Lukö 22

Zudaa ŋoo‑ nynä ɔ yi Zozii pëë

(Matie 26.1‑16; Makö 14.1‑16)

1'Zufʋnyʋaa' ‑glɩsɩɩsɩɛ wa laa lä 'Pakö 'nɩ ‑ɛnö 'tänyɩɩ' wa lü bhlä 'flɔɔ ʋʋ' 'bhaa ‑wʋ lä nä, ɛ yä bhɛ 'mɛmɛ. 2‑Mä 'Cibhisänyʋaa' 'cifinyʋa ‑yä ‑Jlämöcɩanyʋa tään bhä ‑kpläkplää' laa wa 'kä bhlä plä yä wa 'kä Zozii 'kʋ bhlü ‑yä wa 'kɔ 'bhlä nä. ‑Mä wa ‑guu bhä nyɩkpaa ‑wa yi bhlä ‑glɩsɩɩsɩɛ 'kʋ nä. 3‑Bhlɛ, Zozii' 'kʋgënyʋa 'kʋgbä 'sɔ nëëdëë' ‑lɔɔ wa laa bhlä Zuda Sikalɩɔtö nä, 'Dëvlo sluo‑ kätää'. 4'Nɩ ɔ yi mʋ 'nɩ ɔ ‑yä 'Cibhisänyʋaa' 'cifinyʋa ‑yä Laagɔ‑bhutu 'kädʋʋ 'klʋbɛɛnyʋa 'sɔ yi 'nii ‑yä sä ɔ 'kwä bhlä Zozii wlɩɩ' pënö nä, wa 'kä sɔɔ 'kʋ 'ŋʋʋ. 5'Nɩ wa yi 'kʋ 'ŋʋʋ‑ nynä wa 'kä Zuda monii 'nyɛ. 'Nɩ sä wa ‑yɔsɔ 'ŋʋʋ‑ lä 'kʋ nä, sɔɔ ‑kamänʋwa 'tʋ. 6Nä Zuda ŋoo‑ ylä wälɩnɩ 'kʋ nä, 'bhää bhɛ ‑lɔɔ 'kʋ nä, kɔ tään bhɛ nynä ɔ 'kä Zozii pëë ‑yä ‑jlëë' kɩ yibhë.

'Kʋgënyʋa göglä Pakö‑glɩsɩɩsɩɛɛ' ‑dʋdʋkʋ

(Matie 26.17‑19; Makö 14.12‑16)

7‑Glɩsɩɩsɩɛ ‑ɛnö ylʋʋ 'kʋ wa lü lä 'flɔɔ ʋʋ' 'bhaa ‑wʋ lä nä, 'nɩ wa bhlä lä 'sɩɩ 'Pakö‑bhabhlöö nä, ɛ ‑ŋëë ylä nä, 8Zozii ‑lobho ɔɔ' 'kʋgënyʋa Pɩɛlö ‑yä Zään 'sɔ. Ɔ lä a mʋ ‑yä a 'kä ‑glɩsɩɩsɩɛɛ' ŋënüü pi ‑a gä yi ‑a 'gä lü! 9'Kʋgënyʋa 'sɔ lä Cɩanyɔ‑, däsä ‑n ‑waa bhä nynä ‑mä ‑a pinɩɩ? 10Ɔ lä 'duu ‑ʋ ‑kʋ lä ‑mɔɔ 'yikʋ nä, a kʋ 'mnö ‑ŋëë nä, nyɩkpɔɔ' lɔɔ ‑ɔ ‑sluë lä 'nyukwëdë 'wluu nä, a ‑yɔsɔ yi sloo. A 'güo 'kʋ! Dä ɔ 'kä lä plää nä, 11a 'ylä ‑lɔɔ' 'gbëa 'bä. A 'ylɔɔ nynä ‑mä, Cɩanyɔɔ lä ‑bhutukleä ɔ ‑yä ɔɔ' 'kʋgënyʋa 'sɔ 'kä lä Pakö‑glɩsɩɩsɩɛ 'mnö 'nii nä, däsä a ‑kʋ bhä? 12A kä sɔɔ ylää‑ nä, ɔ yi'anyɩ 'sää ŋäkʋ ‑bhutuklü 'kädä paa. ‑Bhutuklëa nä, aa 'mnö ‑göglɔɔ wɛzä nä, ‑mɔɔ a 'kä lä Pakö‑glɩsɩɩsɩɛɛ' ‑dʋdʋkʋ göglä.

13Zozii cii‑ lä sɔɔ nä, kä 'kʋgënyʋa 'sɔ ‑bha 'kʋ 'nɩ wa yi 'duu 'mnö mʋ. Wa ‑mʋ lä nä, sä ɔ ‑sonʋwa bhlä nä, sɔɔ ‑säkä ‑säkä wa nii‑. 'Nɩ wa yi ‑glɩsɩɩsɩɛɛ' ‑dʋdʋkʋ göglä.

Zozii ‑yä ɔɔ' 'kʋgënyʋa ni Pakö‑glɩsɩɩsɩɛ

(Matie 26.26‑29; Makö 14.22‑25; 1 Kolɛ 11.23‑26)

14Lü‑tänyɩɛ ‑ŋëë ylä nä, 'nɩ Zozii ‑yä ɔɔ' lobho lobhonyʋa 'sɔ yi lü ‑kää yi. 15'Nɩ ɔ yiwa soo, ɔ lä 'naa plɛ ‑kʋ bhä kpänyɩ 'tänyɩnɛ 'kʋ. Kä n ylä bhä sää 'titi nynä ‑mä n ‑yä anyɩ 'sɔ 'kä 'kʋ lüü 'fɩa ‑yä 'naa nyäkälɩɩ' 'tänyɩɛ 'kä ŋëë. 16A ni, n ‑yä anyɩ 'sɔ ‑läyɩɔ bʋkʋ 'sää 'kʋ lüü, 'nɩ ‑ɔ 'nöyɩ ‑mɔɔ Laagɔɔ' 'Leyiduu 'mnöö. 17'Nɩ ɔ yi divaapliie 'kʋ 'bhlü, ɔ ‑bhibhie 'fɩa 'nɩ ɔ yi ci, ɔ lä a 'bhlü 'kʋ ‑yä a dëë a 'kä 'mnä, 18‑mä n sonö'anyɩ nynä ‑a 'bhää‑ yɩ ‑lää 'kʋ nä, nn' ‑lä divaa‑gälönʋ 'mnä ‑aaa, 'nɩ Laagɔɔ' 'Leyiduu yi yi. 19'Nɩ ɔ yi 'flɔɔbhë 'kʋ 'bhlü, ɔ ‑bhään 'fɩa Laagɔ, 'nɩ ɔ yia 'mö ‑döödö, 'nɩ ɔ yia ɔɔ' 'kʋgënyʋa dëë. Ɔ lä ‑nänaa, amää‑ plöö‑ 'naa 'yɛkɛɛ n nyɛɛ‑ lä anyɩa' ‑za nä! A nʋ 'sää 'futu 'futu ‑yä a 'kä 'naa dä 'kʋ luë! 20Wa ‑bhɩä ylä lülɩ nä, 'nɩ ɔ yi divaa' pliie 'kʋ 'bhlü 'nɩ ɔ yiwanyɛ 'nyɛ, ɔ lä divaa' pliinɛ, ɛmɛɛ‑ plöö‑ lä Laagɔɔ' mɛnʋ ‑loluu 'naa doluu wlʋa‑ lä anyɩa' ‑za nä. 21‑Mä ɩ ‑kʋ 'sɔɔ 'nɩ ‑ɔ gä'ä lä pëë nä, ɔ ‑kʋ ‑lää 'nɩ ɔ ‑yä ‑amʋ 'sɔ lüü 'kʋ. 22Kä Nyɩkpɔɔ ‑Yowli mʋ ylä. Sɔɔ ɩ ‑jɩjlɔ lä ɔɔ' ‑za. ‑Mä nyɩkpɔɔ' ‑lɔmɔ ‑ɔ 'gɔ lä pëë nä, ɔ yä mie! 23Zozii cii‑ lä sɔɔ nä, wa 'ylä ylä bhɛ, wlä 'nɩɩ, ‑anyɩa nëëdëë' lɔɔ ‑sä 'gɔ bhä pëë?

'Kʋgënyʋa pää ‑lɛ 'kädɔ

(Matie 18.1‑4; Makö 10.35‑45; Zään 13.2‑17)

24Wa ‑kʋ ‑lätee ‑lɔɔ lüdaa 'nɩ wa ‑bhlää bʋkʋ wälɩklë 'kʋ. Wa ylä bhä nynä ‑mä wa 'kä waa' nëëdëë' ‑lɛ 'kädɔ yibhë. 25'Nɩ Zozii yiwa soo, ɔ lä 'bhlɩɩ 'mnö 'loyua nä, nyɩkpa wa 'kämä lä nä, kä wa 'mnänʋwa 'wlu, 'nɩ wa ‑waa nynä ‑mä wa ci nynä wa ‑glö 'nää nʋnyʋä. 26‑Mä anyɩ nëëdë nä, ɩɩ' 'plö ‑lä sɔɔ 'kʋ! Anyɩa nëëdëë' ‑lɛ 'kädɔ, ɔ kʋ nynä anyɩa bʋkʋʋ' lɔɔ. ‑Ɔ gä anyɩ nëëdë 'kämä nä, ɔ kʋ nynä anyɩa' ‑gänʋnyɔ. 27'Nɩ ‑ɔ plöö‑ bhä 'titi nyɩkpa 'kädɔɔ? Nyɩkpɔɔ' lɔɔ ‑ɔ ‑kʋ lä sä 'nɩ wa ŋʋ lä ‑lɛɛ ‑dɔkɔ dëlü nynä ɔ lü nä, ɔmɔ bhä ‑a? ‑mä ‑ɔ dëë lä nä, ɔmɔ bhä ‑a? Wa lä lä lülülɩɩ dëlü 'nɩ ɔ lü lä nä, ɔmɔɔ‑ plöö‑ lä ‑lɛ 'kädɔ. ‑Bhlɛ sɔɔ ɩ ‑kʋ 'nɩ n ‑kʋ'anyɩ nëëdë nynä anyɩa' ‑gänʋnyɔ. 28Anyɩ nä, 'kwlɩkabhɩa 'fɩɩn n blüë‑ lä 'mnö nä, anyɩa 'kʋʋ nyɩkpɔ nö'ö ‑wʋ gwë ‑sä, ‑mä ka 'tɛmä plɛkʋ 'nɩ a ‑kʋ'ʋ yëku. 29Ɩɩ' 'ŋnöö 'mnö nä, sä 'Bäɔ nyɛɛ'ɛ lä 'Leyiduu nä, sɔɔ ‑amʋ ‑mä 'sɩɩ n 'kanyɩmʋ lä 'nyɛ. 30Ɩyä ‑mɔɔ 'naa 'Leyiduu 'mnö nä, a ‑yä ‑amʋ 'sɔ 'kä 'kʋ lüü ‑yä ‑a 'gä 'kʋ 'mnää. A yi ‑mɔɔ 'naa 'Leyiduu 'mnö 'leyi‑këkpü 'kʋgbä 'sɔ 'kʋ kʋ. Anyɩ‑ 'gä lä 'Yizlɛnyʋää' 'lɔlʋkpɔɔ 'kʋgbä 'sɔ 'titee plä.

Simɔɔ Pɩɛlö yi Zozii cɛɛ

(Matie 26.31‑35; Makö 14.27‑31; Zään 13.37‑38)

31Zozii cii‑ lä sɔɔ nä, kɔ laa‑ Simɔɔ Pɩɛlö, ɔ lä Simɔɔ! Simɔɔ! 'Dëvlo tänö‑ö! Ʋ tään nynä ʋ 'kanyɩ 'mʋ gbäzö, ‑n ‑näsä wa gbäzö lä 'säkaa nä. 32‑Mä n yä ‑naa 'wluu bhibhie ‑yä ‑naa pɔlötɛtɛɛ' kä ‑kä 'foclo bhlü. Nä ‑mɔɔ nä, ‑n gä yɩ ‑lɔɔ nëë' blüë 'nɩ ‑n gä ‑yi nä, ‑n gbä ‑n bhelie 'kʋ ‑yä wa 'kä 'tɛtɩ kään. 33Ɔ cii‑ lä sɔɔ nä, Pɩɛlö lä Kwlienyɔ‑, wa kä cii‑ nynä ‑n yi ‑jɩɩ plä nä, n ‑ghlɩlɩ 'nɩ n ‑yä ‑mɔɔ 'sɔ yie plä. 'Nɩ wa kä 'sɩɩ cii‑ nynä ‑mä wa yi‑i 'bhlä nä, n ‑yä ‑mɔɔ 'sɔ yi däbhloo' 'kuu. 34Pɩɛlö cii‑ lä sɔɔ nä, Zozii lä Pɩɛlö‑, kä n sonö‑ö yɩ nynä ‑mä, ‑zɩkää ‑bhlobhlo, zözädö‑kɔkwɛɛ' ‑lä wälɩ 'pä 'nɩ ‑n yi'i 'fɩa 'ci taa cɛnö nynä ‑n nö'ö ‑wʋ ‑yi.

'Kʋgënyʋa 'kä ‑ghlɩlɩ lebhee' ‑za

35'Nɩ Zozii yiwa bʋkʋ soo, ɔ lä 'tänyɩɛ 'mnö n ‑lobhu'anyɩ lä nä, aa bhɔɔ monii ‑kä, bodu ‑mä aa' bhɔɔ 'sɩɩ bhɛɛ‑, 'nɩ aa bhɔɔ 'sɩɩ 'süü bhɛɛ‑. ‑Mä a ‑mʋ lä nä, lʋʋ ‑sä aa bhɛ ‑mɔɔ ‑kää? Wlä Cɩanyɔ‑, ‑a mʋ lä nä, kä ‑a ‑kä bhä ‑lɩɩ 'fɩɩn. 36Zozii lä ‑aa! ‑Mä ‑pɛpɛɛ nä, ‑ɔ gä yɩ ɔɔ' monii ‑kä nä, ɔ 'bhlie yɩ 'kʋ! ‑Ɔ gä bhɛ ɔɔ' bodu ‑kä nä, ɔ 'bhluu yɩ 'kʋ! Ɩyä ‑ɔ 'nö bhɛ ‑jlɛ ‑kä nä, ɔ 'ŋʋ ɔɔ' 'kotuu 'kpä ‑yä ɔ 'kä ‑jlɛ zɔɔ. 37‑Mä kä n mʋ'anyɩ yɩ soo ‑kää nynä wälɩɩ‑ ‑jɩjlɔ lä 'naa ‑zaa nä, kɩ 'kä ylä glää. Kɩ jɩjlɔ‑ lä nynä ‑mä, Gbenyenyinyʋa pää' wa ‑zɛnönöɔ.#22.37 Ɩ bha Eza 53.12. Nä, wälɩɩ 'fɩɩn ‑ɩ ‑jɩjlɔ lä 'naa ‑za nä, ɩɩ' glää‑tänyɩɛ yä ŋëë. 38Ɔ cii‑ lä sɔɔ nä, wlä Kwlienyɔ‑, ‑a bhɛɛ ‑jɛlö 'sɔ, ɩmɩɩ‑ ‑kʋ lä ‑lää! Zozii lä ɩ nää yɩ!

Zozii ‑mʋ Oliviesii' 'kükëa 'wluu bhibhie ‑kää

(Matie 26.36‑46; Makö 14.32‑42; Zään 18.1‑2)

39Zozii' 'bhlɛ bhɛ lä nä, kɔ wlʋʋ‑ ‑zɔɔ 'nɩ ɔ yi Olivie‑kükëa 'wlu mʋ. 'Nɩ ɔɔ' 'kʋgënyʋa yio ‑mɔɔ 'kʋ 'gë. 40Ɔ ‑ŋëë lä nä, kɔ ‑sonʋwa, ɔ lä a bhibhie ‑mä aa' kä ‑kä ‑zɔɔpälɩɩ' bhlüü! 41'Nɩ ɔ yiwa 'pɛpɛlɩä gwë ‑sä, 'nɩ ɔ yi ‑kokoowli glu 'pä 'nɩ ɔ yi bhibhielɩ 'kʋ cie, 42ɔ lä 'oo! 'Bä, ‑n gä ‑waa nä, nyäkälɩnɩ, ‑n ‑sämɩ gwë! ‑Naa nʋ ‑lä 'naa pɔlösaa, ‑mä ‑n nʋ ‑naa pɔlösaa! [43Ɔ ‑kʋ lä bhibhiedä nä, ‑Laagɔzuzu kwlii‑ 'nɩ ʋ yio 'tɛtɩɩ' 'ŋʋ. 44‑Mä ‑lɔɔ' 'tänyɩɛ 'mnö nä, kä Zozii zlʋ bhɛ kpänyɩ 'wugɔɔ 'mnö, 'nɩ ɔɔ' bhibhie ‑kä bhɛ kpänyɩ 'tɛtɩɩ. Ɩ ‑kä 'ŋnö 'nɩ 'bhubhuu ‑ʋ kwlinöɔ‑ bhlä nä ʋ ‑jɩjlää doluu' 'toyuëë', 'nɩ wa too bhä ‑dʋdʋkʋ.] 45Ɔ ‑bhɩä lä bhibhielɩ nä, kɔ ‑bha 'kʋ 'nɩ ɔ yi ɔɔ' 'kʋgënyʋa yëku yi. ‑Mä ɔ lɔ yi nä, plɛ 'kpɔsʋwa‑ bhɛ 'nɩ wa yi ŋɔɔ. 46Ɔ lä ‑ɔnözä 'ni a ŋɔɔ bhää? A ‑bha 'kʋ a 'kä bhibhie ‑mä aa' kä ‑kä ‑zɔɔpälɩɩ' bhlüü!

Nyɩkpa ‑yi Zozii 'kʋ bhlü ‑kää

(Matie 26.47‑56; Makö 14.43‑49; Zään 18.3‑11)

47Wälɩɩ ‑kʋɔ ‑bhlɛ nëë' 'nɩ nyɩkpa yi yi, waa' ‑lɛɛ ‑bhutukpä. Zozii' 'kʋgënyʋa 'kʋgbä 'sɔɔ nëëdëë' nyɩkpɔɔ wa laa bhlä Zudaa nä, ɔmɔɔ‑ ‑kʋ bhlä nyɩkpanä 'yikʋ. Ɔ ‑yi lä nä, kɔ 'jloo‑ Zozii yëku ‑yä ɔ 'kɔ gbëë. 48'Nɩ Zozii yio soo, ɔ lä Zudaa‑, ‑gbëëlɩɩ 'mɩ ‑n bhlü lä 'kʋ 'nɩ ‑n pëë lä Nyɩkpɔɔ ‑Yowli ‑a? 49‑Lɔɔ' 'tänyɩɛ nä, nyɩkpaa ‑wa ‑yä Zozii 'sɔ nää‑ bhlä nä, wa nii‑ lä wälɩɩ 'yi nä, wlä, Kwlienyɔ‑! ‑A ‑yʋwa 'sɔ vë bhä ‑jälögba ‑a? 50Ɔɔ' 'kʋgënyʋa nëëdëë' lɔɔ' ‑bhlo ‑kplä lä ‑mɔɔ ɔɔ' ‑jlɛɛ nä, kɔ döö‑ 'Cibhisänyɔ 'kädɔɔ' ‑gänʋnyɔɔ lüüklä‑nyuklu 'kʋ. 51Zozii lä ɩ nää, a ‑tanʋwa 'yi! 'Nɩ ɔ yi nyɩkpɔɔ' 'nyukluu 'taa. Ɔ 'taanʋ‑ lä nä 'gää nä, kʋ ‑yamä 'nɩ ʋ plöö‑ ʋʋ' saa. 52'Cibhisänyʋaa' 'cifinyʋa ‑yä Laagɔ‑bhutu 'kädʋʋ' 'klʋbɛɛnyʋaa' 'cifinyʋa ɩyä ‑Dɔɔpänyʋa ‑wa ‑yi bhlä nä, Zozii ‑sonʋwa, ɔ lä a wloo sä a ‑yi lä nä! A bhɛɛ‑ ‑agbäkö ‑yä süklü 'nɩ a ‑yi ‑n ‑näsä a ‑yi lä nyɩkpa‑bhlänyɔ 'kʋ bhlü ‑kää nä. 53A ‑yä ‑amʋ 'sɔ ‑kʋ bhä ylɩɩ 'fɩɩn 'kʋ ‑mɔɔ Laagɔ‑bhutuu 'kädʋʋ 'mnö, 'nɩ a nö'ö ‑wʋ ‑mɔɔ 'kʋ ‑bhlüü. ‑Mä 'tänyɩnɛ ‑glö yɩ anyɩa' 'tänyɩ ɩyä 'saboo ‑zizinyenyii' 'päwaa' 'tänyɩ.

Simɔɔ Pɩɛlö cɛɛ‑ Zozii

(Matie 26.57‑58; Makö 14.53‑54; Zään 18.13‑27)

54'Nɩ 'nyɩkpaa yi Zozii klä 'nɩ wa yio 'Cibhisänyɔ 'kädɔɔ' ‑gbäsɩɩ fä. Pɩɛlö güwa‑ bhä 'kʋ ‑mä ɔɔ' 'mɩwa bhɔɔ yëku. 55Nyɩkpa ‑zla bhä ‑kosugbʋ ‑lɔɔ jluu nëëdë, 'nɩ wa ‑kʋʋ bhä yëku sä. 'Nɩ Pɩɛlö yi yi 'nɩ ɔ yiwa nëëdë 'plöö 'nɩ ɔ yi sä kʋ. 56‑Gänʋŋnɔ ‑bhlo ‑yi ‑lɔɔ ‑kosuu yëku. Ɔ nii‑ lä Pɩɛlö 'yi 'nɩ ɔ ‑kʋ bhlä ‑lɔɔ sä nä, kɔ ‑wluo ‑plɩɩ, 'nɩ ɔ yi ci, ɔ lä nyɩkpɔnɔ ‑yä Zozii 'sɔ nää bhä!

Pɩɛlö cɛɛ‑ Zozii

57‑Mä kä Pɩɛlö cɛɛ‑, ɔ lä 'ŋnɔɔ‑, nyɩkpɔɔ ‑n sä lä nä, n 'nöɔ ‑wʋ ‑yi. 58'Föö, 'nɩ nyɩkpɔ ‑bhlo yi bʋkʋ Pɩɛlö 'yi 'ni, 'nɩ ɔ yio soo, ɔ lä ‑mɔɔ, ‑n ‑glö Zozii' nyɩkpaa nëëdëë' nyɩkpɔ! Pɩɛlö lä yio, nn' ‑wʋ waa' nëëdëë nyɩkpɔ plöö‑! 59Ɩ ‑nʋ 'fɩa yiosä 'gliye, 'nɩ nyɩkpɔ ‑bhlo yi bʋkʋ ci, ɔ lä nyɩkpɔnɔ ‑glö Galileeyu nä, 'zaazɩ ɔ ‑yä Zozii 'sɔ nää‑ bhä. 60Pɩɛlö lä ‑mɔɔ, wälɩɩ ‑n ci lä nä, n 'nɩɩ ‑wʋ ‑yi. ‑Mä ɔ nëë' bhlüwälɩ ‑bhlɛ, 'nɩ zözädö‑kɔkwɛɛ yi wälɩ 'pä. 61'Nɩ Kwlienyɔɔ yi 'wlu 'ylɩbha 'nɩ ɔ yi Pɩɛlö 'yi wloo. ‑Mä sä ɔ ‑wluo lä 'gää nä, wälɩɩ Kwlienyɔɔ ‑sonöɔ bhlä kɩ ‑bhlünöɔ pleyi. Kɔ ‑sonöɔ bhlä nynä ‑mä, Pɩɛlö‑, ‑zɩkää ‑bhlobhlo, zözädö‑kɔkwɛɛ' ‑lä wälɩ 'pä 'nɩ ‑n yi'i 'fɩa 'ci taa cɛnö nynä ‑n nö'ö ‑wʋ ‑yi. 62Wälɩnɩ ‑kamä lä Pɩɛlö yëku nä, kɔ wlʋʋ‑ ‑zɔɔ. Ɔ tuu‑ sää ‑aaa 'nɩ ɔɔ' ‑wʋ ‑sɩä.

Wa bhütë Zozii

(Matie 26.67‑68; Makö 14.65)

63‑Mä nyɩkpaa ‑wa ‑klä bhlä Zozii nä, wa nyɩanöɔ bhä, 'nɩ wa bhütüo bhä. 64Wa ‑gʋɔ bhä 'yikʋ 'nɩ wa sonöɔ bhä wlä ‑n 'pä plɛ ‑yä ‑ɔ bhlä‑ä lä nä, ‑n zɛnöɔ 'ŋnö! 65Wa sonöɔ bhä 'sɔɔ wälɩnyenyi ‑bhutukpä 'nɩ wa 'bhɩsɩɔ bhä.

Wa ŋʋʋ‑ Zozii 'Zufʋnyʋaa' 'tite ‑jlëa 'mnö

(Matie 26.59,63‑65; Makö 14.55,61‑64)

66Zeli ‑ze ylä nä, ‑Dɔɔpänyʋa ‑yä 'Cibhisänyʋaa' 'cifinyʋa ‑yä ‑Jlämöcɩanyʋa wa 'wlää‑ 'wlu. 'Nɩ wa yi Zozii waa' 'Tütüplä‑jɛnyɩɛ dëlü ‑lä. 67'Nɩ wa yio soo, wlä ‑mɔɔ gä 'zaazɩ Klisöɔ plöö‑ nä, ‑n sonö‑anyɩ! Zozii lä n ka'anyɩ ‑soo nä, a 'nɩɩ ‑lä nyaasäsä laa. 68'Nɩ n ka'anyɩ 'sɩɩ ylää‑ nä, a nö'ö ‑lä soo. 69‑Mä a yibhë sɔɔ nynä ‑mä, ‑a 'bhää yɩ ‑zɩkää ‑lää 'kʋ nä, kä Nyɩkpɔɔ ‑Yowli 'kä ylä 'Tɛtɩ ‑Kä Laagɔɔ' lüüklä 'kʋ sä kʋ. 70'Nɩ wa yio 'ylä waa' ‑lefɩɩn, wlä ‑mɔɔ plöö‑ 'zaazɩ Laagɔ ‑Yowli ‑a? Ɔ lä ɩmɩ 'fɩɔ a cii‑ lä, ‑amʋ lä. 71Zozii cii‑ lä sɔɔ nä, wlä ‑Mänɩ ‑anyɩ 'titi, ‑anyɩa 'klʋ 'nɩ ɔ yä lä wälɩɩ në wla nä, ‑dläfʋɛ‑lünyʋä ‑sä ‑a tään bhä ‑pɛɛ bʋkʋʋ?

Currently Selected:

Lukö 22: god

Highlight

Copy