EXODUS 17

Lungpi Chungin Ti A Chuak

1Israel mibu cu an dihlak in Sin ramcar khan an i thawh i Bawipa nih nawl a pek hna bangin riahhmun pakhat hnu pakhat an i thawn. Refidim ah khan an riak, asinain din awk ti a um lo. 2Moses cu an sik i, “Din awk ti kan pe,” an ti. Moses nih annih cu a leh hna i, “Zeicahdah keimah cu nan ka sik? Zeicahdah Bawipa cu hneksak nan del?” a ti hna. 3Sihmanhsehlaw mi cu an ti a hal tuk i Moses cu an zaihnawh i, “Zeicahdah Izipt ram khan na kan chuahpi? Kanmah he kan fale he kan saṭil he ti haal in thah awkah maw na kan chuahpi?” an ti. 4Moses nih Bawipa sinah khan thla fakpi in a cam i, “Hi mi hna hi zeitindah ka tuah hna lai? Atu hi lung in a cheh zong an ka cheh sual ko lai,” a ti. 5Bawipa nih Moses cu a thawh i, “Israel mi hruaitu pawl kha tlawmpal in i sawm hna law zapi hmaiah va kal u. Tiva na tuknak na ṭhiangṭhunh kha i lak law va kal. 6Horeb tlang lungpi cungah khan na hmaiah ka rak dir lai. Lungpi cu na tuk lai i mi zapi din awkah ti a chuak lai,” a ti. Moses nih Israel mi hruaitu pawl hmaiah cun cu bantuk cun a tuah. 7Cuka hmun cu “Hneksaknak” ti le “Siknak” tiin a min ah kawh a si; zeicahtiah Israel mi cu Bawipa he khan an i si i, “Bawipa hi kanmah leiah a ṭang maw ṭang lo dah?” ti in an hneksak ruangah khan cuticun min an sak cu a si.

Amalek Mi He An I Do

8Amalek mi kha an ra i Israel mi cu Refidim ah khan an ra tuk hna. 9Moses nih Joshua kha a thawh i, “Mi tlawmpal in i hril hna law thaizing ah Amalek mi kha va do hna u. Kei tu cu tlangpar ah khan ka dir lai i Pathian nih a ka pekmi ṭhiangṭhunh kha ka hler lai,” a ti. 10Moses nih a fial bang khan Joshua cu Amalek mi hna doh awkah khan a kal i Moses, Aaron le Hur cu tlangpar ah khan an kai. 11Moses nih a ban a hler hna chung paoh cu Israel mi nih khan an tei lengmang hna, sihmanhsehlaw a ṭhumh hna paoh ah cun Amalek mi nih khan an nawr ve tawn hna. 12Moses cu a ban tha kha a dit tikah Aaron le Hur nih khan lung pakhat an lak i a cungah cun an ṭhutter i annih nih khattelei veve in an dirkamh i a ban kha an doh hna. Ni a tlak tiang a ban cu an doh hna i 13Joshua nih cun Amalek mi cu a tei dih cikcek hna.

14Cun Bawipa nih Moses kha a thawh i, “Hi kong hi philh a si nakhnga lo cauk chungah ṭial tuah, cun Amalek mi kha a philh in philh an si lai, tiah Joshua kha chim,” tiah a ti. #Deu 25.17-19; 1Sam 15.2-9 15Moses nih biakṭheng pakhat a ser i a min ah, “Bawipa cu ka hmelchunhnak puanzar a si,” a ti. 16Moses nih cun aa thawh i, “Bawipa hmelchunhnak puanzar cu i tlaih u! Bawipa nih Amalek mi cu a zungzal in a doh hna lai,” a ti.

Currently Selected:

EXODUS 17: HCL06

Highlight

Copy