Lukö 23

Wa ‑fä Zozii Pilatö ‑yä Elodö 'sɔ dëlü

(Matie 27.2,11‑14; Makö 15.2‑5; Zään 18.28‑37)

1'Nɩ wa yi 'kʋ ‑bha, 'nɩ wa yi Zozii ‑gɔmnä Pilatö dëlü ‑lä. 2Wa 'nyɛnöɔ bhɛ gbɩ wlä nyɩkpɔnɔ, ‑a ‑ŋënöɔ dä ‑bhlo 'nɩ ɔ nyima bhä 'bhlɩɛ 'mnö nyɩkpaa 'wlu. Ɔ sonʋwa bhä nynä waa' 'pɛɛ ‑lä 'loyo 'kädɔɔ Sezaa' lapoo. 'Nɩ ɔ laa bhä 'sɩɩ ɔ yëku Klisö ‑yä 'loyo. 3'Nɩ Pilatö yio 'ylä nynä ‑mä ‑mɔɔ plöö‑ lä 'Zufʋnyʋaa' 'loyoo ‑a? Zozii lä ‑mɔɔ cii lä. 4'Nɩ Pilatö yi 'Cibhisänyʋaa' 'cifinyʋa ‑yä ‑jlëa 'sɔ soo, ɔ lä gbëgëdëë' laa ‑a ‑nyu lä nä, nn' 'nia ‑wʋ nyɩkpɔnɔ yëku. 5'Nɩ wa yi 'yizlɛ 'ŋʋ, wlä kɔ nyima lä 'bhlɩɛ 'mnö nyɩkpaa 'wlu. ‑Nɩnɩ 'mɩ ɔ cɩa lä Zudee‑bhlɩɛ 'fɩɩn 'mnö. Galilee‑bhlɩɛ 'mnö ɔ cie‑ lä ‑aaa 'nɩ ɔ ‑ŋëë lä ‑mää. 6‑Mä Pilatö nuu‑ lä nä, kɔ ylää‑ 'nää, ɩyä Galileeyu‑ Zozii kä bhä plöö‑ nä, ɔ 'kä sɔɔ yibhë. 7Wa ‑sonöɔ ylä nynä 'loyo Elodöö' 'lëkpëa 'mnö nyɩkpɔ ɔ plöö‑ nä, kɔ ‑fɔɔ Elodö yëku. 'Tänyɩyɩ 'mnö nä, Elodö ‑yi bhä Zolizalɛmʋduu'.

8‑Mä ɔ nii‑ lä Zozii 'yi nä, ‑pʋpɛ bhlɔɔ bhɛ. Ɩ nʋ bhɛ 'tänyɩ 'nɩ Elodö tään bhlä nynä ‑mä ɔ 'kä Zozii 'yi 'ni. Wälɩɩ 'fɩɩn ɔ nuu‑ lä ɔɔ' ‑za nä, 'ɩzä ɔ tänöɔ bhlä. 'Nɩ ɔ bhobho bhä 'sɩɩ nynä ‑mä ɔ yi bhä ‑lɔɔ 'yiziziogbɩ nʋʋ ‑yä ɔ 'kɩ 'yi 'nimʋ. 9Ɩ ‑kä 'ŋnö nä, Elodö ylää‑ Zozii 'kwäslö ‑bhutukpä 'kʋ ‑aaa, ‑mä Zozii 'nöɔ ‑wʋ në ‑slä. 10'Cibhisänyʋaa' 'cifinyʋa ‑yä ‑Jlämöcɩanyʋa ‑wa ‑kʋ bhlä ‑lɔɔ nä, wa 'nyɛɛ‑ bhä Zozii gbɩ ‑bhutukpä. 11'Nɩ Elodö ‑yä ɔɔ' 'sʋjaa 'sɔ nyɩanöɔ bhä 'nɩ wa 'bhɩsɩɔ bhä. Wa ‑nʋɔ ylä sɔɔ ‑aaa nä, wa ‑plɔɔ 'ŋnumʋ‑bänä, 'nɩ Elodö yi ci nynä ‑mä wa 'ylɩbhɔ Pilatö. 12Pilatö ‑yä Elodö 'sɔ nä, kä wa ‑zɔɔ ‑zɔɔ bhä. ‑Mä ylʋʋyɩ 'kʋ nä, wa ‑lüü ‑lɔɔ 'nagwɩ.

Pilatö ŋoo‑ yɩ nynä wa bhoo Zozii 'kusu 'yii

(Matie 27.15‑30; Makö 15.1‑15)

13'Nɩ Pilatö yi 'Cibhisänyʋaa' 'cifinyʋa ‑yä 'bhlɩɛ 'mnö 'cifinyʋa ‑yä nyɩkpaa 'fɩɩn laa, 14'nɩ ɔ yiwa soo, ɔ lä ka ‑lä'ä lä nyɩkpɔnɔ nynä kɔ nyima 'bhlɩɛ 'mnö nyɩkpaa 'wlu, ‑mä anyɩa' 'klʋ 'nɩ n ylɔɔ‑ lä 'kwäslö 'kʋ ‑aaa, ‑mä gbëgëdëë' laa ‑a ‑nyuu lä 'nɩ ‑anö gbʋʋ a 'nyɛnöɔ lä nä, nn' 'nia ‑wʋ. 15Elodö ‑mä 'sɩɩ, ɔɔ' 'ninöɔ ‑wʋ gbëgëdü nyënyë yëku, ɩmɩɩ‑ ‑kä 'ŋnö 'nɩ ɔ 'ylɩbhɔ‑ 'nɩ ɔ ‑lä'ä 'mɔɔ lä bʋkʋ. Nyɩkpɔnɔɔ' ‑wʋ 'kʋ ‑ŋwa nynä ɔ 'ku! Gbëgëdü nyënyë 'nöɔ ‑wʋ yëku ‑kʋ. 16Kä n 'kɔ lä 'sɛpɛ ‑yä n 'kɔ 'yi ‑taa.

[17'Pakö‑glɩsɩɩsöö 'fɩɩn 'kʋ nä, ɩ ‑ŋwa bhä 'kʋ nynä Pilatö taa ‑jɩnyʋa pää' lɔɔ ‑bhlo 'yi.] 18‑Mä nyɩkpaa ‑gbä 'mʋ 'nɩ wa woo bhä, wlä ‑n 'bhlä nyɩkpɔnɔ ‑yä ɔ 'ku, ‑mä ‑n ‑taa Balabasö 'yi! 19Balabasö nä, ɔ ‑glö nyɩkpɔɔ' lɔɔ wa ŋʋʋ‑ bhlä ‑jɩɩ nä. 'Tänyɩ ‑bhlo ‑kʋ ‑lɔɔ 'nɩ kplü ‑gbä 'govlä ‑yä nyɩkpa 'sɔ pää. ‑Lɔɔ' nyɩkpaa nä, ɔmɔ Balabasö ‑kʋmʋwa bhä nëdë 'nɩ ɔ bhlää‑ bhä 'sɩɩ nyɩkpɔ. 20'Nɩ Pilatö yiwa bʋkʋ soo ‑yä, ɔ 'kä gbä wa 'kä Zozii 'yi ‑taa. 21'Nɩ wa yi woolɩ 'kʋ cie, wlä ‑n bhuo 'kusu 'yii! ‑N bhuo 'kusu 'yii! 22'Nɩ Pilatö yiwa bʋkʋ taanadä sonö, ɔ lä 'nɩ gbenyenyi ‑sä ɔ ‑nʋ bhää? Wälɩklëa ‑a nʋ lä ɔɔ' 'kwie nä, nn' 'nia ‑wʋ! N 'kä gbä ‑yä wa 'kɔ 'sɛpɛ 'fɩa ‑yä n 'kɔ 'yi ‑taa. 23'Nɩ nyɩkpaa' woolɩ yi bʋkʋ 'mʋ 'tɛmä. Wlä ‑n bhuo 'kusu 'yii! Nyɩkpanää' woolɩ 'mɩɩ‑ ‑zi yɩ 'kʋ. 24Sä wa ylä bhlä nä, 'nɩ Pilatö yi sɔɔ nʋ. 25Balabasö, ‑ɔ ‑fä bhlä 'govlä zɔgblö 'nɩ ‑ɔ bhlää‑ bhlä 'sɩɩ nyɩkpɔɔ nä, 'nɩ Pilatö yio 'yi taa, 'nɩ ɔ yiwa Zozii 'nyɛ nynä wa 'bhlɔ.

Wa ‑bhoo Zozii 'kusu 'yi

(Matie 27.31‑44; Makö 15.20‑32; Zään 19.17‑24)

26Wa ‑yɔsɔ ‑kʋ bhɛ lä mʋdä nä, wa ‑yä nyɩkpɔ ‑bhlo sloo‑, ɔ bha bhä 'klää'. Ɔmɔ wa laa Simɔɔ, ɔ ‑glö bhä Silɛnöduu' nyɩkpɔ. 'Nɩ wa yio kutu kutu klä nynä ɔ bhɛ 'kusuu ‑yä ɔ 'kä Zozii 'kʋ 'gë.

27Nyɩkpa ‑bhutukpä güwa‑ bhä 'kʋ. ‑Mä 'ŋwnɩa ‑wa ‑kʋmʋwa bhlä nëëdë nä, wälɩɩ känʋwa bhɛ lä kpänyɩ yëkuu' nä, wa bhʋtʋ bhä. 28'Nɩ Zozii yi 'ylɩbhɔ 'nɩ ɔ yiwa soo, ɔ lä Zolizalɛmʋduu' 'ŋwnɩänyɩ‑, aa' 'tu ‑lä 'naa ‑za ‑mä, a 'tu anyɩ 'titi a yëkuu' ‑za, ɩyä a 'tu anyɩa' 'yuaa ‑za! 29A ni 'tänyɩ yi ŋëë 'nɩ 'ŋwnɩaa' ‑lʋa ‑waa ‑läzä lä gään nä, wa yi waa' ‑za ci nynä ‑mä, anyɩmɔɔ‑ ‑wʋ lä 'yu gään 'nɩ ‑ɔɔ ‑läzä lä 'yu nyɩa nä, a yä 'pʋ! 30‑Lɔɔ' 'tänyɩɛ 'mnö, nyɩkpa yi 'küküü soo nynä ɩ bhlünʋwa 'wluu, 'nɩ wa yi 'kpakpüü soo nynä ɩ ŋwɛnʋwa 'kʋ.#23.30 Zɛɛ 'sɩɩ Ozee 10.8. 31Nä, ‑nɩnɩ 'fɩɩn kä mii‑ 'nɩ ɩ kä suu' ‑lɛɛ yälʋ ŋëë nä, su ‑sɔsʋʋ 'mʋʋ‑ yi bhä ‑lɔɔ 'nëë ‑bha ‑a?

32Nyɩkpaa ‑wa ‑fä bhlä Zozii ‑yä wa 'kɔ 'bhlä nä, wa ‑fämʋ bhä 'sɩɩ gbenyenyinyʋä 'sɔ ‑yä wa 'kwa bhä 'sɩɩ 'bhlä. 33'Nɩ wa yi dä wa laa lä 'Wukɔfʋʋ' dä nä ŋëë. ‑Lɔɔ wa ‑bhoo lä Zozii 'kusuu 'yi, 'nɩ wa ‑bhoo lä 'sɩɩ ‑lɔɔ nyɩkpa‑bhlänyʋä 'sɔ. Wa ‑bhoo ‑bhlo Zozii' lüüklä 'kʋ, 'nɩ wa ‑bhoo ‑bhlo ɔɔ' mëëcë 'kʋ. 34['Nɩ Zozii yi ci, ɔ lä 'Bä! ‑N cienʋwa ‑mä, ‑lɩɩ wa nʋ lä nä, wa 'nɩɩ ‑wʋ ‑yi!]

'Nɩ 'sʋjaa‑ ‑kʋ bhlä ‑lɔɔ nä, a paa‑ ‑nügbe ‑yä a 'kä Zozii' 'kwëtii dëë.#23.34 Zɛɛ 'sɩɩ Lɔlɔ 22.19. 35‑Mä nyɩkpaa 'fɩɩn‑ ‑yi bhlä nä, wa ‑kʋ ‑lɔɔ 'nɩ wa wloo bhä. 'Nɩ 'Zufʋnyʋaa' 'cifinyʋa nyɩänöɔ bhä, 'nɩ wa ci bhä, wlä ɔ ‑sä ‑lɔɔ nyɩkpa nëë' nä, ɔmɔɔ‑ gä Klisöɔ plöö‑ nä, ɔ ‑sä yɩ ‑lɔɔ ɔ yëku nëë' ‑nä! 36'Sʋjaa ‑mä 'sɩɩ wa ‑yio yëku 'nɩ wa nyɩanöɔ bhä, 'nɩ wa yio 'kälɩä kää nʋ 'nyɛ nynä ɔ 'mnä. 37Wa sonöɔ bhä, wlä ‑mɔɔ gä 'zaazɩ 'Zufʋnyʋaa 'loyoo plöö‑ nä, ‑mɔɔ 'titi ‑sä ‑lɔɔ ‑n yëku nëë'! 38Zozii' 'kusuu 'yii nä, wa ‑bho bhä ‑lɔɔ kplupä 'nɩ wa ‑jɩjla bhä 'yii nynä ‑mä, ‑Nɔnɔ 'mɔɔ‑ plöö‑ lä 'Zufʋnyʋaa' 'loyoo!

39‑Mä gbenyenyinyʋa 'sɔ wa ‑bhoo bhlä 'sɩɩ nä, waa' lɔɔ ‑bhlo 'bhɩsɛ‑ Zozii 'nɩ ɔ ‑sonöɔ, ɔ lä 'nɩ ‑n ‑nä ‑mɔɔ plöö‑ Klisöɔ ‑a? Nä, ‑n ‑sä yɩ ‑lɔɔ ‑n yëku nëë' ‑yä ‑n 'ga‑anyɩ 'sɩɩ ‑lɔɔ nëë' ‑sä ‑nä! 40‑Mä ‑lɔɔ' 'sɔnalɔɔ ‑fä ɔ lio nëkʋ, ɔ lä ‑mä ‑mɔɔ, ‑nn ‑guu ‑wʋ Laagɔ ‑a? Kwa 'kä‑ä lä 'bhlä ɔmɔ 'bhisäkʋ! 41Anyɩa gbʋklalɩɩ nä, kɩ gëë‑ ‑lɔɔ 'yii. Wälɩɩ ‑a ‑nʋ lä nä, ɩɩ' dluu‑ ‑a plʋʋ lä, ‑mä ‑nɔnɔ nä, ɔɔ' ‑wʋ lʋʋ ‑nʋ! 42'Nɩ ɔ yi Zozii soo, ɔ lä Zozii‑, 'tänyɩɩ ‑n 'gä lä ‑naa 'Leyiduu' 'päwaa 'mnö yii nä, bheeje, ‑n luë 'naa dä 'kʋ! 43'Nɩ Zozii yi nyɩkpɔɔ soo, ɔ lä ‑nʋawlɛɛ', n sonö‑ö nynä ‑mä ‑zɩkää ‑bhlobhlo, n ‑yä ‑mɔɔ 'sɔ yi Laagɔduu' ‑gblää.

44‑Nɩnɩ plö bhlä 'kʋ nä, 'ylʋ ‑kʋ bhä ‑tiin 'kʋ. ‑Mä 'cucukpä ‑plä ‑dʋdʋ 'kʋ dää 'fɩɩn. ‑Lɔɔ' 'cucukpaa ‑kʋ ‑dʋdʋ 'kʋ ‑aaa, 'nɩ ‑kugbë‑gliyi taa ‑klä. 45'Ylʋkwädlaa ‑kpëmä, 'nɩ Laagɔ‑bhutu 'kädʋʋ 'mnö lokwie wa ‑gla bhlä ‑mɔɔ nä, ɛ 'ŋɔtɔ‑ 'pɛlɩ 'sɔ. 46'Nɩ Zozii yi 'mʋ gaa, ɔ lä 'Bä! ‑N tlaa 'naa 'wugɔɔ wlɩ!#23.46 Zɛɛ 'sɩɩ Lɔlɔ 31.6. Ɔ cii‑ lä sɔɔ nä, kɔ pään‑ nyämʋ sä. 47Wlomɛɛnyʋaa' 'sʋjaa' 'cifio ‑ɔ ‑kʋ bhlä ‑lɔɔ nä, ɔ nii‑ lä ‑nɩnɩ 'yi nä, kɔ ‑fään Laagɔ 'ŋnu, ɔ lä nyɩkpɔnɔ plöö‑ bhä 'zaazɩ 'yigëënyɔ! 48‑Mä nyɩkpaa‑ ‑yi bhlä nä, ‑wa nii‑ lä wälɩnɩ 'fɩɩn 'yi nä, wa mʋʋ bhɛ bhʋtʋlɩɩ'. 49'Nɩ ‑wa ‑yi bhlä Zozii nä, ɩyä 'ŋwnɩa ‑wa ‑bha lä Galilee‑bhlɩɛ 'mnö, 'nɩ ‑wa güo‑ bhlä Zozii 'kʋ nä, wa ‑zie bhä gwë 'nɩ wa wloo bhä wälɩɩ 'fɩɩn‑ plö bhlä 'kʋ nä.

Wa ‑zizie Zozii' ‑gɛzɛɛ

(Matie 27.57‑61; Makö 15.42‑47; Zään 19.38‑42)

50Nyɩkpɔ ‑bhlo, ɔmɔ wa laa bhä Zozɛfʋ. Ɔ ‑glö bhä nyɩkpɔɔ' lɔɔ ‑ɔ nää‑ bhlä plɛkʋ 'nɩ ‑ɔnö nʋnʋgbɩ gëë‑ bhlä 'yii nä. 51'Zufʋnyʋaa' 'duu wa laa lä Alimatee nä, ‑mɔɔ' nyɩkpɔ bhlä. 'Nɩ ɔ ‑bɛɛmʋ bhä 'sɩɩ Laagɔɔ' 'Leyiduu' yi‑tänyɩ. Ɔ plöö‑ bhä 'Tütüplä‑jɛnyɩɛ 'mnö nyɩkpɔ ‑mä ɔ bhɔɔ Zozii' 'bhläwälɩɩ 'mʋ ‑kʋmʋ. 52Zozɛfʋnɔ, ɔmɔɔ‑ ‑mʋ 'nɩ ɔ yi Pilatö soo nynä ‑mä wa 'nyɩɔ Zozii' ‑gɛzɛɛ. 53Ɔ ‑sɛɛ 'kusuu 'yii 'nɩ ɔ yie 'cɩclɛ 'pɛpɛ gbëbie, 'nɩ ɔ yie lesii' 'ŋʋ. Lesie nä, cɛkʋ‑kpʋkplä 'mnö wa bhlie‑ bhä, 'nɩ wa 'nɩɛ ‑lä bhä tee ‑gɛzɛɛ' ŋʋʋ‑.

54 Sabaa‑gwlɛylʋʋ' ‑dʋdʋkʋ göglä‑tänyɩɩ' bhɛ lä nä, kä Sabaa 'kä bhɛ lä 'kʋ cie. 55'Ŋwnɩa ‑wa ‑yä Zozii 'sɔ nää‑ 'nɩ ‑wa ‑bha lä Galilee nä, wa ‑yä Zozɛfʋ 'sɔɔ‑ ‑mʋ bhlä ‑mɔɔ lesi 'kʋ. Nä wa nii‑ lesie 'yi 'nɩ, sä wa ‑zizie bhlä Zozii' ‑gɛzɛɛ nä wa nii 'sɩɩ sɔɔ 'yi. 56'Ŋwnɩänä, wa 'ylɩbhɔ‑ 'nɩ wa yi duu' yi, 'nɩ wa yi ‑gɛzɛɛ' ‑daŋwɩɩkpüü pi ‑yä wa 'kɛ bhɛ düda ‑kää mʋ. ‑Mä sä ‑Jlämaa ci bhlä nynä ‑mä Sabaa‑gwlɛylʋʋ 'kʋ nyɩkpɔɔ' nʋ ‑lä lebhe nä, kä wa ‑mʋ nyämʋ sä ‑kää.

Currently Selected:

Lukö 23: god

Highlight

Copy