EXODUS 19

Israel Mi Sinai Tlang Ah

1Israel mi nih Izipt ram in an chuah a thla thumnak thla, a ni khat ni ah Sinai thetse ram ramcar kha an phan. 2Refidim khan an chuak i Sinai ramcar kha an phan i Sinai tlang hmaiah khan an riak. 3Moses cu tlang cungah khan Pathian ton awkah a hung kal.

Tlang cung cun Bawipa nih khan a vun auh i, 4“Israel mi cu, ‘Izipt mi cungah ka tuahmi thil kha nan hngalh; cun mupi nih a fa kha a thla in a cawi bantukin kan cawi hna i ka sin kan phakpi hna kha nan hngalh fawn. 5Cucaah ka nawlbia kha nan ngaih i ka biakamnak kha nan zulh ahcun, ka mi hrimhrim nan si lai. Vawlei hi a dihlak in ka ta a si, asinain, ka thimmi miphun cu nanmah hi nan si lai. #Deu 4.20; 7.6; 14.2; 26.18; Tit 2.14 #1Pet 2.9 6Nannih cu tlangbawi bantukin ka rian a ṭuanmi miphun nan si lai i keimah sin i pekchanhmi nan si lai,’ a ti, tiah chim hna. Cucu Israel mi cu na chimh hrimhrim hna lai,” a ti. #Biat 1.6; 5.10 7Cucaah Moses cu a kal i Israel mi hruaitu pawl kha a pumh hna i Bawipa nih a fialmi vialte kha a chimh hna. 8Cun mi zapi nih khan an dihlak in, “Bawipa nih a chimmi paoh cu kan tuah dih lai,” an ti. Mi zapi nih an lehnak kha Moses nih khan Bawipa cu a chimh ṭhan.

9 Bawipa nih Moses cu, “Mi zapi nih nangmah he bia kan i ruah kha an theih i nangmah kha an in zumh zungzal nakhnga, na sinah a chahmi khuadawm in ka ra lai,” a ti. Mi zapi nih an lehnak kha Moses nih Bawipa cu a chimh.

10 Bawipa nih Moses cu, “Mi zapi sinah khin va kal law nihin le thaizing biaknak ding caah va timhlamhter hna. An thil kha su hna seh law 11kiptuh caah i ralring cia hna seh. Cu ni ah cun, Bawipa cu Sinai Tlang cungah ka rung ṭum lai i cuka ah cun mi zapi nih khan an dihlak in an ka hmuh khawh lai. 12Mizapi caah khan tlang velchum ah cun ramri na ser lai i, ‘Tlang cungah maw kai lai u ci, a hram zong maw tawng lai u ci. Nan tawngh sual ahcun a tawngmi cu thah nan si lai; #Heb 12.18-20 13Ahohmanh nih tawngh loin thi lakin lung in cheh nan si lai, asilole thal in kah nan si lai. Mi zong saṭil zong hi ti hin tuah nan si lai; thah nan si hrimhrim ko lai,’ na ti hna lai. Tuuki muko kha tum a si tik lawnglawng ah mi zapi cu tlang cungah an kai kho lai,” a ti.

14Moses cu tlang cung khan a rung ṭum i mi zapi cu Pathian biaknak caah khan a timhlamhter hna. An thil kha an suk i 15Moses nih cun a thawh hna i, “Kiptuh ah cun timh cia tein um u. Ahohmanh nu le pa si hlah u,” a ti hna.

16Ni thumnak ni zingka ah cun tlang cungah cun khuari le ṭektla a um i khuadawm chahpi kha a um; tuukawng ki muko kha fak piin an tum. Riahhmun i a ummi vialte kha an thin a phang i an ther dih. #Biat 4.5#Deu 4.11-12 17Moses nih khan mi zapi cu Pathian ton awkah khan a kalpi hna i tlang hramah cun an dir. 18Bawipa cu Sinai Tlang cungah khan mei in a rung ṭum caah Sinai Tlang cu a dihlak in meikhu nih a zelh. Meikhu cu meiphu meikhu bantuk khin a kai hluahmah i mi zapi cu an dihlak in a ther in an ther. 19Tuukawng ki muko thawng cu a thang chin lengmang. Moses nih cun bia a chim i Pathian nih khuari in a run leh. 20Bawipa cu Sinai Tlang par ah cun a rung ṭum. Moses cu tlangpar ah cun hung tuah tiah a run kawh i Moses cu a hung kai. 21Bawipa nih Moses cu a thawh i, “Keimah zoh awkah ahohmanh nih ramri kha an lonh sual nakhnga lo ralrinnak vung pe hna, tampi an thi sual lai. 22Tlangbawi hmanh keimah pawngah a rami cu an i thianh lai, cu ti a si lo ahcun dan ka tat sual hna lai,” a ti. 23Moses nih Bawipa cu, “ ‘Tlang ah khan ramri ser u law cuticun tlang cu tlang zarh ah cang seh,’ tiin ralrinnak na kan pek caah, mi zapi cu an ra kho lai lo,” tiah a ti. 24Bawipa nih Moses cu, “Vung kal law Aaron kha hun i kaipi. Asinain tlangbawi hna le mi zapi hna nih khan ka sin rat awkah ramri kha an lonh hrimhrim lai lo, dan ka tat sual hna lai,” a ti. 25Moses cu a vung kal i mi zapi kha a vung chimh hna.

Currently Selected:

EXODUS 19: HCL06

Highlight

Copy