Lukö 24

Zozii ‑glɔɔ 'kuëë

(Matie 28.1‑10; Makö 16.1‑11; Zään 20.1‑10)

1'Sɔlɩ 'kʋ zëplü 'pii 'ŋwnɩa ‑bha 'kʋ 'nɩ ‑daŋwɩɩɛ wa ‑pi bhlä nä, wa bhlie‑ 'kʋ 'nɩ wa yi lesie 'kʋ mʋ. 2‑Mä wa lä wa wloo nä, cɛkʋ ‑gwlikeyee ‑ɛ 'suu‑ bhlä lesi‑këfëa në nä, ɛ 'bhisio‑ 'nɩ ɛ ‑bha ‑lɔɔ. 3'Nɩ wa yi lesie 'mnö kwli, ‑mä Kwlienyɔ Zozii' ‑gɛzɛɛ' ‑wʋ bhɔɔ ‑mɔɔ ‑kʋ. 4Waa' 'ni bhɛ sä wa 'kä ‑lɔɔ' wälɩɩ klä nä. Wa lä wa wloo nä, ‑n ni nyɩkpa 'sɔ. Waa ‑plä ‑bänö 'päpö 'nɩ ɩɩ' pɔnɔɔ lie bhä. 5'Ŋwnɩa niwa‑ lä 'yi nä, kä ‑ŋänö ‑plʋwa, 'nɩ wa yi 'wlu sä glaa. 'Nɩ nyɩkpa yiwa 'ylä, wlä ‑ɔnözä 'nɩ nyɩkpɔɔ' ‑lɔmɔ ‑ɔ ‑yä lä nä, a tänönöɔ bhä 'kudukua nëëdëë? [6Ɔɔ' ‑wʋ ‑mää ‑kʋ, ‑mä ɔ yä 'kuëë glɔɔ.] Aa' luë ‑wʋ ‑a? 'Tänyɩɩ' ɔ ‑yä anyɩ 'sɔ ‑kʋ bhlä ‑mɔɔ Galilee' nä, ɩɩ' sä ɔ ‑sonö'anyɩ bhlä nä, sɔɔ ɩ plö lä 'kʋ. 7Ɔ ‑sonö'anyɩ bhä, ɔ lä ɩ ‑ŋwa 'kʋ nynä ‑mä Nyɩkpɔɔ ‑Yowli, wa pënönöɔ nyenyinyʋa wlɩɩ', ɩyä wa 'bhlänöɔ 'kusu 'yii. ‑Mä ɔ kä kuu‑ nä, tanaylʋʋ 'kʋ ɔ yi 'kuëë glɔɔ. 8Nyɩkpaa cii‑ lä sɔɔ nä, 'nɩ 'ŋwnɩa yi Zozii' ciciwälɩɩ' dä luë.

9Wa ‑bha lä lesi 'kʋ 'nɩ wa ‑yi lä nä, Zozii' lobho lobhonyʋa 'kʋgbä ‑bhlo ɩyä ‑mɔɔ' 'kʋgënyʋa, kä wa ‑sänʋwa 'dö. 10Mali Madlɛɛ ‑yä 'Zanö, ɩyä Zakö ɔ 'nɔ Malii, ɩyä 'ŋwnɩää' 'yigädalʋä, wamää‑ ‑lä bhlä 'döö. 11‑Mä 'kʋgënyʋa ‑klɩɩ nynä gäma gäma‑wälɩ nä, wa 'nɩɩ ‑wʋ nyaasäsä laa.

12'Nɩ Pɩɛlö yi 'kʋ ‑bha 'nɩ ɔ yi lesi 'kʋ mʋ. Ɔ ‑ŋëë lä ‑mɔɔ nä, ɔ kwlio‑ 'kʋ 'nɩ ɔ yi lesie 'mnö wloo. 'Cɩclɛɛ 'pɛpɛɛ wa ‑gbëbie bhlä Zozii nä, ɛmɛ ‑bhlo 'coo‑ ‑too ‑mɔɔ lesie 'mnö. Ɔ nii‑ lä wälɩɩ 'yi nä, kä plɛkʋ 'ninio‑ 'nɩ ɔ yi 'ylɩbhɔ.

'Kʋgënyʋä 'sɔ mʋ Emayusöduu' 'nɩ Zozii ‑ghlʋwa 'yi

(Makö 16.12‑13)

13‑Lɔɔ' ylʋʋ ‑bhlobhlo 'kʋ, Zozii' 'kʋgënyʋä 'sɔ mʋ bhä 'du ‑bhlo 'kʋ, ʋmʋ wa laa Emayusö. Nyɩkpɔ 'kä Zolizalɛmʋduu' ‑bha ‑yä ɔ 'kä Emayusö‑duu mʋ nä, ɔ sä 'gliyi 'sɔ ‑blɔkʋ. 14Nä, nʋnʋgbɩɩ 'fɩɩn ‑ɩ plöö‑ lä Zolizalɛmʋduu' 'kʋ nä, 'kʋgënyʋänä 'sɔ 'ŋʋnɩ bhä 'dö 'kʋ 'nɩ wa bhlü bhlä ‑blɔɔ. 15Ɩ ‑kʋwa ‑bhlɛ nëë' 'nɩ Zozii ‑yiwa ‑blɔkʋ ŋëë. Ɔ ‑yʋwa 'sɔ nämnö bhɛ däbhloo'. 16‑Mä kɔ 'ninienʋwa‑ nä, wa 'nöɔ ‑wʋ ‑yibhë. 17'Nɩ ɔ yiwa 'ylä ɔ lä ‑mä ‑mä wälɩ ‑sä a ci bhää? ‑Mä plɛ yʋwa bhɛ 'kpɔsɔ. 18‑Bhlo wa laa bhlä Kleopasö nä, ɔ lä ‑mä wälɩɩ 'fɩɩn‑ plöö‑ lä 'ylönö 'kʋ nä, ‑mɔɔ ‑bhlo 'coo‑ ‑kʋ lä Zolizalɛmʋduu' 'nɩ ‑ɔ 'nɩɩ ‑wʋ lä ‑yi ‑a? 19Zozii lä a lä saa bhää? Wlä Nazalɛtöö' Zozii, wälɩɩ ‑ɩ ‑ŋënöɔ lä nä, ɩmɩ ‑a ci lä. Ɔ ‑glö bhä 'plɔfɛtɩɩ' lɔɔ ‑ɔ ‑kä bhlä 'päwä 'kädänä. Laagɔ dëlü ɩyä 'bhlɩɛ 'mnö nyɩkpaa 'fɩɩn 'yikʋ nä, ɔɔ' nʋnʋgbɩɩ ‑yä ɔɔ' ciciwälɩɩ 'sɔ ‑kä bhä 'päwä. 20‑Mä ‑anyɩa 'Cibhisänyʋaa' 'cifinyʋa, wa ‑yä ‑anyɩa 'bhlɩɛ 'mnö 'cifinyʋa, wa 'ŋʋʋ‑ 'kʋ 'nɩ wa ‑pënöɔ Wlomɛɛnyʋä 'wlɩɩ ‑yä wa 'kɔ 'bhlä. 'Nɩ wa yio 'kusu 'yii bhoo. 21‑Anyɩ, ‑anyɩa ‑za nä, ‑a ‑kä bhä ɔɔ' pɔlötɛtɛ nynä ɔmɔɔ‑ 'gä bhlä 'Yizlɛnyʋä ‑lɔɔ nëë' ‑sä. Wa bhlɔɔ‑ lä nä, ɩ nʋ yɩ ylɩɩ taa. 22‑Anyɩa nëëdëë' 'ŋwnɩä zio, wamää‑ 'ninie‑anyɩ lä sää 'titi plɛkʋ. Zëplünöö wa ‑bha 'kʋ 'nɩ wa yi ɔɔ' lesie 'kʋ mʋ. 23Wa ‑mʋ lä nä, waa' ‑wʋ ‑mɔɔ ɔɔ' ‑gɛzɛɛ ‑ŋëë. Nä, wamää‑ ‑sonö‑anyɩ lä nynä kä ‑Laagɔzizi ‑ghlʋwa 'yii, 'nɩ ɩ ‑sonʋwa nynä Zozii ‑yä 'kuëë glɔɔ ‑mä ɔ ‑yä. 24'Nɩ ‑anyɩa nëëdëë' nyɩkpa yi 'kʋ ‑bha, 'nɩ wa yi 'sɩɩ ‑mɔɔ lesi 'kʋ mʋ. Sä 'ŋwnɩa cii‑ bhlä nä, sɔɔ ‑säkä ‑säkä wa nii‑. ‑Mä ɔmɔ nä, wa 'nöɔ ‑wʋ nii‑.

25'Kʋgënyʋa cii‑ ylä sɔɔ nä, 'nɩ Zozii yiwa soo, ɔ lä anyɩ, a 'tɛ 'nyukwli kpänyɩ! 'Nɩ anyɩa' bhobhowluu 'kä 'plɔfɛtɩnyʋaa' ciciwälɩɩ 'kʋ 'bhlü ‑yä a 'kɩ nyaasäsä laa nä, ‑lɔɔ tlʋmä 'mʋ! 26Ɩ ‑ŋwa bhä 'kʋ nynä Klisöɔ 'klʋ bhɩänöɔ 'fɩa ‑yä ɔ 'kä ɔɔ' 'klʋagbaa 'mnö plä. Yio ‑a? 27Ɔ cii‑ ylä sɔɔ nä, 'nɩ sɩ ‑jɩjlɔ lä ‑mɔɔ Laagɔ‑bɔɔgʋʋ 'mnö nä, ɔ yiwa sɔɔ 'mʋ ‑säsä. Ɔ 'bhää‑ yɩ Moyizöö' ‑Jlämaa ‑yä 'plɔfɛtɩnyʋa 'fɩɩn 'bɔɔgwɩɩ 'kʋ ‑aaa, 'nɩ ɔ yiwa Klisöɔ zëkpëa 'mʋ ‑säsä.

28Wa mɛ bhɛ lä Emayusö‑duu yëku nä, kä Zozii ‑nʋ nynä lɔɔ ‑ɔ 'gä 'plö. 29'Nɩ wa yio soo, wlä wloo 'ylʋ yä mʋ nä, kä 'cucu 'kä lä plä. ‑Naa 'plö ‑lä ‑mä ‑n goo ‑lää ‑anyɩ yëku! Wa cii‑ lä sɔɔ nä, Zozii' yɩɔ plöö‑ ‑mä kɔ ‑plää yɩ ‑lɔɔ. 30Nä, lü‑tänyɩ ‑ŋëë 'nɩ, wa lü ylä nä, Zozii bhlüü‑ 'flɔɔbhë 'kʋ, ɔ ‑bhibhie, 'nɩ ɔ yia 'mʋ ‑döödö 'nɩ ɔ yiwa dëë. 31‑Mä sä ɔ ‑bhɩä lä 'gää 'flɔɔbhëa dëëlɩ nä, kä waa' 'yii welio‑ 'nɩ wa ‑yibhënöɔ. ‑Mä 'kpobhuu ‑bhlo 'kʋ, ɔ 'mʋmnɔ‑. 32Ɔ 'mʋmnɔ‑ ylä nä, wa ci bhɛ, wlä ‑zɩglägbaa, Zozii bhlä! 'Ɩzä dä ‑a yi bhlä ‑blɔkʋ nä, 'nɩ ɔ säsänö‑anyɩ bhlä Laagɔwälɩɩ 'mʋ nä, 'nɩ ‑anyɩa pleyii si bhlä.

33‑Mä, wa ‑bha 'kʋ 'nɩ wa yi Zolizalɛmʋduu' 'ylɩbhɔ‑. Zozii' lobho lobhonyʋa 'kʋgbä ‑bhlo, wa ‑yä waa' näänyʋa, wa 'wlää‑ bhä 'wlu, 'nɩ wa yiwa ‑lɔɔ ŋëë. 34Wamää‑ ‑sänʋwa 'dö wlä, Kwlienyɔɔ yä 'zaazɩ 'kuëë glɔɔ ‑mä Simɔɔ nio‑! 35'Nɩ, nyɩkpanä 'sɔ, wa yi 'dö ‑sä. Wälɩɩ 'fɩɩn ‑ɩ plöö‑ lä ‑mɔɔ ‑blɔkʋ 'kʋ, ɩyä dä wa ‑kʋ lä lüdä 'nɩ Zozii ‑dëë lä 'flɔɔbhëa 'nɩ, wa yibhënöɔ‑ lä nä, ‑lɔɔ' wälɩɩ 'fɩɩn kwa ‑sänɩ.

Zozii ‑ghlä ɔɔ' 'kʋgënyʋä 'yii

(Zään 20.19‑23)

36‑Mä wälɩɩ ‑kʋwa ‑bhlɛ nëkʋ 'nɩ ‑bla! Zozii yi 'kʋ ghlä 'nɩ ɔ yiwa nëëdë 'nynigo. 'Nɩ ɔ yi ci, ɔ lä 'pʋpʋɛ yi o! 37‑Mä wa ‑luë nynä 'kuzuzu ‑ghlʋwa 'yii nä kä ‑ŋänö ‑plʋwa. 38'Nɩ Zozii yiwa soo, ɔ lä ‑mä, ‑ɔnözä 'nɩ a gu bhää 'nɩ plɛ belio'anyɩ bhä 'mʋʋ? 39A ni 'naa wlɩɩ 'yi ‑a! A ni 'naa ‑kokokpüü 'yi ‑a! ‑Amʋ lä! A ni 'naa 'yɛkɛɛ 'yi ‑a! A wloo'o 'nää, ɩyä a 'tanö'ö! 'Kuzuzuu' ‑wʋ 'yɛkɛ ‑kä, 'nɩ ʋʋ' ‑wʋ 'fɔɔ ‑kä. A ni'i ylä 'yii! N ‑kä 'yɛkɛ 'nɩ n kä 'fɔɔ. 40'Nɩ ɔ yiwa ɔɔ' ‑klɔgböö ‑yä ɔɔ' ‑kokokpüü pana. 41‑Mä nükpëë' ‑slʋwa, 'nɩ waa' mii‑ bhɔɔ ‑yä wa 'kɩ nyaasäsä laa. ‑Bhlɛ sɔɔ ɩ ‑kʋ 'nɩ ‑pʋpɛ ‑kʋwa bhä pleyii. 'Nɩ Zozii yiwa 'ylä, ɔ lä a ‑kä ‑lää lülülʋʋ ‑a? 42Ɔ ylʋwa lä sɔɔ nä, 'nɩ wa yio zlüklë ‑lä, aa ŋuŋulaa. 43'Nɩ ɔ yia 'kʋ 'bhlü 'nɩ, waa' 'klʋ, ɔ yia lü.

44'Nɩ ɔ yiwa soo, ɔ lä a ni ‑nɩnɩ 'mɩ n sonö'anyɩ bhlä 'tänyɩɛ 'mnö n ‑yä anyɩ 'sɔ ‑kʋʋ bhlä ‑lätee 'kʋ nä. N ‑sonö'anyɩ bhä, n nä, ɩ ‑ŋwa 'kʋ nynä 'naa yëkuu' wälɩɩ 'fɩɩn ‑ɩ ‑jɩjlɔ lä Moyizöö' ‑Jlämaa 'mnö, 'nɩ ‑ɩ ‑jɩjlɔ lä 'plɔfɛtɩnyʋaa' 'bɔɔgwɩɩ 'mnö ‑yä Lɔlɔɔ' 'bɔɔgʋʋ 'mnö nä, ɩ glää. 45'Nɩ Zozii yi waa' bhobhowluu 'klʋ kää ‑yä wa 'kä Laagɔ‑bɔɔgʋʋ 'mʋ 'nu. 46Ɔ lä ɩ ‑jɩjlɔ nynä Klisöɔ yi bhä nyäkälɩ 'ni, 'nɩ ɔ yi bhä 'ku. ‑Mä tanaylʋʋ 'kʋ nä, ɔ yi bhä 'kuëë glɔɔ. 47Ɩ ‑ŋwa bhä 'kʋ nynä wa soo nyɩkpaa nynä wa ‑bha nyenyi‑zëkpëa 'mnö ‑yä Laagɔ 'kwa cie. 'Nɩ 'Nägädöö nä, wa yi Zolizalɛmʋduu' 'bhää 'nɩ wa yi 'bhlɩɩ 'fɩɩn bhlü, 'nɩ Klisöɔ 'ŋnöö 'mnö wa yii ‑sää. 48Anyɩ nä, a plöö‑ ‑nɩnɩ 'fɩɩn ‑dläfʋɛ‑lünyʋä. 49‑Lɩɩ 'Bäɔ cii‑ lä nynä ɔ yi anyɩa ‑za nʋ nä, n kä ‑mʋ nä n yi'anyɩmɩ ‑lä. Nä, a kʋ ‑lää duu' ‑yä a ‑bɛɛ ‑mä Laagɔɔ' 'päwaa yi'anyɩ 'kʋ kwlii.

Zozii ‑gblää ‑laagɔɔ'

(Makö 16.19; Nʋnʋ 1.4‑14)

50Zozii ‑soo ylä sɔɔ ɔɔ' 'kʋgënyʋa nä, kɔ ‑yʋwa 'sɔ ‑bha Zolizalɛmʋduu' 'nɩ wa yi Betanii‑duu' ‑gbäsɩɩ mʋʋ. Betanii yëku, ‑lɔɔ wa ‑kʋ, 'nɩ Zozii yi wlɩ 'kʋ bhɛlɩä, 'nɩ ɔ yiwa 'nyu 'pä. 51Ɔ ‑kʋwa 'nyu 'pädä 'nɩ Laagɔ yiwanyɔ nëëdë sä, 'nɩ ɔ yi ‑laagɔɔ' ‑gblää. 52Ɔɔ' 'kʋgënyʋa ‑mä, 'nɩ wa yio bʋbɔ. 'Nɩ ‑pʋpɛɛ 'mnö, wa yi Zolizalɛmʋduu' 'ylɩbhɔ. 53Ylɩɩ 'fɩɩn 'kʋ nä, wa ‑kʋ bhä ‑mɔɔ Laagɔ‑bhutuu 'kädʋʋ 'mnö, 'nɩ wa fään bhä Laagɔ 'ŋnu.

Currently Selected:

Lukö 24: god

Highlight

Copy