Matíe 23
23
Zozíi nyɛ́ Falizɩ́ɛnyʋa yà jràmá a másɛnyʋa sɔ́ tába
(Málɩ́kɩ 12.38‑40; Lúkɩ 11.39‑46; 20.45‑47)
1Zozíi srʋ nyʋa fɩ́ɛ́ lé ɔ́ srʋ sáà ɔ́ kʋjɩ̀nyʋ̀àà mà: 2«Lɔ̀ a másɛnyʋa yà Falizɩ́ɛnyʋa sɔ́ kà lé à kà Moyízɩ a lɔ̀ɔ̀ mʋ́ sɩsa. 3Naa, a ka lé a ká ʋ́ má ŋwʋ́ lé wɔlɩ́ɛ́ fɩ́ɛ́ á na ká cí a, a nií, mà a ná nɩ ámá bhísakʋ́. Ámá a nɩ́ nɩ cémʋ́ á cíé a. 4Á cɩa kʋŋwnɔmabèdi lé á nyɩ́ɩ́ a lía gbɩdɩ̀ da, bhè ámá, á nɩ́ yrá lé á wlie a múó coco gbɔ́ lɛ́. 5Cémʋ́ a ká nɩ lé nyʋa káá dʋdʋ̀ a, ɩ́ pʋpʋ́ á nie, ɩ́ ka ŋnɩ́ a, á trʋmalɛ a bànɩ a nimni kʋ́ lé jràmábɔ̀gʋ̀ɔ̀ a mneku a flʋ̀wɩ́ tòyilɛ̀ɛ̀ a lía gʋalɛ klʋ́dàgblà a, ámá á nɩ flʋ̀wɩ́ɛ́ ɩ́ lɛkádɩ̀ɛ̀.#23.5 Zúfʋnyʋa a jràmábɔ̀gwɩ̀ɛ̀ á zɛlɛ a, ànɩ kʋ ʋ́ lé á ŋwʋ́ɩ́ flʋ̀wɩ́ tòyilɛ̀ a mnɩ́, cémʋ́ a nɩ ka drʋ a, á gʋagʋalɩɩ́ a nyoku gɔ̀, a ká kɔ́ɔ̀kɔ́ luò. 6A nɩ mʋ dɛ́ɛ́ lúbhoé kʋ a li ka a, á wà náma da a bɔ́ɔlɛɛ́, ɛ̀ nɩ̀ ŋwɔ́ɔ zúfʋcɛcɩghlɩɛ́ a mnɩ́ a, drɩ̀ a kpí a mnɩ́ á bɔ́ɔlɛ. 7Á wà sáà lé dɛ́ɛ́ nyʋa zù a, a páa ʋ́ má yúó lé a wlelaá Másɛ, 8ɛ̀ nɩ̀ ŋwɔ́ɔ amɔ a, nyɔ ná wle amɔ Másɛ. A Másɛ, ɔ́ bhli bhlɛ̀gbɩ́ lé a lɔ̀fɩ́ɛ́, nɩ́ayúó a ŋwɔ́ɔ. 9A ná wle dɛ́ zɩkpa zɔ̀ nyɔ a tʋ́, mà a Tʋ́ɔ́ bhli bhlɛ̀gbɩ́ ɔ́mɔ́ kʋ̀ ɔ̀ lagɔɔ́. 10Lé nyɔ ná wle sáà amɔ tíenyɔ, mà a tíenyɔɔ́ bhli bhlɛ̀gbɩ́ ɔ́mɔ́ ŋwɔ́ɔ Kláyɩ́sɩ. 11Nyɔɔ́ ɔ̀ ŋwɔ́ɔ a nyièdɩ a nyɩ́kpɔkádɔ a, ɔ́mɔ́ nà kà a cóyʋ plɩ́. 12Nyɔ nɩ̀ yrá ɔ̀ kà ɔ nyoku nyɔ kʋ́ bhá lé ɔ kà ɔ lía kʋ́ zi a, áa kwléeloó sá, nyɔɔ́ nɩ̀ kwlée ɔ nyoku sá a, á bhɔ́ɔ́ nyɔ kʋ́.
Kplé lé ɛ́ kla amɔ, amɔ jràmá a másɛnyʋa
(Málɩ́kɩ 12.40; Lúkɩ 11.47‑52)
13Kplé ya amɔ kla, amɔ lɔ̀ a másɛnyʋa yà Falizɩ́ɛnyʋa sɔ́, yrʋnyʋa yɩ! Amɔɔ kɩkla a lía a Lagɔ a Léyibhlɩɛ́ a nyúzɔ yɩ́ kʋ́ a. Amɔ a nɩ́ pla mɔ̀ɔ, lé a nɩ́ yrá lé nyʋaá à yrá lé à kà mɔ̀ɔ pla a, a ká mɔ̀ pla. [14Kplé ya amɔ kla, amɔ lɔ̀ a másɛnyʋa yà Falizɩ́ɛnyʋa sɔ́, yrʋnyʋa yɩ! A bhá kʋ́zrɩ̀ŋwna a kakalɩɛ́ fɩ́ɛ́ gɔ̀ lé a nɩ bhibhie a, a trʋmalɛ a bhibhiewɔlɩɛ́ mʋ́, nyʋa ká amɔ dʋdʋ̀ a zà. Ɩ́mɩ́ nà kà ŋnɩ́ ka lé Lagɔ ká amɔ tɩ́tɩ́ kádɛ ŋwʋ́.#23.14 Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.]
15Kplé ya amɔ kla, amɔ lɔ̀ a másɛnyʋa yà Falizɩ́ɛnyʋa sɔ́, yrʋnyʋa yɩ! A plɩ́lɛ bhlɩ́ɛ́ fɩ́ɛ́ jɩ̀, dʋ̀dʋ kʋ́, jie klʋ́, lé a bhá Moyízɩ a Jràmá lé a cíle nyʋa gɔ̀ a ká Lagɔ wlɩ tʋa, nyɔɔ́ nɩ tʋa Lagɔ wlɩ a, a cráka ɔ zɩkpa lé á plɩ́ɛ́ amɔ a nɩ zɩkpaá gɔ̀ lé a nyɛ́lɛ yɩ́ mɔ́ kosugàlàà né kʋ́.
16Kplé ya amɔ kla, amɔɔ́ nɩ́ yɛ́ kʋ́ bhè a tíele a lía a. Amɔɔ nie mà: Nyɔ nɩ sɔ́lɩ Lagɔ̀wlʋ̀ɔ̀ a ŋnɩ́ mʋ́ a, ɔ nɩ́ àyɩ lɛ́ nɩ. Mà Lagɔ̀wlʋ̀ɔ̀ a mnɩ́ a sìkàà ŋnɩ́ mʋ́ ɔ nɩ sɔ́lɩ a, bhʋ́anɩ nyɔɔ́, ka lé ɔ ká wɔlɩ́ɛ́ ɔ́ cí a, nɩ. 17Nɩnà nyʋa yɩ, yɩ́cucúbhlanyʋa yɩ! Lɛ́ ànɛ gbá kà gbʋ́ a, sìkàà, mà Lagɔ̀wlʋ̀kádʋ̀ɔ̀ ŋwʋ́ɛ́ sìkàà kpá a?
18A nie sɔ́kʋ́ mà: Nyɔ nɩ sɔ́lɩ Lagɔ̀bʋ̀bɔ̀da a ŋnɩ́ mʋ́ a, ɩ nɩ́ ka lɛ́ nɩ, mà bʋbɔ̀mnɛ̀ɛ̀ a ŋnɩ́ mʋ́ ɔ nɩ sɔ́lɩ a, bhʋ́ ɩ́ kʋ gba jɩ̀, bhʋ́ wɔlɩ́ɛ́ ɔ́ cí a, ɔ́ ka lé ɔ kɩ́ɩ́ nɩ. 19Yɩ́cucúbhlanyʋa yɩ! Lagɔ̀bʋ̀bɔ̀dàà yà Lagɔ mnɛ̀ɛ̀ sɔ́ a zà, lɛ́gbá kà gbʋ́ a, mnɛɛ́ mà bʋbɔ̀da a ŋwʋ́ɛ́ mnɛɛ́ kpá a? 20Nyɔɔ́ nɩ̀ sɔ́lɩ Lagɔ̀bʋ̀bɔ̀da a ŋnɩ́ mʋ́ a, ɔ sɔ́lɩ sáà lɩ́ɛ́ fɩ́ɛ́ kʋ̀ bʋbɔ̀da a ŋnɩ́ mʋ́. 21Nyɔɔ́ nɩ̀ sɔ́lɩ Lagɔ̀wlʋ̀kádʋ̀ɔ̀ a ŋnɩ́ mʋ́ a, ɔ sɔ́lɩ sáà Lagɔ̀ɔ̀ kʋ wlʋɔ́ a mnɩ́ a, ŋnɩ́ mʋ́. 22Nyɔɔ́ nɩ̀ sɔ́lɩ lagɔɔ́ a ŋnɩ́ mʋ́ a, ɔ́ sɔ́lɩ à tʋ́ Lagɔ a léyikpoó yà tʋ́ɔ́ mɔ̀glʋ̀ɔ̀ bɔ́laá jɩ̀ sɔ́ a, ŋnɩ́ mʋ́.
23Kplé ya amɔ kla, amɔ lɔ̀ a másɛnyʋa yà amɔ Falizɩ́ɛnyʋa sɔ́, yrʋnyʋa yɩ! Amɔ nyʋaá à pɛ́lɛ nɔ́nʋ́ nyokuié á wlele mátɩ lé gblɔ̀gblɔ yà yɩ́bhɛ sɔ́ a moníi, bhè à pá Lagɔ̀jràmá a mnɩ́ a gbakalɩma wɔlɩ́ɛ́ kʋ̀ mɔ̀ɔ lé a ká nɩ a, klá a. A nɩnɩgbɩ nɩ́ sá srí, a nɩ́ námɛɛ́ ka, a nɩ́ Lagɔ a fádùò ka, bhè ɩ́mɩ́ a ka lé a ká la fɩ́ɛ́ nɩ, lé ànɩ nɩ kʋ la bɩ́ a, a kɩ́ɩ́ la nɩ. 24A tíele nyʋa bhè a nɩ́ yɛ́ kʋ́! Nyɩyie nɩ bhli a mnámnányu a mnɩ́ a, a sʋʋ́ zɔ̀. Mà mnagwlì nɩ̀ bhli a nyú a mnɩ́ a, a nɩ́ yɛ́ɛ́ kʋ́ lé a mná.
25Kplé ya amɔ kla, amɔ lɔ̀ a másɛnyʋa yà Falizɩ́ɛnyʋa sɔ́, yrʋnyʋa yɩ! Amɔ nyʋaá à kpɩta dàplɩ yà bíi sɔ́ a jɩ̀, bhè ɩ mnɩ́ yíe a ghlíighlíilɩ yà lɩ́ɛ́ a bhá nyʋa gɔ̀ a kʋ́ a. 26Yícucú Falizɩ́ɛyʋʋ̀! Kpɩta fɩ́ɛ́ nà kɔ́pʋɔ́ yà nà dàplʋɔ́ sɔ́ a mnɩ́, bhʋ́alɛ́ ʋ́ jɩ̀ yi kplɔɔ̀.
27Kplé ya amɔ kla, amɔ lɔ̀ a másɛnyʋa yà Falizɩ́ɛnyʋa sɔ́, yrʋnyʋa yɩ! A wlʋ́ mànɩ́ námalesi pápɩ́, bhè nɩ̀ dʋdʋ̀ ɩ mnɩ́ a, nyɩ́kpɔfeyi yà sɩsɩ́ sɔ́ yíe mɔ̀ kʋ́. 28A sɛ́fʋɔ́, a kpɩkpɩ náa, nɩ̀ dʋdʋ̀ amɔ a, nànɩ́ námanyʋa, zɩ̀glàmà yrʋʋ́, kpɔkplá a, mɔ́nyùmòè ɩ́mɩ́ yíe amɔ kʋ́.
29Kplé ya amɔ kla, amɔ lɔ̀ a másɛnyʋa yà Falizɩ́ɛnyʋa sɔ́, yrʋnyʋa yɩ! A malɛ Lagɔ a nékʋ́cinyʋa a lésié lé a ŋwʋ́ɛ́ nyʋaá kà a nɩnɩgbɩ srí sá a lési gɔ̀ dɩgàlɩ. 30Lé a nie mà: Àmɔ̀, à nɩ̀ kʋ̀ la à tɩtɩa a tányɩɛ́ kɔ́ a, à yà sɔ́ nɩ́ a ká la jányɩ lé, à kà la Lagɔ a nékʋ́cinyʋa bhlá. 31Ɩ́mɩ́ amɔ mɔ̀glʋ̀ a cíé lɛ́, nyʋaá à bhlá Lagɔ a nékʋ́cinyʋa a, a yúó a ŋwɔ́ɔ.#23.31 A zɛlɩɩ sáà Nɩnɩgbɩ 7.52. 32A ŋwʋ́ fɩ́, wɔlɩ́ɛ́ a tinyʋa ya wá kʋ́ cíe a, a plɩ́ á gɔ̀ lé a bhɩɩ́ zɔ̀! 33A nyù kpʋanyɩ mnɩ́ bɛbɛlɩ bhísakʋ́, bhʋʋ́mnayɩ! A nɩ́ ka kosugàlàà neé wlʋ́? 34A pʋ nyúkwlí ɩ́mɩ́ kà ŋnɩ́ a zà ná ká amɔ Lagɔ a nékʋ́cinyʋa gɔ̀ laa, dɔ̀panyʋa, lé lɔ̀ a másɛnyʋa. A ká àna bhlá, a ká àna kúsi jɩ́ kʋ, a yi àna a zúfʋcɛcɩghlɩɛ́ a mnɩ́ sɩ́á, a yi á jɩ̀ gbɛ a yà sɔ́ a yi díé bhli. 35Bhʋ́ a nyʋa fɩ́ɛ́ à kà a dòlú a kɔ́sɔ sá flɛ́flɛ sa a, ɩ́ kalɩmɛɛ́ ɛ́mɛ́ a na ka yɛ́, bháa yɩ́ Abɛ́lɩ ɔ̀ kɔ̀ɔ nɩnɩgbɩ srí wá sá a ɔ́ dòlúó jɩ̀, lé kà Balasíi a yʋ́ Zakalíi a bhlá wá Lagɔ̀wlʋ̀kádʋ̀ɔ̀ yà bʋbɔ̀dàà sɔ́ a nyièdɩ a, dòlúó jɩ̀ ŋnɩ. 36Náa srʋɛ amɔ cícása mà, nyumoé fɩ́ɛ́ a nɩ lɛ́ a ɩ́ kalɩmɛɛ́ ɛ́mɛ́ a na ká yɛ́.
Zozíi bhɔtɔ Zelízalɛ́mʋdùò a zà
(Lúkɩ 13.34‑35)
37Wéé! Zelízalɛ́mʋ, Zelízalɛ́mʋ, mɔ̀ɔ bhlá Lagɔ a nékʋ́cinyʋa lé ɔ̀ pá Lagɔ a cíecíenyʋa ɔ́ la mɔ̀ a, cɔ́kpalɩ lé á kúée! Ná duo yrá la lé ká la ɩ nyoku gɔ̀ nà nyʋaá kʋ́ gʋ́gwlà, cémʋ́ kɔkɔga gʋ́gwlalɛ lɛ́ a yúó á papakwí zɔ̀ kʋ́ a, mà, a nɩ́ ɩ́ kʋ́ ŋwnʋ́! 38Wéé! Lagɔ ya á Lagɔ̀wlʋ̀kádʋ̀ɔ̀ glɔ̀gbá jɩ̀ sa, gbó a lɛkɔfʋ́ ya ʋ́ tuò! 39Náa srʋɛ yɩ́ amɔ mà, a nɩ́ ka yɩ́ mɔ́ɔ yɛ́, lé tányɩ nà kà kɛ́zɔ̀ ʋ́ kʋʋ lé a ká cí mà: Mɔ̀ɔ nà kà Kanyɔ Lagɔ a ŋnɩ́ mʋ́ yi a, jɔ̀lʋ pla mɔ̀!#23.39 A zɛlɩɩ sáà Lɔlɔ 118.26.»
Currently Selected:
Matíe 23: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
