 44A sɛ́fʋɔ́, á yrɔ́ɔ́ mà: Kanyɔɔ̀, tányɩ gbá mʋ́ à yɛ́ wá mɔ̀ lé kleé bhlá wá mɔ̀, mnátʋ bhlá mɔ̀, ɩ̀ pla wá àmɔ̀ kʋ́, ɩ̀ di wá bhluú, gúu bhlá wá mɔ̀ ɩ̀ kʋ wá jɩ̀ɩ, lé à nɩ́ wá mɔ̀ kʋ́ yɩ á? 45Bhʋ́ ɔ́ srʋ á mà: Cɩ́cása a mnɩ́ náa srʋɛ amɔ mà, tányɩɛ́ mʋ́ a nɩ́ nyʋa fɩ́ɛ́ lɩ̀à a nyièdɩ a yítòyilɛ̀ námasa kʋ́ bhli a, mɔ́ a nɩ́ námasa kʋ́ bhli. 46Bhʋ́anɩ nyʋaá, á nɩ kalɩmɛɛ́, a nɩ́ kɛɛ́ kɔ́ɔ̀kɔ́ mʋ́ wlʋ́ lé kɔ́ yi kɛ́ ʋ́ bhɩa, mà nyʋaá kà a nɩnɩgbɩ srí sá a, kɔ́ɔ́ ʋ̀ nɩ́ bhɩada ka a, ʋ́mʋ́ á na ká yɛ́.»

Currently Selected:

Matíe 25: NEY

Highlight

Copy