BIACEIHTU 18
18
Mikah le Dan Mi Kong
1Khi caan lioah cun Israel mi lakah siangpahrang an um lo. Cun khi caan lioah cun Dan phunmi hna cu umnak dingah ro an kawl; zeicahtiah khi caan tiangah Israel phun hna nih an comi ro cu annih nih an co ve rih lo. 2Cucaah an phun ningpi chungin, Zorah le Eshtaol in, a ṭhawngmi panga, ram cu hung ngiat hung hlathlai awkah, an thlah hna; cun annih nih, “Va kal u law, ram cu hung hlathlai u,” tiah an ti hna. Cun Efraim tlangram kha an phan i Mikah inn kha an phan i khika ah an riak. 3Mikah inn pawng i an um tikah Levi mi tlangval aw kha an theih i cu lei cu an hei fuh i amah cu, “Aho nih dah mahka ah hin an ratpi? Mah ka hmun ah hin zeidah na tuah? Hika ah hin na rian zeidah a si?” tiah an ti. 4Cun anih nih annih cu, “Cu bantuk, cu bantukin Mikah nih ka cungah a ka tuah; a ka hlan i a tlangbawi ah ka cang,” tiah a ti hna. 5Cun annih nih amah cu, “Pathian kan halpiak tuah, tiah kan in nawl, kannih nih kan kalhnawhchanmi hi kan hlawhtling lai maw tling lo kan hngalh khawh nakhnga,” tiah an ti. Cun tlangbawi nih cun annih cu, 6“Hnangam tein kal ko u. Nan kalhnawh chanmi hi, Bawipa mit tangah a um ko,” tiah a ti hna.
7Cun mi panga hna kha an kal i Laish an phan, khika i a ummi hna cu Sidon mi hna umtuning in kikdai le lunghrinnak ngei loin le vawlei cung i a ummi thil zeihmanh bau loin le chawva tampi ngei in le him tein an um le Sidon mi hna he an i hlat le aho he hmanh an i tlatkai lo kha an va hmuh hna. 8Cun annih nih Zorah le Eshtaol i an unau hna sinah an rat tikah, an unau hna nih cun, “Zeitindah a si?” tiah an ti hna. 9Annih nih, “I thawh u law, hung kalhnawh hna u sih; an ram cu kan hmuh i zohhmanh, a vawlei a ṭha ngaingai. Nan cawlcang lai lo dahra hi? Cu ram i hung kal, hung luh le hung co cu i khulnuarh hlah u. 10Nan hung kal tikah lunghrinnak ngei lomi hna sinah nan hung phan lai. Ram cu a kaupi ko; asi, Bawipa nih nan kut chungah, vawlei cung i a ummi thil zeihmanh a bau lonak hmun cu an pek cang hna,” tiah an ti.
11Cun Dan phun chungin mi za ruk, raltuknak hriamnam he aa thuammi hna cu Zorah le Eshtaol in an i thawh i 12an hung kal i Judah ram chung i Kiriath-jearim ah cun an riak. Cu ruangah cun cu hmun cu nihin tiang hin Mahaneh-dan tiah kawh a si; zohhmanh, mah cucu Kiriath-jearim nitlaklei ah a um. 13Cun cuka cun Efraim tlangram ah khan an lan i Mikah inn kha an phan.
14Cun Laish ram ngiat awkah a hung kalmi, mi panga hna nih khan an unau hna cu, “Hi inn hna chungah hin tlangbawi angki le milem tete hna le suaimi milem le thletmi milem an um kha nan hngal maw? Cucaah zeidah nan tuah lai kha ruat tuah u,” tiah an ti hna. 15Cun khi leiah an va kal i Mikah inn ah Levi tlangvalpa umnak kha an phan i a khuasakning kha an hal. 16Danmi za ruk hna, raltuknak hriamnam aa putmi hna cu, kutka ah cun an dir; 17cun tlangbawi cu kutka luhnak i minung za ruk raltuknak hriamnam aa putmi hna he an dir lioah, ram ngiat awkah a hung kalmi panga hna kha an lut i suaimi milem, tlangbawi angki, milem tete le thletmi milem kha an lak hna. 18Cun hi hna nih hin Mikah inn chungah an luh i suaimi milem le tlangbawi angki le milem tete le thletmi milem kha an lak tik hna ah, tlangbawi nih khan annih cu, “Zeidah nan tuah?” tiah a ti hna. 19Cun annih nih amah cu, “Dai tein um ko, na kaa cu na kut in hup ko, kan sinah ra law, kan caah pa le tlangbawi si ko. Nangmah caah mipa pakhat innchungkhar ca i tlangbawi si maw a ṭha deuh. Israel mi chung i phun khat le hrin khat ca i tlangbawi si dah a ṭha deuh?” tiah an ti. 20Cun tlangbawi cu a lung a lawm; tlangbawi angki le milem tete le suaimi milem kha a lak hna i mi hna sinah cun a kal.
21Cucaah an i mer i an kal, ngakchia hna le saṭil hna le thil hna kha an hmaiah an chiah hna. 22Mikah inn in hla nawn an phak tikah, Mikah inn pawng i a ummi inn i a ummi hna kha aa auh hna i Dan mi kha an phak hna. 23Dan mi cu an hei auh hna i annih nih an hun i mer i Mikah cu, “Na zeidah a ti i mah bantuk mibu he khan na kan rathnawh?” an ti. 24Cun anih nih, “Ka sermi ka pathian hna le tlangbawi cu nan i lak i nan kal, zeidah ka ngeih ti kun? Cucaah zeitindah nannih nih, ‘Na zeidah a ti?’ tiah nan ka ti?” tiah a ti. 25Cun Dan mi hna nih amah cu, “Kan sinah hin bia chim len ko hlah, thin tawimi hna nih an in ṭhuat sual lai i na nunnak le na innchungkhar hna nunnak kha na sung sual lai,” tiah an ti. 26Cun Dan mi hna cu an kal ko; Mikah nih a caah an ṭhawng tuk ti kha a hmuh tikah, aa let i a inn ah a kir.
27Cun Dan mi hna nih Mikah nih a sermi thil le amah ta a simi tlangbawi kha an i kalpi hna i Laish khua an phan, khi khuami hna cu kikdai le lunghrinnak ngei loin an um. Vainam in an sam dih hna i khua kha mei in an khangh. 28Sidon in a hlat ca le midang he i tlatkainak an ngeih lo caah, chanhtu ahohmanh an um lo. Cu khua cu Bethrehob ta a simi nelrawn chungah khan a um. Cun annih nih khua kha an sak ṭhan i a chungah an um. 29Cun khua cu a min ah, Israel hrinmi Dan an pu min chuankhan in Dan an sak, sihmanhsehlaw cu khua min cu a terte ah cun Laish a si. 30Cun Dan mi hna nih cun suaimi milem cu anmah caah an i phun. Cun Moses fapa Gershom i a fapa Jonathan le a fapa hna cu, ram kha sal i a taan ni tiang, Dan miphun caah tlangbawi an si. 31Cucaah Mikah nih a sermi milem cu, Shiloh i Pathian inn ah a um chung cu, annih nih anmah caah an i chiah.
Currently Selected:
BIACEIHTU 18: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006