EXODUS 20

Nawlbia Pahra

(Deu 5.1-21)

1Pathian nih hi bia vialte hi a chim hna. 2Aa thawh i, “Sal i nan cannak inn chung, Izipt ram chungin an chuahtu hna cu Bawipa nan Pathian hi ka si.

3“Keimah hlei in pathian dang zeihmanh nan bia lai lo.

4“Vancung i a ummi thil si hna seh, vawlei i a ummi thil si hna seh, ti chung i a ummi thil si hna seh, vawlei tang i a ummi thil si hna seh, cu hna mui he aa lo in siasal zeihmanh nan i ser lai lo. #Exo 34.17; Lev 19.4; 26.1; Deu 4.15-18; 27.15 5Zei bantuk siasal hmanh an si ah an hmaiah nan kun lai lo i nan bia hna lai lo, zeicahtiah keimah hi Bawipa nan Pathian cu ka si i nahchuah a ngeimi Pathian ka si. A ka huatu cungah cun chan thum chan li tiangin an tefa hna cungah khan dantatnak ka tlunter. #Exo 34.6-7; Nam 14.18; Deu 7.9-10 6Asinain a ka daw i ka nawlbia a zulmi hna cungah cun chan thong khat tiangin a fekmi ka dawtnak kha ka langhter.

7“Bawipa nan Pathian min cu ningcang loin hmang hlah u, ningcang loin ka min a hmangmi cu dan ka tat hna lai. #Lev 19.12

8“Sabbath ni kha philh hlah u, Bawipa caah va hmang u. #Exo 16.23-30; 31.12-14 9Nan rian vialte kha ni ruk chung nan ṭuan lai, #Exo 23.12; 31.15; 34.21; 35.2; Lev 23.3 10sihmanhsehlaw ni sarih ni cu dinh ni a si i Pathian caah nan hman lai. Cu ni ah cun ahohmanh rian nan ṭuan lai lo, nanmah siseh, nan fale si hna seh, nan sal si hna seh, nan saṭil si hna seh, nan khua chung i a ummi miphun dang si hna seh, ahohmanh rian nan ṭuan lai lo. 11Ni ruk chungah Bawipa nih van le vawlei le rili le an chung i a ummi thil vialte kha a ser hna i ni sarih ni ah cun aa din. Cucaah cun Bawipa nih dinh ni cu thluachuah a pek i amah ca rian ṭuannak caah a duh. #Gen 2.1-3; Exo 31.17

12“Nan nu le nan pa kha upat hna u, cu ti nan tuah ahcun, Bawipa nan Pathian nih an pekmi hna ram ah hin saupi nan um lai. #Deu 27.16; Mat 15.4; 19.19; Mar 7.10; 10.19; Luk 18.20; Efe 6.2,3

13“Lai nan nawng lai lo. #Gen 9.6; Lev 24.17; Mat 5.21; 19.18; Mar 10.19; Luk 18.20; Rom 13.9; Jei 2.11

14“Va cung pa duh siseh, nupi cung nu duh siseh, nan tuah lai lo. #Lev 20.10; Mat 5.27; 19.18; Mar 10.19; Luk 18.20; Rom 13.9; Jei 2.11

15“Nan fir lai lo. #Lev 19.11; Mat 19.18; Mar 10.19; Luk 18.20; Rom 13.9

16“Nan minung hawi cungah tehte dinglo nan si lai lo. #Exo 23.1; Mat 19.18; Mar 10.19; Luk 18.20

17“Nan innpa inn kha nan mit a thi lai lo. A nupi siseh, a salpa siseh, a salnu siseh, a cawtum siseh, a laa siseh, a ngeihmi thil paohpaoh si hna seh, nan mit a thi lai lo,” a ti. #Rom 7.7; 13.9

Mi Zapi An Thin A Phang

(Deu 5.22-33)

18Mi zapi nih khan khuari thawng le tuukawng ki muko aw thawng kha an theih i nimtlau le tlang cung meikhu kha an hmuh hna tikah, a ther in an ther i lamhlat piin an dir. #Heb 12.18-19 19Moses kha an thawh i, “Nangmah nih bia cu kan chim ko, na chimmi cu kan ngaih ko lai, sihmanhsehlaw Pathian nih a kan chimh ahcun kan thi lai,” an ti. 20Moses nih mi zapi cu, “Nan thinphang hlah u; Pathian a rat cu nanmah hneksak awk le sualnak nan tuah nakhnga lo amah nan a ṭih zungzal nakhnga ca lawngah a si,” a ti. 21Sihmanhsehlaw mi zapi cu lamhlatpi ṭhiamṭhiam khan an dir i Moses lawng cu Pathian umnak minmei a nah in a nakmi pawngah khan a va kal.

Biakṭheng Kong

22 Bawipa nih Moses cu a thawh i, “Israel mi cu, ‘Nan sinah vancung in bia ka chim kha nan hmuh cang. 23Keimah he biak ṭi awkah, sui in siseh, ngun in siseh pathian nan i ser hna lai lo. 24Vawlei in biakṭheng pakhat ka caah nan ser lai i cu cungah cun khangh thawinak le hawikomhnak thawinak ca i nan hmanmi nan caw le nan tuu hna kha nan khangh hna lai. Cuka hmun ah nan ka biak lai tiah kan timi hna hmun paoh ah khan nan sinah ka ra lai i thluachuahnak kan pek hna lai. 25Ka caah biakṭheng cu lung in nan ser a si ahcun, nanmah nih nan remhmi lung in nan ser lai lo, zeicahtiah a remhnak i nan thirkhenh nan hman caah khan, ka ca i hman awkah aa tlak ti lo. #Deu 27.5-7; Jos 8.31 26Ka biakṭheng ah hleihlak in nan kai lai lo, cu ti nan kai ahcun ka biakṭheng ah cun nan chiaṭha kha nan langhter sual lai,’ a ti, tiah chim hna,” a ti.

Currently Selected:

EXODUS 20: HCL06

Highlight

Copy