Lukö 17

Nyenyii ɩyä cielɩ

(Matie 18.6‑7,21‑22; Makö 11.22‑26)

1'Nɩ Zozii yi ɔɔ' 'kʋgënyʋa soo, ɔ lä wälɩɩ' lɩɩ ‑ɩ yi lä gbä 'nɩ nyɩkpɔ yi lä nyenyii' bhlüü nä, ɩ yi ŋëë oo, ‑mä ‑ɔ gä ‑gbä 'nɩ ɔ ‑lie kä nyenyii' bhlüü nä, ɔ yä mie! 2‑Lɔɔ' nyɩkpɔɔ kä 'sää 'yu 'tɩkɩɩlɛɛ 'titi nyenyii' pään nä, ɔ ‑ŋwa 'kʋ nynä ‑mä wa gʋänöɔ cɛkʋ 'kädʋ ‑blɩɩ' ‑yä wa pänöɔ jiee'. 3Nä, a fä a yëku plɛkʋ!

‑N gä bheli ‑kä 'nɩ ɔ kä‑ä nyenyi ‑nʋ nä, ‑n slɔɔ në! Ɔ kä‑ä 'nyukwli ‑poo nä, ‑n cienöɔ! 4'Ɩzä kɔ kä ‑yi 'nɩ ylʋʋ ‑bhlobhlo 'mnö, ɔ kä‑ä nyenyi ‑nʋ 'ci ‑ngbɔɔsɔ, 'nɩ ɔ kä 'sɩɩ 'ci ‑ngbɔɔsɔ ‑yi 'nɩ ɔ kä‑ä ‑soo nynä ‑mä bheeje ‑n cienö'ö ‑mä nn' ‑läyɩɔ sɔɔ nʋ nä, ‑n cienöɔ!

A kään pɔlötɛtɛ

5'Nɩ Zozii' lobho lobhonyʋa yio soo, wlä Kwlienyɔ‑, ‑n gbä ‑yä ‑anyɩa pɔlötɛtɛɛ 'kä 'ghlümë! 6Kwlienyɔɔ lä anyɩa' pɔlötɛtɛ kä 'titi ‑kʋ nynä ‑mä suyʋyi 'tɩkɩɩlɩɔ wa laa lä mutadö nä, a yi suunʋ soo nynä ‑mä suu‑, ‑n ‑bha glu ‑yä ‑n goo n yëku jiee'! 'Nɩ suu yi'anyɩ 'klʋkpää' 'ŋʋ.

A 'plö ‑gänʋnyʋää' lʋä ‑wa nʋ lä waa' lebhee 'nää nä

7A ‑kä ‑pɛpɛɛ ‑gänʋnyɔɔ' lɔɔ ‑ɔ nʋ lä anyɩa' 'klää lebhe, 'nɩ ‑ɔ wloo lä 'sɩɩ ɔɔ' mna 'kʋ nä. 'Nɩ ‑lɔɔ' ‑gänʋnyɔɔ bha lebhe 'kʋ 'nɩ ɔ yi. Anyɩa' nëëdëë' lɔɔ ‑sä yio bhä soo nynä ‑mä ‑gänʋnyɔnɔ, ‑n yi 'fäfä ‑yä ɔ 'plöö 'tëbhle 'kʋ ‑yä ‑n 'gä lüü? 8Kä a 'kɔ lä soo nynä ‑mä ‑n mʋ ‑yä ‑n 'gä pi. Lülülɩɩ kä ‑ylö 'nɩ a 'kɔ lä bʋkʋ soo nynä ‑mä ‑n ylo ‑yä ‑n ‑sä 'naa ‑dɔkɔ ‑yä ‑n ‑lää'ä mʋ dëlü ‑yä n 'kä lü n 'kä 'mnä. A kä yɩ 'fɩa ‑lü 'nɩ a kä mnää‑ nä, ‑lɔɔ ‑tɛɛ a 'kɔ lä soo nynä ‑mä ‑n ‑mʋ yɩ ‑pɛɛ ‑yä ‑n 'gä lü ‑yä ‑n 'gä 'mnä! 9Käänyɔ nä, ɔɔ' bhään ‑wʋ ɔɔ' ‑gänʋnyɔ lebhee' ‑za. ‑Ɔnöza bhää? ‑Gänʋnyɔɔ nä, ɔɔ' lebhee ɔ 'kä bhlä nʋ nä, ɛmɛ ɔ ‑nʋ lä. 10Nä, anyɩ ‑mä 'sɩɩ, lebhee' ‑lɛɛ Laagɔ ‑sonö'anyɩ lä nynä ‑mä a nʋ nä, a kɛ yɩ ‑nʋ nä, a soo a yëku nynä ‑mä ‑a ‑glö ‑gänʋnyʋä nä 'flɛ ‑a nʋ, nä lebhee' ‑lɛɛ ‑a 'gä bhlä nʋ nä, ɛmɛ ‑a ‑nʋ lä.

Zozii ‑yamä 'zläbhlänyʋä 'kʋgbä

11Zozii mʋ bhlä Zolizalɛmʋduu' nä, ɔ ‑ghlää Samalii‑bhlɩɛ ‑yä Galilee‑bhlɩɛɛ' ‑kääzlʋʋ 'kʋ. 12‑Mä, ɔ ‑kʋ bhɛ 'du ‑bhlogbe 'mnö plädä, 'nɩ 'zläbhlänyʋä 'kʋgbä yio ‑blɔkʋ yi. Wa ‑zie gwë 'nɩ wa yi woo, 13wlä Cɩanyɔ Zozii‑, bheeje, ‑n yibhënö‑anyɩ ŋäzö! 14Zozii niwa‑ lä 'yi nä, 'nɩ ɔ yiwa soo, ɔ lä a mʋ ‑yä 'Cibhisänyʋa 'kanyɩ wloo! ‑Mä wa ‑kʋ ‑bhɛ ‑mɔɔ mʋdä 'nɩ wa yi yamä. 15Nä, waa' pää' lɔɔ ‑bhlo, ɔ nii‑ lä 'yi nynä ɔ yä yamä nä, kɔ 'ylɩbhɔ‑ 'nɩ ɔ yi yi, ɔ woo bhä 'nɩ ɔ fään bhä Laagɔ 'ŋnu. 16Ɔ ‑yi lä 'nɩ ɔ yi Zozii dëlü ‑kokoowli glu 'pä 'nɩ ɔ yio ‑aŋukwä 'pä. ‑Lɔɔ' nyɩkpɔɔ nä, ɔ ‑glö bhä Samaliiyu. 17Zozii nio‑ lä 'yi nä, kɔ cii‑, ɔ lä 'nɩ wamä 'kʋgbä ‑yamä ylä nä, ‑a sä bhä ‑mɔɔ' ‑lʋa ‑pɛɛnä? 18‑Lää' nyɩkpɔnɔ ‑bhlo, ‑ɔmɔɔ‑ plöö‑ lowuyuo nä, ɔmɔɔ‑ ‑yi Laagɔ bhää ‑kää ‑a? 19'Nɩ Zozii yio soo, ɔ lä ‑n ‑bha 'kʋ ‑yä ‑n mʋ, ‑mä ‑naa pɔlötɛtɛɛ yä‑ä puë!

'Nyɩkpɔɔ ‑Yowlii' yi‑tänyɩɛɛ' wälɩ

(Matie 24.3‑42)

20'Tänyɩ ‑kʋ ‑lɔɔ 'nɩ Falizɩɛnyʋa yi Zozii 'ylä, ɩyä 'tänyɩɛ 'mnö Laagɔɔ' 'Leyiduu' 'päwa 'kä lä yi nä, wa 'kɛ yibhë. 'Nɩ Zozii yiwa soo, ɔ lä Laagɔɔ' 'Leyiduu nä, ʋʋ' ‑lä yi nynä lʋʋ' lʋʋ nyɩkpa 'kä lä wloo nä. 21Nyɩkpɔɔ' ‑lä ci nynä ‑mä, a ni Laagɔɔ' 'Leyiduu 'mʋʋ‑ ‑kʋ lä ‑mää! 'Nɩ ʋmʋʋ‑ ‑kʋ lä ‑mɔyɩ! Laagɔɔ' 'Leyiduu' 'päwaa ‑kʋ'anyɩ nëëdë.

22'Nɩ ɔ yi ɔɔ' 'kʋgënyʋa soo, ɔ lä 'tänyɩ yi ŋëë 'nɩ a yi tää nynä ‑mä a 'kä Nyɩkpɔɔ ‑Yowlii' yi‑tänyɩɛɛ' ylʋʋ ‑bhloo' ‑kpakpa 'yi 'ni, ‑mä a 'nʋʋ ‑lä 'yi 'ni.

(Matie 24.26‑27; Makö 13.21‑22)

23‑Nänʋä yi'anyɩ soo nynä ɔmɔɔ‑ ‑kʋ lä ‑mää! 'Nɩ ‑nänʋä yi'anyɩ soo nynä ɔmɔɔ‑ ‑kʋ lä ‑mɔyɩ! ‑Mä sä wa yi 'flɛ ci nä, a 'nä mʋ ‑lä ‑mɔɔ! A 'nä paa ‑lä 'nɩ a 'kä ‑mɔɔ mʋ! 24A ni 'yi ‑a, sä ŋɔkʋʋ' ‑ŋnäzälö lie lä 'tänyɩɛ ‑bhlobhlo 'mnö ŋɔkʋʋ' dää 'fɩɩn nä, sɔɔ Nyɩkpɔɔ ‑Yowlii' yi‑tänyɩɛ 'kä lä kʋ. 25‑Mä ɩ ‑ŋwa 'kʋ nynä 'kwlɩ bhɩänöɔ 'fɩa kpänyɩ. Ɩyä 'bhlɛsʋnʋʋ' nyɩkpaa cɛnöɔ.

26Wälɩɩ' ‑lɩɩ ‑ɩ plöö‑ lä Nowee' 'bhlɛsʋʋ 'mnö 'kʋ nä, ɩɩ' ‑säkä ‑säkä 'gä lä Nyɩkpɔɔ ‑Yowlii' yi‑tänyɩɛ 'mnö 'kʋ 'plö. 27Nowee' 'bhlɛsʋʋ' nyɩkpaa nä, wa lü bhä 'nɩ wa mnä bhä, 'nɩ wa nönö bhä. Wa nyɛ bhä waa' 'yuŋnʋgbɛnyʋä 'wlie, 'nɩ wa 'nyɛ bhä wa 'yuŋwadie 'ŋwnɩä. Wa ‑kʋ sɔɔ nʋdä ‑aaa, 'nɩ Nowee yi 'gokpü 'kädaa 'mnö plä. 'Nɩ 'nyu 'kädʋʋ yi lä bhlä, 'nɩ ʋ yi nyɩkpaa 'fɩɩn nuë.#17.26‑27 Zɛɛ 'sɩɩ Ciedä 6.9–7.24. 28Kɩ 'kä lä 'sɩɩ kʋ nynä Lotöö' 'bhlɛsʋʋ 'mnöö wälɩɩ ‑ɩ plöö‑ lä 'kʋ nä. Lotöö' 'bhlɛsʋʋ 'mnö nä, nyɩkpaa lü bhä 'nɩ wa mnä bhä. Wa zɔɔ bhä 'nɩ wa ŋʋ bhä 'kpä. Waa goo bhä waa' 'kälö, 'nɩ wa slä bhä 'sɩɩ waa' ‑bhiti. 29‑Mä ylʋʋ 'kʋ Lotö ‑bha lä Sodɔmʋʋ' nä, kä ‑kosu ‑yä cɛkwɩslo ‑bha ŋɔkʋ 'nɩ ɩ ‑jɛɛ Sodɔmʋ‑duu 'wlu, 'nɩ ɩ yi ‑mɔɔ' nyɩkpaa 'fɩɩn sie. 30Nä, Nyɩkpɔɔ ‑Yowlii' yi‑tänyɩɩ', sɔɔ ‑säkä ‑säkä ɩ 'kä lä 'kʋ 'plö.

31‑Lɔɔ' ylʋʋyɩ 'kʋ nä, ‑ɔ gä bhɛ ɔɔ' ‑bhutuu' ‑gwlɛɛdaa ‑kʋ nä, ɔɔ' plä ‑layɩ ‑bhutuu' nynä ‑mä ɔ ‑kä ‑mɔɔ ɔɔ' lɩɩ nä, ɔ 'kɩ 'kʋ 'bhlü! ‑Ɔ gä bhɛ 'sɩɩ 'klää ‑kʋ nä, ɔɔ' 'ylɩbhɔ ‑läyɩ! 32Wälɩɩ ‑ɩ ‑ŋëë lä Lotö 'ŋnɔ nä, a 'pɩɩ plɛ 'kʋ! 33‑Ɔ gä tää nynä ɔ 'kä ɔɔ' zëkpë 'kʋ bhlää nä, ɔ yia të. 'Ɩzä ‑ɔ gä ɔɔ' zëkpë ‑të nä, ɔ yia 'ni. 34N sonö'anyɩ nynä ‑lɔɔ' ylʋʋyɩ 'kʋ nä, nyɩkpa 'sɔ yi 'sabo ‑bɔɔgɩ ‑bhlo 'kʋ pu, 'nɩ ‑bhlo yi 'kʋ bhlüo‑, 'nɩ ‑bhlo yi ‑lɔɔ too. 35'Ŋwnɩä 'sɔ yi ‑gwëdë ‑zɔɔ kʋ, 'nɩ ‑bhlo yi 'kʋ bhlüo‑, 'nɩ ‑bhlo yi ‑lɔɔ too. [36Nyɩkpa 'sɔ yi 'klää kʋ 'nɩ Laagɔ yi ‑bhlo fämʋ 'nɩ ‑bhlo yi ‑lɔɔ too.]

37Zozii cii‑ ylä 'sɔɔ nä, kä ɔɔ' 'kʋgënyʋa ylɔɔ‑, wlä Kwlienyɔ‑, dä ‑sä ‑lɔɔ ‑lɩyɩ 'fɩɩn 'kä bhä nʋɔ? Zozii lä dä ‑gɛzɛɛ yi lä kʋ nä, ‑lɔɔ goplüü 'kä lä 'wlu 'wlää.

Currently Selected:

Lukö 17: god

Highlight

Copy