BIACEIHTU 17
17
Mikah Siasal Hna le A Tlangbawi Kong
1Efraim tlangram mi pakhat a min Mikah a simi a rak um. 2Cun amah nih a nu sinah, “Ngun phar thong khat le za khat an in lakpiak i cu kong i chiat na ser i ka hna theih ah na chimmi kha, zohhmanh, ngun kha ka sinah a um ko; keimah nih ka lak,” tiah a ti. Cun a nu nih, “Ka fapa cu Bawipa nih thluachuah pe ko seh,” tiah a ti. 3Ngun tangka cu a nu kha a pek ṭhan i a nu nih, “Ka fapa cungah chiatsernak kha a tlun nakhnga lo, Bawipa sinah ngun tangka cu ka pekchanh hna. Thing milem ngun hutmi sernak caah hman a si lai. Cucaah atu ah ngun tangka cu na sinah kan pek ṭhan,” tiah a ti. 4Cun ngun tangka cu a nu kha a pek ṭhan hna. Ngun tangka hna chungin za hnih kha a lak i ngun soser kha a pek i soser nih cun milem ah a ser; milem cu thing in a ser i ngun in a tuam i Mikah innchung ah cun an chiah. 5Cun Mikah nih cun hmunthiang pakhat a ngei i tlangbawi angki le milem tete a ser hna i, a fapa pakhat cu a thianter i a tlangbawi ah a cang. 6Khi caan lioah cun Israel mi lakah siangpahrang an um lo; ahopaoh nih anmah le an duhmi cio kha an tuah ko. #Biac 21.25
7Cun Judah ram chung Bethlehem khuami a simi, Judah chung a simi tlangval pakhat, Levi mi a simi a um i, cu pa cu khika ah khan a va pem. 8Mipa cu Judah ram Bethlehem khua cun a chuak i hmun a hmuh khawhnak paoh ah um dingin a kal; cun a kalnak ah cun Efraim tlangram i a ummi Mikah inn cu a phan. 9Cun Mikah nih a chawnh i, “Khuazei in dah na rat?” tiah a ti. Cun anih nih, “Keimah cu Judah ram Bethlehem i a ummi Levi mi ka si i hmun ka hmuhnak paoh i pem dingin ka kal,” tiah a ti. 10Cun Mikah nih amah cu a thawh i, “Ka sinah um law, ka caah pa le tlangbawi ah cang law, kum khat ah ngun phar hra lengmang kan pek lai, cun hnipuan hruk khat le na nuncannak zong,” tiah a ti. 11Cun Levi mi cu mipa he um awkah cun a lung a si; cun tlangval cu a fapa hna lak i pakhat bantuk ah a cang. 12Cun Mikah nih Levi mipa cu a thianter i tlangval cu a tlangbawi ah cun a cang i Mikah inn ah cun a um. 13Cun Mikah nih, “Atu cu Levi mi kha tlangbawi ah ka ngeih cang caah, Bawipa nih khuaawng a ka pemhter lai ti kha ka hngalh,” tiah a ti.
Currently Selected:
BIACEIHTU 17: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006