Lukö 18

A 'nä sɩä ‑lä bhibhielɩ 'kʋ

1'Nɩ Zozii yiwa ‑nyädlä soo ‑yä ɔ 'kwa paa nynä ‑mä ɩ ‑ŋwa 'kʋ nynä nyɩkpɔ bhibhie 'kɔɔkɔ ‑yä ɔ 'nä sɩä ‑lä. 2Ɔ lä 'du ‑bhlo 'kʋ, 'zuzu ‑kʋ bhä ‑mɔɔ 'nɩ ɔɔ' ‑guu bhɔɔ Laagɔ, 'nɩ ɔɔ' 'mänyɩ bhɔɔ 'sɩɩ nyɩkpɔ. 3‑Mä ‑lɔɔ' 'duu 'mnö nä, 'kuzëlüŋnɔ ‑bhlo ‑kʋ bhä 'sɩɩ ‑mɔɔ, 'nɩ ɔ yi bhä 'nɩ ɔ luë bhä 'kɔɔkɔ 'zuzuo nynä 'zuzu‑, bheeje, 'naa wälɩɩ n ‑lä‑ä bhlä yëku nä, ‑n wlui yɩ 'kʋ ‑yä ɩ 'kä cio ‑nä! 4'Ŋnɔɔ cii‑ lä sɔɔ nä, 'nɩ 'zuzuo lä ɔ 'fɛnöɔ ‑kä! ‑Bhlɛ sɔɔ ɩ ‑kʋ 'nɩ 'ŋnɔnɔ yi yi bhä 'kʋ. ‑Mä 'tänyɩ ‑kʋ ‑lɔɔ 'nɩ 'zuzuo ‑bhobho ‑plɩɩ, ɔ lä ‑ɛɛɛ, nn' ‑guu ‑wʋ 'zaazɩ Laagɔ, 'nɩ n 'mänyɩ ‑wʋ 'sɩɩ nyɩkpɔ, 5‑mä 'cëa 'mnö 'ŋnɔnɔ yii lä ‑lää nä, 'nɩ ɔ bhɩä'ä lä 'kwlɩ nä, ɩ ‑ŋwa 'kʋ nynä ‑mä n wloo ɔɔ' wälɩɩ 'kʋ dɔ nö'ö ‑lätee gbʋ 'kʋ wlaa nä. 6Kwlienyɔ Zozii lä 'zuzuo ‑ɔ plöö‑ lä nyɩkpa ‑nyonyoo nä, sɔ cii‑ lä nä, a nuu‑ sɔɔ nä! 7Laagɔ nä, ʋʋ' 'yua ‑wa woo lä 'nɩ ‑wa pʋʋ lä wälɩ ‑gägäzëlü ‑yä 'sabo nä, sɩ yi bhä kʋ 'nɩ ʋʋ' ‑lä bhä waa' wälɩ 'kʋ wloo, 'nɩ ʋ yi bhä bʋä 'fɩa? 8Kä n sonö'anyɩ yɩ nynä ‑mä Laagɔ yi 'fäfä waa' wälɩ 'kʋ wloo. ‑Mä Nyɩkpɔɔ ‑Yowli kä yɩ ‑yi nä, ɔ yi bhä pɔlötɛtɛ 'ylʋzɔɔ ŋëë ‑a?

Falizɩɛyuo ‑yä lapoo‑ylänyɔɔ' bhibhielɩɩ' ‑nyädlaa

9Nyɩkpaa' ‑nänʋä bhobho wa yëkuu' ‑za nynä ‑mä wa ‑glö 'yigëënyʋä Laagɔ dëlü, 'nɩ ‑waa 'mänyɩ ‑wʋ waa' ‑liesɩ nä, ɩ ‑kä 'ŋnö 'nɩ waa' ‑zaa, Zozii cii‑ bʋkʋ ‑nyädlä. 10Ɔ lä nyɩkpa 'sɔ, wamää‑ ‑mʋ lä Laagɔ‑bhutuu' bhibhie ‑kää. ‑Bhlo plöö‑ Falizɩɛyu, 'nɩ ‑bhlo plöö‑ lapoo‑ylänyɔ. 11‑Mä Falizɩɛyuo 'nynigo‑, 'nɩ ɔ yi bhibhielɩ 'kʋ cie, ɔ lä ‑ɛɛɛ, Laagɔ‑ ‑ayokä! Sä ‑amʋ nn' ‑wʋ lä ‑mɔɔ' nyɩkpaa 'bhisäkʋ ‑kʋ nä, n bhänö‑ö! Wamä nä, kä wa ghlü, waa' gbɩɩ ‑wʋ 'yi gëë‑, 'nɩ wa ylä 'ŋwnɩä. 'Nɩ ‑amʋ nä, 'naa nʋnʋgbɩɩ' ‑wʋ ‑kʋ nynä lapoo‑ylänyɔnɔɔ' nʋnʋgbɩɩ. 12‑Amʋ, n goo ‑gbugbe 'sɔlɩcëa 'mnö 'ci 'sɔɔ. 'Nɩ n 'pɛɛ 'naa kääkäälɩɩ 'fɩɩn 'tigiti. 13‑Maa, lapoo‑ylänyɔɔ nä, ɔ ‑zie bhä gwë, 'nɩ ɔɔ' mii‑ bhɔɔ 'wluu 'kʋ bhɛlɩälɩ ɔɔ' nyenyi‑zëkpëa ‑za. Ɩ kamänöɔ bhlä yëkuu nä, ɔ bhibhie bhɛ, ɔ lä 'oo‑! Laagɔ‑ bheeje, ‑n wɔtɔmä plɛ 'naa ‑za, ‑mä n ‑glö nyenyinyɔ! 14Zozii lä n sonö'anyɩ nynä ‑mä, lapoo‑ylänyɔnɔ ‑bhibhie lä sɔɔ nä, kä Laagɔ ŋoo‑ ɔɔ' bhibhie 'kʋ, 'nɩ ɔ yi gbëë' mʋ. ‑Mä Falizɩɛyuo, Laagɔɔ' ‑wʋ ɔɔ' bhibhie 'kʋ ŋoo‑. Nä, nyɩkpɔ kɔ yëku 'kʋ bhɛlɩä nä, Laagɔ yio ‑dʋdʋkʋ ‑lä. Ɩɩ ‑zä kä nyɩkpɔ kä ɔ yëku ‑dʋdʋkʋ ‑lä nä, Laagɔ yio 'kʋ bhɛlɩä.

Zozii lä 'yua yinöɔ

(Matie 19.13‑15; Makö 10.13‑16)

15'Tänyɩ ‑kʋ ‑lɔɔ 'nɩ nyɩkpa lä bhä 'yuëlɩa Zozii yëku nynä ɔ 'kwa 'taa. ‑Mä ɔɔ' 'kʋgënyʋa nii‑ lä ‑nɩnɩ 'yi nä, nyɩkpaa ‑wa lä bhlä 'yua nä, kä wa ‑fʋwa nëkʋ. 16'Nɩ ɔ yi ci, ɔ lä a ‑taa 'yuëlɩa 'yi ‑yä wa yinö'ö ‑mä a 'nä 'tluwa ‑lä! Laagɔɔ' 'Leyiduu nä, nyɩkpaa‑ ‑kʋ lä nynä 'yuëlɩä nä, waa' lʋʋ lä. 17‑Nʋawlɛɛ 'mnö, n sonö'anyɩ ‑mä, nyɩkpɔ 'nö Laagɔɔ' 'Leyiduu' yëkuu' wälɩɩ klä nynä 'yulɛɛ nä, ɔɔ' ‑lä 'kɔɔn mii 'nɩ ɔ 'kä ‑mɔɔ plä.

Lɛkäänyɔ ‑yi Zozii yëku

(Matie 19.16‑30; Makö 10.17‑31)

18'Nɩ 'Zufʋnyʋaa' 'cifi ‑bhlo yi Zozii soo nynä ‑mä ‑mɔɔ nä, ‑n ‑glö cɩanyɔɔ' 'nägälɔɔ, nä ‑n sonö'ö ‑wʋ saa! Säsä n kä bhä 'titi ‑nʋ 'nɩ 'pʋpʋɛɛ‑ ‑kʋ lä 'kɔɔkɔɔ ‑za nä, n yie bhä 'nii? 19'Nɩ Zozii yio soo, ɔ lä sɩ ‑kʋ bhä 'nɩ ‑n ci bhä nynä ‑mä kä n nää‑? Nyɩkpɔɔ' ‑wʋ 'ylʋnʋ ‑zɔɔ ‑kʋ 'nɩ ɔ 'kä nää 'nɩ ‑ɔ 'nö Laagɔ ‑bhlo. 20‑N ‑yi ylä Laagɔɔ' ‑Jlämaa! Ka ci lä nynä ‑mä ‑Naa 'ylä ‑lä ‑n ‑liee' 'ŋnɔ, ‑naa 'ylä ‑lä ‑n ‑liee' 'wli, ‑naa 'bhlä ‑lä ‑n ‑lie, ‑naa ghlü ‑lä, ‑naa lü ‑lä ‑kpläkplö ‑dläfʋɛ, ɩyä ‑n 'ŋʋ ‑n 'bä ‑yä ‑n ‑nɔɔ!#18.20 Ɩ bha 'Nämʋ 20.12‑16; Detlo 5.16‑20.

21'Nɩ nyɩkpɔɔ yio soo, ɔ lä Cɩanyɔ‑, n 'bhää 'naa nyëbliduu' ‑aaa ‑yä n ŋëë ‑zɩkä nä, kä n ŋʋʋ‑ ‑Jlämäyɩ 'klʋkpää' 'nɩ n ‑glänöa 'klʋ. 22Zozii nuu‑ lä sä nyɩkpɔɔ cii‑ lä nä, kɔ ‑sonöɔ, ɔ lä wälɩklë ‑bhlo ‑too ‑mɔɔ nä, n 'nöa ‑lätee ‑nʋ. ‑N mʋ ‑yä ‑n 'ŋʋ ‑naa kääkäälɩɩ 'fɩɩn 'kpä, ɩyä ‑n dëë ɩɩ' moniee ŋäzönyʋä, ‑mä ‑n yi ‑mɔɔ Laagɔduu' leylü kään. Ɩyä ‑n yi ‑yä ‑n gë'ë 'kʋ! 23‑Mä nyɩkpɔɔ nuu‑ lä wälɩɩ nä, ɔ ‑glö bhlä lɛkäänyɔ 'kädɔ nä, kä wälɩɩ ‑kamänöɔ kpänyɩ yëkuu'.

24Zozii nii‑ lä ɔɔ' kʋkʋsaa 'yi nä, kɔ cii‑, ɔ lä 'wee! Lɛkäänyɔ 'kä Laagɔɔ' 'Leyiduu 'mnö plä nä, ɩ yi 'tɛmä kpänyɩ! 25Lɛkäänyɔ 'kä Laagɔɔ' 'Leyiduu 'mnö plä nä, ɩ 'tɛ kpänyɩ 'nɩ ɩ ‑zi sä mnɛgwli 'kä kwɛɛ' këfë nëë' blüë nä 'kʋ. 26Ɔ cii‑ lä sɔɔ nä, ‑wa ‑puo bhlä 'nyukwli nä, wlä 'aaa! Nä, ɩ kä yɩ sää ‑kʋ nä, nyɩkpɔ ‑sä yi bhä ‑pɛɛ ‑lɔɔ nëë' ‑bhaa? 27'Nɩ Zozii yiwa soo, ɔ lä lʋʋ lʋʋ' nyɩkpɔɔ' ‑lä lä mii nä, kä Laagɔ minʋ.

28'Nɩ Pɩɛlö yio soo, ɔ lä Cɩanyɔ‑, 'nɩ ‑anyɩ! Ka ‑bha ‑anyɩa kääkäälɩɩ 'fɩɩn gbʋʋ' 'nɩ ‑a yi‑i lä 'kʋ 'gë. 29Zozii lä ‑nʋawlɛɛ 'mnö n sonö'anyɩ nynä mä, nyɩkpɔ kä Laagɔɔ' 'Leyiduu' ‑za ɔɔ' 'gbëë ‑bha nä, ɔ yi ɔ 'ŋnɔ yëku ‑bha ‑o, ɔ yi ɔ bhelie yëku ‑bha ‑o, ɔ yi ɔ 'bä ‑yä ɔ 'nɔ 'sɔ yëku ‑bha ‑o, ɔ yi ɔɔ' 'yuë yëku ‑bha ‑o, 30‑lɩɩ 'fɩɩn ‑lɔɔ' nyɩkpɔ 'kä lä yëku ‑bha nä, ɔ yi ‑mää zëkpë 'kʋ ɩɩ' 'nää bhutukpä 'ni 'fɩa, 'nɩ ‑zee, 'pʋpʋɛɛ‑ ‑kʋ lä 'kɔɔkɔɔ ‑za nä, ɔ yie 'ni.

Zozii yi 'ku 'nɩ ɔ yi 'kuëë glɔɔ

(Matie 20.17‑19; Makö 10.32‑34)

31Zozii laa‑ ɔɔ' 'kʋgënyʋa 'kʋgbä 'sɔ ‑asilee' 'nɩ ɔ yiwa soo, ɔ lä a ni, kä ‑a mʋ ylä Zolizalɛmʋduu' ɩyä wälɩɩ 'fɩɩn 'plɔfɛtɩnyʋa ‑jɩjlä lä Nyɩkpɔɔ ‑Yowlii' ‑za nä, ɩ 'kä glää. 32Wa yio lowie wlɩɩ' pënö. Wa yio gbenyenyisä klä, wa yio nyɩä 'nɩ wa yio ‑dlɛɛ 'klʋ ŋwna. 33Wa yio ‑gblɩɩ' 'sɛpɛ, 'nɩ wa yio 'bhlä 'nɩ ɔ yi 'ku. ‑Mä ɔ kä kuu‑ nä, taanaylʋʋ 'kʋ ɔ yi 'kuëë glɔɔ. 34‑Mä sä Zozii ci bhlä nä, waa' ‑wʋ sɔɔ 'mʋ nuu‑. Kä ‑lɔɔ' 'klüü ‑zizio bhä 'kʋ waa' ‑za.

Zozii ‑yamä 'yikpüü' kʋnyɔ

(Matie 20.29‑34; Makö 10.46‑52)

35‑Mä wa ŋëë bhɛ lä Zelikoo‑duu yëku nä, 'yikpüü' kʋnyɔ ‑bhlo ‑kʋ bhä ‑lɔɔ ‑blɔgbäkö sä 'nɩ ɔ zla bhä 'plöplönyʋä. 36Ɔ nuu‑ lä nyɩkpaa' kplü nä, kɔ ylää‑ 37'nɩ wa yio soo, wlä Nazalɛtöö' Zozii 'mɔɔ‑ plö lä. 38'Nɩ ɔ yi woolɩ 'kʋ cie, ɔ lä Zozii‑, ‑a tötɔ Davidö ‑Yowli‑! Bheeje, ‑n yibhënö'ö ŋäzö! 39‑Mä nyɩkpaa ‑wa nämnö bhlä ‑jlëaa' 'yikʋ nä, wa fɔɔ bhä nëkʋ nynä ɔ kʋ ‑plɩɩ. ‑Mä ɔ puwa bhɔɔ 'nyukwli, 'nɩ ɔ woo bhä 'kɔɔkɔ kpänyɩ, ɔ lä ‑a tötɔ Davidö ‑Yowli‑! Bheeje, ‑n yibhënö'ö ŋäzö!

40Ɔ cii‑ lä sɔɔ nä, kä Zozii 'nynigo‑ 'nɩ ɔ yi nyɩkpaa soo nynä wa ‑yɔsɔ yi. Ɔ ‑ŋëë lä Zozii yëku nä, kä Zozii ylɔɔ‑ 41nynä ‑mä lʋʋ ‑sä ‑n ‑waa bhä nynä n nʋ ‑naa ‑zaa? Nyɩkpɔɔ lä Kwlienyɔ‑, ‑n gbä ‑yä 'naa 'yii 'kä welio ‑yä n 'kä sä 'ni! 42Ɔ cii‑ lä sɔɔ nä 'nɩ Zozii yio soo, ɔ lä ‑naa pɔlötɛtɛɛ yä‑ä puë. 'Ni yɩ sä! 43Zozii cii‑ lä sɔɔ nä, 'kpobhu ‑bhlo 'kʋ, kä 'yikpü‑käänyɔɔ' 'yii welio‑. Ɔ ni bhɛ lä sä nä, kɔ gëë‑ Zozii 'kʋ 'nɩ ɔ fään bhä Laagɔ 'ŋnu. 'Nɩ nyɩkpa 'fɩɩn‑ nii‑ ylä ‑nɩnɩ 'yi nä, wa fään bhä 'sɩɩ Laagɔ 'ŋnu.

Currently Selected:

Lukö 18: god

Highlight

Copy