BIACEIHTU 19
19
Levi Mipa le A Nupichun Kong
1Khi caan lioah, Israel chung i siangpahrang an um lo lioah khan, Levi mi pakhat cu Efraim tlangram a ken ah a pem i Judah ram Bethlehem khua in nuchun pakhat aa lak. 2Cun a nuchun cu a cungah a thin a hung i a sinin Judah ram Bethlehem khua i a pa inn ah khan khua a tli, khika ah thla li tluk a um. 3Cun a va nih amah sinah bia nem va chim le amah kha kirpi ṭhan awkah a tho i a zulh. A sinum le laa tuah khat a kalpi hna. A nupi pa inn kha a va phan i ngaknu pa nih cun a rak hmuh tikah ton awkah lunglawmhnak in a ra. 4Cun a pu, ngaknu pa nih khan, a camter i a sinah ni thum a cam; cu caah an ei an ding i khika ah an cam. 5Ni linak ni ah zingka in an tho i kal awkah an i tim. Sihmanhsehlaw ngaknu pa nih cun a tupa cu, “Rawl tlawmpal in ei law, i hrim rih ngat, cu hnuah na kal te lai,” tiah a ti. 6Cucaah mipa pahnih hna cu hmunkhat ah an ṭhu i an ei i an ding ṭi. Cun ngaknu pa nih mipa sinah cun, “Tuzan cu riak rih ko law, lunglawm tein um ko,” tiah a ti. 7Cun mipa cu kal awkah a thawh tikah a pu nih khan a lem i khika ah a riak ṭhan. 8Ni nganak ni ah kal awkah zingka tein a tho. Cun ngaknu pa nih khan, “I hrim rih tuah law, nitlak tiangin um tuah,” tiah a ti. Cucaah an pahnih in an ei ṭi. 9Cun mipa le a nuchun le a sal kha kal awkah an i thawh tikah, a pu, ngaknu pa nih cun, amah cu, “Zohhmanh, atu cu ni a tla dengmang cang, zan khuadei in cam ko rih u. Zohhmanh, khua a mui cuahmah cang; hika ah hin riak law, na lung kha nuamhter ko, cun thaizing ah zing tein na tho lai i na inn ah na kal ko lai,” tiah a ti.
10Sihmanhsehlaw mipa nih zan riah cu a duh ti lo; a tho i a kal i Jebus (cucu Jerusalem) ral kha a phan. A dan danhmi laa tuah khat kha aa ngeih hna i a nuchun zong kha a sinah cun a um. 11Jebus kha an hei naih tikah ni a tla dengmang cang i a salpa nih khan a bawipa cu, “Ra tuah, Jebus mi hna khua ah hin va pial u si law, khika ah va riak u sih,” tiah a ti. 12Cun a bawipa nih amah cu, “Israel mi chungah aa tel lomi miphun dang hna khua chung luh awkah kan pial lai lo; sihmanhsehlaw Gibeah ah kan lan ko lai,” a ti. 13Cun a salpa sinah cun, “Ra tuah, hi hmun hna lakah pakhatkhat hi va fuh hna u si, Gibeah ah maw Ramah ah dik kan riah hnga,” a ti. 14Cucaah an lan i an kal ko; cun Benjamin ta a simi Gibeah pawng an phak tikah ni nih a tlak phuat hna. 15Cun Gibeah i luh awk le riah awkah khika in an pial. Cun a lut i khua lai ah a ṭhu, zeitintiah zan riah awkah ahohmanh nih an inn chungah an tlunter hna lo.
16Cun zohhmanh, zanlei sang ah tarpa pakhat cu lo i a rian ṭuannak in a ra tlung; cu pa cu Efraim tlangram mi a si i Gibeah ah a pem; cu ka hmunmi hna cu Benjamin mi an si. 17Cun khua a hei zoh i khualai ah cun khualpa kha a hei hmuh. Cun tarpa nih cun, “Khuazei ah dah na kal lai? Khuazei in dah na rat?” a ti. 18Cun anih nih, “Judah ram Bethlehem khua in ka ratnak Efraim tlangram i hmun ken ah cun kan kal lai. Judah ram Bethlehem khua ah cun ka kal i atu cu ka inn ah ka kir lio; ahohmanh nih an ka tlunter lo. 19Kan laa hna caah ram le rawl kan ngei ko i, keimah le na salnu le na sal hna he a ummi tlangval caah hin rawl le mitsur hang kan ngei ko; zeihmanh kan bau lo,” tiah a ti. 20Cun tarpa nih cun, “Nan cungah daihnak si ko seh; nan herhmi vialte cu keimah nih kan ruahpiak hna lai; khua lai bel ah cun riak hrimhrim hlah u,” tiah a ti. 21Cucaah a inn chungah a luhpi i laa cu rawl a pek hna. Cun an ke kha an i ṭawl i an ei i an ding.
22Cun annih nih thanuam in an um lioah khan, zohhmanh, cu khua chung i zei ruaram lomi hna nih cun inn kha an kulh i innka kha an cumh len. Cu inn ngeitu tarpa kha, “Na inn ah a lutmipa kha kan theihhngalh nakhnga hun chuahpi tuah,” tiah an ti. #Gen 19.5-8 23Cun mipa inn ngeitupa kha, an sinah a va chuak i annih cu, “Asilo, ka nau le hna, ṭhalo tuk hringhran in um hlah u; hi mipa nih ka inn chungah a luh cang caah hi thil ṭhalo cu tuah hlah u. 24Zohhmanh u, hika ah ka fanu ngaknu le a nuchun an um; ka hun chuahpi hna lai. Sual hna u law, nanmah nih a ṭha nan timi kha an cungah va tuah ko u, sihmanhsehlaw hi mipa cungah cun hi tlukin a ṭha lomi thil cu tuah hlah u,” tiah a ti hna. 25Sihmanhsehlaw mi hna nih cun amah cu an ngai duh lo. Cucaah mipa nih a nuchun kha a tlaih i an sinah a hei chuah; cun annih nih amah kha an theihhngalh i zan khuadei in zinglei tiang an hrem. Cun khua fing a hung cah tikah an kalter. 26Cun khua a dei tikah minu cu a ra i a bawipa a tlunnak inn, mipa inn ah khan, innka ah a tlu i khua a ceu hlantiang a ril ko.
27Cun a bawipa cu zinglei ah a tho i innka kha a hun hna i kal awkah a chuah tikah, zohhmanh, a nuchun cu innka ah khan innkaba i tlaih in a ril ko. 28Anih nih, “Tho law, kal u sih,” tiah amah cu a ti. Sihmanhsehlaw zeihmanh a let lo. Cun a laa cungah a chuan i mipa cu a tho i a inn leiah a kal. 29Cun a inn a phanh tikah nam aa lak i a nuchun cu a can, a kut a ke in, hmun hleihnih ah a ṭhen i Israel ram vialte ah a kuat dih. #1Sam 11.7 30Cun a hmumi vialte nih, “Mah bantuk thil hi dah ngai Israel mi nih Izipt ram in an chuah ni in nihin tiangah a um bal lo, a hmuh zong kan hmu bal lo; ruat u law, i ceih ṭi u law, chim tuah u,” an ti.
Currently Selected:
BIACEIHTU 19: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006