Matíe 24
24
Zozíi anɩ́ Lagɔ̀wlʋ̀kádʋ̀ɔ̀ yi wɔlɔɔ̀
(Málɩ́kɩ 13.1‑2; Lúkɩ 21.5‑6)
1Zozíi wlʋ́ɛ́ Lagɔ̀wlʋ̀kádʋ̀ɔ̀ mnɩ́ ɔ́ mnɛ lé ɔ́ kʋjɩ̀nyʋ̀àà gbɛlɔɔ́ jɩ̀ lé á srʋ ɔ́ mà ɔ dʋdʋ̀ cémʋ́ wlʋɔ́ a námɛ kʋ̀ a. 2Bhʋ́ Zozíi srʋ á mà: «Lɩ́ɛ́ fɩ́ɛ́ a dʋdʋɛ lɛ́ dɛ́ a? Ná srʋɛ yɩ́ lɛ́ amɔ cícása mà: Wlʋɔ́ a dʋdʋɛ lɛ́ dɛ́ a, yruú yi ʋ́ kʋ lé, á yi ʋ́ wla lé ʋ cɔ́kpalɩ́ɛ́ fɩ́ɛ́ yi sá kɔ́sɔ lé lɛ́ nɩ́ ka ʋ́ tuò.» 3Cémʋ́ Olivíe kikéé wlú ɔ́ bɔ́ɔ a, ɔ́ kʋjɩ̀nyʋ̀àà ŋnɩ ɔ̀ mɔ́ lé á pʋpʋ́ a nyièdɩ, á yrɔ́ɔ́ mà: «Másɛɛ̀, tányɩ gbá mʋ́ wɔlɩ́ɛ́ na ká ŋnɩ áa? Lé cégbá mʋ́ à yi nà yiyitanyɩɛ́ yɩbhlɩ, lé à yi zɩkpa á zɔ̀bhɩayruó yɩbhlɩ á?»
Nyakalɩ kɔ́kɔ́mnɩ́ a bháàda
4Zozíi srʋ á mà: «A mányɩ! Nyɔ ná nyɩ́glɩ̀ amɔ. 5Mà nyʋa kɔ́kɔ́mnɩ́ yi ná ŋnɩ́ mʋ́ yi. Á yi cí mà: Mɔ́ ŋwɔ́ɔ Kláyɩ́sɩ, lé á yi nyʋa kɔ́kɔ́mnɩ́ nyɩ́glɩ̀. 6A yi tavʋ̀wɔ̀lɩ nú, lé a yi sáà ʋ́ yrè nú, mà ŋanɩmɛ ná bhlá amɔ, ɩ́ ka lé ɩ ká ŋnɩ a, ɩ́zà ɩ́ ŋnɩ! Mà zɩkpa a bhɩada nɩɩ́ àyɩ ʋ́ kʋ. 7Bhlɩ́ yi ɛlibhlɩ ànɛ tʋ́ fa, léyibhlɩ ya léyibhlɩ ànɛ sɔ́ yi vʋ, Bhlɩ́ kɔ́kɔ́mnɩ́ ànɛ jɩ̀ kleé yi pla, dʋ̀dʋ yi tɩtɛɛ̀. 8Ɩ́ yi wlʋ́ mànɩ́ cémʋ́ ŋwnɔ́ a vavamnɩ cíele lɛ́ cɩcɩɛ kʋ́ a. 9Nyʋa yi amɔ kalɩmɛ mʋ́ ŋwʋ́, ɛ́mɛ́ mʋ́ a na ká kúu. Bhlɩ́ fɩ́ɛ́ yi amɔ mʋ́ gblɩ̀ ná zà. 10Wɔlɩ́ɛ́ fɩ́ɛ́ lɩ̀à yi ŋnɩ́ ka lé nyʋa kɔ́kɔ́mnɩ́ yi Lagɔ a nyúzɔ kʋ́ wlʋ́, á yi a nyoku glɩ́ kʋ́ plɔplɔɔ̀, a yi mʋ́ gblɩ̀ gblɩ̀. 11Kpɔkplá Lagɔ̀ɔ̀ a nékʋ́cinyʋa kɔ́kɔ́mnɩ́ yi wlʋ́ lé á yi nyʋa kɔ́kɔ́mnɩ́ nyɩ́glɩ̀. 12Lé nyumoé a zumole yi ŋnɩ́ ka lé nyʋaá à wà la Lagɔ a, kɔ́kɔ́mnɩ́ a Lagɔ a wàwʋ́ɔ́ yi kʋ́ sɩsalɔɔ̀. 13Mà nyɔɔ́ nà kà duo kʋ́ tɛ́ma àààn lé bɩ́kʋ́bhɩayruó ká ŋnɩ a, ɔ́mɔ́ nà kà ʋ́ neé wlʋ́. 14Lagɔ a Léyibhlɩɛ́ a Námadìè yi bhlɩ́ɛ́ fɩ́ɛ́ jɩ̀ salɔɔ̀, lé nyʋa fɩ́ɛ́ a nɩ́ Lagɔ yì a, á yií yɩbhlɩ, fɩ́ɛ́ lé zɩkpa a zɔ̀bhɩayruó ká kɛ́ ŋnɩ.
Nyʋa yi kalɩmɛ kɔ́kɔ́mnɩ́ yɛ́
(Málɩ́kɩ 13.14‑23; Lúkɩ 21.20‑24)
15Ɩ́ yi ŋnɩ́ ka lé nyɔɔ́ ɔ̀ ŋwɔ́ɔ kplínyɔ lé ɔ̀ ŋáta, lé ɔ̀ bhusule Lagɔ a ŋnɩ́, ɔ̀ kɔ̀ɔ̀ wɔlɩ́ Lagɔ a nékʋ́cinyɔ Danɩ́ɛ́lɩ cí wá a,#24.15 A zɛlɩɩ sáà Danɩ 9.27; 11.31; 12.11. a yio kɛ́zɔ̀ Lagɔ̀wlʋ̀kádʋ̀ɔ̀ a kplɔkplɔdàà ŋnɩɩ. Nyɔɔ́ ɔ̀ zɛlɛ wɔlɩ́ɛ́ lɩ̀à, ɔ́ ka lé ɔ kɩ́ɩ́ námasa nú! 16Bhʋ́ a tányɩɛ́, nyʋaá nɩ̀ kʋ̀ Zudée a, a gú lé a mʋ kíkí a nyièdɩ zúzùò kà. 17Mɔ̀ nyɔɔ́ nà kà jrùkʋ́ kʋ a, nàa mʋ yɩ́ lɛ sré lɛ́ bhá ka. 18Ɔ̀ nà kà lágbaá kʋ a, ɔ ná yrɩ́bha yɩ́ lɛ dú kótu bhá ka. 19Bhʋ́ a tányɩɛ́, kplé lé ɛ́ kla ŋwnáá à nyɩ́a yúó a yà gbádɩ̀ŋwna sɔ́. 20A bhibhie Lagɔ lé bhʋ́anɩ sóo fa wɔlɩ́ɛ́ nɩ ka nyʋ́gbʋ̀zʋʋ́ yà Zúfʋnyʋa a nyɔbhleyru sɔ́ kʋ́ ŋnɩ. 21Kalɩmɛɛ́ nyʋa na ká yɛ́ a, ɛ́ zumole yi gɔ̀ plɩ́ lé ɛ́ yi kɔ́ nɩ ka wá wlʋ́ lé yi lé ŋnɩ zɩmnɛ́ a nɩ kalɩmɛɛ́ kʋ́ zi, lé sɩ́tɛ̀ a kalɩmɛ nɩ́ ká yɩ́ sáà yɛ́lɔɔ̀. 22Lé Lagɔ nɩ nɩ́ la bhʋ́anɩ kalɩmɛ a yrié kʋ́ sɩsa a, nyɔ nɩ́ ka la pʋ́, mà nyʋaá ɔ́ gbázɩ̀ mʋ́ a, ámá kà ŋnɩ́ a zà ɔ́ sɩsa yrié kʋ́. 23Nyɔ nɩ srʋ amɔ mà: Lagɔ a mʋ́gbàzɩ̀yʋ̀ɔ̀ kʋ dɛ́, ɩ́ zà: Ɔ́mɔ́ lɛ̀ a, a ná bhá ɔ cícíwɔlɩɛ́ wɔlɩ́ kʋ́. 24Kpɔkplányʋa yi yi á yi a nyoku Kláyɩ́sɩ wleè, kpɔkplányʋa àna yi yi lé á yi a nyoku Lagɔ a nékʋ́cinyʋa kʋ́ bhá, á yi wɔlɩ́ɛ́ ɩ̀ mna nyʋa neé a, yà lɛ̀wɔ̀lɩ kɔ́kɔ́mnɩ́ sɔ́ nɩ, a ká nyʋa nyɩ́glɩ̀, a nɩ nɩ́ kʋ́ mányɩ a, á yi nyʋaá Lagɔ gbázɩ̀ mʋ́ lé ɔ́ wlee à kɔ̀ɔ nɔnʋ zrɩ a, nyɩ́glɩ̀. 25Ààà! Yáa amɔ nóo weè!
Nyɔɔ́ a Yuwliyʋɔ́ a yiyitanyɩ
(Málɩ́kɩ 13.24‑27; Lúkɩ 21.25‑28)
26A nɩ srʋ amɔ mà: A lɛ́bhɛɛ Lagɔ a mʋ́gbàzɩ̀yʋ̀ɔ̀ kʋ̀ ɔ̀ zɩkpa a mnɩ́ a, a ná mʋ mɔ̀ɔ! A nɩ srʋ amɔ mà: A yi mà ɔ́mɔ́ zúzùò dɛ́ a, a ná bhɩ́ɩ́ cícása kʋ́! 27A lɛ́bhɛɛ, cémʋ́ lagɔ̀ɔ̀ nɩ wɛ́zɛ̀ bhè ʋ́ ŋana dɛ́ɛ́ yrʋ́gàvlà lalɛ lé ʋ́ ŋnɩɛ dɛ́ɛ́ yrʋ́ bhlile a, sɩ́tɛ̀ mʋ́ Nyɔɔ́ a Yuwliyʋɔ́ na ká yi. 28Dɛ́ɛ́ kúdùkʋ kʋɛ a, bhʋ́ kɔ̀kɔ̀bàyrɩ́ ŋnɩlɔ wlú. 29Bhʋ́anɩ kalɩmɛ a yrié nɩ plɩ́ a, dòdùò yi pla, cʋ́ nɩ́ ka yɩ́ sáà lʋ, lagɔ̀drà yi zɔ̀ bhlebhle lé lagɔɔ́ a pɔ́wa kʋ̀ mɔ̀ɔ a, á yi gbʋgbɔ̀lɔ̀.#24.29 A zɛlɩɩ sáà Eza 13.10; 34.4; Zɔwɛ́ 3.4. 30Bhʋ́ Nyɔɔ́ a Yuwliyʋɔ́ a yiyitanyɩɛ́ na ká lagɔɔ́ flʋ, zɩkpa zɔ̀ a nyʋa ká bhɔtɔ, a ká ŋwí, a ká Nyɔɔ́ a Yuwliyʋɔ́ jɩ̀ dʋdʋ̀ ɔ ká jrù a mnɩ́ flʋ ɔ yà ɔ blɔ̀blɔ́ yà ɔ pɔ́wa kɔ́kɔ́mnɩ́ɛ́ sɔ́. 31Lɛglɛ̀ kádɛ̀ɛ̀ yi fɩ́ɛ́ wɔlɩ́ pá, lé ɔ́ yi ɔ kplɔkplɔzìzìè bhlɩ́ɛ́ fɩ́ɛ́ jɩ̀ cíe, ɩ ká nyʋaá ɔ́ pá wá ŋnɩ́ a kʋ́ gʋ́gwlà.»
Figíe su a núnúó
(Málɩ́kɩ 13.28‑31; Lúkɩ 21.29‑33)
32Zozíi srʋ á sɔ́kʋ́ mà: «A yɩbhlɩ saá mà figíe su pápalɛ wɔlɩpɩʋ! A nɩ yɛ́ figíe su a lábhɩ lé ɩ nɩ náma kʋ́ lé ɩ nɩ tɔpɔ a, a yɩbhlɩ yɩ́ saá mà kɔ̀kɔ̀yrʋ̀ ya yɩ́ ʋ́ mɛ́. 33Sɩ́tɛ̀ mʋ́ a sɛ́fʋɔ́, a nɩ yɛ́ yɩ́ lɛ́ wɔlɩ́ɛ́ fɩ́ɛ́ lɩ̀à a, a yɩbhlɩ yɩ́ saá mà Nyɔɔ́ a Yuwliyʋɔ́ a yiyitanyɩ ya ʋ́ mɛ́. Ɛ̀ tuo yɩ́ ʋ́ tòyipɛ lé ɔ ká yɩ́ ŋnɩ. 34Ná srʋɛ yɩ́ lɛ́ amɔ cícása, zɩmnɛ́ a jànyɩ̀ɛ̀ lɩ̀à nɩ́ ka plɩ́ɩ, lé wɔlɩ́ɛ́ fɩ́ɛ́ ɩ́ srʋɛ lɛ́ amɔ a, ɩ́ yi ŋnɩ. 35Lagɔ yà dʋ̀dʋ sɔ́ yi plɩ́, mà ná cícíwɔlɩɛ́ nɩ́ ka kɔ́ɔ̀kɔ́ plɩ́ɩ.
Nyɔ nɩ́ Lagɔ a Yuwliyʋɔ́ a yi yi yruó yì
(Málɩ́kɩ 13.32‑37; Lúkɩ 17.26‑30,34‑36)
36Ɛ̀ nɩ̀ ŋwɔ́ɔ yi yi yruó yà glíiyié sɔ́ a, nyɔ nɩ́ɩ́ yìi, kplɔkplɔzìzi kʋ̀ Lagɔ gɔ̀ a, nɩ́ɩ yìi, Lagɔ a Yuwliyʋɔ́ mɔ̀glʋ̀ nɩ́ saá yì, ɛ̀ nɩ̀ nɩ́ Tʋ́ɔ́ a múó coco ŋwɔ́ɔ a. 37Wɔlɩ́ɛ́ ɩ̀ plɩ́ɩ Nowée a tányɩɛ́ a, ɩ́mɩ́ nà kà Nyɔɔ́ a Yuwliyʋɔ́ a yiyitanyɩ plɩ́ɩ. 38Tányɩɛ́ mʋ́ nyú kádʋ̀ɔ̀ bhla bhè ʋ́ yíe kɔ́ kʋ́ a, nyʋa lie wá, á mná wá, á síé wá lé á síe wá a yúó, fɩ́ɛ́ lé Nowée ká gɔ́kádʋ̀ɔ̀ a mnɩ́ pla. 39Nyʋa nɩ́ɩ́ mányɩ, a nɩ́ɩ́ wɔlɩ́ kʋ́ bhá, lé nyúó dúo bhlí lé ʋ́ bhla lé ʋ́ fa á lɔ̀fɩ́ɛ́. Sɩ́tɛ̀ mʋ́ Nyɔɔ́ a Yuwliyʋɔ́ a yiyitanyɩɛ́ na ká kʋʋ̀. 40Nyʋa sɔ́ yi a lágbaá kʋʋ̀ á yi ʋ́ múó bhá lé múó yi ʋ́ tuo. 41Ŋwná sɔ́ yi gwlè zɔ̀ kʋʋ̀, á yi ʋ́ múó bhá, lé múó yi ʋ́ tuo. 42Naa, a dɛdɛ̀ mà a nɩ́ a Kanyɔ a yiyiyruú yì! 43A yɩbhlɩ saá mà gbó a kanyɔ nɩ yì la dɩ́bɩ̀glìyìè mʋ́ ghlíighlíinyɔ yie a, ɔ́ yi la dɛdɛ̀, bhʋ́ ghlíighlíinyɔ nɩ́ ka ɔ́ wlʋɔ́ wla lé ɔ ká ɔ sré pla. 44A sɛ́fʋ a yrɩ̀lɩ mà glíiyie mʋ́ a nɩ́ Nyɔɔ́ a Yuwliyʋɔ́ lùò a, ɛ́mɛ́ mʋ́ ɔ́ na ká yii.
Námacoyʋ lé fíkecoyʋ
(Lúkɩ 12.41‑48)
45Cóyʋ gbá náa lé ɔ̀ fíke, lé ɔ́ kanyɔ tɔ̀ duo lé ɔ́ ŋwʋ́ ɔ gbó a nɔnʋzrɩ̀nyʋàà yɩ́ kʋ́, lé lelitanyɩ nɩ ŋnɩ a, ɔ káá lelilɩ nyɛ́ à? 46Jɔ̀lʋ pla bhʋ́anɩ cóyʋɔ́, ɔ̀ kɔ̀ɔ̀ kanyɔ nɩ wlʋ́ lówùduú lé ɔ̀ nɩ̀ ŋnɩlɔɔ́ bhʋ́anɩ nɔnʋɔ́ zrɩda a! 47Náa srʋɛ amɔ cícása, mà bhʋ́anɩ cóyʋɔ́, ɔ́ kanyɔ yio ɔ kakalɩɛ́ fɩ́ɛ́ yɩ́gɔ̀ŋwʋ̀da nyɛ́. 48Mà, cóyʋɔ́ ɔ̀ ŋwɔ́ɔ nyumocoyʋ a, lé ɔ nɩ cí mà: Ná kanyɔ nɩ́ ka kakamnɩ́lɛ́ yrɩ́bha a, 49lé ɔ nɩ bháa ʋ́ ɔ licoyuoó a bhite kʋ́, lé ɔ yà nɔmnanyʋa sɔ́ ká li, lé á ká mná a, 50yruó yà glíiyié sɔ́ ɔ nɩ́ lùò a, ɩ́mɩ́ kʋ́ gbó a kanyɔ na kɔ́ɔ́ zɔ̀ vú. 51Ɔ nɩ vúó zɔ̀ a, ɔ́ yio kalɩmɛ mʋ́ ŋwʋ́. Cémʋ́ á bhlile yrʋnyʋa kʋ́ a, sɩ́tɛ̀ mʋ́ ɔ́ na kɔ́ɔ́ kʋ́ bhlii. Bhʋ́ ɔ́ na ká kalɩmɛ yɛ́ lé ɔ ká ŋwí.»
Currently Selected:
Matíe 24: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
