BIACEIHTU 16
16
Gaza Khua Ah Samson
1Samson cu Gaza ah a va kal i khika ah hlawhhlangnu pakhat a hmuh i a va ihpi. 2Gaza mi hna cu, “Samson hika ah a ra,” tiah an chimh hna i annih nih a hmun kha an kulh i khua hauka khan zan khuadei an bawh. Zan khuadei dai tein an um i, “Zinglei khua a dei tiang hngak u sih; cun khi tikah kan thah lai,” an ti. 3Sihmanhsehlaw Samson cu zanṭim tiang a it i zanṭim ah cun a tho i khua kutka innkhar hna le a tung pahnih hna kha a tlaih hna i a hrenhnak hna he cun an dihlak in a phawi hna i a liang ah aa khinh hna i Hebron hmai i a ummi tlangpar ah cun a kalpi hna.
Samson le Delilah Kong
4Mah hi hnuah hin Sorek nelrawn i a ummi nu pakhat, a min Delilah a simi kha a duh. 5Cun Filistin bawi hna kha a sinah an ra i, “Lem law, a thazang ṭhapi hi khuazei ah dah a um i zei lam in dah kan tei khawh i kan ṭem khawh i kan hrilh khawh lai, hngalh i zuam tuah; cun kannih nih ngun phar thong khat le za khat cio kan in pek lai,” tiah an ti. 6Cun Delilah nih Samson cu, “Zaangfahnak tein khuazei ah dah na thazang nganpi hi a um i tei khawh na si nakhnga zeitindah ṭem na si hnga, ka chim tuah,” tiah a ti. 7Cun Samson nih anih cu, “Liza a thar pasarih, a ro rih lomi in ka ṭem hna seh law ka der lai i midang bantuk cio ka si ko lai,” tiah a ti. 8Cun Filistin bawi hna nih cun a ro rih lomi liza a thar pasarih cu an rak put i cu cun a ṭem. 9Innchung chungchin in a bawhtumi a umter hna. Cun anih nih, “Samson, Filistin mi nih an in luhhnawh hih!” tiah a ti. Sihmanhsehlaw liza hna cu, khumhri phuai mei nih a tongh i a cah bak bantuk khin a chah bak ko hna. Cucaah a thazang biathli cu hngalh a si lo.
10Cun Delilah nih Samson sinah cun, “Zohhmanh, na ka hlen i lih na ka chimh; zeitindah ṭem khawh na si lai cu ka chim ko sawh,” tiah a ti. 11Cun anih nih a sinah, “Hman bal lomi hri a tharmi in an ka ṭem ahcun, ka der lai i midang bantuk ka si ve ko lai,” tiah a ti. 12Cucaah Delilah nih hri thar cu a lak hna i amah cu cu hri cun a ṭem i, “Samson, Filistin mi nih an in tlaih cang lai hih!” tiah a ti. Cun a bawhtu hna cu innchung chungchin ah an um. Sihmanhsehlaw a kut ṭemnak hri cu lazai bantuk men in a chah hna.
13Cun Delilah nih Samson cu, “Atu tiangin na ka hlen lengmang ko i lih na ka chimh; zeitindah ṭem khawh na si hnga, ka chim ko,” tiah a ti. Cun anih nih, “Ka lu cung samphiar phiar sarih hi thiam ah na tah chih i tahtlem in fek tein na khawn chih ahcun ka der lai i midang bantuk ka si ve ko lai,” tiah a ti. 14Cucaah a ih kar ah, Delilah nih cun a lu cung samphiar phiar sarih cu a lak hna i thiam ah a tah chih. Cun tahtlem in fek tein a khawn chih i, “Samson, Filistin mi nih an in tlaih cang lai hih!” tiah amah cu a ti. Sihmanhsehlaw aa hngilhnak in a hun i hlau i tahtlem he, a tlang he, a thiam he a phawi dih hna.
15Cun anih nih a sinah, “Na lung ka sinah um ṭung loin, zeitindah, ‘Kan dawt,’ tiah na ti khawh? Atu voi thum tiang na ka hlen cang i na thazang nganpi a umnak cu na ka chim lo,” tiah a ti. 16Cun ni khat hnu ni khat a bia in a rial lengmang i a lem lengmang tikah, a lungthin cu thih tiangin a ing a puang. 17Cun a ruahnak vialte kha a chimh i a sinah, “Lu-ei nam zeihmanh nih ka lu a tawng bal lo; zeicahtiah kei cu ka nu paw chungin Pathian ca i Nazir mi ka si. Ka lu hi meh ahcun ka thazang nih hin a ka kaltak lai i ka der lai i midang bantuk cio ka si ve ko lai,” tiah a ti.
18Delilah nih a ruahnak vialte kha a ka chimh dih cang tiah a hngalh tikah, Filistin bawi hna kha bia a cah hna i a auh hna i, “Atu voi khat te cu hung rih tuah u, zeitintiah a ruahnak vialte a ka chimh dih cang,” tiah a ti. Cun Filistin bawi hna cu a sinah an hung i an kut in phaisa kha an i put. 19A phei chungah a ihter i mipa pakhat a auh i a lu cung i a sam phiar sarih cu a mehter. Cun hrem hram kha a thawk i a thazang nih khan a kaltak cang. 20Cun amah nih cun, “Samson, Filistin mi nih an in tlaih cang lai hih!” tiah a ti. Cun aa hngilhnak cun a hun i hlau i, “Voi dang bantuk khan ka chuak lai i keimah le keimah kaa luatter lai,” tiah a ti. Cun anih nih, Bawipa nih a kaltak cang kha a hngal lo. 21Cun Filistin mi nih an tlaih i a mit an khoih i Gaza ah an vun kalpi i dar hreng an khenh; cun thonginn chungah rawl rialnak lung in rawl kha an rialter. 22Sihmanhsehlaw a lu i a sam cu meh hnuah khan ṭhan ṭhan hram a thawk ve.
Samson Thihnak
23Cun Filistin bawi hna cu an pathian Dagon sin i raithawinak nganpi pek awk le nuamhnak tuah awkah an i pum; zeitintiah annih nih, “Kan pathian nih kan ral Samson cu kan kut chungah a kan pek cang,” tiah an ti. 24Cun mi nih an hmuh tikah khan an pathian kha an thangṭhat i, “Kan pathian nih kan ral, kan ram a hrawkhraltu le tampi a kan thattu cu kan kut chungah a kan pek cang,” tiah an ti. 25Cun an lung kha aa lawmh tikah annih nih, “Samson kha va ko tuah u, nunnuam kan tuahpiak seh,” tiah an ti. Cucaah Samson cu thong chung khan an auh i an hmaiah nunnuam cu a tuahpiak hna. Tung karlak ah khan an dirter i 26Samson nih cun a kut in a tlaitu tlangval sinah cun, “Hi inn a sut tung hna cu ka tawnghter tuah hna, kaa hngauh tuah hna lai,” tiah a ti. 27Inn cu pa he nu he an khat; Filistin bawi vialte hna cu khika ah an um, cun inncung ah cun Samson nih nunnuam a tuah lioah a zohtu nu le pa thong thum tluk an um.
28Cun Samson nih Bawipa kha a auh i, “Maw Bawipa Pathian, ka hngal ṭhan ko tiah kan nawl, ka ṭhawnter ṭhan ko tiah kan nawl, hi voi khatte hi cu, maw Pathian, Filistin mi hna cungah hin ka mit pahnih lak i pakhat caah hin phu ka hlam nakhnga, ka ṭhawnter ko,” tiah a ti. 29Cun cu inn a dohtu bik a laifang tung pahnih hna cu, Samson nih fek tein a tlaih hna i, a orhlei kut in pakhat a kehlei kut in pakhat a tlaih hna i, a koih hna. 30Cun Samson nih, “Filistin mi hna sinah hin thi ning luao,” tiah a ti. Cun a thazang dih umnak in a kun i, inn nih cun a chung i a ummi bawi hna le mi vialte hna cu a cimhhnawh hna. Cucaah a thih chihmi mithi hna cu, a nun chung i a thahmi hna nakin an tam deuh. 31Cun a unau hna le a innchungkhar vialte an rung i an lak i an hun kalpi i Zorah le Eshtaol karlak i a ummi a pa Manoah thlan ah khan an vui. Israel mi kha kum kul bia a ceih hna.
Currently Selected:
BIACEIHTU 16: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006