Lukö 19

Zozii ‑plä Zasee' daa 'kʋ

1'Nɩ Zozii yi Zelikoo‑duu 'mnö ŋëë. Ɔ tɔɔ bhɛ 'duu. 2‑Mä ‑mɔɔ Zelikoo‑duu 'mnö nä, nyɩkpɔ ‑bhlo ‑kʋ bhä ‑mɔɔ 'nɩ wa lɔɔ bhä Zasee. Zasee nä, ɔmɔɔ‑ 'kämä bhlä lapoo‑ylänyʋa, 'nɩ ɔ plöö‑ bhä 'sɩɩ lɛkäänyɔ. 3Ɔ tää bhä nynä ɔ 'kä Zozii' 'plöplölɔɔ 'yi 'ni. ‑Mä, ɔ plöö‑ bhlä nyɩkpa‑klilɛɛ nä, nyɩkpa‑kpaa' 'nyɩɔ bhɔɔ 'casɩ. 4‑Mä Zasee ‑yi bhä ‑blɔɔ Zozii 'kä bhlä bhlü nä, kɔ paa‑ 'nɩ ɔ yi 'yikʋ mʋ. Nä, suu wa laa lä Sikomɔɔ nä, ʋ ‑kʋ bhä ‑lɔɔ ‑blɔgbäkö. 'Nɩ ɔ yiu 'wlu ‑gblää. 5Zozii ‑ŋëë ylä ‑lɔɔ nä, kɔ bhɛlɩä 'wlu 'kʋ, 'nɩ ɔ yi Zasee soo, ɔ lä Zasee‑! ‑N pio 'kʋ ‑yä ‑n kwli, ‑mä ‑zɩkä nä, ‑naa dää 'mö n 'kä lä 'kʋ plä! 6'Nɩ Zasee yi 'kʋ vʋvʋä 'nɩ ɔ yi kwli. 'Nɩ ‑pʋpɛɛ 'mnö, ɔ yi Zozii ɔɔ' dää fä.

7‑Mä nyɩkpaa 'fɩɩn ‑wa nii‑ lä wälɩɩ 'yi nä, wa 'ŋuŋuë bhä, 'nɩ wa ci bhä, wlä nyɩkpɔnɔ ‑ɔ plöö‑ lä gbenyenyinyɔɔ nä, ɔɔ' ‑gbäsɩɩ, ‑mɔɔ Zozii ‑plä lä 'kʋ! 8‑Mä Zasee ‑bha 'kʋ 'nɩ ɔ 'nynigo‑ Kwlienyɔɔ Zozii dëlü, 'nɩ ɔ yio soo, ɔ lä Kwlienyɔ‑, ‑n ni kä n 'kä lä 'naa kääkäälɩɩ 'mʋ mimi ‑yä, n 'kɩ 'mʋ ‑döö ‑yä n 'kä ŋäzönyʋa 'nyɛ. 'Nɩ, n kä bhä 'sɩɩ nyɩkpɔ 'nyigë‑ 'nɩ n kɔ bhä ɔɔ' kääkäälʋʋ ‑sä nä, n yio ‑lɔɔ' ‑lʋʋ' 'ci ‑mɔɔnä 'ylɩbha. 9Ɔ cii‑ lä sɔɔ nä, Zozii lä ‑zɩkää' ylʋʋnʋ 'mnö nä, kä Laagɔ ‑yi lä 'gbënä 'mnö ‑yä ʋ 'kä ‑mɔɔ' nyɩkpaa ‑lɔɔ nëë' ‑sä. ‑Ɔnöza bhää? Zasee 'plömʋ 'sɩɩ Ablaamʋʋ' 'lɔlʋnyɔ. 10Nyɩkpɔɔ ‑Yowli nä, nyɩkpaa ‑wa yä lä too nä, wamä ɔ tää lä ‑yä ɔ 'kwa ‑lɔɔ nëë' ‑sä.

Wa ‑të ‑gänʋnyʋa ‑sikaa nää' ‑nyädlä

(Matie 25.14‑30)

11Nyɩkpaa ‑poo Zozii 'nyukwli 'nɩ ɔ ci 'nɩ ɔ mɛ bhɛ Zolizalɛmʋ‑duu yëku. Ɩ ‑kä 'ŋnö nä, wa ‑bhobho bhɛ nynä Laagɔɔ' 'Leyiduu, kʋ 'kä bhɛ 'kpobhuu ‑bhlo 'kʋ ‑lɔɔ 'kʋ ghlä ‑yä wa 'kʋ 'yi ni. 'Nɩ Zozii yiwa ‑nyädlä soo. 12Ɔ lä nyɩkpɔ ‑bhlo, ɔ ‑glö bhä 'lɔlʋkpö 'kädä 'kʋʋ nyɩkpɔ. ‑Mä ɔ yi bhä 'kɔbhɛ 'kʋʋ 'bhlɩ 'mnö mʋ ‑yä, 'leyi‑këkpëa' 'päwaa, wa 'kɔɔnya ‑mɔɔ 'nyɛɛ. Wa kɔ bhɛ 'päwaa nyɛɛ‑ nä, ɔ 'kä 'ylɩbhɔ. 13Ɩ ‑kä 'ŋnö nä, ɔ laa‑ ɔɔ' ‑gänʋnyʋaa' lʋä 'kʋgbä, 'nɩ ɔ nyɛɛ‑ nyɩkpɔ nyɩkpɔ ‑sikaabhë. 'Nɩ ɔ yiwa soo, ɔ lä a 'bhlü 'kʋ ‑yä a 'pä 'kwäsɛ, ‑mä kä n mʋ ‑yä n 'kä yi.

14‑Mä nyɩkpɔɔ nä, kä ɔ 'bhunyʋä ‑zʋɔ bhä. Nä, ɔ ‑mʋ ylä nä, kwa ‑lobho nyɩkpa ‑mɔɔ 'bhlɩɛ 'mnö ‑gbäsɩɩ wa 'kɔ bhlä 'leyi‑këkpëa 'nyɛɛ nä. Wa ‑fä 'dö, wlä ‑anyɩ, aa 'ylä ‑wʋ nynä nyɩkpɔnɔ 'plö ‑anyɩa 'loyo. 15Ɔ 'bhunyʋä cii‑ 'flɛ sɔɔ, ‑mä nyɩkpaa nyɩɔ‑ 'bhlɩɛɛ 'leyi‑këkpëa. 'Nɩ ɔ yi ɔ 'bhlɩ 'ylɩbhɔ. Ɔ ‑yi lä nä, kɔ laa‑ ɔɔ' ‑gänʋnyʋa ɔ nyɛɛ‑ bhlä ‑sikaa‑bhüü nä, ɩyä nyɩkpɔ nyɩkpɔ 'kɔ 'kwäsɛɛ ɔ paa‑ lä nää' yëkuu' wälɩ soo.

16Tɛɛtɛɛlɔɔ ‑yi lä nä, ɔ lä Käänyɔ‑, ‑sikaabhëa ‑n nyɛɛ'ɛ lä nä, n 'pänöa‑ 'kwäsɛɛ' nä n nii‑ bʋkʋ aa' 'ci 'kʋgbä. 17Ɔɔ' käänyɔ lä ‑n ‑glö ‑gänʋnyɔɔ' 'nägälɔɔ! N nyɛɛ‑ɛ ‑lɛɛ pɛ, 'nɩ ‑n ‑nʋnɔ 'nägä‑lebhee' nä, n ‑kä yɩ ‑naa pɔlötɛtɛ. Ɩ ‑kä 'ŋnö nä, ‑n 'plö yɩ 'naa 'bhlɩɛ 'mnöö 'di 'kʋgbää' ‑gɔmnä. 18‑Nɔnɔ ‑bha lä ‑lɔɔ nä, 'nɩ 'sɔna ‑gänʋnyɔ yi yi. Ɔ lä Käänyɔ‑, ‑sikaabhëa ‑n nyɛɛ'ɛ lä nä, n 'pänöa‑ 'kwäsɛɛ' nä n nii‑ bʋkʋ aa' 'ci ‑ngbü. 19'Nɩ käänyɔɔ yio soo, ɔ lä ‑mɔɔ ‑mä 'sɩɩ, ‑n 'plö 'naa 'bhlɩɛ 'mnöö 'di ‑ngbüü' ‑gɔmnä. 20'Nɩ ‑gänʋnyɔ ‑bhlo yi bʋkʋ yi. Ɔ lä Käänyɔ‑, ‑naa ‑sikaabhëa ‑n nyɛɛ'ɛ bhlä nä, kä n ‑gʋa ‑lapoluu' 'nɩ n ‑klaa 'nää, nä ‑n ni amä! 21Kä ‑naa wälɩ 'tɛ nä, kä n ‑guunö‑ö. ‑Lʋʋ ‑ʋnö lebhe ‑nn ‑wʋ lä ‑nʋ nä, ʋmʋ ‑n ‑waa nynä wa 'nyɛ‑ɛ. 'Nɩ dä ‑nn ‑wʋ lä lülülʋʋ ‑goo nä, ‑lɔɔ ‑n tänönʋ. 22Ɔ cii‑ lä sɔɔ nä, kä ɔɔ' käänyɔ ‑sonöɔ, ɔ lä wälɩɩ ‑ɩ bhä‑ä lä nëë' nä, ɩmɩɩ‑ ‑lä 'gä‑ä lä gbʋ klaa. ‑Mɔɔ, ‑n ‑glö sää ‑gänʋnyɔɔ' ‑lɛɛ nyonyo! ‑Zɩglägbämä, ‑n ‑yi sɔɔ nynä kä 'naa wälɩ 'tɛ. 'Nɩ ‑n ‑yi 'sɩɩ sɔɔ nynä ‑lʋʋ ‑ʋnö lebhe nn' ‑wʋ lä ‑nʋ nä, ʋmʋ n ‑waa nynä wa nyɛɛ'ɛ. 'Nɩ dä nn' ‑wʋ lä lülülʋʋ ‑gonö nä, ‑lɔɔ n tänönʋ! 23Nä, sɩ ‑kʋ bhä 'nɩ ‑nn bhä 'naa ‑sikaabhëa monii‑bhutuu 'nää ‑klää? 'Tänyɩnɛɛ' nä, a yä bhɛ ‑bʋzʋɛ kätää' pää. N ‑yi bhlä nä, kä n bhlie bhlä 'kʋ.

24'Nɩ käänyɔɔ yi nyɩkpaa‑ ‑kʋ bhlä ‑lɔɔ nä soo, ɔ lä a ‑sɔɔ ‑sikaabhëa wlɩɩ' ‑yä a 'nyɩa ‑gänʋnyɔɔ ‑ɔ nii‑ lä aa' ci 'kʋgbä nä! 25Nyɩkpaa lä 'aaa! Käänyɔ‑, 'nɩ ɔ ‑kä wɛzä ‑sikaabhü 'kʋgbä! 26Wa cii‑ lä sɔɔ nä, ɔ lä n sonö'anyɩ nynä ‑mä ‑ɔ gä ‑kä nä, wa yio bʋkʋ 'nyɛ. ‑Mä ‑ɔɔ ‑wʋ lä ‑kä nä, sä ɔ ‑kä bhlä nä wa yio sɔɔ ‑sä. 27'Nɩ ɔ yi bʋkʋ ci, ɔ lä nyɩkpaa' ‑lʋa ‑waa 'ylä bhɔɔ lä nynä n 'plö waa' 'loyo nä, 'naa ‑zɔbhlɛgbänyʋa, a ‑yʋwa 'sɔ yi ‑länʋmʋ ‑yä 'naa 'klʋ a ‑dʋwa ‑blɩɩ!

Zozii ‑plä Zolizalɛmʋduu' nynä 'loyo

(Matie 21.1‑9; Makö 11.1‑10; Zään 12.12‑16)

28Zozii ‑sonʋwa ylä ‑nyädlaa nä, kɔ 'plöö‑ nyɩkpaa' 'kpaa 'yikʋ 'nɩ ‑blɔɔ ‑ʋ gblä lä Zolizalɛmʋ‑duu' nä, ɔ yiu plää. 29‑Mä wa mɛ bhɛ lä Olivie‑kükëa yëkuu' 'dii wa laa lä Bɛfazee ‑yä Betanii 'sɔ nä, kä Zozii ‑lobho ɔɔ' 'kʋgënyʋä 'sɔ, 30ɔ lä a mʋ 'duu ‑ʋ ‑kʋ lä ‑mɔɔ 'yikʋ nä 'mnö. A kä ‑mʋ nä, a yi dä ‑bhlo ŋëë 'nɩ a yi jakasöö' 'yu 'ni. Wa ‑gʋänöɔ lʋʋ 'yi, ‑mä nyɩkpɔ 'nöɔ ‑lä ‑zä kätää' ‑gblää. A blisio ‑yä a ‑lä'ä 'mɔɔ! 31Nyɩkpɔ ka'anyɩ ylää‑ nynä ‑ɔnözä 'nɩ a blisio bhää nä, a ci nynä Kwlienyɔɔ ylɔ bʋkʋ.

32Zozii ‑sonʋwa lä sɔɔ nä, 'nɩ wa yi mʋ. Sɔ ‑sonʋwa bhlä nä, wa ‑ŋëë 'zaazɩ ‑lɔɔ jakasö‑yuo. 33Nä, wa ‑kʋɔ yɩ blisiedä 'nɩ ɔɔ' käänyʋä yiwa 'ylä nynä ‑ɔnözä 'nɩ wa blisio bhää? 34Wlä Kwlienyɔɔ ylɔɔ bʋkʋ. 35Wa cii‑ lä sɔɔ nä, 'nɩ wa yi jakasö‑yuo Zozii yëku ‑lä. Wa pɔɔ‑ waa' 'kwëtii 'kʋ 'nɩ wa yi gbä 'nɩ Zozii yio kätää' ‑gblää. 36‑Mä sä jakasö‑yuo mʋ nä, sɔɔ nyɩkpaa lʋlʋ waa' 'kwëtii ‑blɔɔ 'kʋ ‑yä ɔ 'kɩ 'kʋ nämnö. 37Wa ‑ŋëë lä Zolizalɛmʋ‑duu yëku 'nɩ, wa kwli bhɛ lä Olivie‑kükëa nä, Zozii' 'kʋgënyʋaa' 'kpaa, ‑pʋpɛ bhlʋwa bhä. Wa woo bhä 'nɩ wa fään bhä Laagɔ 'ŋnu, 'yiziziogbɩɩ ɔ ‑nʋ 'nɩ wa nii‑ bhlä 'yi nä, ɩɩ' ‑za. 38Wa ci bhä, wlä

‑Mɔɔ mɔ ‑ɔ plöö‑ lä 'loyoo 'nɩ

‑Ɔ yi lä Kwlienyɔ Laagɔɔ' 'ŋnöö 'mnö nä,

'Nyupälɩ ŋënö‑ö 'kʋ!

'Kʋwɔtɔlɩ kʋ ‑mɔɔ Laagɔ yëku!

'Klʋagba ŋëë ‑mɔɔ Laagɔduu' fɛɛn fɛɛn! # 19.38 Ɩ bha Lɔlɔ 118.26.

39‑Mä wa woo bhɛ lä nä, Falizɩɛnyʋa ‑wa ‑kʋ bhlä ‑lɔɔ nä, kwa ‑soo Zozii, wlä Cɩanyɔ‑, ‑n slä ‑naa 'kʋgënyʋa në ‑yä wa 'kä ‑plɩɩ kʋ ‑nä! 40Zozii lä n sonö'anyɩ nynä ‑nänʋä kä ‑plɩɩ ‑kʋ nä, cɛkwɩɩ 'mɩɩ‑ 'gä lä woo.

Zozii tuu‑ Zolizalɛmʋ‑duu' ‑za

41‑Mä Zozii ‑ŋëë lä Zolizalɛmʋ‑duu yëku 'nɩ ɔ niu‑ lä 'yi nä, kɔ tuu‑. Ɔ 'tunʋ‑ 'kʋ, ɔ lä 42'Wee Zolizalɛmʋ‑! ‑Mɔɔ ‑mä 'sɩɩ, ‑n gä ‑kä bhlä ‑zɩkää ‑naa 'kʋ wɔtɔlɩɩ' ylʋʋ ‑yibhë nä! ‑Mä ‑nɩnɩ 'fɩɩn kɩ ‑zizionö‑ö ylä 'yii! 43Ylɩɩ yi ŋëë 'nɩ ‑naa ‑zɔbhlɛgbänyʋa yi‑i ‑gbugbë 'yikʋ vë, 'nɩ wa yi‑i 'klʋ glää! Wa yi‑i dä 'fɩɩn ghlää 'nɩ wa yi‑i pɩä! 44‑N ‑yä ‑naa 'yua 'sɔ, wa yi'anyɩ 'plɩtɩä! Waa yi‑i wlä 'nɩ ‑gɔgbää' ‑lä ‑gɔgbä 'kʋ too! ‑Ɔnöza bhää? 'Tänyɩɛ 'mnö Laagɔɔ ‑yii lä yëku ‑yä ʋ 'kä‑ä 'nää nʋ nä, ‑lɔɔ' 'tänyɩɛ, ‑n 'nɩɛ ‑wʋ ‑yibhë!

Zozii ‑plä Laagɔ‑bhutu 'kädʋʋ 'mnö

(Matie 21.12‑17; Makö 11.15‑17; Zään 2.13‑17)

45‑Mä Zozii ‑ŋëë lä Zolizalɛmʋ‑duu' nä, kɔ ‑plä Laagɔ‑bhutu 'kädʋʋ 'mnö 'nɩ, nyɩkpaa ‑wa ‑kʋ bhlä ‑mɔɔ 'nɩ ‑wa pä bhlä 'kwäsɛɛ nä, ɔ yiwa 'tlü. 46Ɔ lä ɩ ‑jɩjlɔ nynä ‑mä, Laagɔ lä

'Naa ‑bhutuu ‑glö bhibhiedä.

'Nɩ anyɩ, a klʋ nynä 'ghüghünyʋää' ‑gwlɛɛdä! # 19.46 Ɩ bha Eza 56.7; Zele 7.11.

47Zozii cɩanʋwa bhä ylɩɩ 'fɩɩn 'kʋ ‑mɔɔ Laagɔ‑bhutuu 'kädʋʋ 'mnö. ‑Mä 'Cibhisänyʋaa' 'cifinyʋa, ‑yä ‑Jlämöcɩanyʋa, wa ‑yä 'bhlɩɛ 'mnö 'cifinyʋa, wa tää bhä nynä wa 'kɔ 'bhlä. 48‑Mä sä ɔɔ' ciciwälɩɩ mɛɛ‑ bhlä nyɩkpaa 'fɩɩn 'nyukwlii' 'nɩ, wa ‑waa bhlä ɔɔ' 'nyukwli poolɩ nä, sä wa 'kä bhlä nʋ ‑yä wa 'kɔ 'bhlä nä, waa' 'ni bhɔɔ sɔɔ.

Currently Selected:

Lukö 19: god

Highlight

Copy