EXODUS 18

Jethro Nih Moses A Tlawng

1Midian ram tlangbawi Jethro, Moses pu nih khan, Moses le Israel mi hna caah Pathian nih a tuahmi vialte le Bawipa nih Izipt ram in a chuahpi hna ning kha a rak theih. 2Cucaah Moses nih a rak tluntermi a nupi Zipporah kha Jethro nih cun a ratpi. #Exo 2.21-22 3Jethro nih Zipporah fapa pahnih Gershom le Eliezer zong kha aa ratpi ve hna. (Moses nih khan, “Ram dang ah khual ka si,” a rak ti i cucaah a fapa pakhat kha Gershom a sak. #Lam 7.29 4Cun, “Ka pa i a Pathian cu a ka bawmtu a si i Faro vainam chungin a ka khamh,” a ti fawn i cucaah a min ah a fapa a dang pakhat cu Eliezer a sak.) 5Jethro cu Moses nupi le fapa hna he khan Moseste an riahnak thetse ram chung Bawipa tlang ah khan a ra. 6Moses kha bia a hei cah i, “Na pu keimah le na nupi le na fapa a pahnih cu na sinah kan ra lio,” a ti. 7Amah ton awkah khan Moses cu a kal i a hmaiah a kun i a hnamh. Pakhat le pakhat cu an dam dam lo kong kha an i hal i thlam chungah khan an lut. 8Israel mi hna ruangah Izipt mi hna le Faro cungah Bawipa nih a tuahmi vialte kha a chimh dih. Lampi ah harnak an tonmi le Bawipa nih a khamh hnanak zong kha a chimh. 9Jethro nih an cung i Bawipa a ṭhatnak vialte le Izipt mi hna sinin a khamh hnanak kong a theih tikah a lung aa lawm ngaingai. 10Aa thawh i, “Izipt mi hna kut chung le Faro kut chungin an khamhtu hna Bawipa cu thangṭhat ko u. Izipt mi kut tang sal cannak i a mi a khamhtu hna Bawipa cu thangṭhat ko u. 11Atu cu Bawipa hi pathian vialte hna lakah a ngan bik a si tiah ka hngalh; Izipt mi hna nih Israel mi cungah huatnak in rian an ṭuan tikah hi bantukin a tuah caah khan, a ngan bik a si cu ka hngalh,” a ti. 12Cun Jethro nih cun Pathian caah raithawi awk a hun i phorhmi le khanghthawinak a hun i phorhmi cu an thawi hna i Aaron le Israel mi hruaitu pawl vialte cu Moses pu sinah cun an ra i Pathian hmaika ah rawl kha an ei ṭi hna.

Biaceihtu An Thim Hna

(Deu 1.9-18)

13A thaizing ah cun Moses cu mi zapi biaceih awkah khan a ṭhu i zinglei in zanlei tiang a hmaika ah cun mi kha an um. 14Moses pu Jethro nih khan a tuahmi vialte cu a hmuh tikah, “Mi zapi ca i na tuah lengmangmi hi zeidah a si? Mi nih zinglei in zanlei tiang an in dirhnawh tikah, zeicahdah hika ah hin nangmah lawngin na ṭhut?” tiah a ti. 15Moses nih cun, “Pathian duhnak kha zeidah a si kan kawlpiak an ka ti caah hitihin ka tuah ko. 16Mi pahnih an i sik tikah ka sinah an ra i ahodah a palh, ahodah a palh lo ti kha bia ka thlehpiak hna i Pathian nawl le upadi kha ka chimh hna,” tiah a leh. 17Cu tikah Jethro nih cun a leh i, “Na tuahmi hi ahmaan lo. 18Nangmah zong na ba tuk lai, na sin i a ummi zong an ba tuk lai. Hi rian hi na caah a tam tuk, nangmah lawngin na tuah kho lai lo. 19Cucaah ruahnak in cheu tuahning, ka bia cu ngai tuah, Pathian nih in umpi ko seh. Nang na rian cu mi zapi Pathian sin i chuahpi i an i siknak bia a sin i lanh kha a si lai. 20Cun nawlbia le phunglam kha na cawnpiak hna lai i zeitindah an nun awk a si ti le zeidah an tuah awk a si ti kha na hngalhter hna lai. 21Sihmanhsehlaw thil ti khomi kha na thim hna lai i mi zapi hruaitu ah na chiah hna lai: a thong bu hruaitu le a za bu hruaitu le sawm nga bu hruaitu le pahra bu hruaitu tiin na chiah hna lai. Annih cu Pathian a ṭihmi, bochan awk tlak a simi an si lai, nawhthuh pek khawh lomi an si lai. 22Annih nih biaceihtu an si tikah zungzal ca in an si lai. Bia har deuhdeuh kha na sinah an chuahpi lai, asinain a hme deuh pawl kha cu anmah nih an ceih lai. Cu nih cun na caah rian kha a fawiter deuh lai i na thilrit kha an in chan lai. 23Hi bantukin na tuah ahcun, Bawipa nih nawl an pekning hin na tuah ahcun, na ba tuk lai lo i mi zong kha an bia limpiak in inn ah an ṭin kho lai,” a ti.

24Moses nih Jethro bia cu a ngaih i a chim bantuk khan a tuah. 25Israel mi dihlak chung khan thil ti kho deuhdeuh pawl kha a thim hna i hruaitu ah khan a chiah hna: a thong pawl hruaitu, a za pawl hruaitu, sawm nga pawl hruaitu, pahra pawl hruaitu, tiin a chiah hna. 26Mi zapi ca biaceihtu rian kha zungzal ca in an ṭuan. Bia har deuhdeuh kha Moses sinah an chuahpi, sihmanhsehlaw a fawi deuh pawl kha cu anmah nih an ceih.

27Cun Moses nih a pu cu a kalter i amah ram leiah khan a tlung.

Currently Selected:

EXODUS 18: HCL06

Highlight

Copy