Matíe 22

Sísíŋwnɔɔ́ ɔ̀ flʋɛzɔ̀ a, ɔ lúbhoé a núnúó

(Lúkɩ 14.16‑24)

1Lé Zozíi bhá sɔ́kʋ́ níní lé ɔ́ cíi nyʋaá gɔ̀, ɔ́ srʋ á mà: 2«Lagɔ a Léyibhlɩɛ́ wlʋ́ mà, cémʋ́ lóo a yʋ́ a ŋwnɔ́ wlʋ́ɛ́ lɛ́ sísɩ́sreé bhè ɔ́ ŋwʋ́ɛ́ lɛ́ ʋ́ lilɩ́é a. 3Ɔ́ cíe ɔ cóyuo, a wle nyʋaá a yi a ká li, mà nyʋaá nɩ́ yrá yiyíé. 4Ɔ́ cíe sɔ́kʋ́ cóyuo àna lé ɔ́ srʋ á mà: A mʋ a srʋ nyʋaá ɩ́ wle la a, mà: Lelilɩɛ́ ya yrɩ̀lɩ̀, ɩ́ bhlá dòdòbhlìì, lé mna káda àna, ɩ́ lɔ̀fɩ́ɛ́ ya yri, a yi à kà yɩ́ li bhè à kà lúbhoò. 5Mà nyʋaá á wle a, a nɩ́ mányɩlaá, ànɔ nɩ̀ kʋ̀ a, ɔ́ɔ mnɛ ɔ́ wɔlɩ́ kʋ́, nyɔ ànɔ nɩ soglù a, ɔ́ɔ mnɛ ɔ lágbaá, ànɔ mnɛ ɔ pɛ́lʋ́ kʋ́. 6Nyʋa àna bhlie cóyuó kʋ́ á bhitaá á bhláá. 7Lóoó ŋwʋ́ dɩ lé ɔ́ ku ɔ sújàà lé á bhlá nyʋa fɩ́ɛ́ lé á sesie a díé. 8Ɩ́ plɩ́ɩ yɩ́ lɛ́ sɩ́tɛ̀ a ɔ́ srʋ yɩ́ ɔ cóyuó mà: Lelilɩɛ́ ya yrɩ̀lɩ, mà nyʋaá ɩ́ wle la lilie a zà a, a nɩ́ ɩ́ kʋ́ ŋwà. 9A mʋ lé a bhli tríe, lé nyʋaá a ya sɔ́ a na ká gbɩ́dà a, a srʋ á a yi a ká li. 10Lé cóyuó mʋ lé á jɛlɔ̀ tríi a mnɩ́ sá lé á wle nyʋa fɩ́ɛ́ á yɛ́ a, á mɔ́nyùmò a na a, a náma a na a, á pá á wɔlɩ́, wlʋɔ́ yíe nyʋa kʋ́. 11Lé lóo pla wlʋɔ́ a mnɩ́ ɔ ká nyʋa à yi a yɛ́, lé ɔ yɩ́ bhli nyɔ a múó jɩ̀, ɔ nɩ́ lúbhoé a sá yrʋ́ʋ. 12Lé ɔ́ srʋ ɔ́, ɔ́ anɩ́: Bhée, bhè cégbá mʋ́ ɩ̀ nɩ lé ɩ̀ pla dɛ́ bhè nɩ́ lúbhoé a sá yrʋ́ a? Nyɔɔ́ nɩ́ srɔɔ né. 13Bhʋ́ lóo srʋ cóyuó mà: A gʋa nyɔɔ́ lɩ̀à a bhɩɩ́ yà ɔ sɩɩ́ sɔ́, lé a pálɔɔ́ jrùkʋ́ cúcúó a mnɩ́! Ɔ ká ɔ̀ kʋ ɔ ká ŋwí lé ɔ ká kalɩmɛ yɛ́.» 14Bhʋ́ Zozíi srʋ á mà: «A lɛ́bhɛɛ, nyʋa kɔ́kɔ́mnɩ́ Lagɔ wle mà tòyipɛ ɔ́ bhá a mnɩ́.»

Sezáa a lapóo a pɛ́ɛpɛwɔlɩ

(Málɩ́kɩ 12.13‑17; Lúkɩ 20.20‑26)

15Naa Falizɩ́ɛnyʋaá mʋ lé á núnuù, cémʋ́ á yi nɩ lé Zozíi yi cí lé á wɔlɩ́ yio sɩa a. 16Ɩ́ ka ŋnɩ́ lé á cíe a kʋjɩ̀nyʋ̀àà á zùò lé Elódʋ a jrèè a mnɩ́ a nyʋa, a ká Zozíi srʋ mà: «Másɛɛ̀, à yì saá mà ɩ̀ cíé cícása, lé nà cɩ́acɩ́awɔlɩ ŋwʋ́ɛ́ nyʋa Lagɔ̀nyùzɔ kʋ́, nɩ̀ɩ́ gúu nyɔ, nyɔ a kʋkʋlɩ nɩ́ sa sáà mɔ̀ duo mnɩ́. 17Naa, srʋ caá àmɔ̀ cémʋ́ ɩ̀ bhobho a: Lagɔ̀jràmá cíé mà, à pɛ́ɛ Wlɔmɛ́ɛnyʋa a lóo á wlele Sezáa a lapóo? Mà à ná pɛ́ɛ la a?» 18Mà cémʋ́ Zozíi yì á nyumo fasɩ a, ɔ́ srʋ á mà: «Ɛ̀kʋ̀ʋ̀ bhè a sa mɔ́ɔ zɔ̀ a, yrʋnyʋa yɩ? 19A pápa mɔ́ɔ moníe a bhá lé a pɛ́lɛ lapóo a!» Lé á lɔɔ́ flèejìè. 20Lé ɔ́ yrá á mà: «Nyɔ ànɔ̀ gbá kɔ̀ɔ wlú yà ɔ ŋnɩ́ sɔ́ kʋ̀ flèejìèè jɩ̀ a?» 21Á anɩ́: «Lóo kádɔ Sezáa.» Bhʋ́ ɔ́ srʋ á mà: «Ààà! Naa, a nyɛ́ Sezáa lɛ́ɛ́ ɛ̀ ŋwɔ́ɔ ɔ lɛ́ a, lé a nyɛ́ sáà Lagɔ a nɩ lɛ́ɛ́ ɛ̀ ŋwɔ́ɔ ɔ nɛ́ a!» 22Mà wɔlɩ́ɛ́ Zozíi cíi lɛ́ sɩ́tɛ̀ lé á nú a, ɩ́ mna á neé. Ɩ́ ka ŋnɩ́ lé á wlʋ́ɔ́ gɔ̀, lé á mʋ.

Kúdùkuo a galɔ̀wɔ̀lɩ̀ɛ̀, cégbá mʋ́ Sadisɩɛ́nyʋa bhobhuí a?

(Málɩ́kɩ 12.18‑27; Lúkɩ 20.27‑40)

23Bhʋ́ a yruó a múó a mnɩ́, Sadisɩɛ́nyʋa à nɩ́ bhá lɛ́ kúdùkuo a galɔ̀wɔ̀lɩ̀ɛ̀ cícása kʋ́ a, á yi Zozíi yrá ka mà: 24«Másɛɛ̀, Moyízɩ anɩ́ mà: Nyɔ yà ɔ ŋwnɔ́ sɔ́ nɩ nɩ́ yʋ́ va lé ɔ nɩ kú a, ɔ nɩ́ayʋ́ bhá kʋ́zrɩ̀ŋnɔ̀ɔ̀, lé ɔ nɩ́ayʋ́ a lɔ́lɔ́kpaá nɩ ka tuò.#22.24 A zɛlɩɩ sáà Detro 25.5‑6. 25Ɩ̀ lɛ́bhɛɛ, nɩ́ayúó gbàásɔ́ kʋ wá àmɔ̀ gɔ̀. Tagàanɔ sí, mà ɔ yà ɔ ŋwnɔ́ɔ́ sɔ́ nɩ́ yʋ́ va lé ɔ́ kú. Lé sɔ́ nɩ́ayʋ́ɔ́ bhá kʋ́zrɩ̀ŋwnɔ̀ɔ̀. 26Mà ɔ́ bhá ŋwnɔ́ɔ́ a, céamúó lé ɔ́ kú. Lé taánɔ bhá ŋwnɔ́ɔ́, céamúó lé á ŋnɩ gbàásɔ́ anɔɔ́ jɩ̀. 27Áa gbàásɔ́ɔ́ bhɩa a, ŋwnɔ́ɔ́ a sɛ́fʋɔ́, lé ɔ́ kú. 28Naa, yruó kʋ́ kúdùkuo nɩ galɔ̀ a, nɩ́ayúóó gbàásɔ́ɔ́ nyièdɩ̀ɛ̀ ànɔ gbá ŋwnɔ́ɔ́ na ká bhá à?» 29Bhʋ́ Zozíi srʋ á mà: «A ya tuo, a nɩ́ nú Lagɔ̀wɔ̀lɩ̀ɛ̀ a zɛlɛ a, lé a nɩ́ sáà Lagɔ a pɔ́waá yì. 30A lɛ́bhɛɛ cémʋ́ ɩ́ kʋ a, tányɩɛ́ mʋ́ kúdùkuo nɩ galɔ̀ kɛ́zɔ̀ a, yuwle yà ŋwná sɔ́ nɩ́ ka yɩ́ bhábhà, kplɔkplɔzìzi bhísakʋ́ á na ká yɩ́ kʋʋ Lagɔ gɔ̀ mɔ̀. 31Kúdùkuo a galɔ̀wɔ̀lɩ̀ɛ̀, cémʋ́ Lagɔ cíli a, a nɩ́ɩ́ sɩ́tɛ̀ zɛɛ? 32Lagɔ anɩ́: Mɔ́ɔ ŋwɔ́ɔ Ablaámʋ a Lagɔ, Izákɩ a Lagɔ, Zakɔ́bʋ a Lagɔ.#22.32 A zɛlɩɩ sáà Námɛɛ́ 3.6. Lagɔ nɩ́ kúdùkuo a Lagɔ ŋwɔ́ɔ, gà gà nyʋa á Lagɔ kʋ̀ʋ.» 33Mà nyʋaá fɩ́ɛ́ pʋ Zozíi a cícíwɔlɩɛ́ nyúkwlí a, neé mna á.

Jràmáá a zi Jràmáá fɩ́ɛ́ kʋ́ a

(Málɩ́kɩ 12.28‑34; Lúkɩ 10.25‑28)

34Falizɩ́ɛnyʋa nú mà Zozíi a cícíwɔlɩ sɩa Sadisɩɛ́nyʋaá a, á bɔ́ɔ sá lé á núnuù. 35Lé á nyièdɩ a jràmá a másɛ a múó yi Zozíi zɔ̀ sa ka, ɔ́ yrɔ́ɔ́ mà: 36«Másɛɛ̀, Jràmá gbá zi jràmáá fɩ́ɛ́ kʋ́ a?» 37Zozíi anɩ́: «Jràmáá à zi kʋ́ a, ámá ŋwɔ́ɔ mà: Wà kanyɔɔ́ ɔ̀ ŋwɔ́ɔ nà Lagɔ a, nà duo a lɔ̀fɩ́ɛ́ a mnɩ́, wàlɔ̀ɔ̀ nà zuzu a lɔ̀fɩ́ɛ́ a mnɩ́, lé wàlɔ̀ɔ̀ nà bhobhoé a lɔ̀fɩ́ɛ́ a mnɩ́.#22.37 A zɛlɩɩ sáà Detro 6.5.

38Jràmáá fɩ́ɛ́ a nyièdɩ a tagà jràmáá má kʋ̀ʋ lé ámá à zi kʋ́. 39Sɔ́ jràmáá wlʋ́ʋ tagà anaa, lé á zi sáà ámá bhísakʋ́ kʋ́, ámá ŋwɔ́ɔ mà: Ɩ̀ kà lé cémʋ́ ɩ̀ wà ɩ̀ nyòku a, kà sɩ́tɛ̀ ɩ̀ liyʋ wà.#22.39 A zɛlɩɩ sáà Levíi 19.18.

40Jràmá cíé sɔ́ɔ́ lɩ̀à ɩ́mɩ́ gbá Moyízɩ a lɔ̀ɔ̀ yà Lagɔ a nékʋ́cinyʋaá fɩ́ɛ́ sɔ́ a cícíwɔlɩɛ́ wlɩɩ.»

Kláyɩ́sɩ yà Davídɩ sɔ́ cégbá mʋ́ á kʋ kʋ mʋ́ a?

(Málɩ́kɩ 12.35‑37; Lúkɩ 20.41‑44)

41Cémʋ́ Falizɩ́ɛnyʋaá ya wlú ŋnɩlɔ a, bhʋ́ Zozíi yrá á mà: 42«Cégbá mʋ́ a bhobhole Kláyɩ́sɩ a zà a? Ɔ̀ kɔ̀ɔ̀ lɔ́lɔ́kpa a mnɩ́ a nyɔ ɔ́ ŋwɔ́ɔ a?» Falizɩ́ɛnyʋaá anɩ́: «Kláyɩ́sɩ, Davídɩ a yʋ́ kʋ̀ʋ.» 43Zozíi anɩ́: «Bhè cégbá mʋ́ ɩ́ kʋ lé Blɔ̀blɔ̀zùzùò kwlíi wá Davídɩ jɩ̀ lé ɔ́ wle wá Kláyɩ́sɩ Kanyɔ á? 44Davídɩ cí mà:

Kanyɔ Lagɔ srʋ ná Kanyɔ mà,

Plɩ́ɩ ná lilie kʋ́ kà sá bɔ́ɔ!

Bɔ́ɔ ʋ́, bhè ká nà gblɩ̀nyʋ̀àà fɩ́ɛ́ nà kokokpí zɔ̀ ŋwʋ́, kà a jɩ̀ námnɩ. # 22.44 A zɛlɩɩ sáà Lɔlɔ 110.1.

45Davídɩ nɩ wle wá Kláyɩ́sɩ ɔ Kanyɔ a, ɛ̀kʋ̀ʋ̀ bhè ɔ́ yi sɔ́kʋ́ ɔ yʋ́ plɩ́ à?» 46Zozíi yrá á sɩ́tɛ̀ a, nyɔ nɩ́ a nyièdɩ kʋ lé ɔ ká né sa à. Bhá yɩ́ ʋ́ jɩ̀ a, nyɔ nɩ́ yɩ́ sɔ́kʋ́ mɔ́ wɔlɩpɩʋ kʋ́ yráa.

Currently Selected:

Matíe 22: NEY

Highlight

Copy